Dag 246 van 365- Psalm 140-142 en 1 Korintiërs 14:1-19

₂Tye MASRA, ferlusu mi fu den sma di e du ogri,

kibri mi gi den man di e du sani nanga tranga.

₃Soso ogri den e prakseri fu du,

heri dei na soso trobi den e meki.

₄A tongo fu den de leki di fu takru sneki

den sani di den e taki e kiri leki te takru sneki beti yu. sela

₅Tye MASRA, no meki mi fadon ini anu fu ogri-ati sma,

kibri mi gi den man di e du sani nanga tranga,

den de nomonomo fu puru mi na pasi.

₆Den heimemre sma seti sani fu fanga mi,

den hari titei span na tapu mi pasi,

diki olo gi mi fu mi fadon na ini. sela

₇Mi taigi MASRA taki: “Na Yu na mi Gado

tye MASRA, arki mi te mi e begi Yu trangatranga.

₈MASRA Masra, mi tranga Ferlusuman,

Yu e kibri mi te mi de ini bigi feti.

₉Tye MASRA, no meki den ogri-ati sma kisi san den wani,

no meki den sani di den seti fu du psa trutru tu,

te den opo fu feti mi. sela

₁₀Meki a ogri di den poti fu du nanga mi,

psa nanga densrefi.

₁₁Meki faya krofaya fadon na den tapu,

meki faya bron den,

meki den fadon ini olo fu den no opo kon moro.

₁₂Presi no mus de ini a kondre

gi den sma di e taki takru fu trawan,

meki ogri miti den sma di e du sani nanga tranga.”

₁₃Mi sabi taki MASRA e feti gi den mofinawan te den de na krutu,

taki A e meki den pôtiwan kisi den leti.

₁₄Fu tru, den sma di bun ini Yu ai sa prijse Yu,

den sma di e libi leki fa a fiti sa tan krosbei fu Yu.

Tye MASRA, na Yu mi e kari,

kon es'esi kon yepi mi,

kaka Yu yesi te mi e kari Yu.

₂Meki a begi fu mi de na Yu fesi leki wan ofrandi nanga wan switi smeri,

meki den anu fu mi di mi e opo,

de leki a ofrandi di e bron te neti.

₃MASRA, yepi mi fu mi taki bun sani nanga mi mofo,

èn yepi mi fu mi hori en te a no de fanowdu fu taki.

₄No meki a ati fu mi angri fu du ogri,

no meki mi go du ogri-ati sani,

nanga sma di e du kruktudu,

yepi mi fu mi no teki prati ini den fesa fu den.

₅Efu wan sma di bun ini Yu ai naki mi,

mi e si en leki wan bun sani,

efu a piri ai gi mi,

dan dati de leki oli tapu mi ede.

Efu ogri-ati sma e pina mi, mi sa tan begi.

₆Awinsi sma sa fringi den edeman fu den fu wan bergi kon na gron,

fu a mofo fu mi den no o yere no wan spotu.

₇Leki fa sma e drai a doti èn panya en,

na so den bonyo fu wi didon na grebimofo.

₈Ma MASRA Masra, mi e tan hori mi ai na Yu tapu,

no meki mi dede tapu wan ogri fasi,

bika na Yu mi e kibri.

₉Kibri mi gi den sani di den seti fu fanga mi,

gi den olo di den sma di e du kruktudu diki,

fu mi fadon na ini.

₁₀Meki den ogri-ati sma fadon ini den srefi olo di den diki,

den alamala,

ma meki mi kmopo ini den anu.

₂Trangatranga mi e kari MASRA,

trangatranga mi e begi MASRA.

₃Mi e loktu mi ati na En fesi,

taigi En a benawtu ini san mi de.

₄Te mi lasi ati srefsrefi,

Yu sabi a pasi di mi mus teki.

Den feyanti fu mi seti sani fu fanga mi

tapu a pasi di mi mus waka.

₅Mi e luku na mi let'sei

ma mi no e si no wan sma fu yepi mi,

no wan presi de pe mi kan lon go kibri,

no wan sma e aksi fa a e go nanga mi,

₆Na Yu mi e kari, MASRA,

mi e taigi Yu taki: “Na Yu na mi kibripresi,

na Yu na ala sani san mi abi dyaso na grontapu.”

₇Arki te mi e tan begi,

bika mi kon swaki srefsrefi,

ferlusu mi fu den sma di de nomo na mi baka,

bika den tranga moro mi.

₈Puru mi na ini a pina ini san mi de,

fu mi prijse Yu nen,

na mindri fu den sma di bun ini Yu ai

bika na wan bigi bun Yu du gi mi.