Dag 230 van 365- Psalm 100-102 en 1 Korintiërs 1

₁Gi a gemeente fu Gado na Korinte.

Disi na wan brifi fu Paulus nanga brada Sostenes. Mi na wan boskopuman fu Kristus Yesus fu di Gado wani dati. ₂A brifi na gi unu di Gado poti aparti gi Ensrefi ini Kristus Yesus, unu di Gado kari fu de sma fu En. Ma a de tu gi ala sma di e kari a nen fu wi Masra Yesus Kristus, awinsi pe den e tan. A de Masra fu den èn fu wi.

₃Mi e winsi taki Gado wi P'pa nanga Masra Yesus Kristus sa sori un bun-ati èn gi un freide.

₄Ala leisi mi e tan taki Gado tangi gi unu, fu di A sori unu En bun-ati ini Kristus Yesus. ₅Bika tapu ala fasi un kisi furu blesi, fu di un de wan nanga Kristus. Un sabi fa fu taki èn un kisi ala sortu koni, ₆fu di san wi leri unu fu Kristus ben beri rutu na ini unu. ₇Dat' meki no wan fu den presenti fu Gado e mankeri unu ini a pisten san un e wakti fu wi Masra Yesus Kristus sori Ensrefi. ₈A sa yepi unu fu hori doro te na a kba, fu un kan de sondro fowtu tapu a dei fu wi Masra Yesus Kristus. ₉Gado de fu fertrow. A kari unu fu unu nanga En Manpikin Yesus Kristus sa libi leki wan nanga makandra.

₁₀Ma brada nanga sisa, ini a nen fu wi Masra Yesus Kristus mi e begi unu, fu un de wan. No meki prati de na un mindri. Un mus de wan ini denki èn wan ini a fasi fa un e si sani. ₁₁Bika, brada nanga sisa, den ososma fu Klowe taigi mi taki un e meki trobi nanga unsrefi. ₁₂San mi wani taki na tak' iniwan fu unu e taki wan tra sani. A wan e taki: “Mi na fu Paulus.” A trawan e taki: “Mi na fu Apolos.” Trawan baka feni taki den na fu Kefas noso taki den na fu Kristus. ₁₃Ma Kristus no prati ini grupu. A no Paulus ben dede gi unu na a kroisi. Un no ben dopu tu ini a nen Paulus. ₁₄Mi e taki Gado tangi tak' mi no dopu no wan fu unu, boiti Krispus nanga Gayus. ₁₅Dan no wan fu unu kan taki tak' a dopu ini a nen fu Paulus. ₁₆Mi e memre taki mi ben dopu Stefanas nanga den ososma fu en tu. Moro fara mi no man memre taki mi dopu ete wan sma. ₁₇Bika Kristus no ben seni mi fu dopu sma, ma fu ferteri den a bun nyunsu. Èn mi no ben mus du en nanga heihei wortu di kmopo fu libisma denki, fu no meki taki a dede fu Kristus na a kroisi lasi en krakti.

₁₈Bika a boskopu fu a kroisi na wan don sani gi den sma di e go lasi. Ma gi wi di Gado ferlusu, a de a krakti fu Gado. ₁₉Bika a skrifi taki: “Mi o tyari wan kba kon na a koni fu den koniman, èn Mi o meki taki a sabi fu den sabiman de fu soso.” ₂₀Pe a koniman de? Pe a wan de di sabi a wèt fu Gado? Pe den bigi takiman fu a ten disi de? Gado sori den taki a koni fu grontapu na don sani. ₂₁A koni fu Gado de fu si ini ala sani, ma libisma nanga ala en koni, no ben kon leri sabi Gado. Dat' meki Gado teki a besroiti fu teki den don sani di wi e preiki fu ferlusu den sma di e bribi. ₂₂Den Dyusma e angri fu si wondru èn den Grikisma e suku moro koni. ₂₃Ma wi e preiki fu Kristus di dede na a kroisi. Gi den Dyusma, a de wan sani di e afrontu den. Gi den sma di no sabi Gado a de wan don sani. ₂₄Ma gi den sma di Gado kari, awinsi den na Dyusma noso Grikisma, wi e preiki taki Kristus de a krakti nanga a koni fu Gado. ₂₅Bika a don fu Gado, koni moro a koni fu libisma, èn a swaki fu Gado, tranga moro a krakti fu libisma.

₂₆Brada nanga sisa, un prakseri san un ben de di Gado kari unu. Libisma fasi, furu fu unu no ben de koniman. Èn a no ben de so taki furu fu unu ben abi bigi makti, noso taki un ben de sma di kmopo fu prenspari famiri. ₂₇Ma den sma di grontapu e si leki don sma, na den dati Gado teki fu poti den koniman na syen, èn den sma di grontapu e si leki swakiwan, na den dati Gado teki fu meki a fesi fu den wan di abi makti fadon. ₂₈Den sma di grontapu no e si leki prenspari sma, nanga den sma di grontapu e si fu noti, na den Gado teki gi Ensrefi. San no de noti ini a ai fu grontapu, na dati Gado teki fu broko a makti fu den wan di de wan sani. ₂₉Dat' meki no wan enkri libisma kan meki bigi na fesi Gado. ₃₀Gado meki taki un dati de wan nanga Kristus Yesus. Gado meki tu taki Kristus de wi koni. Na Kristus e meki wi kon bun ini a ai fu Gado, na En e meki wi tron sma fu Gado èn na En e ferlusu wi. ₃₁Dan a sa de leki fa a skrifi: “Efu wan sma wani meki bigi, dan a mus du en fu Masra kisi bigi nen.”