Dag 232 van 365- Psalm 105-106 en 1 Korintiërs 3

₁Prijse MASRA, kari En nen,

ferteri den folku fu den bigi sani di A du.

₂Singi gi En, singi psalmsingi gi En,

taki fu ala den wondru fu En.

₃Meki bigi gi En santa nen.

Un di e suku MASRA, un prisiri.

₄Suku fu MASRA, suku a krakti fu En,

tan suku En dorodoro.

₅Memre den wondru di A du,

den marki nanga den krutu di a koti.

₆Un bakapikin fu Abraham, a knekti fu En,

un bakapikin fu Yakob, a wan di A teki spesrutu.

₇Na En, MASRA, na wi Gado,

A e krutu heri grontapu.

₈A e hori Ensrefi fu têgo na a ferbontu fu En,

a pramisi di A meki fu alaten,

₉a ferbontu di A meki nanga Abraham,

a sweri di A meki nanga Isak.

₁₀A poti en gi Yakob

leki wan sani di den mus o tan du,

gi Israel leki wan têgo ferbontu,

₁₁di A taki: “Na yu Mi o gi a kondre Kanaan,

leki a kondre di yu kisi taki na fu yu.”

₁₂Di den no ben de nanga furu sma ete,

leki wan pikin grupu doroseisma,

₁₃di den ben e waka fu a wan folku go na a trawan,

fu a wan kondre go na a trawan.

₁₄A no gi no wan sma pasi fu pina den,

A ben e strafu kownu fu den ede:

₁₅“No fasi den wan di Mi salfu,

no du den profeiti fu Mi ogri.”

₁₆A ben meki angriten kon ini a kondre,

ala a nyanyan ben kon kba.

₁₇Ma A ben seni wan man go na den fesi,

Yosef ben seri leki wan srafu.

₁₈Den ben keti den futu fu en,

poti isri linga lontu a neki fu en

₁₉te leki a ten ben doro

pe den dren di a ben tyari kon na krin

kon tru,

te leki den sani di MASRA ben taki

sori taki a abi leti.

₂₀Dan a kownu seni sma go na en fu lusu en,

a man di ben tiri furu folku meki a kon fri.

₂₁Dan a poti Yosef leki basi fu a oso fu en,

leki tiriman abra ala san a ben abi.

₂₂fu sori den tiriman drape fa sani ben mus du,

fu leri den fesiman koni.

₂₃Dan Israel go na Egipte,

Yakob go tan leki wan doroseisma ini a kondre fu Ham.

₂₄Dan Gado meki a pipel fu En kon furu srefsrefi,

èn den ben kisi makti moro den sma di ben e pina den.

₂₅Dan Gado kenki a ati fu den,

den no ben lobi a folku fu En srefsrefi moro,

èn den ben e kori den knekti fu En.

₂₆Ne Gado seni Moses, a knekti fu En,

nanga Aaron, di Ensrefi ben teki.

₂₇Den du den marki na den mindri

den marki di A ben taigi den tak' den o psa,

nanga wondru drape ini a kondre fu Ham.

₂₈A seni dungru èn a kondre ben kon dungru.

ma den no ben wani du san A taki.

₂₉Dan A meki a watra fu den tron brudu,

A kiri ala den fisi fu den.

₃₀A meki todo furu a kondre tu,

te ini den kamra fu kownu.

₃₁A komanderi èn kawfrei ben doro,

maskita ben furu a heri kontren fu den.

₃₂Prefu alen A meki pis'pisi ijs fadon ini a kondre,

faya ben koti na loktu tu.

₃₃A naki den droifidyari nanga den figabon fu den,

a broko ala den bon ini a kontren fu den.

₃₄A komanderi èn sprenka doro,

someni taki den no ben de fu teri.

₃₅den nyan ala grun wiwiri ini a kondre,

sosrefi ala a nyanyan na ini den pranigron.

₃₆A kiri ala den fosi pikin di ben gebore ini a kondre fu den,

den tranga fosi manpikin.

₃₇A meki a pipel fu En kmoto ini Egipte,

nanga furu gowtu nanga solfru sani,

no wan fu den ben e misi futu di den ben e gwe.

₃₈Den sma fu Egipte ben breiti taki den Israelitisma ben gwe,

bika den ben frede fu den.

₃₉A ben bradi wan wolku fu kibri den,

A ben gi den wan faya fu den ben kan si te neti.

₄₀Di den aksi En nyanyan, A seni fowru gi den,

A gi den brede fu heimel tu èn den nyan te a sari den.

₄₁A priti wan bergiston opo fu watra lon,

a lon leki wan liba ini a drei kontren pe den ben de.

₄₂Gado no ben fergiti a santa pramisi

di A ben pramisi Abraham, a knekti fu En.

₄₃A ben meki a pipel fu En hari gwe nanga prisiri,

den wan di A ben teki gi Ensrefi gwe nanga prisiri babari.

₄₄A gi den a kondre fu tra folku,

den kisi den sani di ben de fu den tra folku.

₄₅Drape den ben mus tan du den sani fu En,

èn hori densrefi na den wèt fu En.

Haleluya!

₁Haleluya! Prijse MASRA, bika A bun,

a lobi fu En na fu têgo.

₂Suma sa man taki fu den bigi wroko fu MASRA?

Suma sa man gi En a grani di fiti En?

₃Den sma di e libi bun,

den sma di e libi ala ten soleki fa a fiti,

na blesi sma.

₄Tye MASRA, memre mi,

fu di Yu abi prisiri nanga a pipel fu Yu,

kon ferlusu mi tu.

