Dag 217 van 365- Psalm 68-69 en Romeinen 8:1-21

₂Te Gado opo fu du wan sani,

den feyanti fu En e lon panya,

den di no lobi en srefsrefi e lowe te A sori Ensrefi.

₃Leki fa winti e wai smoko gwe,

na so A e wai den puru na pasi,

leki fa wan kandra e bron gwe,

na so den ogri-ati sma e dede gwe te Gado sori Ensrefi.

₄Ma den sma di bun ini Gado ai e breiti,

den e prisiri na Gado fesi,

den e prisiri srefsrefi.

₅Singi gi Gado, singi fu a nen fu En,

meki wan pasi gi En di e rei tapu den bigi opo wei.

MASRA na En nen,

un prisiri na En fesi.

₆Na En na a p'pa fu den pikin

di no abi p'pa nanga m'ma moro,

na En e luku taki den uma di masra dede kba,

kisi den leti.

Gado ini a santa tanpresi fu En.

₇Gado, e meki den sma di de den wawan,

feni wan famiri fu tan,

A e poti strafuman fri,

èn A e meki sani waka bun gi den.

Ma den sma di no wani saka densrefi gi En,

sa libi na ini wan drei kondre.

₈Gado, di Yu ben e waka fesi a pipel fu Yu,

di Yu ben hari psa ini a bigi dreisabana, sela

₉grontapu ben e beifi

èn watra ben e fadon kmopo na heimel

di Gado sori Ensrefi, a Gado fu Sinai,

di Gado sori Ensrefi, a Gado fu Israel.

₁₀Gado, Yu ben meki bogobogo alen fadon,

Yu gi a kondre fu Yu nyun libi di a ben e drei gwe.

₁₁A folku fu Yu go libi drape,

Gado, ini Yu bunfasi, Yu ben meki a kondre klari gi den mofinawan.

₁₂Masra gi wan komanderi,

furu umasma lolo en go moro fara.

₁₃“Den kownu e lon gi den libi,

den legre fu den e lon,

umasma e prati den sani di den libi na baka,

₁₄ma unu e sribi na den skapupen fu unu.”

Den frei fu den doifi ben tapu nanga solfru

den langa wiwiri fu en nanga fini gowtu.

₁₅Bika di a Wan di abi ala makti meki den kownu lon,

A meki sneeuw fadon tapu Salmonbergi.

₁₆Basanbergi, yu bigi bergi,

Basanbergi, bergi nanga someni ede,

₁₇bergi nanga someni ede, fu sanede yu e dyarusu,

fu sanede yu e dyarusu tapu a bergi di Gado teki fu tan?

Fu tru, MASRA o libi drape fu têgo.

₁₈Masra hari kmopo fu Sinaibergi go na a santa presi,

A hari go nanga dusundusun fetiwagi,

so furu taki den no de fu teri.

₁₉Yu opo go na heimel,

Yu tyari den wan di Yu wini gwe nanga Yu,

Yu teki kado fu libisma,

srefi fu den sma di no wani saka densrefi gi Yu.

Yu o libi drape MASRA, Gado.

₂₀Prijse Masra,

dei fu dei A e tyari wi,

na En na a Gado di e ferlusu wi. sela

₂₁Na a Gado dati na a Gado di e tyari ferlusu,

na MASRA Masra e yepi wi fu wi no dede.

₂₂Fu tru, Gado e masi a ede fu den feyanti fu En,

den ede di lai wiwiri,

den ede fu den di e tan du kruktu sani.

₂₃Masra taki:

“Mi e go teki den feyanti fu yu na Basan,

Mi e go puru den ini a dipi se,

₂₄fu un waka na ini a brudu fu den.

Den dagu fu unu o leki a brudu fu un feyanti.”

₂₅Sma si fa Yu e waka leki winiman

na fesi fu a grupu, Gado,

na fesi fu a grupu mi Gado, mi kownu,

Yu e go na a santa presi.

₂₆Den singiman e waka na fesi,

na mindri yu abi den yongu uma di e naki tamboerijn,

na bakasei den man di prei instrumenti nanga snaar.

₂₇Den e singi taki:

“Un prijse Gado te un kon makandra,

un prijse MASRA,

unu di kmoto fu a rutu fu Israel.”

₂₈Benyamin, a moro yonguwan, e waka na fesi,

dan yu e kisi den edeman fu Yuda,

ini bigi grupu,

nanga den di fu Sebulon nanga Naftali.

₂₉Meki wi si a makti fu Yu, Gado,

a makti fu Yu, Gado,

di Yu ben e sori wi fos'fosi,

₃₀ini a tempel fu Yu ini Yerusalem.

Drape kownu e tyari kado gi Yu.

₃₁Piri ai gi den meti di e libi ini a langa grasi sei a liba,

a grupu bulu, den yongu kaw,

masi den wan di lobi solfru,

meki den folku di lobi feti panya go na alasei.

₃₂Heihei boskopuman e kmopo fu Egipte kon,

Etiopia e langa en anu es'esi go na Gado.

₃₃Pipel fu den kondre fu grontapu,

un singi gi Gado!

Un singi wan singi gi Masra, sela

₃₄gi a Wan di e rei ini a moro hei heimel,

di de bun langa kba.

Un yere, A e meki taki a makti sten fu En de fu yere.

₃₅Un taki tak' Gado tranga:

na En na kownu ini Israel,

den wolku e sori a krakti fu En.

