Dag 208 van 365- Psalm 43-45 en Handelingen 27:27-44

₁Tye mi Gado, meki mi kisi mi leti,

feti gi mi fesi krutu nanga a pipel di no e dini Yu.

Puru mi ini anu fu den di e bedrigi,

èn di e du kruktu.

₂Bika Yu de a Gado pe mi kan go kibri,

fu sanede Yu no e luku mi moro?

Fu sanede mi mus sari leki wan sma di e low,

fu di den feyanti fu mi de nomo na mi baka?

₃Seni a leti nanga a tru fu Yu,

fu den tiri mi,

fu den tyari mi go na a santa bergi fu Yu,

na a presi pe Yu e tan.

₄Dan mi kan go baka na a altari fu Gado,

na Yu, Gado, di e meki mi prisiri srefsrefi,

èn prijse Yu nanga a citer,

tye Gado, mi Gado!

₅Fu sanede meki mi e sari so?

Fu sanede meki sani e dangra mi so?

Mi o poti mi howpu tapu Gado,

bika a ten e kon pe mi o prijse En baka,

a Ferlusuman èn Gado fu mi!

₂Tye mi Gado,

nanga wi eigi yesi wi yere fu en,

den afo fu wi ferteri wi fu den,

fu den bigi sani di Yu du ini a ten fu den,

ini a ten di de fara na wi baka.

₃Yu ben yagi tra folku gwe nanga Yu krakti,

fu ben poti den fu libi ini a kondre.

Yu meki bigi ogri miti den folku,

ma Yu ben meki den kon furu moro nanga moro.

₄Bika a no nanga feti den teki a kondre abra,

a no a krakti fu den ben meki den wini,

ma na a makti nanga a krakti fu Yu,

èn fu di Yu ben de ala ten nanga den.

Yu ben du dati fu di Yu ben abi prisiri nanga den.

₅Gado, Yu na mi kownu,

Yu e komanderi fu den ferlusu Yakob.

₆Nanga yepi fu Yu wi e pusu den feyanti fu un trowe,

èn ini Yu nen wi e traputrapu den wan di e feti wi.

₇Bika a no na tapu a bo fu mi, mi e fertrow,

a no a deigri fu mi e ferlusu mi.

₈Ma na Yu ferlusu wi fu wi feyanti,

na Yu meki taki den sma di no man si wi na ai, kon na syen.

₉Dat' meki wi e prijse Yu heri dei, wi Gado,

wi sa gi Yu grani fu têgo! sela

₁₀Ma now Yu poti wi na wan sei,

Yu e meki wi kisi syen.

Yu no hari gwe nanga a legre fu wi.

₁₁Yu meki taki wi ben abi fu lon gi wi feyanti,

èn den di no lobi wi srefsrefi fufuru ala den sani fu un teki.

₁₂Yu meki den kiri wi leki na meti den e srakti,

Yu panya wi go na mindri den tra folku.

₁₃Yu seri a pipel fu Yu gi wan lawlaw moni,

Yu no meki moni nanga a seri di Yu seri den.

₁₄Yu meki den kondre lontu wi e teki wi meki spotu,

den e koti odo gi wi èn den e lafu wi.

₁₅Yu meki un tron wan odo gi den folku,

Yu e meki den folku e seki den ede te den e luku wi.

₁₆Heri dei mi e waka nanga a syen.

Sma kan si na mi fesi taki mi e syen,

₁₇te mi e yere fa den e teki wi e meki spotu,

fa den e lafu wi,

nanga a fasi fa den feyanti fu wi

nanga den di wan puru atibron na wi tapu,

e luku wi.

₁₈Ala den sani dati miti wi,

ma wi no fergiti Yu

èn wi no broko a ferbontu fu Yu.

₁₉Un no drai wi baka gi Yu,

èn un tan waka tapu Yu pasi.

₂₀Ma toku Yu broko wi pis'pisi

na a presi pe bus'meti e libi

èn Yu meki dipi dungru tapu wi.

₂₁Efu wi ben fergiti a Gado fu unu,

efu wi ben anbegi wan gado fu wan tra folku,

₂₂Gado bo sabi dati.

A sabi ala san kibri ini a ati fu wan libisma.

₂₃Fu tru, na fu Yu ede den e kiri wi dorodoro,

den e teki unu leki skapu di den e tyari go srakti.

₂₄Wiki Masra! Fu sanede Yu e sribi?

Wiki! No poti wi fu têgo na wan sei!

₂₅Fu sanede Yu e kibri a fesi fu Yu?

Fu sanede Yu e fergiti a bigi nowtu,

a pina ini san wi de?

₂₆Un didon brokobroko ini a doti,

wi no man opo wisrefi fu a gron.

₂₇Opo, kon yepi unu!

Kon ferlusu unu, nanga a bigi lobi fu Yu.

₂Mi ati furu nanga moi wortu,

mi tongo na a skrifitiki fu a skrifiman,

na gi kownu mi e meki wan puwema.

₃Yu na a moro moi sma di de,

yu e taki switi tu nanga trawan.

Na dat' meki Gado blesi yu fu têgo.

₄Yu dyadya fetiman,

tai a deigri fu yu na yu seibere,

a marki fu yu grani nanga glori.

₅Iya, hari gwe nanga glori go wini a feti,

fu sani kan psa tapu wan tru fasi,

fu sani kan du nanga sakafasi

èn tapu wan leti fasi.

Sori yu krakti nanga den bigi sani di yu o du.

₆Den peiri fu yu de srap'srapu,

den e boro a ati fu yu feyanti.

Folku e fadon dededede na yu futu.

₇Gado, yu o rigeri fu têgo èn ala ten,

yu o rigeri tapu wan leti fasi.

₈Yu lobi te sma e du sani tapu wan leti fasi,

ma yu no lobi srefsrefi te sma e du kruktudu.

Fu dat'ede, Gado,

yu Gado teki yu prefu den mati fu yu,

dan A poti yu leki kownu,

fu yu kan breiti.

₉Switismeri de na ala den krosi fu yu:

mire, aloe nanga kasia,

poku di e switi yu yesi de fu yere

na ini den kownu-oso di lai nanga ivoor.

₁₀Den lobiwan fu yu na umapikin fu kownu.

A uma nanga san yu trow tnapu na yu leti sei,

nanga furu gowtu fu Ofir na en skin.

₁₁Mi umapikin, arki mi,

luku lontu dan yu arki,

no hori yusrefi moro na den sani fu yu pipel nanga a famiri fu yu.

₁₂Saka yusrefi gi kownu,

te a e angri fu si a moi fu yu,

bika en abi fu taki now fu yu.

₁₃Umapikin fu Tyrus,

den moro gudusma fu a folku sa suku fu kon bun nanga yu,

èn den o tyari kado kon gi yu.

₁₄Ini ala en moifasi a trowmisi e wakti na inisei,

a krosi di a weri furu nanga gowtu.

₁₅Ini moi krosi nanga ala sortu kloru,

den e tyari en go gi kownu,

den yongu uma, den mati fu en,

e waka na en baka.

₁₆Nanga prisiri èn nanga singi

den e go ini oso fu kownu.

₁₇Den manpikin fu yu di e kon na yu baka,

sa tron kownu leki den afo fu den.

Yu sa poti den fu tiri a heri kondre.

₁₈Mi sa ferteri pikin nanga bakapikin

fu den bigi sani di yu du,

dan so ala folku sa gi yu grani fu têgo èn ala ten.