₅Dan mi sa si a bun di Yu abi

gi den wan di Yu teki gi Yusrefi,

mi sa prisiri makandra nanga Yu folku

èn meki bigi nanga den wan di Yu teki spesrutu gi Yu.

₆Wi sondu, neleki den afo fu wi,

wi du sani di no bun, wi du ogri.

₇Den afo fu wi no ben abi ai gi den wondru fu Yu

di den ben de na Egipte.

Den no memre a bigi lobi fu Yu,

prefu dati den kaka futu gi Yu na a se,

na a Riet Se.

₈Ma A ferlusu den fu En nen ede,

fu sma ben kan si a krakti fu En.

₉A bari a Riet Se èn a se drei gwe,

A meki den hari psa ini a dipi fu a se,

leki na ini a dreisabana den ben waka.

₁₀A ferlusu den ini a makti fu den sma di no lobi den srefsrefi,

A puru den ini a makti fu a feyanti.

₁₁A watra tapu den sma di ben feti den,

no wan fu den tan na libi.

₁₂Dan fosi a pipel fu En bribi san A ben taki,

dan den singi fu gi En grani.

₁₃Ma her'esi den fergiti den sani di A du,

èn den no wakti fu Gado taigi den san den mus du.

₁₄Soso nyanyan ben de ini de ede ini a dreisabana,

èn den du sani fu luku san Gado ben o du.

₁₅Dat' meki A gi den san den ben angri fu abi,

A gi den someni taki den ben e fuga fu en.

₁₆Sowan fu den ben kon dyarusu tapu Moses,

ini a kampu fu den,

nanga tapu Aaron, a santa knekti fu MASRA.

₁₇Ne a gron priti opo èn a swari Datan,

a tapu a heri grupu fu Abiram.

₁₈Wan faya bron den wan di ben waka na den baka,

wan faya bron den ogri-ati sma.

₁₉Den meki wan pikin kaw na Horeb,

dan den boigi gi a gowtu popki.

₂₀Den kenki Gado, a glori fu den, gi wan popki,

gi wan popki fu wan kaw di e nyan grasi.

₂₁Den fergiti Gado, a Ferlusuman fu den,

di ben du bigi sani ini Egipte,

₂₂di ben du wondru ini a kondre fu Ham,

di ben du sani na a Riet Se di ben meki den tnapu nanga opo mofo.

₂₃Ne Gado taki tak' A o puru den na pasi.

Ma Moses, di A ben teki spesrutu, dyompo gi den,

a begi gi den fu Gado no lusu a atibron fu En,

fu puru den na pasi.

₂₄Den ben e si a bun kondre fu noti,

den no ben fertrow den sani di Gado ben taigi den.

₂₅Prefu dati den ben krutu ini den tenti,

den no ben wani arki a sten fu MASRA.

₂₆Ne Gado sweri trutru taki A o kiri den,

taki A no ben o meki den tan na libi ini a dreisabana,

₂₇taki A ben o kiri den bakapikin fu den na mindri den tra folku,

èn taki A o panya den go na den tra kondre.

₂₈Di den bigin dini Baal tapu a Peorbergi,

èn nyan sani di ben gi leki ofrandi na dedewan,

₂₉di den bigin tanteri En nanga den sani di den ben e du,

wan takrusiki broko na den mindri.

₃₀Ma Pinekas kon na mindri,

dan a siki tapu di ben e kiri den.

₃₁Gado si dati leki wan bun sani,

fu têgo, fu alaten.

₃₂Den meki Gado ati bron na den watra fu Meriba,

fu den ede sani no waka bun gi Moses.

₃₃Bika di den kaka futu gi a Yeye fu Gado,

Moses taki sani ini atibron, di a no ben mus taki.

₃₄Den no kiri den tra folku puru na pasi tu,

den folku di Gado ben taigi den fu puru na pasi,

₃₅ma den go moksi nanga den,

èn den go libi leki fa den e libi.

₃₆Den go dini den kruktu gado fu den,

di poti den ini bigi problema.

₃₇Den gi den manpikin nanga den umapikin fu den

leki ofrandi na takruyeye.

₃₈Den meki brudu lon fu soso,

a brudu fu den eigi manpikin nanga umapikin fu den,

di den tyari leki ofrandi na den kruktu gado fu Kanaan,

dan so den pori a kondre nanga a brudu di lon.

₃₉Den doti densrefi tu nanga den sani di den du,

den huru gi Gado nanga den wroko fu den.

₄₀Ne MASRA ati bron tapu a pipel fu En,

A si a pipel di A teki gi ensrefi leki wan groskin sani.

₄₁A gi den abra ini a makti fu tra folku,

meki den sma di no ben lobi den srefsrefi

tiri den.

₄₂Den feyanti fu den ben pina den,

èn den ben mus boigi gi a makti fu den.

₄₃Furu leisi A ferlusu den,

ma den ben tan kaka den futu,

èn so den ben e sungu gwe moro nanga moro

ini a kruktudu fu den.

₄₄Ma A ben e luku den ini den benawtu,

te A ben yere fa den ben e dyeme.

₄₅Dan A ben e memre a ferbontu fu En fu den ede,

A bigi lobi fu En ben meki A sari den.

₄₆Dan A ben meki taki den sma di tyari den gwe leki srafu

sori den sari-ati.

₄₇Ferlusu wi MASRA, Gado fu wi,

tyari wi kon na wan baka fu mindri den tra folku,

fu wi prijse a santa nen fu Yu,

fu meki bigi gi a grani fu Yu.

₄₈Prijse MASRA, a Gado fu Israel,

prijse En fu têgo èn ala ten.

Meki a heri pipel piki taki:

“Amen! Haleluya!”