Den bigi wroko fu Gado
1Haleluya! Prijse a nen fu MASRA,
knekti fu MASRA, un prijse En,
2unu di e tnapu ini a oso fu MASRA,
unu di tnapu tapu den pren fu a oso fu Gado.
3Prijse MASRA, bika A bun,
singi fu a nen fu En, bika na wan tumsi switi nen.
4Na MASRA srefi ben teki Yakob,
A teki Israel gi Ensrefi.
5Mi sabi taki MASRA bigi,
taki MASRA bigi moro ala gado.
6MASRA e du san A wani
ini heimel nanga tapu grontapu,
ini den se nanga den moro dipi pisi fu den se.
7A e tyari wolku kon fu den moro fara uku fu grontapu,
A e meki faya koti,
A e meki alen fadon,
A e meki winti wai kmopo fu den maksin fu En.
8Na En kiri den fosi pikin fu den sma fu Egipte,
di fu libisma nanga di fu meti.
9Na En ben meki marki nanga wondru psa ini yu, Egipte,
Fu Farao nanga den knekti fu en si.
10Na En ben wini bigi folku,
kiri kownu di ben abi bigi makti:
11Sikon, a kownu fu den Amoritisma,
Og, a kownu fu Basan,
nanga ala den kownu fu Kanaan.
12Dan A teki a kondre fu den gi a pipel fu En,
A gi en na Israel, a folku fu En, taki na fu den.
13MASRA, a nen fu Yu e tan fu têgo,
MASRA, noiti sma o man tapu fu taki fu Yu.
14MASRA e sorgu taki a pipel fu En e kisi en leti,
A e sorgu gi den knekti fu En.
15Den gado fu den tra folku meki fu solfru nanga gowtu,
sani di libisma meki nanga den anu.
16Den abi mofo, ma den no man taki,
den abi ai, ma den no e si,
17den abi yesi, ma den no e yere,
no wan libibro no de ini den.
18Den sma di meki den, o kon tan leki den,
ala sma di e fertrow na den tapu.
19Sma fu Israel, un prijse MASRA!
Bakapikin fu Aaron, un prijse MASRA!
20Bakapikin fu Levi, un prijse MASRA!
Un di abi bigi lespeki gi MASRA, un prijse MASRA!
21Meki wi prijse MASRA ini Sion,
En, di abi En tanpresi ini Yerusalem.
Haleluya!
