Dag 207 van 365- Psalm 40-42 en Handelingen 27:1-26

₂Fayafaya mi ben ferwakti MASRA,

dan A poti yesi arki

èn A yere fa mi e bari suku yepi.

₃Dan A hari mi puru na ini a grebi-olo,

A hari mi puru na ini a tokotoko,

na ini a morsu ini san mi ben de.

A poti mi tnapu na tapu wan bigi ston,

A meki mi tnapu tranga baka na tapu mi futu.

₄A leri mi wan nyun singi,

wan singi fu gi a Gado fu wi grani.

Furu sma sa si san MASRA du,

dan den sa lespeki En,

èn poti den fertrow na En tapu.

₅A sma di poti en fertrow tapu MASRA,

na wan blesi sma,

a sma di no e suku yepi na den sma nanga heimemre,

èn di no e moksi nanga sma di e dini kruktu gado.

₆MASRA, mi Gado, Yu du furu wondru,

Yu abi furu bun prakseri abra wi tu.

No wan sma de fu marki nanga Yu!

Efu mi wani taki fu den sani disi,

efu mi ben wani ferteri fu den,

den bo furu tumsi gi mi fu kari.

₇Den meti di wi e srakti leki ofrandi gi Yu,

nanga den graan-ofrandi fu wi,

no e gi Yu prisiri.

Den meti di wi e bron leki ofrandi

nanga den ofrandi fu kisi pardon fu sondu,

Yu no abi fanowdu tu,

ma Yu opo den yesi fu mi fu mi kan yere Yu.

₈Na dat' meki mi taki: “Luku, dyaso mi de,

leki fa a skrifi fu mi ini den buku.”

₉Mi e angri fu du a wani fu Yu mi Gado,

mi lobi a wèt fu Yu nanga mi heri ati.

₁₀Te a pipel fu Yu kon makandra

mi e taki fa Yu e du sani nanga leti.

mi no e hori mi mofo,

Yu sabi dati MASRA.

₁₁Mi no e kibri en taki Yu bun,

ma mi e taki fu a bow di sma kan bow na Yu tapu,

nanga a ferlusu di Yu e ferlusu.

Mi e taki fu a bigi lobi fu Yu pe a pipel de makandra,

nanga fa Yu de fu fertrow.

₁₂MASRA, no tapu fu sori mi a sari-ati fu Yu.

Tan sori mi a bigi lobi fu Yu

èn taki Yu de fu fertrow dorodoro.

₁₃Bika furu problema lontu mi,

den kruktudu fu mi e suku den pai,

èn mi no sabi moro san fu du.

Den kruktudu fu mi furu moro den wiwiri tapu mi ede,

mi lasi ati.

₁₄Tye, MASRA, ferlusu mi,

MASRA, kon esi kon yepi mi.

₁₅Meki den alamala di e suku fu kiri mi, kisi syen,

den no mus man opo den ede fu syen

meki den di angri fu bigi ogri miti mi hari go nanga baka,

meki den tron spot'popki.

₁₆Meki den fesi fadon,

den di e bari lafu fu mi ede.

₁₇Meki ala sma di e suku Yu

breiti èn abi prisiri,

meki den wan di e angri fu Yu ferlusu den

tak' dorodoro taki: “MASRA bigi.”

₁₈MASRA, mi na wan mofinawan èn mi pôti,

ma memre mi.

Yu na mi Yepiman nanga mi Ferlusuman,

tye, mi Gado, no draidrai fu yepi mi.

₂A sma di e sorgu gi pôtisma,

na wan blesi sma,

te bigi problema miti en,

MASRA o ferlusu en.

₃MASRA o kibri en èn hori en na libi,

den kondreman fu en o gi en grani.

Yu no o gi den feyanti fu en a okasi fu du en wan sani.

₄MASRA o yepi en te a de na sikibedi.

Yu o meki taki a tnapu baka tapu en futu.

₅Mi taki:

“MASRA, Mi sondu,

ma sori mi a bun-ati fu Yu, dresi mi.”

₆Den feyanti fu mi e winsi fu ogri miti mi,

den e taki:

“Oten a o dede?

Oten a nen fu en o kmopo na grontapu?”

₇Te wan sma kon luku mi, a e taki switi nanga mi,

ma en ati furu nanga ogri.

Te a de na strati a e taki san de ini en ati.

₈Ala den sma di no man si mi na ai e taki safrisafri fu mi,

den e winsi fu a moro bigi ogri miti mi.

₉Den e taki:

“A siki disi di a abi o kiri en.

Pe a didon a no o opo moro.”

₁₀Srefi a moro bun mati fu mi,

mi mati tapu san mi ben e fertrow,

èn di ben e nyan nanga mi,

drai en baka gi mi.

₁₁Ma Yu, MASRA, sori mi a bun-ati fu Yu,

meki mi tnapu baka na tapu mi futu,

dan mi o pai den baka fu den sani di den du.

₁₂Na so mi o sabi taki Yu abi prisiri nanga mi:

te den feyanti fu mi no man taki tak' den wini mi.

₁₃Ma mi dati, Yu e kraka mi fu di mi no du ogri,

fu têgo Yu o gi mi wan presi krosbei fu Yu.

₁₄Prijse MASRA, a Gado fu Israel,

fu têgo èn ala ten.

Amen, iya, na so a de.

₂Tye Gado,

leki fa wan dia e angri fu watra,

na so mi e angri fu Yu nanga mi heri ati.

₃Mi e angri trutru fu Gado,

fu a libi Gado.

Oten mi sa man go èn tnapu baka na En fesi?

₄Na den watra-ai fu mi, mi e dringi,

dei nanga neti,

bika sma e aksi mi heri dei taki:

“Pe a Gado fu yu de?”

₅Mi ati e broko te mi e prakseri

fa mi ben e waka na ini wan bigi grupu makandra nanga trawan,

fa mi ben e waka na den fesi go na a oso fu Gado,

fa un ben e bari fu prisiri

èn singi fu gi Gado tangi,

leki wan bigi grupu di e go na wan fesa.

₆Fu sanede meki mi e sari so?

Fu sanede meki sani e dangra mi so?

Mi o poti mi howpu tapu Gado,

bika a ten e kon pe mi o prijse En baka,

a Ferlusuman èn Gado fu mi!

₇Mi e sari sote,

dat' meki mi e prakseri Yu,

dyaso, ini a kondre fu a Yordanliba,

na a Hermonbergi nanga a Misarbergi.

₈Leki fa a watra fu wan sula e lon nanga bigi babari,

na so den problema e wasi kon na mi tapu,

leki bigi skwala den e fadon na mi tapu.

₉Deiten MASRA e meki mi si a bigi lobi fu En,

te neti mi e singi wan singi gi En,

leki wan begi gi a Gado di gi mi libi.

₁₀Mi wani taigi Gado, a Trangawan pe mi e kibri, taki:

Fu sanede Yu fergiti mi so?

Fu sanede mi mus sari leki wan sma di e low,

fu di den feyanti fu mi de nomo na mi baka?

₁₁Mi e firi en te na ini mi bonyo,

te den sma di e feti mi e dreigi mi,

te den e aksi mi heri dei taki:

Pe a Gado fu yu de?

₁₂Fu sanede meki mi e sari so?

Fu sanede meki sani e dangra mi so?

Mi o poti mi howpu tapu Gado,

bika a ten e kon pe mi o prijse En baka,

a Ferlusuman èn Gado fu mi!