1Un teki mi leki eksempre, leki fa mi teki Kristus leki eksempre.
Sori lespeki gi yu basi
2Mi e prijse unu taki un e tan memre mi ini ala sani, èn taki un e hori unsrefi na den sani san mi leri unu.
3Ma mi wani fu un sabi disi ete: Dati Kristus na a basi fu ibri man, taki a man na a basi fu en uma, èn taki Gado na a basi fu Kristus. 4Dat' meki ibri mansma di abi wan sani tapu en ede te a e begi, noso te a e taki san Gado gi en fu taki, e saka a nen fu en basi. 5Ma ibri umasma di no abi wan sani tapu en ede te a e begi, noso te a e taki san Gado gi en fu taki, e saka a nen fu en basi. A kon de leki wan umasma di piri en ede. 6Bika efu wan umasma no e tapu en ede, dan a kan koti en edewiwiri tu. Ma efu na wan syen gi wan umasma fu koti en edewiwiri noso fu piri en ede, dan a musu e tapu en ede.
7Wan mansma no mus tapu en ede. Bika en na a prentyi nanga a glori fu Gado. Ma a umasma na a glori fu en masra. 8Bika Gado no teki a uma fu meki wan mansma, ma A teki wan mansma fu meki wan uma. 9Gado no ben meki a man fu a uma ede, ma na a uma A ben meki fu a man ede. 10Dat' meki wan umasma mus tapu en ede, owktu fu den engel ede. 11Ma na ini Masra a umasma no de noti sondro a mansma, èn a mansma no de noti sondro a umasma. 12Bika leki fa Gado teki a man fu meki a uma, na so umasma e meki mansma tu. Ma na Gado meki ala sani. 13Un srefi luku, dan un taigi mi efu a bun fu wan umasma e begi Gado sondro fu tapu en ede. 14A fasi fa Gado meki ala sani e sori wi taki na wan syen gi wan mansma efu a e kweki langa wiwiri. 15Ma na wan grani gi wan umasma efu a abi langa wiwiri. Bika Gado gi en langa wiwiri fu tapu en ede.
16Efu wan sma wani hari taki nanga mi fu dati, mi wani taigi en taki wi nanga den gemeente fu Gado no abi no wan tra gwenti.
