Dag 231 van 365- Psalm 103-104 en 1 Korintiërs 2

Mi sili, prijse MASRA!

Nanga ala san de na ini mi, mi e prijse En santa nen.

₂Mi sili, prijse MASRA!

No fergiti no wan fu den bun di A du.

₃A e gi yu pardon fu ala yu kruktudu,

A e dresi ala yu siki,

₄A e kibri yu fu yu no dede,

A e sori yu bogobogo lobi nanga sari-ati,

₅A e meki soso bun miti yu, yu heri libi,

fu yu tan yongu èn tranga leki wan aka.

₆MASRA e du sani tapu wan leti fasi,

èn A e meki den sma di trawan e pina

kisi den leti.

₇A tyari den prakseri fu En kon na krin gi Moses,

A meki a pipel fu Israel si den wroko fu En.

₈MASRA abi sari-ati nanga bun-ati,

A abi langa pasensi nanga bigi lobi.

₉A no sa tan sori finga na wi tapu,

A no e hori sma na ati tu.

₁₀A no e gi wi a strafu di wi fiti fu kisi fu wi sondu,

A no e gi wi a pai di wi fiti fu kisi fu wi kruktudu.

₁₁Ma leki fa heimel de so hei fu grontapu,

na so a lobi fu En bigi gi den sma di abi lespeki gi En.

₁₂Soleki fa a oostsei de so fara fu a westsei.

na so fara A e poti den kruktudu fu wi na wan sei.

₁₃Leki fa wan p'pa e sorgu gi en pikin,

na so MASRA e sorgu

gi den sma di abi lespeki gi En.

₁₄Bika A sabi nanga san wi meki,

A no fergiti taki wi meki fu kleidoti.

₁₅A libi fu wan libisma de leki grasi,

a e opo leki den bromki ini wan wei.

₁₆Te a winti wai psa na en tapu a no de fu feni moro,

sma no sabi moro pe a ben tnapu.

₁₇Ma a lobi fu MASRA de fu têgo

gi den sma di abi lespeki gi En,

èn a bun fu En de fu têgo gi den bakapikin,

₁₈gi den di e hori densrefi na a ferbontu fu En,

èn gi den di e hori densrefi na den gebod fu En.

₁₉A kownusturu fu MASRA de na heimel,

A de kownu abra ala sani.

₂₀Un engel fu MASRA, prijse En,

un dyadya fetiman di e du san A e taki,

un di e arki En sten.

₂₁Prijse MASRA, ala un engel,

un knekti fu En di e du En wani.

₂₂Prijse MASRA,

ala sani di A meki,

na ala sei pe A e rigeri,

Mi sili, prijse MASRA.

₁Mi sili, prijse MASRA!

MASRA, Gado fu mi, Yu bigi fu tru.

A grani nanga glori de leki wan krosi na Yu skin.

₂Wan krin leti de leki wan dyakti lontu Yu,

Yu e hari a heimel span leki wan tenti.

₃Yu e meki den kamra fu Yu na tapu den watra,

den wolku na Yu wagi,

Yu e koiri na tapu den frei fu a winti.

₄Yu teki a winti leki Yu boskopuman,

a faya di e koti na loktu leki Yu wrokoman.

₅Yu poti grontapu tnapu steifi,

fu a no seki noiti moro.

₆Bigi watra ben tapu grontapu leki wan krosi,

a watra ben hei psa den bergi.

₇Ma di Yu bari en a saka,

a gwe es'esi di a yere Yu sten leki a dondru.

₈Den bergi opo kon na loktu,

a watra saka go na den lagi presi,

a go na den presi di Yu ben poti gi en.

₉Yu poti marki gi en ofara den kan go,

noiti moro a sa tapu grontapu baka.

₁₀Yu e seni a watra go na den kriki,

mindri den bergi den e hari psa.

₁₁Ala den busi meti e dringi fu en,

den werder buriki fu a sabana e nati den neki.

₁₂Den fowru di e frei na a heimel e meki den nesi ini den bon sei den kriki,

na mindri fu den taki den singi fu den de fu yere.

₁₃Fu den kamra fu Yu, Yu e nati den bergi,

so Yu e meki taki grontapu abi nofo watra.

₁₄Yu e meki grasi gro gi meti fu den nyan,

nanga grun wiwiri di libisma kan prani.

So a kan feni nyanyan fu a gron,

₁₅win di e gi prisiri,

oli di e meki a fesi brenki,

iya brede di e gi libisma krakti.

₁₆Den bon fu MASRA kan dringi te a sari den,

den sedrebon fu a Libanonbergi di A prani,

₁₇drape den fowru e meki den nesi,

drape den ooievaar e tan.

₁₈Den hei bergi na fu den stonbokoboko,

den klipdas e teki den bergiston leki den kibripresi.

₁₉Yu meki a munkenki fu poti den spesrutu ten,

a son dati sabi oten a mus saka.

₂₀Yu e seni dungru kon fu neti fadon,

dan ala den meti fu a busi e teki waka.

₂₁Den yongu lew e bari te den e suku nyanyan,

den angri fu Gado gi wan sani fu nyan.

₂₂Te a son e opo den e hari gwe baka,

den go kanti didon ini den olo.

₂₃Ma dan libisma e kmopo fu den oso go na wroko,

èn den e wroko te neti.

₂₄MASRA, den sani di Yu meki furu sote.

Yu meki alamala nanga koni,

grontapu furu nanga den sani di Yu meki.

₂₅Luku a se fa a bigi èn fa a bradi,

den meti di e beweigi na ini no de fu teri,

pikinwan nanga bigiwan.

₂₆Na tapu en den sipi de,

na ini en a Lefiatan de,

di Yu meki fu prei nanga en.

₂₇Ala den sani e wakti na Yu tapu,

fu Yu gi den nyanyan na tapu a yoisti ten.

₂₈Te Yu e gi den, den e nyan,

te Yu e opo Yu anu, den e abi nofo fu nyan.

₂₉Efu Yu no e luku den moro, den e frede te fu dede,

efu Yu teki a libibro fu den, den e dede

èn den e tron doti baka.

₃₀Ma te Yu seni a libibro fu Yu,

den e kon na libi,

Yu e meki a grontapu kisi nyun libi.

₃₁Meki a glori fu MASRA tan fu têgo,

meki MASRA prisiri nanga En wroko.

₃₂Te A e luku grontapu, grontapu e beifi,

efu a fasi den bergi, den e puru smoko.

₃₃Mi sa singi gi MASRA solanga mi de na libi,

mi sa singi gi a Gado fu mi solanga mi de.

₃₄Mi e howpu taki den prakseri fu mi sa gi En prisiri,

neleki fa mi e prisiri nanga En.

₃₅Sondusma no sa de moro na grontapu,

ogri-ati sma no sa de fu feni moro.

Mi sili, prijse MASRA!

Haleluya.