A prakseri fu a buku disi
1Disi na den leri fu kownu Salomo fu Israel, a manpikin fu David. 2Den leri disi na fu gi wi koni, na fu sori wi fa wi mus libi èn fu yepi wi fu wi kan ferstan sani krin. 3Den e leri wi fa wi mus libi fu kon koni, fa wi kan du Gado wani, fu libi bun èn fu libi krin. 4A e meki den sma di no sabi furu, kon srapu, a e gi yongusma sabi èn leri den fa fu teki den yoisti besroiti. 5Meki den koniwan arki fu den kon moro koni. Meki a yepi den sma di e ferstan sani krin, fu den ferstan sani moro krin. 6Dan den o man ferstan a leri disi nanga den dipi sani, den sani di koniman e leri nanga den raitori fu den. 7Lespeki gi MASRA na a fundamenti fu sabi, ma don sma e hari den noso gi koni, nanga te trawan e sori den fa den mus libi.
Wantu rai gi yonkuman
8Mi boi, arki te yu p'pa e leri yu fa yu mus libi,
no poti den sani na wan sei di yu m'ma e leri yu.
9A o de leki wan kroon tapu yu ede,
leki wan keti na yu neki.
10Mi boi, te sondusma e suku fu kori yu,
yu mus kaka yu futu gi den.
11No arki den te den e taki: “Kon nanga wi. Meki wi go meki brudu lon.
Meki un go luru wan sma di no du noti èn kiri en fu soso.
12Meki un swari en libilibi leki fa dedekondre e du,
meki un swari en heriheri leki fa sma e go ini den grebi.
13Dan un o feni ala den gudu fu en,
un o furu un oso nanga den sani di un o teki fu en.
14Kon, teki prati nanga unu.
Un o prati ala sani makandra.”
15Mi boi, no teki waka nanga den,
no du den sani di den e du.
16Bika den gaw fu go du ogri,
es'esi den e meki brudu lon.
17Te fowru si taki sma span net gi den,
den no e frei go fasi na ini.
18Ma den sma disi e fromu na ini den eigi net,
èn den e lasi den libi na ini.
Den ben go fu go kiri trawan,
ma na densrefi e dede.
19Na disi e psa nanga ala sma di e du ogri fu kon na den moni,
den e pai fu en nanga den libi.
Koni e gi warskow
20Koni e bari bun tranga tapu strati,
a e opo en sten na wowoyo,
21a de fu yere tapu den uku fu den moro dyugudyugu strati,
na a bigi doro fu a foto, pe sma e kon makandra, a e taki:
22“Unu di no sabi furu, olanga un o tan bribi ala sani?
Un di e spotu, olanga yu o tan meki spotu?
Un don sma, olanga a o de so taki un no lobi sabi srefsrefi?
23Efu un sa gi yesi na den warskow fu mi,
dan mi sa gi un ala a koni di mi abi,
èn mi o meki un ferstan den sani di mi e taki.
24Ma un no ben wani arki di mi ben e kari,
no wan sma ben wani luku di mi ben e langa mi anu.
25Un poti ala den rai fu mi na wan sei,
èn un drai un baka gi den warskow fu mi.
26Na fu dat'ede mi o lafu now te a ongoloku o miti unu,
mi o teki un meki spotu te a ogri o miti unu.
27Te a ogri o kon na un tapu leki wan tranga winti,
a ongoloku leki wan draiwinti,
te nowtu nanga problema o kon na un tapu,
28dan un o bari kari mi, ma mi no o piki,
un o suku mi, ma un no o feni mi.
29Bika den no lobi sabi srefsrefi,
èn den no teki a besroiti fu lespeki MASRA.
30Un no ben teki den rai tu di mi gi unu,
èn ala den warskow fu mi un poti na wan sei.
31Dat' meki un o piki den froktu fu den sani di un du,
èn un o sidon nanga ala den sani di un poti fu du.
32Bika a arki di den sma di no sabi furu no wani arki,
nanga a span di don sma no e span nanga a libi,
o kiri den.
33Ma a sma di e arki mi, o libi ini freide,
a no abi fu frede taki wan ogri o miti en.”
