Dag 247 van 365- Psalm 143-145 en 1 Korintiërs 14:20-40

Tye MASRA, yere mi begi,

arki te mi e begi tangitangi,

piki mi, bika mi kan bow na Yu tapu

èn Yu e du sani nanga leti.

₂No tyari Yu knekti go na krutu,

bika no wan libisma no de sondro fowtu ini Yu ai.

₃Mi feyanti de nomonomo na mi baka,

a e traputrapu mi na gron,

a e meki mi tan ini dungru presi,

leki den sma di dede bun langa kba.

₄Na dat' meki mi lasi ati so,

mi no sabi srefsrefi moro san fu du.

₅Mi e prakseri fosten baka,

mi e prakseri den sani di Yu du,

mi e prakseri den bigi wroko fu Yu anu.

₆Mi e opo den anu fu mi go na loktu gi Yu,

mi e angri fu Yu leki fa drei gron e angri fu watra. sela

₇Piki mi es'esi, MASRA, bika mi e dede,

no kibri Yu fesi gi mi,

noso mi o de leki den sma di e dede go ini den grebi.

₈Memre mi mamanten na a lobi fu Yu,

bika tapu Yu mi e fertrow,

sori mi a pasi di mi mus teki,

bika na Yu mi e kon nanga mi begi.

₉Ferlusu mi fu den feyanti fu mi, MASRA,

na Yu mi e lon kon kibri.

₁₀Leri mi fu du Yu wani, bika Yu na mi Gado,

meki a bun Yeye fu Yu tyari mi waka

tapu wan pasi sondro problema.

₁₁Hori mi na libi, MASRA, fu Yu nen ede,

puru mi ini a benawtu ini san mi de,

bika Yu e du sani nanga leti.

₁₂Puru ala den feyanti fu mi na pasi,

fu Yu lobi ede,

tyari wan kba kon na ala den sma di e pina mi,

bika mi na Yu knekti.

Mi e prijse MASRA, a Trangawan,

di e leri mi fa mi mus feti,

di e meki mi anu klari gi feti.

₂Na En na a Wan di e sori mi lobi,

na En na mi tranga kibripresi,

a presi pe noti no man miti mi

na En na mi Ferlusuman.

A de leki wan schild di e kibri mi,

na En e meki folku saka densrefi gi mi.

₃MASRA san na wan libisma tak' Yu e luku fu en,

èn san na wan libisma tak' Yu e prakseri en?

₄A libi fu wan sma de leki wan bro,

leki wan schaduw di e hari psa.

₅MASRA, skoifi a heimel opo èn saka kon,

fasi den bergi, meki den puru smoko.

₆Fringi a faya fu Yu di e koti na loktu meki den feyanti bruya,

sutu den peiri fu Yu èn meki den lon panya.

₇Langa Yu anu kmopo fu loktu,

yepi mi, ferlusu mi puru ini dipi watra,

ini a makti fu doroseisma,

₈fu den di e taki soso lei,

awinsi den opo den let'anu na loktu tak' na tru den e taki.

₉Tye mi Gado, wan nyun singi mi wani singi gi Yu,

mi o singi en gi Yu nanga a harp di abi tin snaar,

₁₀Yu, di e meki kownu wini feti,

yu di e ferlusu Yu knekti David na ini bigi feti.

₁₁Yepi mi, ferlusu mi puru ini a makti fu doroseisma,

fu den di e taki soso lei,

awinsi den opo den let'anu na loktu tak' na tru den e taki.

₁₂Meki den manpikin fu wi de leki yongu bon,

di e gro hei go na loktu ini den yongu yari,

meki den umapikin fu wi de leki steifi ukupostu gi wan kownu-oso,

nanga moimoi sani tyerfi na den tapu.

₁₃Span den maksin fu wi,

meki ala sortu nyanyan sani de ini den,

meki den skapu nanga krabita fu wi kon furu moro nanga moro,

taki den no de fu teri.

₁₄Meki den kaw fu wi de fatufatu,

no meki feyanti broko a skotu fu wi foto fu kon feti wi,

no meki den tyari no wan fu wi gwe leki strafuman,

no meki no wan babari nanga dyeme de fu yere na tapu den pren.

₁₅A pipel pe sani e waka so

na wan blesi pipel,

èn a pipel di abi MASRA leki a Gado fu en

na wan blesi pipel.

Mi sa taki fa Yu bigi, mi Gado, Yu di de Kownu,

mi sa prijse a nen fu Yu fu têgo èn ala ten.

₂Ala dei mi sa prijse Yu,

gi a nen fu Yu grani fu têgo èn ala ten:

₃“MASRA bigi èn A fiti fu kisi grani trutru,

no wan sma man ferstan fa A bigi.”

₄Fu têgo wi sa prijse den wroko fu Yu,

èn taki fu den bigi sani di Yu du.

₅Mi sa taki fu a bigi glori fu Yu,

nanga den bigi wondru di Yu du.

₆Sma o taki fu den bigi sani di Yu du,

èn mi o ferteri fa Yu bigi.

₇Den sa ferteri fu a bigi bun fu Yu,

èn prisiri fu a fasi fa Yu e du sani nanga leti.

₈“MASRA abi bun-ati nanga sari-ati,

A abi langa pasensi nanga bigi lobi.

₉MASRA bun gi ala sma,

èn A abi sari-ati gi ala sani di A meki.”

₁₀Ala den sani di Yu meki sa gi Yu grani, MASRA,

den sma di e tan waka na Yu baka sa prijse Yu.

₁₁Den o taki fu a krakti fasi fa Yu e tiri leki kownu,

èn ferteri fu ala san Yu man du,

₁₂dan so libisma sa yere fu den bigi sani di Yu du,

yere fu a krakti fasi fa Yu e tiri leki kownu.

₁₃Yu na kownu fu têgo,

fu ala ten Yu o tiri libisma.

₁₄MASRA e kraka ala sma di lasi ati,

A e yepi ala sma di de ini bigi problema.

₁₅Ala sma e luku fu Yu nanga wan ferwakti,

èn Yu e gi den nyanyan a yuru di den abi en fanowdu.

₁₆Yu e gi den moro leki san den abi fanowdu,

Yu e gi ala sani di e libi, san den e angri.

₁₇Ini ala sani di A e du

MASRA e du sani na tapu wan leti fasi,

a lobi fu En de fu si ini ala san A e du.

₁₈MASRA tnapu klari fu yepi ibriwan di e kari En,

ibriwan di e kari en nanga wan krin ati.

₁₉A e gi den sma di e lespeki En san den e angri,

a e yere te den e bari suku yepi èn A e ferlusu den.

₂₀MASRA e kibri ala sma di lobi En,

ma A e puru den ogri-ati sma na pasi.

₂₁Mi sa gi MASRA grani nanga mi mofo,

èn meki ala sani di e libi prijse a santa nen fu En

fu têgo èn ala ten.