Dag 254 van 365- Spreuken 10-12 en 2 Korintiërs 4

Wan boi di koni e gi en p'pa prisiri,

ma wan boi di don e meki en m'ma sari.

₂Gudu di yu no kisi na tapu wan leti fasi, no o du yu bun,

ma fu du a wani fu Gado e kibri yu fu yu no dede.

₃MASRA no e meki angri kiri wan sma di bun ini en ai,

ma A e tapu ogri-ati sma fu den no kisi san den e angri.

₄Sma di lesi fu wroko o pina,

ma sma di e wroko tranga o gudu.

₅Wan koni manpikin e koti nyanyan te a ten fu koti nyanyan doro,

ma wan manpikin di e sribi ini a ten dati, e gi den sma fu en syen.

₆Bogobogo blesi e kon tapu den sma di bun ini Gado ai,

ma ogri e kibri ini den wortu fu ogri-ati sma.

₇Sma di bun ini Gado ai e libi wan bun nen na baka,

ma sma e fergiti a nen fu ogri-ati sma es'esi.

₈Wan koni sma e teki rai,

ma wan sma di e taki dondon sani, o broko en neki.

₉Wan sma tapu san trawan no man sori finga,

e waka en pasi sondro frede,

ma wan sma di e kori trawan, o kisi en pai.

₁₀Wan sma di e bedrigi trawan, e tyari sari,

ma wan sma di e taki dondon sani, o broko en neki.

₁₁Den wortu fu sma di bun ini Gado ai

de leki wan watrabron di e gi libi,

ma ogri e kibri ini den wortu fu ogri-ati sma.

₁₂Sma di no man si trawan na ai, o meki trobi nanga den nomonomo,

ma sma di lobi trawan e gi den pardon te den meki fowtu.

₁₃Wan sma di abi ferstan e taki nanga koni,

ma den sani di wan sma e taki di no abi ferstan e meki a kisi fonfon.

₁₄Koni sma no e taki tumsi fu sori taki den koni,

ma den sani di don sma e taki na soso ogri.

₁₅A gudu fu wan guduman e kibri en fu sani no miti en,

ma a bigi ogri fu wan pôtisma na a pôtifasi fu en.

₁₆A pai fu wan sma di bun ini Gado ai na taki a e abi langa libi,

den sani di wan ogri-ati sma e abi e meki a e sondu.

₁₇A sma di e arki te trawan e warskow en, sa libi langa,

ma a sma di no lobi srefsrefi te trawan e warskow en, e lasi pasi.

₁₈A sma di no e meki wan trawan si taki a no lobi en srefsrefi,

na wan leiman,

èn a sma di e panya lei fu trawan,

na wan don sma.

₁₉Wan sma di e taki furu o taki sani di a no mus taki,

ma wan sma di koni no e taki tumsi furu.

₂₀Den sani di wan sma di bun ini Gado ai e taki,

abi warti leki a moro bun solfru,

ma den sani di ogri-ati sma e prakseri no warti noti.

₂₁Den sani di wan sma di bun ini Gado ai e taki, de wan yepi gi furu,

ma don sma e dede fu di den no abi ferstan.

₂₂Na den blesi fu MASRA e meki wan sma kon gudu,

tranga wroko no e meki yu kon moro gudu.

₂₃Leki fa wan don sma e prisiri nanga den ogri di a e du,

na so wan koni sma e prisiri nanga a ferstan di a abi.

₂₄A sani di ogri-ati sma e frede, na dati e miti den,

ma Gado e gi sma di bun ini En ai san den e angri.

₂₅Baka wan tranga winti a ogri-ati sma no de fu feni moro,

ma sma di e libi bun no e seki.

₂₆Leki fa sani tapu asin e swa tifi èn smoko e bron ai,

na so wan basi e fuga nanga wan knekti di lesi.

₂₇Lespeki gi MASRA e gi langa libi,

ma den yari fu ogri-ati sma e syatu.

₂₈A howpu di sma di bun ini Gado ai abi, e gi den prisiri,

ma a howpu di ogri-ati sma abi no e du noti gi den.

₂₉MASRA de wan tranga kibripresi gi sma di e libi leki fa a fiti,

ma sma di no e du a wani fu Gado, A e puru na pasi.

₃₀Sma di bun ini Gado ai no e seki kmoto noiti fu den presi,

ma ogri-ati sma no o tan na grontapu.

