Dag 5 van 365- Genesis 13-15 en Matteüs 5:1-26

₂Abram ben de wan guduman di ben abi furu meti, solfru nanga gowtu. ₃A hari kmoto fu a Negebsabana èn fu a wan presi a ben e hari go na a trawan te leki a ben doro na Betel, pe a ben meki en tenti wan leisi kba, mindri Betel nanga Ai. ₄Dan Abram anbegi MASRA tapu a presi pe a ben meki a altari wan leisi kba.

₅Lot, di ben go nanga Abram, ben abi skapu, kaw nanga tenti tu. ₆Dat' meki den no ben man tan libi makandra fu di nofo gron no ben de gi ala den meti. ₇Disi ben e meki taki den skapuman fu Abram nanga den di fu Lot ben e kisi trobi. A pisten dati den Kananitisma nanga den Perisitisma ben e libi ini a kondre tu. ₈Ne Abram taigi Lot taki: “Wi no mus meki trobi èn trobi no mus de tu mindri den skapuman fu wi. Bika mi nanga yu na famiri. ₉Kon meki wi prati. Luku, a heri kondre didon na yu fesi, yu kan teki pe yu wani. Efu yu e go na kruktusei, mi e go na let'sei. Efu yu e go na let'sei, mi e go na kruktusei.” ₁₀Dan Lot luku lontu. A si taki a heri kontren fu a Yordan ben abi furu watra. Fosi MASRA ben figi Sodom nanga Gomora puru na grontapu, a heri kontren dati te go miti Soar ben de leki a dyari fu MASRA, wan kontren nanga furu watra neleki Egipte. ₁₁So Lot teki a heri kontren fu a Yordan. Den prati èn Lot hari go na a oostsei. ₁₂Abram tan libi na ini Kanaan. Lot go tan na den foto ini a kontren fu a Yordan. A meki en kampu krosbei fu a foto Sodom. ₁₃Ma den sma fu Sodom ben takru srefsrefi èn den ben e libi wan sondu libi na ini a ai fu MASRA.

₁₄Baka di Abram nanga Lot prati, MASRA taigi Abram taki: “Luku lontu fu a presi pe yu tnapu. Luku go na a noordsei, a zuidsei, a oostsei nanga a westsei. ₁₅Bika Mi sa gi yu nanga den bakapikin fu yu a heri kondre disi di yu e si. A sa de fu unu fu têgo. ₁₆Den bakapikin di Mi o gi yu o furu leki santi. Neleki fa yu no man teri santi, na so den bakapikin fu yu no sa de fu teri tu. ₁₇Opo, dan yu waka alasei ini a heri kondre. Mi sa gi yu a kondre disi.” ₁₈Ne Abram gwe go meki en kampu na den bigi bon fu Mamre, krosbei fu Hebron, dan a bow wan altari drape gi MASRA.

₁A pisten dati kownu Amrafel fu Sinear, kownu Aryok fu Elasar, kownu Kedorlaomer fu Elam nanga kownu Tidal fu Goyim, ₂ben e feti nanga kownu Bera fu Sodom, kownu Birsa fu Gomora, kownu Sinab fu Adma, kownu Semeber fu Seboyim nanga a kownu fu Bela. Bela na wan tra nen gi Soar. ₃Den kownu disi ben meki wan ferbontu fu yepi makandra feti, dan den hari go na a Sidimdal di den e kari a Dede Se now. ₄Twarfu yari langa den ben de knekti fu Kedorlaomer. Ma ini a di fu tin-na-dri yari den no ben wani du moro san Kedorlaomer ben e taigi den fu du. ₅Dan ini a di fu tin-na-fo yari Kedorlaomer nanga den kownu di ben de na en sei kon feti nanga den Refaitisma dan den wini den na Asterot-Karnaim. Den wini den Susitisma na Ham nanga den Emitisma na Sawe-Kiryataim. ₆Den wini den Horitisma tu tapu a Seirbergi pe den ben e libi, te go miti El-Paran di ben de na a bigin fu a dreisabana. ₇Baka dati den drai go na En-Mispat, disi na wan tra nen gi Kades, dan den teki a heri kontren abra fu den Amalekitisma nanga di fu den Amoritisma di ben e libi na Haseson-Tamar. ₈Dan a kownu fu Sodom, a kownu fu Gomora, a kownu fu Adma, a kownu fu Seboyim nanga a kownu fu Bela, disi na wan tra nen gi Soar, hari go na a Sidimdal, dan den seti den legre klar'klari fu feti. ₉Den ben o feti nanga kownu Kedorlaomer fu Elam, kownu Tidal fu Goyim, kownu Amrafel fu Sinear nanga kownu Aryok fu Elasar. Fo kownu ben o feti nanga feifi trawan. ₁₀Now a ben de so taki a Sidimdal ben lai nanga tarapeti. Di a kownu fu Sodom nanga di fu Gomora ben e lowe, den fadon go na ini den tarapeti. Den trawan lowe go na den bergi. ₁₁Dan den fo kownu teki ala gudu nanga nyanyan fu Sodom nanga Gomora tyari gwe. ₁₂Den teki Lot, a manpikin fu Abram en brada tu. Den teki en nanga ala den meti fu en tyari gwe, fu di a ben e libi na Sodom.

