Dag 257 van 365- Spreuken 19-21 en 2 Korintiërs 7

₁Wan sma di e pina ma tapu san trawan no man sori finga,

betre moro wan don sma di gwenti lei.

₂A angri fu du wan sani sondro fu abi ferstan fu a sani, no bun,

a sma di lobi fu lon du sani es'esi, o meki fowtu.

₃Na a donfasi fu wan sma e pori en eigi libi,

ma na tapu MASRA en ati e bron.

₄Wan guduman e kisi nyun mati dorodoro,

ma wan pôtiman e lasi den di fu en.

₅Wan sma di e lei gi trawan fesi krutubakra,

o kisi en strafu nomonomo,

wan sma di e ferteri lei, e kisi en pai.

₆Furu sma e meki muiti fu prenspari sma kan lobi den,

ala sma wani de mati fu sma di lobi gi.

₇Efu no wan fu den brada fu wan pôtisma lobi en,

o moro den mati fu en. Den dati e tan fara fu en.

Efu a e suku fu taki nanga den, den no de fu feni.

₈A sma di e meki muiti fu kon koni, lobi en libi,

èn a sma di e du sani nanga ferstan, o feni bun.

₉Wan sma di e lei gi trawan fesi krutubakra,

o kisi en strafu nomonomo,

wan sma di e ferteri lei,

o dede.

₁₀Gudu no fiti wan don sma,

na so a no fiti srefsrefi tu taki wan srafu e tiri heihei man.

₁₁Wan sma di abi ferstan no e kisi atibron es'esi,

a de wan grani gi en fu gi sma pardon di meki fowtu.

₁₂A atibron fu wan kownu, na leki a babari fu wan lew,

ma a bunfasi fu en de leki dow tapu a grasi.

₁₃Wan don pikin na wan bigi problema gi en p'pa,

èn wan uma di lobi meki trobi de leki wan daki di e leki dorodoro.

₁₄Oso nanga gudu yu e kisi fu den bigisma fu yu,

ma wan koni uma na wan kado fu MASRA.

₁₅Lesi e meki sma fadon ini dipi sribi,

èn wan sma di e du sani nanga en ten o tan nanga angri.

₁₆A sma di e libi nanga den rai di a kisi, sa tan na libi.

ma a sma di e si dati leki noti, o dede.

₁₇Efu yu gi wan pôtisma wan sani,

na leki te yu e leni MASRA wan sani.

MASRA sa pai a sma baka fu a bun di a du.

₁₈Fon yu pikin solanga yu e si taki howpu de gi en ete,

ma no fon en te leki yu kiri en.

₁₉A sma di e kisi hebi atibron mus butu,

bika efu yu yepi en wan leisi, yu o abi fu tan yepi en.

₂₀Arki te sma e gi yu rai nanga te sma e warskow yu,

te fu kba yu o kon koni.

₂₁Libisma e waka nanga furu prakseri ini den ede,

ma san MASRA poti fu psa, na dati o psa.

₂₂Libisma abi a angri fu du bun,

a moro betre fu pina dan fu lei fesi krutubakra.

₂₃Sma di e lespeki MASRA e libi langa,

den e sribi switi fu den, sondro fu ogri miti den.

₂₄Awinsi a lesiman dipi en anu go ini wan skarki,

a lesi srefi tumsi fu tyari en go na en mofo.

₂₅Te wan sma di e spotu e kisi fonfon,

den wan di no sabi furu e kon srapu,

efu yu warskow wan sma di srapu,

a e kisi moro sabi.

₂₆A pikin di e naki en p'pa èn di e poti en m'ma na doro,

na wan takru pikin di e tyari syen kon na en tapu.

₂₇Mi boi, efu yu no wani arki den warskow fu mi,

dan yu kan tapu fu arki den bun rai di mi e gi yu.

₂₈Wan sma di no bun fu noti e teki a leti meki spotu

te a tnapu fesi krutubakra,

èn a mofo fu ogri-ati sma e swari kruktudu.

₂₉A strafu fu sma di e spotu e wakti den kba,

so tu a tiki gi a baka fu don sma.

₁A sma di e dringi furu win e bigin meki spotu,

a sma di e dringi tranga sopi e bigin meki babari,

a sma di e dringi drungu, no abi ferstan.

₂A hebi atibron fu wan kownu, na leki a babari fu wan lew,

a sma di wiki a atibron fu en, e prei nanga en libi.

₃Na wan grani gi wan sma te a no e hari taki,

ma don sma lobi a sani dati.

₄Wan lesiman no e drai doti te a ten doro fu du dati,

ma te a ten fu koti nyanyan doro

a e aksi ensrefi fa a du kon

taki en no abi.

₅Den prakseri fu wan sma de leki dipi watra,

ma wan sma nanga ferstan sabi fa fu tyari den kon na doro.

₆Furu sma feni taki den de fu fertrow,

ma wan sma di de fu fertrow trutru, tranga fu feni.

₇Wan sma di bun ini Gado ai e waka a bun pasi,

Gado e blesi den pikin fu en di e kon na en baka.

₈Te wan kownu o koti krutu,

a man yagi ala ogri, soso fu luku nanga en ai wawan.

₉Suma man taki: “Mi abi wan krin konsensi,

mi no abi no wan sondu?”

