Dag 215 van 365- Psalm 63-65 en Romeinen 6

₂Tye Gado, Yu na mi Gado, na Yu mi e suku,

mi sili e angri fu Yu,

nanga ala san de ini mi, mi e angri fu Yu

ini wan drei kondre, sondro watra.

₃Meki mi si Yu ini a santa presi,

meki mi si a krakti nanga a glori fu Yu.

₄Mi no man libi sondro a bigi lobi fu Yu,

mi mofo sa gi Yu grani.

₅So mi sa gi Yu tangi mi heri libi langa,

opo den anu fu mi te mi e kari Yu nen.

₆Yu e gi mi a moro bun nyanyan fu nyan,

nanga ala prisiri mi e prijse Yu.

₇Te mi didon na tapu mi bedi mi e prakseri Yu,

heri neti mi e kari a nen fu Yu safrisafri.

₈Bika na Yu yepi mi,

mi e prisiri ondro den frei fu Yu.

₉Mi e hori Yu nanga ala krakti di de ini mi,

a let'anu fu Yu e hori mi.

₁₀Ma den di e suku fu kiri mi,

sa saka go ini a dipi fu grontapu.

₁₁Meki den dede na ini bigi feti,

meki krasimeti nyan den dedeskin fu den.

₁₂Ma kownu sa abi prisiri ini Gado,

iniwan sma di e meki pramisi ini a nen fu En, sa prisiri

ma A o tapu a mofo fu den di e lei.

₂Tye Gado, arki a kragi di mi e kragi,

kibri mi fu a frede di feyanti e meki mi frede.

₃Kibri mi gi den prakseri fu den ogri-ati sma

gi a grupu fu den di e du kruktudu.

₄Den e srapu den tongo leki nefi,

den bita wortu fu den e sutu leki peiri.

₅Kibrikibri den e sutu tapu sma di no du noti,

wantronso den e sutu na den tapu,

den no e frede no wan sma.

₆Den e gi densrefi dek'ati ini a ogri di den o du,

den e meki mofo fu seti wan sani fu miti mi,

den e taki: “Suma e si unu?”

₇Den e waka nanga prakseri fu du ogri:

“Wi klari, a sani seti bun.”

Iya, den prakseri nanga a ati fu libisma dipi.

₈Dan Gado sutu En peiri na den tapu,

sondro fu den ben ferwakti en den kisi mankeri.

₉Den eigi tongo meki den fadon.

Ala sma di e si den, e seki den ede.

₁₀Dan ala sma bigin lespeki Gado,

èn taki fu den sani di A du,

den e ferstan now taki na Gado wroko.

₁₁Den sma di bun ini Gado ai o prisiri fu den sani di MASRA du,

èn den o suku kibripresi na En.

Ala den sma di e du Gado wani o gi En grani.

₂Gado di e libi ini Sion, a fiti fu wi gi Yu grani.

Wi o du san wi pramisi Yu.

₃Yu di e yere begi,

ala libisma e kon na Yu.

₄Te den kruktudu fu wi furu tumsi fu tyari,

Yu e gi wi pardon fu den.

₅A sma di Yu teki puru mindri trawan fu kan kon krosbei na Yu,

na wan blesi sma,

a kan go kon ini Yu tempel.

Wi o kisi bogobogo fu a bun fu Yu oso,

bogobogo fu a santa tempel fu Yu.

₆Yu e piki den begi fu wi nanga bigi wroko,

Gado, Yu e meki wi kisi wi leti èn Yu e ferlusu wi.

Sma di e libi te na den kbapisi fu grontapu,

sma fu te abra den moro fara se, e fertrow na Yu tapu.

₇Nanga a krakti fu Yu, Yu poti bergi tnapu,

Yu tranga srefsrefi.

₈Yu e tiri den se te den e rigeri,

den skwala te den seki,

nanga a opruru fu den folku.

₉Na dat' meki libisma na alasei fu grontapu,

abi lespeki gi den marki fu Yu,

pe a son e opo nanga pe a e saka

Yu e meki sma bari fu prisiri.

₁₀Yu e sorgu gi a kondre,

Yu e meki a kisi nofo watra,

Yu e gi en bun doti.

A liba fu Gado span nanga watra

Yu e meki a gron gi karu.

Iya, na so Yu e meki den klari.

₁₁Yu e nati a gron te den drai a doti,

Yu e safu a doti nanga alen èn Yu e blesi den sani di prani.

₁₂Yu e blesi a yari fu bogobogo nyanyan kan koti,

pe Yu e psa, bogobogo nyanyan e de.

₁₃Den wei abi bogobogo grasi,

den lagi bergi e prisiri.

₁₄Den meti ini den wei no de fu teri

karu e gro bogobogo ini den dal,

den e singi èn prisiri nanga makandra.