Dag 234 van 365- Psalm 110-112 en 1 Korintiërs 5

Na so MASRA taigi mi Masra:

“Kon sidon na Mi let'anu sei,

Mi o poti den feyanti fu yu

leki wan futubangi na yu futu.”

₂Fu Sion MASRA e langa a kownutiki fu yu go moro fara,

yu o abi makti abra den feyanti fu yu.

₃Sondro dwengi a folku o tnapu klar'klari

te yu o hari go na feti.

Te a dei e broko den moro tranga yonkuman

e opo kon na yu na ini santa krosi.

₄MASRA ben meki wan sweri

èn A no o teki baka san A ben taki.

A ben taki: “Yu na priester fu têgo

na a fasi fu Melkisedek.”

₅MASRA tnapu na yu let'anu sei.

Te En ati bron, A e masi den kownu.

₆A e leisi strafu gi den folku,

dedeskin e didon tapu makandra

A e broko a makti fu den ala sei na grontapu.

₇Te a de na pasi, A e dringi fu a kriki sei a pasi,

dan A e opo En ede.

₁Haleluya! Mi sa prijse MASRA nanga mi heri ati,

prijse En makandra nanga den sma di e libi leki fa a fiti.

₂MASRA e du bigi wroko,

den sma di abi prisiri nanga den, e ondrosuku den.

₃Den sani di A e du e sori a grani nanga a glori fu En,

A du di A e du sani na tapu wan leti fasi na fu têgo.

₄A poti wan dei pe a pipel mus memre den wondru fu En,

MASRA abi bun-ati èn A sori sari-ati.

₅A gi nyanyan na den sma di e lespeki En,

A memre a ferbontu fu En fu têgo.

₆A sori a pipel fu En a bigi krakti fu En,

èn A gi den a kondre fu den tra folku.

₇Den sani di A e du na tru sani èn den fiti fu du,

ala den komanderi fu En de fu fertrow,

₈den o tan fu têgo èn ala ten.

A meki den tapu wan tru fasi fu sori taki A de fu fertrow.

₉A tyari ferlusu gi a pipel fu En,

a ferbontu di A meki na fu têgo,

a nen fu En santa èn a fiti fu kisi lespeki.

₁₀Lespeki gi MASRA na a fundamenti fu koni,

ala sma di e du san a e taki abi wan krin ferstan.

A grani fu En na fu têgo!

₁Haleluya! A sma di e lespeki MASRA,

a sma di abi prisiri fu du san den gebod fu En e taki,

na wan blesi sma.

₂Den pikin fu en sa abi makti ini a kondre,

Gado sa blesi den bakapikin fu den sma di e libi leki fa a fiti.

₃Bogobogo gudu sa de ini a oso fu en,

a e du ala ten san bun ini Gado ai.

₄A de leki wan faya ini a dungru

gi den sma di e libi leki fa a fiti,

a e sori den en bun-ati,

a e sori den sari-ati

èn a e libi bun nanga den.

₅Sani sa go bun nanga a sma di abi sari-ati nanga trawan,

di e leni trawan moni,

èn di e wroko en moni na tapu wan leti fasi.

₆Noti sa miti en,

fu têgo den sa memre a sma di bun ini Gado ai.

₇Gi takru nyunsu a no sa frede,

en ati no o beifi,

bika a e tan fertrow tapu MASRA.

₈En ati no o de na dyompo, a no e frede,

teleki a si fa den feyanti fu en fadon.

₉A lobi prati san a abi,

a e gi mofinawan,

a e du ala ten san bun ini Gado ai,

a makti nanga a grani fu en sa kon bigi moro nanga moro.

₁₀Ogri-ati sma e si dati èn den e nyan den niri,

den e kaw na tapu den tifi èn den e lasi ala howpu,

bika den ogri-ati sma no man du

san den ben abi na ini prakseri fu du.