₁₃Ma wan man di ben lowe kon ferteri Abram, a Hebrewman. A pisten dati Abram ben e tan na den bigi bon fu Mamre, a Amoritiman. Mamre nanga den brada fu en, Eskol nanga Aner, ben meki wan ferbontu nanga Abram fu yepi densrefi feti. ₁₄Di Abram yere taki den tyari en famiri gwe leki srafu, a teki den srafu fu en di ben gebore ini en oso, den wan di a ben man fertrow. Dri hondro nanga tin-na-aiti man. Dan den hari go te na Dan na baka den kownu. ₁₅Di neti fadon Abram prati den man fu en ini grupu dan den lontu den. Den wini den èn den lon den go te na Hoba, na a noordsei fu Damaskus. ₁₆Den teki ala den gudu baka. Den tyari Lot kon baka tu nanga ala en gudu, makandra nanga den frow nanga den tra sma di den kownu ben teki leki srafu.

₁₇Di Abram wini Kedorlaomer nanga den kownu di ben e feti nanga en, a drai go baka. Dan a kownu fu Sodom hari kon miti en ini a Sawedal, di den e kari a Kownudal tu. ₁₈Dan Melkisedek, a kownu fu Salem, tyari brede nanga win gi Abram. Melkisedek ben de wan priester fu a Moro Hei Gado. ₁₉Dan a blesi Abram. A taki:

Ne Abram prati ala sani na tin pisi, dan a gi Melkisedek wan pisi. ₂₁Dan a kownu fu Sodom taigi Abram taki: “Yu kan hori ala den gudu, ma gi mi den sma di yu teki leki srafu.” ₂₂Ne Abram taigi a kownu fu Sodom taki: “Mi e sweri na MASRA, a Moro Hei Gado, di meki heimel nanga grontapu: ₂₃Mi no sa teki noti san na fu yu. No wan fetre noso wan susubanti srefi. Bika yu no mus man taki tak' na yu meki Abram kon gudu. ₂₄Kwet'kweti. Mi no sa teki noti moro leki san den man fu mi nyan kba. Ma yu mus gi Aner, Eskol nanga Mamre di ben go nanga mi, san den mus kisi.”

₁Baka dati MASRA meki Abram si wan sani. A si fa MASRA e taigi en taki: “No frede Abram. Mi sa sorgu taki noti no miti yu èn Mi sa gi yu wan bigi paiman.” ₂Dan Abram taki: “Tye, Masra MASRA, sortu bun yu sa gi mi so dan? Mi o dede gwe sondro wan pikin èn a sma di o kisi ala den gudu fu mi o de Eliyeser fu Damaskus.” ₃Abram taigi MASRA moro fara taki: “Luku, Yu no gi mi no wan pikin, dan now wan knekti fu mi o kisi ala mi gudu.” ₄Ma MASRA taigi en taki: “A no en sa kisi ala den gudu fu yu, ma yu eigi manpikin sa kisi den.” ₅Ne MASRA tyari en go na dorosei. A taigi en taki: “Opo yu ede luku heimel, dan yu luku efu yu man teri den stari. Dan MASRA taigi en taki: Na so furu den bakapikin fu yu sa de tu.” ₆Abram bribi sa MASRA taigi en, èn MASRA si en leki wan sma di bun ini en ai.

₇Dan MASRA taigi en taki: “Mi na MASRA di tyari yu kmoto fu Ur fu den Kaldeasma, fu gi yu a kondre disi.” ₈Ma Abram aksi taki: “Masra, MASRA, fa mi o du sabi taki a sa de fu mi?” ₉Ne MASRA taigi en taki: “Tyari wan yongu kaw fu dri yari kon gi mi, sosrefi wan krabita fu dri yari, wan man skapu fu dri yari, wan stondoifi nanga wan yongu doifi kon.” ₁₀So Abram go teki den kon gi MASRA. A prati den meti langalanga na mindri dan a poti den pisi abra nanga abra. Den fowru a no prati. ₁₁Di den tingifowru kon fu saka sidon tapu den dede meti, Abram yagi den gwe.