₃₁Den sani di den sma di bun ini Gado ai e taki, furu nanga koni,

ma a tongo di e lei den sa koti puru.

₃₂Wan sma di bun ini Gado ai, sabi san bun fu taki,

ma ogri-ati sma e taki soso lei.

₁Wan wegi di no soifri na wan groskin sani gi MASRA,

ma wan soifri wegi e gi En prisiri.

₂Wan heimemre sma e kisi syen es'esi,

ma wan sma nanga sakafasi na wan koni sma.

₃Den sma di e libi leki fa a fiti e meki bunfasi tyari den waka,

ma a bedrigifasi fu den sma di no e waka na Gado baka, o kiri den.

₄Tapu a dei di Gado o strafu libisma, gudu no o yepi no wan sma,

ma fu du a wani fu Gado e kibri yu gi dede.

₅Fu du a wani fu Gado e opo pasi gi a sma di e libi krin,

ma a ogri di ogri-ati sma e du e meki den broko den neki.

₆Fu du a wani fu Gado e kibri den sma

di e libi leki fa a fiti,

ma den sma di no e waka na Gado baka,

e fasi ini den takru lostu fu den.

₇A dede fu wan ogri-ati sma e tyari wan kba tu

na a howpu di a ben abi.

A gudu fu en no man du noti gi en.

₈Gado e ferlusu a sma di bun ini En ai na ini benawtu,

dan A e meki a benawtu dati miti a ogri-ati sma.

₉Wan sma di no e dini Gado

e poti wan trawan nanga en mofo

na ini bigi problema,

ma a koni fu den sma di bun ini Gado ai

e kibri den.

₁₀Den sma fu wan foto e breiti

te a e go bun nanga sma di bun ini Gado ai,

ma te ogri-ati sma e dede,

prisiri e de fu yere alasei.

₁₁A blesi fu den sma di e libi leki fa a fiti

e tyari wan foto go na fesi,

ma den sani di ogri-ati sma e taki

e broko en.

₁₂A sma di e si wan trawan leki noti, na wan sma sondro ferstan,

ma wan sma nanga ferstan e tan tiri.

₁₃Wan sma di e waka taki sani, no man hori kibritori gi ensrefi,

ma wan sma di de fu fertrow, e hori en gi ensrefi.

₁₄Efu wan folku no sabi sortu pasi den mus teki, den o dede gwe,

ma wan foto e gro te furu raiman de.

₁₅Wan sma di tnapu dyaranti gi wan sma di a no sabi, o broko en neki,

ma a sma di no meki pramisi, no abi noti fu frede.

₁₆Wan moi uma e kisi lespeki,

ma na krakti e gi wan man gudu.

₁₇Wan bun sma e du ensrefi bun,

ma wan sma di no sabi san na sari-ati, e du ensrefi ogri nanga dati.

₁₈A moni di ogri-ati sma e meki, no de san den ben prakseri,

ma a pai fu wan sma di bun ini Gado ai, na wan trutru pai.

₁₉A sma di e du a wani fu Gado sa libi langa,

ma a sma di e waka e du ogri, o dede.

₂₀Wan sma nanga wan kruktu ati na wan groskin sani gi MASRA,

ma den sma di e libi leki fa a fiti, e gi En prisiri.

₂₁Soleki fa a no abi misi taki sma di e du ogri o kisi den strafu,

na so a no abi misi taki Gado sa ferlusu den sma di bun ini En ai.

₂₂Wan moi uma sondro ferstan,

de leki wan gowtu linga na a noso fu wan agu.

₂₃Den sani di sma di bun ini Gado ai e angri, e tyari soso bun,

den sani di ogri-ati sma wani, e wiki a atibron fu Gado.

₂₄Wan sma di e gi,

e kisi moro nanga moro,

tra sma e pina moro nanga moro,

aladi den e hori sani na baka di den ben mus gi.

₂₅Sma di e du bun, sa feni bun,

sma di e gi trawan fu dringi, o kisi fu dringi tu.

₂₆A pipel e fluku a sma di e kibri en karu, fu seri en moro diri,

ma blesi e kon tapu a wan di e seri en.

₂₇Gado e prisiri nanga a sma di e meki muiti fu du bun,

ma ogri e miti a sma di lobi du ogri.

₂₈Wan sma di e fertrow na tapu en gudu, de leki drei wiwiri di e fadon,

ma den sma di bun ini Gado ai o gro kon leki yongu pransun.