₃₆Gado, te Yu e kmopo fu a santa presi fu Yu, sma e beifi,

na En, a Gado fu Israel, e gi makti,

A e gi En pipel nyun krakti.

Prijse Gado!

₂Tye Gado, ferlusu mi,

bika a watra doro te na mi neki kba.

₃Mi e sungu gwe ini dipi tokotoko,

den futu fu mi no man firi gron.

Mi feni misrefi ini dipi watra,

bigi watra e hari mi tyari gwe.

₄Mi weri fu kari,

mi sten gwe,

den ai fu mi kon swaki

fu a luku di mi e luku fu Gado.

₅Den wan di no lobi mi srefsrefi,

sondro taki mi du den wan sani,

furu moro mi edewiwiri.

Furu de di wani kiri mi,

den feyanti fu mi di no de fu fertrow.

Noiti mi fufuru wan sani fu den,

ma den wani fu mi gi den sani baka.

₆Tye Gado, Yu sabi a don fasi fa mi ben libi,

Yu sabi den sondu di mi du.

₇Masra, MASRA fu ala sani,

no meki den di poti den fertrow na Yu tapu

kon na syen fu mi ede.

Tye Gado fu Israel,

no meki taki fu mi ede syen naki den wan di e suku Yu.

₈Bika na fu Yu ede sma e afrontu mi,

fu syen mi no man opo mi ede.

₉Mi de leki wan doroseisma gi den kondreman fu mi,

den eigi brada fu mi no sabi mi moro.

₁₀Bika a lobi fu Yu oso e bron ini mi,

suma e afrontu Yu, e afrontu mi.

₁₁Mi ben e krei te mi ben e faste,

ma sma ben teki mi e meki spotu,

₁₂te mi ben weri mi lowkrosi,

den e koti odo gi mi.

₁₃Na a bigi doro fu a foto srefi den e taki fu mi,

srefi drunguman e teki mi meki spotu nanga singi.

₁₄Ma MASRA, na Yu mi e begi,

meki disi de wan ten pe Yu abi prisiri nanga mi.

Tye Gado, piki mi, fu a bigi lobi fu Yu,

sori mi taki mi kan bow na Yu tapu èn ferlusu mi.

₁₅Hari mi puru ini a tokotoko fosi mi sungu gwe,

meki mi kmopo ini a anu fu den di no lobi mi,

puru mi ini a dipi watra.

₁₆No meki bigi watra srepi mi tyari gwe,

no meki mi sungu gwe ini dipi tokotoko,

no meki mi saka go ini dedekondre.

₁₇Tye MASRA, piki mi, bika a lobi fu Yu bigi,

drai luku mi baka, ini Yu bunfasi.

₁₈No kibri Yu fesi gi Yu knekti,

ma piki mi es'esi,

bika mi e frede sote.

₁₉Kon na mi, poti mi fri,

ferlusu mi fu mi feyanti.

₂₀Yu sabi a syen di mi e nyan,

a afrontu di den e afrontu mi,

a spotu di den e spotu nanga mi,

ma Yu sabi ala den sma tu di e pina mi.

₂₁A afrontu di den e afrontu mi

meki mi lasi ati,

mi no sabi moro san fu du.

Mi ben howpu fu wan sma sori mi sari-ati,

ma not'noti,

mi ben howpu fu sma kon trowstu mi,

ma mi no si no wan.

₂₂Den feyanti fu mi gi mi nyanyan nanga bita dresi na ini,

di watra ben kiri mi den gi mi asin fu dringi.

₂₃Meki a nyanyan di den e nyan na den fesa fu den tron den strafu,

meki a de wan sani fu fanga den sma di den kari kon.

₂₄Breni den, fu den no man si moro,

meki den futu frekti fu têgo te den e waka.

₂₅Strafu den nanga atibron,

no meki den lon gi a faya atibron fu Yu.

₂₆Meki a tanpresi fu den tron wan broko pranasi,

no meki no wan sma tan na libi ini a kampu fu den.

₂₇Bika den e pina den wan di Yu strafu,

den e hebi a pen moro gi den sma di Yu naki.

₂₈Teri ala den ogri di den du,

èn no gi den pardon fu no wan fu den.

₂₉Figi a nen fu den puru ini a buku fu libi,

no meki a de makandra nanga di fu den sma di e libi bun ini Yu ai.

₃₀Mi na wan mofinawan

nanga hebi pen,

tye Gado, ferlusu mi,

poti mi na wan presi pe noti no kan miti mi.

₃₁Mi sa prijse a nen fu Gado nanga wan singi,

gi En grani nanga wan switi singi.

₃₂Dati sa gi MASRA moro prisiri,

dan fu tyari meti leki ofrandi,

dan den bulu di fiti fu tyari leki ofrandi.

₃₃Den sma di trawan e si leki noti sa si dati

èn den sa prisiri,

den di e suku Gado, sa kisi howpu baka.

₃₄Bika MASRA e yere den mofinawan,

A no e poti a pipel fu En di de na strafu na wan sei.

₃₅Heimel nanga grontapu mus gi En grani,

den se nanga ala san e libi na den ini.

₃₆Bika Gado sa ferlusu Sion,

A sa bow den foto fu Yuda baka.

A pipel fu En sa go libi drape èn teki en abra.

₃₇Den pikin fu den di e dini En, sa kisi en gi densrefi,

den di lobi a nen fu En, sa libi drape.