Dag 224 van 365- Psalm 84-86 en Romeinen 12

₂MASRA fu ala sani,

mi lobi a tempel fu Yu fu tru!

₃Mi e angri, iya, mi e angri fu de ini a tempel fu MASRA,

nanga ala san de ini mi, mi e singi gi a libi Gado.

₄MASRA fu ala sani, mi Kownu èn mi Gado,

srefi a pikinfowru e feni wan tanpe,

a zwaluw e meki en nesi fu a poti den pikinwan

na den altari fu Yu.

₅Den sma di e libi ini Yu oso, na blesi sma,

den e prijse Yu dorodoro. sela

₆Den sma di e kisi den krakti fu Yu, na blesi sma,

den di wan teki a pasi fu kon na Yu.

₇Efu den e psa ini wan dal di drei srefsrefi,

a e tron wan presi nanga bogobogo watra gi den,

blesi e kon na den tapu leki alen.

₈O moro den e waka o moro den e kisi krakti,

te leki den doro fesi Gado ini Sion.

₉MASRA, Gado fu ala sani, yere a begi fu mi,

tye Gado fu Yakob, arki! sela

₁₀Tye Gado, Yu di e kibri wi leki wan schild,

luku èn sori a wan di Yu salfu Yu bunfasi.

₁₁Bika wán dei ini Yu oso,

betre moro dusun dei na wan tra presi.

A moro bun fu tnapu tapu a stupu fu a oso fu a Gado fu mi,

dan fu de ini a oso fu ogri-ati sma.

₁₂Bika MASRA Gado e krin wi pasi,

na En e kibri wi leki wan schild.

A no e hori a bun na baka

gi den sma tapu san trawan no man sori finga.

₁₃MASRA fu ala sani,

a sma di e fertrow na Yu tapu, na wan blesi sma.

₂MASRA, Yu ben bun gi a kondre fu Yu,

Yu tyari wan kenki ini a fasi fa sani ben e go nanga Yakob.

₃Yu gi a pipel fu Yu pardon fu den kruktudu,

nanga den sondu fu den. sela

₄Yu meki a atibron fu Yu saka,

Yu no lusu a atibron fu Yu moro.

₅Tye Gado, meki wi de baka leki fa wi ben de bifo,

meki wan kba kon na a wani di Yu no wani sabi noti moro fu wi!

₆Na fu têgo Yu ati o tan bron na wi tapu?

a atibron fu Yu o de fu alaten?

₇Tye, meki wi libi baka,

dan a pipel fu Yu sa prisiri fu Yu ede.

₈Tye MASRA, sori wi a bigi lobi fu Yu

èn ferlusu wi.

₉Mi wani arki san Gado, MASRA, sa taki,

bika A sa pramisi taki sani o waka bun baka gi a pipel fu En,

gi den di e tan waka na En baka,

efu den no drai go libi wan soso libi baka.

₁₀Fu tru, es'esi A o kon ferlusu den sma di e lespeki En,

èn a glori fu En o de fu si ini wi kondre baka.

₁₁Dan bigi lobi nanga a fertrow di Gado de fu fertrow

sa waka anu na anu,

fu du sani na tapu wan leti fasi nanga freide

o brasa densrefi.

₁₂A bow di Gado o man bow tapu libisma

o de fu feni baka na grontapu,

èn Gado di e du sani nanga leti

o luku kmopo fu heimel.

₁₃MASRA o meki sani waka bun gi wi,

èn den pranigron fu wi o gi nyanyan.

₁₄A du di Gado e du sani nanga leti

o go na En fesi

fu meki pasi gi En.

Tye MASRA, arki mi èn piki mi,

bika mi na wan pôti èn mofina sma.

₂Kibri mi, bika mi e lespeki Yu.

Yu na mi Gado, ferlusu Yu knekti,

tapu Yu mi e fertrow.

₃Sori mi Yu bun-ati Masra,

bika na Yu mi e tan kari.

₄Meki Yu knekti prisiri baka,

bika, Masra, na Yu mi e kon nanga mi begi.

₅Masra, Yu bun èn Yu tnapu klar'klari fu gi pardon,

a lobi fu Yu bigi gi ibri sma di e kari Yu.

₆Tye MASRA, arki a begi fu mi,

arki te mi e begi trangatranga.

₇Te mi de ini benawtu mi e kari Yu

bika Yu e piki mi.

₈No wan gado de leki Yu, Masra,

èn no wan du den wondru di Yu du.

₉Masra, na Yu meki ala folku,

den alamala o kon boigi gi Yu èn gi a nen fu Yu grani,

₁₀bika Yu bigi èn Yu e du wondru,

Yu, Gado, Yu wawan.

₁₁MASRA, leri mi fa Yu wani taki mi mus libi,

fu mi kan tyari misrefi leki fa Yu wani.

Gi mi wan ati di e lespeki Yu.

₁₂Masra, Gado fu mi, mi sa prijse Yu nanga mi heri ati,

mi sa gi Yu nen grani fu têgo,

₁₃bika a lobi bigi di Yu abi gi mi,

na Yu ferlusu mi fu mi go ini a dipi dedekondre.

₁₄Tye Gado, sma nanga bigifasi e meki densrefi klari

fu kon feti nanga mi,

wan grupu di e du sani nanga tranga

wani kiri mi,

den no e span nanga Yu.

₁₅Ma Yu, Masra, na wan Gado di abi sari-ati nanga bun-ati,

Yu abi langa pasensi, Yu furu nanga lobi,

èn Yu de fu fertrow.

₁₆Drai luku mi èn sori mi a bun-ati fu Yu,

gi a knekti fu Yu krakti,

ferlusu a manpikin fu a uma di e dini Yu.

₁₇Gi mi wan marki fu a bunfasi fu Yu,

dan den feyanti fu mi sa si dati èn kon na syen,

te den si MASRA, fa Yu yepi mi èn trowstu mi.