Dag 245 van 365- Psalm 137-139 en 1 Korintiërs 13

₁Na den liba fu Babel

wi ben sidon e krei,

te wi ben e prakseri Sion.

₂Na den wilgenbon drape

wi ben anga den citer fu wi.

₃Den wan di ben hori wi leki strafuman

ben wani fu wi singi gi den.

Den wan di ben e pina wi

ben wani fu wi meki prisiri. Den taki:

“Singi wan singi fu Sion gi wi.”

₄Fa wi man singi wan singi fu MASRA,

na ini wan dorosei kondre?

₅Tye Yerusalem, efu mi fergiti yu,

meki mi let'anu fergiti tu fa fu prei a citer.

₆Meki mi tongo fasi ini mi mofo

efu mi fergiti yu,

efu mi no si yu leki a sani di e gi mi a moro bigi prisiri.

₇MASRA, no fergiti san den Edomitisma du

a dei di feyanti ben teki Yerusalem abra,

fa den ben e bari: “Broko a foto, broko a foto,

broko en trowe na gron.”

₈Babel, den o broko yu srefi trowe na gron tu.

A sma di o pai yu baka fu san yu du nanga wi,

na wan blesi sma.

₉A sma di o grabu den pikin fu yu,

èn naki den kiri na den bergiston,

na wan blesi sma.

Mi wani prijse Yu nanga mi heri ati,

mi sa singi gi Yu na fesi den gado.

₂Mi sa boigi nanga mi fesi go na a santa tempel fu Yu,

èn prijse Yu fu a lobi fu Yu,

nanga a bow di mi kan bow na Yu tapu,

bika Yu pramisi bigi sani

fu Yu nen ede.

₃Di mi ben kari Yu, Yu piki mi,

Yu ben gi mi howpu baka nanga nyun krakti.

₄MASRA, ala den kownu fu grontapu sa prijse Yu,

te den yere fu den pramisi di Yu gi wi.

₅Den sa singi fu den sani di MASRA e du. Den sa taki:

“A glori fu MASRA bigi!

₆MASRA bigi moro ala sani!

A e luku fu den sma di abi sakafasi,

den sma di abi heimemre A si fu fara.”

₇Te mi de ini bigi benawtu,

Yu e hori mi na libi,

Yu e tapu den feyanti fu mi

di e kon nanga atibron na mi tapu,

èn Yu e ferlusu mi nanga Yu krakti.

₈MASRA sa du san A pramisi.

Tye MASRA, a lobi fu Yu na fu têgo.

No poti a wroko fu Yu anu na wan sei.

MASRA, Yu e ondrosuku mi èn Yu sabi mi,

₂Yu sabi mi te mi e sidon,

Yu sabi mi te mi e opo,

fu fara Yu sabi den prakseri fu mi.

₃Yu e luku te mi e wroko anga te mi e teki bro,

Yu sabi ala san mi e du.

₄MASRA, no wan wortu no de ini mi mofo

di Yu no sabi.

₅Yu lontu mi fu bakasei nanga fu fes'sei,

Yu poti Yu anu na mi tapu.

₆Mi no man ferstan a fasi fa Yu sabi mi,

a dipi tumsi gi mi, mi no man grabu en.

₇Pe mi ben o man go fu Yu no si mi?

Pe mi ben o man lowe go gi Yu?

₈Efu mi kren go na heimel, Yu de drape,

efu mi saka go ini dedekondre, Yu de drape tu.

₉Awinsi mi frei go te pe a son e opo,

noso mi go libi psa den moro fara se,

₁₀drape srefi Yu ben o tiri mi,

drape srefi Yu let'anu ben o grabu mi hori.

₁₁Efu mi taki: “Meki dungru tapu mi,

meki a faya lontu mi kon dungru,”

₁₂dan a dungru srefi no man kibri mi gi Yu,

a neti ben o kon krin leki dei

a dungru ben o kon krin leki faya.

₁₃Na Yu meki ala sani fu mi,

na Yu tyari ala pisi fu mi kon na wan

na ini mi m'ma bere.

₁₄Mi e prijse Yu fu a ferwondru fasi fa Yu meki mi,

den sani di Yu e du bigi fu tru,

mi sabi dati bunbun.

₁₅Den bonyo fu mi no ben kibri gi Yu,

di Yu ben e meki mi sondro fu wan sma sabi,

dipi na ondro gron.

₁₆Den ai fu Yu ben si mi di mi skin ben gersi not'noti ete,

ala den dei fu mi ben skrifi poti kba ini a buku fu Yu,

aladi no wan fu den dei ben meki srefi ete.

₁₇Gado, o dipi den prakseri fu Yu de,

ofuru den de.

₁₈Mi no man teri den, den furu moro santi,

efu mi wiki mi de na Yu ete.

₁₉Tye Gado, mi e winsi taki Yu puru den ogri-ati sma na pasi,

unu di e meki brudu lon,

un tan fara fu mi.

₂₀Den e taki takru fu Yu,

den feyanti fu Yu e taki wan lo ogri fu Yu.

₂₁MASRA, mi no lobi den sma di no lobi Yu,

mi no wani si den sma srefsrefi di no wani du Yu wani.

₂₂Mi no man si den na ai srefsrefi,

mi e si den leki feyanti.

₂₃Ondrosuku mi, mi Gado, fu Yu kan sabi mi ati,

tesi mi, fu Yu kan sabi den prakseri fu mi.

₂₄Luku efu mi no teki wan kruktu pasi,

èn yepi mi fu teki a pasi di e tyari mi kon na Yu.