Dag 219 van 365- Psalm 72-73 en Romeinen 9:1-18

Tye Gado, leri kownu fa fu krutu tapu wan leti fasi,

meki a manpikin fu kownu du sani nanga leti leki Yu.

₂Meki a tiri a pipel fu Yu na tapu wan leti fasi,

meki a meki den mofinawan kisi den leti.

₃Meki den bergi tyari freide gi a pipel,

fu di sani du na tapu wan leti fasi.

₄Meki a meki den mofinawan fu a folku kisi den leti,

meki a ferlusu den pôtiwan,

ma meki a masi den sma di e pina trawan.

₅Meki a abi langa libi,

solanga leki a son nanga a munkenki sa de,

fu têgo.

₆Meki a de bun gi a pipel,

leki fa alen bun gi den wei,

leki alen di e nati grontapu.

₇Meki taki sma sa libi tapu wan bun fasi moro nanga moro,

solanga di a de na makti.

Meki taki freide sa de na ala sei

te leki munkenki no sa de moro.

₈Gi en makti fu a wan se te go miti a trawan,

fu a Eufratliba go te na a kba fu grontapu.

₉Meki den sma di e libi ini a bigi dreisabana boigi gi en,

meki den feyanti fu en leki a doti puru fu en futu.

₁₀Meki den kownu fu Tarsis,

nanga den di fu den kondre tapu se,

tyari kado gi en.

Meki den kownu fu Saba nanga Seba

tyari gudu kon gi en.

₁₁Meki ala kownu kon boigi gi en,

meki ala folku kon dini en.

₁₂Fu tru, a o yepi a pôtiwan di e bari e suku yepi,

a mofinawan nanga a sma di no abi no wan sma fu yepi en.

₁₃A o sorgu gi den swakiwan nanga den pôtiwan,

a o meki den pôtiwan feni yepi.

₁₄A o ferlusu den fu a pina nanga a kwinsi ini san den de,

a libi fu den diri ini en ai.

₁₅Meki kownu libi langa!

Sma o tyari gowtu fu Seba kon gi en,

sma sa begi dorodoro gi en,

heri dei den o aksi Gado fu blesi en.

₁₆Karu sa gro bogobogo ini a kondre,

srefi te na loktu fu den bergi.

Den lepi nyanyan sa wai go wai kon,

leki den bon tapu a Libanonbergi.

Bun sa de fu feni bogobogo ini den foto,

leki fa den wei furu nanga grasi.

₁₇Sma sa memre a nen fu en fu têgo,

den sa taki fu en solanga a son e opo.

Ala folku sa winsi fu Gado blesi den,

leki fa Gado blesi en,

èn den sa taki tak' en na wan koloku sma.

₁₈Prijse MASRA Gado, a Gado fu Israel.

Na En wawan e du wondru.

₁₉Prijse a switi nen fu En fu têgo,

èn meki a glori fu En furu heri grontapu.

Amen, iya, amen.

₂₀Dyaso den begi fu David, a manpikin fu Isai, kon na wan kba.

Fu tru, Gado bun gi Israel,

gi den sma di e dini En wawan.

₂Ma mi fu mi sei,

pikinso moro dan mi ben kmopo tapu a pasi,

pikinso moro dan den futu fu mi ben grati kmopo.

₃Bika mi ben e dyarusu tapu den sma

di no feni en fanowdu fu du Gado wani,

mi ben e dyarusu di mi si taki sani e go bun

nanga den ogri-ati sma.

₄Den no sabi san na siki,

den e nyan bun èn den gesontu.

₅Den no sabi san na broko-ede,

den problema di tra sma abi,

den no abi.

₆Dat' meki a heimemre fu den de fu si

leki wan keti na den neki,

a du di den e du sani nanga tranga

de leki wan krosi na den skin.

₇Den fatu sote, taki den ai e suku fu kon na doro,

a ati fu den furu nanga ogri prakseri.

₈Den e meki spotu,

èn tapu wan ogri-ati fasi den e taki nanga heimemre

fa den o kwinsi trawan.

₉Den e kosi Gado,

èn den e gi sma bigitaki.

₁₀Na dat' meki sma e waka na den baka,

den e dringi den wortu fu den leki watra.

₁₁Den e taki:

“Fa Gado o man sabi san wi e du?

Fa a Moro Hei Gado o man kisi dati fu yere?”

₁₂Iya, na so den ogri-ati sma e taki,

den no abi no wan broko-ede

èn den e kon gudu moro nanga moro.

₁₃Ma mi dati, na fu soso mi hori mi ati krin,

na fu soso mi no du ogri.

₁₄Bika na heri dei Gado e strafu mi,

ala mamanten baka A e fon mi.

₁₅Ma efu mi sa taki leki fa den e taki,

dan a ben o de leki na seri mi e seri a pipel fu Gado.

₁₆Mi broko mi ede fu ferstan a sani disi,

a ben e dangra mi tumsi,

₁₇te leki mi go ini a santa presi fu Gado,

dan mi kon ferstan san o miti den.

₁₈Fu tru, Yu e tyari den waka tapu grati pasi,

Yu e meki den fadon fu den no opo noiti moro.

₁₉Ini wan pingi fu wan ai den e dede gwe,

den no de fu si moro,

den e dede wan takru dede.

₂₀Yu e si den leki noti Masra,

den de leki wan dren

te Yu wiki, wantronso den no de fu si moro.

₂₁Di mi ati ben bita,

di mi ben e nyan mi niri,

₂₂mi ben don,

mi no ben abi ferstan srefsrefi,

leki fa meti no abi ferstan.

₂₃Ma now mi e ferstan taki ala ten mi de na Yu,

taki Yu hori mi na mi let'anu.

₂₄Nanga den rai di Yu e gi mi,

Yu e sori mi fa mi mus waka.

Dan Yu o teki mi tyari gwe nanga glori.

₂₅Boiti Yu mi no abi no wan tra sma na ini heimel,

mi no e angri fu noti tu na grontapu.

₂₆Awinsi a ati fu mi tan tiri,

a skin fu mi pori gwe,

Yu, Gado, na a Trangawan,

Yu na ala san mi abi fu têgo.

₂₇Bika mi sabi taki den di de fara fu Yu,

o lasi den libi.

Yu e puru ala sma na pasi

di no wan waka na Yu baka.

₂₈Ma mi fu mi sei,

a bun gi mi fu tan krosbei fu Gado,

na Masra MASRA na mi kibripresi.

Mi sa ferteri fu ala den sani di Yu du.