₁₂Di son bigin saka Abram fadon ini wan dipi sribi. Ne wantronso wan bigi frede nanga wan dipi dungru kon na en tapu. ₁₃Dan MASRA taigi Abram taki: “Disi na san yu mus sabi bun. Den bakapikin fu yu o de leki doroseisma na ini wan kondre di no de den eigi kondre. Den o de leki srafu drape èn den sma o pina den fo hondro yari langa. ₁₄Ma Mi sa strafu a folku tu di teki den leki srafu. Baka dati den o gwe libi a kondre nanga furu gudu. ₁₅Ma yu o dede ini freide. Yu o doro wan moi libimarki fosi den tyari yu go na yu grebi. ₁₆Den afopikin fu yu sa drai kon dyaso baka. Bika dan fosi den Amoritisma sa du someni ogri taki Mi mus yagi den puru fu a kondre.”

₁₇Di son saka èn wan dipi dungru fadon, wantronso wan korpatu nanga wan frambo ben de fu si di ben e psa na mindri den pisi meti. ₁₈Tapu a fasi dati MASRA sroto wan ferbontu nanga Abram. A taigi en taki: “Mi sa gi den bakapikin fu yu a kondre disi, kmoto fu a liba fu Egipte go te na a bigi Eufratliba. ₁₉A kondre fu den Kenitisma, den Kenisitisma, den Kadmonitisma, ₂₀den Hetitisma, den Perisitisma, den Refaitisma ₂₁den Amonitisma, den Kananitisma, den Girgasitisma nanga den Yebusitisma.”

₁Di Yesus si ala den sma di ben e waka na En baka, A kren go sidon tapu wan bergi. Dan den sma di ben e teki leri fu En teki presi lontu En. ₂Dan Yesus bigin leri den taki:

₁₃“Yu de leki sowtu gi den sma na grontapu. Ma efu sowtu lasi en tesi, fa a o kon sowtu baka? Yu no man du noti moro nanga en, dan fu trowe en gwe meki sma waka na en tapu.

₁₄Yu de leki wan faya gi den sma na grontapu. Wan foto di de na tapu wan bergi no kan tan kibri. ₁₅Yu no e leti wan kokolampu, dan yu e poti en ondro wan embre. Ma yu e poti en tapu wan tafra fu a gi faya na ala sma ini a oso. ₁₆Na so a faya fu yu mus de fu si gi trawan, fu den kan si den bun wroko fu yu. Dan den o gi yu P'pa na heimel bigi nen.”

₁₇“Yu no mus prakseri taki Mi kon fu poti a wèt nanga den sani di den profeiti skrifi na wan sei. Mi no kon fu poti den na wan sei, ma Mi kon fu du san den e taki. ₁₈Bika fu tru Mi e taigi un taki: Solanga heimel nanga grontapu sa de, no wan pikin pisi fu san skrifi ini a wèt sa kmopo. Ala san skrifi sa psa. ₁₉Dat' meki a sma di e poti a moro pikin pisi srefi fu den wèt na wan sei, dan a e leri trawan fu du a srefi sani, a sma dati sa kisi a moro lagi presi na mindri den sma di Gado e tiri. Ma a sma di e du san den wèt e taki, èn a e leri trawan fu du a srefi sani, sa kisi wan hei presi na mindri den sma di Gado e tiri. ₂₀Bika Mi e taigi un taki: Efu yu no e libi moro bun ini Gado ai moro den sabiman fu Gado wèt nanga den Fariseiman, dan noiti yu o man tron wan sma di Gado e tiri.”

₂₁“Un yere taki a wèt fu Moses leri den bigisma fu unu taki: ‘Un no mus kiri wan tra sma,’ èn owktu taki: ‘Krutubakra sa leisi strafu gi a sma di du a sani dati.’ ₂₂Ma Mi e taigi un taki: Suma ati e bron nanga en brada sa fadon ini anu fu krutubakra. A sma di sa kari en brada ‘don kaw,’ o fadon ini anu fu a grankrutu, èn a sma di sa kari en brada ‘lawman,’ o feni ensrefi te ini a faya fu hel. ₂₃Dat' meki efu yu e tnapu fesi a altari fu tyari wan ofrandi gi Gado, ma yu memre taki yu brada abi wan sani nanga yu, ₂₄libi a ofrandi let' drape dan yu go meki en bun nanga yu brada. Baka dati yu kan drai kon baka fu tyari a ofrandi gi Gado. ₂₅Efu wan sma di abi wan sani nanga yu, e tyari yu go na krutu, dan yu mus meki muiti fu meki en es'esi bun nanga en fosi un doro drape. Bika te un doro drape a sa gi yu abra na a krutubakra. Dan a dati sa gi yu abra na skowtu, di sa poti yu na ini straf'oso. ₂₆Fu tru Mi e taigi yu taki: Yu no o kmoto drape solanga yu no pai te nanga a laste koprosensi.”