Dag 220 van 365- Psalm 74-76 en Romeinen 9:19-33

Tye Gado, fu sanede Yu poti wi fu têgo na wan sei?

Fu sanede Yu ati e bron nanga den skapu di Yu e tiri?

₂Memre a pipel di Yu ben teki bun langa kba gi Yusrefi,

di Yu ben ferlusu fu de Yu eigi lo,

memre Sionbergi, a bergi pe Yu ben libi.

₃Kon, kon luku fa sani broko didon na gron fu têgo,

fa a feyanti naki ala sani broko ini a santa presi.

₄Feyanti fu Yu ben e bari ini a presi

pe wi nanga Yu ben e miti.

Den poti den fraga fu den drape tu.

₅Leki fa wan sma e opo en beiri bun hei,

fu kapu bon,

₆na so den ben opo den beiri nanga den owru

fu naki den sani broko,

tapu san moimoi prentyi ben tyerfi.

₇Den bron a santa presi fu Yu te na gron,

den doti a oso pe wi ben anbegi Yu.

₈Den ben taigi makandra taki:

“Un o broko den te na gron.”

Den bron ala den oso pe wi ben e anbegi Yu.

₉Wi no e si marki fu Yu moro,

profeiti srefi no de moro,

no wan sma sabi tu olanga sani o tan so.

₁₀Tye Gado, olanga a feyanti o tan teki wi meki spotu,

olanga den o tan afrontu a nen fu Yu.

₁₁Fu sanede Yu no e yepi wi?

No fow Yu anu moro langa,

ma puru den na pasi!

₁₂Ma Gado, Yu na mi Kownu,

dati de so bun langa kba.

Yu ferlusu wi leti dyaso pe wi e libi.

₁₃Nanga a krakti fu Yu,

Yu prati a se na tu,

Yu masi den ede fu den bun bigi sneki fu a se.

₁₄Na Yu ben masi den ede fu a Leviatan,

dan Yu gi en leki nyanyan na den meti fu a sabana.

₁₅Na Yu meki a watra fu den watrabron nanga kriki bigin lon,

èn na Yu e meki liba nanga furu watra drei gwe.

₁₆Na Yu meki dei, na Yu meki neti.

na Yu poti a munkenki nanga a son na den presi.

₁₇Na Yu poti den kbapisi fu grontapu,

na Yu meki dreiten nanga alenten.

₁₈MASRA, memre fa a feyanti e meki spotu,

fa wan don folku e afrontu a nen fu Yu.

₁₉No gi a doifi fu Yu di Yu lobi,

abra na krasi meti.

No fergiti a libi fu den mofinawan fu têgo.

₂₀Memre a ferbontu di Yu meki nanga wi,

bika furu dungru presi de ini a kondre,

kibripresi pe ogri e psa.

₂₁No meki den di trawan e pina

drai gwe nanga syen,

ma meki den mofinawan,

nanga den pôtiwan

prijse Yu nen.

₂₂Tye Gado, opo, du wan sani!

Taki fu wini a tori fu Yu!

Memre fa den don sma e afrontu Yu heri dei.

₂₃No fergiti a babari fu den feyanti fu Yu,

a babari fu den di e kaka futu gi Yu,

a de fu yere dorodoro!

₂Wi e gi Yu tangi, Gado, wi e gi Yu tangi,

a nen fu Yu de ala ten na tapu wi tongo,

wi e taki fu den bigi sani di Yu du.

₃“Na tapu a yoisti ten,

Mi sa krutu tapu wan leti fasi.

₄Awinsi grontapu nanga ala san e libi na en tapu sa beifi,

na Mi ben poti en tnapu na tapu postu. sela

₅Mi taigi den sma nanga heimemre taki:

No abi heimemre.

Den ogri-ati sma Mi taigi taki:

No opo yusrefi.

₆No opo yusrefi gi Gado,

un no meki bigi te un e taki.”

₇Bika bigi nen no e kmoto fu oostsei

noso fu westsei

a no e kmoto fu a sabana tu,

₈ma na Gado na krutubakra,

na En e opo a wan,

na En e broko a trawan.

₉MASRA hori wan kan nanga win ini En anu,

a moksi nanga spesrei

èn a e skuma

A e kanti en gi den ogri-ati sma fu grontapu,

den abi fu dringi en te leki a leigi.

₁₀Ma mi dati, ala ten mi sa taki fu en,

mi sa singi gi a Gado fu Yakob.

₁₁“Mi sa broko a krakti fu den ogri-ati sma,

ma Mi o meki a krakti fu den bun sma kon moro bigi.”

₂Den sma fu Yuda sabi Gado,

a abi wan bigi nen ini Israel.

₃Bika na ini Salem a tenti fu En de,

na tapu Sionbergi A e libi.

₄Na drape A ben broko den faya peiri nanga den bo,

den schild, den deigri nanga ala tra fetisani. sela

₅Yu e brenki, Yu bigi,

Di Yu saka kmopo fu a bergi pe Yu fon den feyanti fu Yu.

₆Den dyadya fetiman fu den lasi ala den fetisani,

den dede gwe,

no wan fu den ben abi krakti fu du wan sani.

₇Gado fu Yakob, di Yu bari den

den man di e tyari den asi nanga den asi dede gwe.

₈Ala sma mus lespeki Yu

suma man tan na libi

te Yu e lusu a atibron fu Yu?

₉Fu heimel Yu leisi strafu,

grontapu e frede, den tan tiri.

₁₀Dan Gado opo tnapu fu krutu,

fu ferlusu ala den sma di trawan e si fu noti. sela

₁₁Den sma di ben opo ini atibron gi Yu,

o meki Yu kisi moro grani,

èn den wan nanga atibron di kmopo libilibi ini a bigi feti,

o anbegi Yu.

₁₂Un du den sani di un ben pramisi MASRA, un Gado.

Un alamala di lontu En,

un tyari un presenti gi a Wan di fiti fu kisi lespeki.

₁₃A e broko tiriman saka,

A e meki kownu na grontapu frede gi En.