₂₉A sma di lobi meki trobi ini a famiri, o kisi noti te a gudu o prati,

wan don sma o de srafu fu wan koni sma.

₃₀A fasi fa wan sma e libi di bun ini Gado ai, e gi langa libi,

èn wan koni sma e wini a ati fu trawan.

₃₁Wan sma di bun ini Gado ai e kisi en pai dyaso na grontapu,

na so a ogri-ati sma nanga den sondusma o kisi di fu den tu.

₁A sma di lobi te wan trawan e sori en fa a mus libi,

na wan sma di lobi sabi,

ma a sma di no lobi srefsrefi te wan trawan e warskow en,

na wan don sma.

₂MASRA e sori En bunfasi na a sma di e libi bun,

ma A e krutu a sma di e waka nanga takru prakseri.

₃Ogridu no e hori no wan sma tnapu,

ma a sma di bun ini Gado ai de leki wan bon di beri en rutu dipi.

₄Wan dyadya uma e meki en masra kisi bigi grani,

ma wan uma di e gi en masra syen,

de leki wan takru siki di e nyan en fu inisei.

₅Sma di bun ini Gado ai no e waka nanga takru prakseri,

ma ogri-ati sma e prakseri soso fu bedrigi sma.

₆Den wortu fu ogri-ati sma e meki brudu lon,

ma den sani di wan sma di e libi leki fa a fiti e taki,

e ferlusu sma.

₇Ogri-ati sma e dede gwe

èn den no de fu si moro,

ma a oso fu den sma di bun ini Gado ai

sa tan tnapu.

₈O moro wan sma srapu,

o moro grani a e kisi,

ma den sma di e denki kruktu

tra sma e si fu noti.

₉A moro betre yu no de na teri ma yu abi wan knekti,

dan fu prei bigi ma yu no abi nyanyan.

₁₀Wan sma di bun ini Gado ai e sorgu bun gi den meti fu en,

ma ogri-ati sma no sabi san na sari-ati.

₁₁Wan sma di e wroko en pranigron sa abi furu nyanyan,

ma wan sma di e lon baka sani di no abi warti,

na wan sma di no abi ferstan.

₁₂Wan ogri-ati sma e angri fu kisi gudu tapu wan kruktu fasi,

ma a rutu fu den sma di bun ini Gado ai, e gi bun froktu.

₁₃Wan takru sma e fasi ensrefi nanga en eigi lei,

ma wan sma di bun ini Gado ai e kmopo ini benawtu.

₁₄Na den sani di wan sma e taki kan meki taki a abi en bun.

Den bun sani di wan sma du, e drai kon baka na en.

₁₅Wan don sma e prakseri ala ten taki a abi leti,

ma wan koni sma e teki rai.

₁₆Wan don sma e sori wantron taki en ati e bron,

ma wan sma di koni e hori en mofo te wan trawan afrontu en.

₁₇Wan sma di de fertrow e meki a tru kon na doro,

ma wan sma di no de fu fertrow e lei.

₁₈Den sani di wan sma e taki kan hati wan trawan

leki te wan nefi sutu en,

ma sani di a mofo fu wan koni sma e taki,

e dresi.

₁₉A tru e tan fu têgo,

ma wan lei no abi langa libi.

₂₀A ati fu wan sma di e prakseri ogri, furu nanga bedrigi fasi,

ma den sma di e suku fu tyari freide, abi prisiri.

₂₁No wan ogri sa miti a sma di bun ini Gado ai,

ma soso problema e miti wan ogri-ati sma.

₂₂Sma di e lei de leki wan groskin sani gi MASRA,

ma sma di de fu fertrow, e gi En prisiri.

₂₃Wan sma di koni no e meki ala sma sabi fa a koni,

ma wan sma di don e meki ala sabi fa a don.

₂₄Sma di e wroko tranga e kisi makti,

sma di lesi e tron srafu.

₂₅Sorgu e hebi a ati fu wan sma,

ma wan bun wortu e gi en prisiri.

₂₆A e go moro bun nanga a sma di bun ini Gado ai, dan ibri tra sma,

ma a ogri-ati sma e teki wan pasi di e tyari en go lasi.

₂₇Wan ontiman di lesi no o man fanga noti,

ma wan sma di e wroko tranga e feni furu gudu.

₂₈A sma di e du a wani fu Gado o libi langa,

na wan grati pasi pe dede no de.