Dag 210 van 365- Psalm 49-50 en Romeinen 1

₁Gi den sma fu Gado na Roma,

Disi na wan brifi fu Paulus, wan knekti fu Kristus Yesus. A ben kari mi fu de wan boskopuman fu En, èn A poti mi aparti fu panya a bun nyunsu fu Gado. ₂Gado ben pramisi a bun nyunsu disi na fesi, di A meki den profeiti fu En skrifi en ini a Santa Buku. ₃A bun nyunsu disi e taki fu En Manpikin, wi Masra Yesus Kristus, di kon gebore leki libisma ini a famiri fu kownu David. ₄Ma a Yeye fu En di santa, sori un krin taki En na a Manpikin fu Gado fu di Gado meki A opo baka na dede. ₅Kristus meki taki Gado sori wi En bun-ati èn A meki wi tron En boskopuman. Wi mus wroko ondro ala den folku, fu den kon bribi ini Gado èn du san A taki. Na so Kristus sa kisi bigi nen. ₆Un srefi de ini a grupu sma disi, di Gado kari fu tron sma fu Yesus Kristus. ₇Dat' meki mi e skrifi unu di de na Roma, un di Gado lobi èn di A kari fu de sma fu En. Mi e winsi taki Gado wi P'pa, nanga Masra Yesus Kristus, sa sori un bun-ati èn gi un freide.

₈Na a fosi presi mi e taki mi Gado tangi fu un alamala fu san Yesus Kristus du gi unu. Bika na heri grontapu, sma e taki fu a bribi fu unu. ₉Mi e dini Gado nanga mi heri ati fu panya a bun nyunsu fu En Manpikin. Na En na mi kotoigi taki mi e tan prakseri unu ala leisi te mi e begi. ₁₀Mi e begi Gado taki efu a de En wani, fu A gi mi wan okasi now fu kon na unu. ₁₁Bika mi e angri fu si unu, fu prati wan presenti fu a Santa Yeye nanga unu fu gi un krakti. ₁₂San mi wani taki, na tak' wi kan kraka makandra. Mi e kraka unu nanga mi bribi èn unu e kraka mi nanga a bribi fu unu. ₁₃Brada nanga sisa, mi wani fu un sabi taki furu leisi mi ben prakseri fu kon na unu. Ma te leki now ala leisi wan sani ben kon na mindri. Mi wani si froktu na un mindri, leki fa mi e si en na den tra folku. ₁₄Bika mi abi a frantwortu fu ferteri a bun nyunsu na den Grikisma nanga den sma di no de Griki. Sosrefi gi sma di kisi leri nanga sma di no kisi leri. ₁₅Dat' meki mi e angri fu kon na unu na Roma, fu ferteri unu a bun nyunsu.

₁₆Mi no e syen gi a bun nyunsu, bika a de a krakti fu Gado fu ferlusu ala sma di e bribi. A de gi den Dyusma fosi, ma a de tu gi den sma di no de Dyu. ₁₇A bun nyunsu e sori unu fa un kan kon bun ini Gado ai. A sani disi e bigin èn a e kba nanga bribi. Bika a skrifi taki: “A sma di bun ini Gado ai, sa libi fu di a bribi.”

₁₈A atibron fu Gado e kmoto fu heimel kon na tapu ala sma di no e teri En èn di no e libi soleki fa A wani. A fasi fa den e libi e meki taki den tru sani fu Gado no de fu si gi tra sma. ₁₉Bika san den ben kan sabi fu Gado de krin fu si, bika Gado srefi tyari en kon na krin gi den. ₂₀A tru taki nanga un ai un no man si a têgo makti fu Gado nanga En Gadofasi. Ma sensi di grontapu meki, un man ferstan den sani disi te un e luku den sani san A meki. Dat' meki den no man taki tak' den no ben sabi moro betre. ₂₁Bika aladi den sabi Gado, den no gi En grani leki Gado, èn den no taki En tangi. Den abi den eigi denki fu Gado. Den no abi ferstan èn den ati kon dungru. ₂₂Den e prakseri taki den koni, ma den don. ₂₃Bika prefu den dini a bigi Gado di no e dede, den go dini popki di gersi libisma di e dede gwe. Den go dini popki di gersi fowru di e frei na loktu, meti di e waka tapu fo futu, nanga meti di e kroipi. ₂₄Dat' meki Gado gi den abra na den takru lostu fu den ati, fu den du ala sortu sani di no fiti nanga makandra skin. ₂₅Den kenki den tru sani fu Gado gi a lei. Den e gi grani na den sani san Gado meki èn den e dini den, prefu den dini Gado di meki ala sani. Meki wi opo a nen fu Gado fu têgo! Amen. ₂₆Dat' meki Gado libi den meki den du den syensyen sani di den lostu fu du. Umasma no e go na bedi nanga wan man, soleki fa Gado poti en, ma den e go na bedi nanga tra umasma. ₂₇A de a srefi nanga den mansma. Den no wani go nanga umasma na bedi, ma den e lostu tra mansma fayafaya. Mansma e go na bedi nanga mansma. Dan so den e kisi a strafu ini den skin di fiti a ogri san den e du. ₂₈Fu di den no feni en fanowdu fu teri Gado, meki A libi den fu den prakseri sani san no abi no wan warti, èn meki den du sani san no fiti. ₂₉Den lai nanga kruktudu. Den abi ogri ati, bigi-ai nanga takru fasi. Den e dyarusu, den e kiri, den e meki trobi, den e bedrigi, soso ogri de ini den, èn den e konkru sma tori. ₃₀Den e taki takru fu trawan èn den no wani sabi noti fu Gado. Den no abi no wan dropu lespeki, den abi bigifasi èn den lobi taki bigitaki. Den e feni nyun fasi fu du ogri, èn den no e arki den m'ma nanga den p'pa. ₃₁Den e du lawlaw sani, yu no kan fertrow den, èn den no abi no wan dropu lobi noso sari-ati gi trawan. ₃₂Den e du den sani disi aladi den sabi taki Gado o strafu den sma di e du den sani disi. Ma a no dati wawan. Den e prisiri tu nanga tra sma di e du den sani dati tu.