₁₀Tu sortu wegi, nanga tu sortu markikan,

wan fu seri sani, nanga wan fu bai sani,

den ala tu de wan groskin sani gi MASRA.

₁₁Yu kan sabi kba fa wan pikin tan, efu yu luku den sani di a e du.

Den sani di a e du e taigi wi efu na wan bun pikin di de fu fertrow.

₁₂A yesi di e yere nanga a ai di e si,

na MASRA meki ala tu.

₁₃No lobi sribi tumsi noso yu o kon tron wan pinaman,

ma opo go wroko, dan yu o abi nofo nyanyan.

₁₄A sma di e bai e taki: “Disi no bun! Disi no bun!”

Ma te a e gwe, a e meki bigi fa a feni den sani bai bunkopu.

₁₅Gowtu nanga diriston de fu feni nofo,

ma wan sma di e taki nanga ferstan no makriki fu feni.

₁₆Teki a tapusei krosi fu a sma

di tnapu dyaranti gi wan sma

di a no sabi,

gi en leki panti na wan doroseisma.

₁₇Nyanyan di wan sma fufuru kan switi gi en,

ma bakaten a o gersi leki na ston de ini en mofo.

₁₈Den sani di wan sma wani du o go bun,

efu a sidon prakseri bun fosi a o du en,

dat' meki fosi yu go feti wan bigi feti,

yu mus prakseri bun fosi.

₁₉Wan sma di e tak'taki sani, no man hori kibritori gi ensrefi,

dat' meki yu no mus moksi nanga sma di e tak'taki sani.

₂₀A sma di e fluku en p'pa nanga en m'ma,

o dede go ini dipi dungru.

₂₁Efu wan sma kon gudu tumsi esi,

a gudu no sa de wan blesi gi en bakaten.

₂₂No taki: “Mi o pai a sma baka di du mi ogri,”

ma fertrow tapu MASRA, A sa yepi yu.

₂₃Wegi sani nanga tu sortu wegi na wan groskin sani gi MASRA,

na wan ogri sani fu wegi nanga wan wegi di no soifri.

₂₄Na MASRA e poti fa a libi fu wan sma o waka,

dan fa wan libisma o man sabi fa en libi o de?

₂₅No pramisi Gado wan sani

sondro fu prakseri bun fosi efu yu o man du en.

Efu yu du dati yu o kon ini problema.

₂₆Wan kownu di koni sabi fa fu puru ogri-ati sma na trawan mindri,

èn a e strafu den hebi.

₂₇A yeye fu wan sma na leki wan lampu gi MASRA,

nanga en A e ondrosuku den moro dipi prakseri fu a sma.

₂₈Wan kownu di e sori lobi èn di de fu fertrow sa tan na makti,

lobi e meki taki a e tan kownu.

₂₉Yongusma e prodo nanga den krakti,

owrusma nanga den weti wiwiri.

₃₀Wan bun fonfon e puru ogri ini wan sma,

wipi e krin a ati fu en fu san no bun.

₁MASRA e tiri den prakseri fu wan kownu,

neleki fa A e tiri a watra fu wan kriki,

A e meki a go pe A wani.

₂Ala sani san wan sma e du, bun na ini en eigi ai,

ma MASRA e luku fu sanede a e du den sani.

₃Fu du Gado wani èn fu libi bun,

dati e gi MASRA moro prisiri dan fu tyari ofrandi gi En.

₄Bigifasi nanga heimemre,

san de fu si ini a libi fu ogri-ati, na soso sondu.

₅Den sani di wan sma di e wroko tranga poti fu du,

o tyari bun gi en,

ma wan sma di e du sani es'esi, o pina.

₆Gudu di yu kisi fu di yu bedrigi trawan,

de leki wan smoko di e wai gwe esesi go ini a anu fu dede.

₇A tranga nanga san den ogri-ati sma e du sani,

e srepi den go na den grebi,

bika den no wani du sani na tapu wan leti fasi.

₈A sma di e bedrigi e waka kronkron pasi,

ma a sma di no e du ogri e du sani tapu wan leti fasi.

₉A moro betre fu libi ini wan uku tapu a daki fu wan oso,

dan fu libi ini a srefi oso nanga wan uma di lobi meki trobi.

₁₀A ogri-ati sma e angri fu du ogri,

a no abi sari-ati nanga tra sma.

₁₁Te den e strafu a sma di e meki spotu,

a sma di no sabi furu e kon koni.

Te yu e gi wan koni sma leri,

a e kisi moro sabi.

₁₂A Wan di e du sani nanga leti

e luku san e psa ini a oso fu ogri-ati sma,

èn A e meki bigi ogri miti den.

₁₃Efu yu tapu yu yesi te wan pôtiman e bari suku yepi,

sma no o piki yu te yu o bari suku yepi tu.

₁₄Efu yu gi wan sma wan moni bakabaka, a kan kowru en atibron,

wan kado ini en saka kan meki taki en ati no teki faya.

₁₅Wan sma di bun ini Gado ai e prisiri te a e du bun,

ma gi den sma di e du ogri, a de wan bigi ogri.

₁₆Wan sma di wani libi leki a lasi en ferstan,

o kisi ensrefi mindri den dedewan.

₁₇Wan sma di lobi hori fesa,

o pina,

wan sma di lobi bigi nyanyan nanga dringi,

no o gudu.

₁₈Den ogri-ati sma e kisi a strafu fu den sma di bun ini Gado ai,

èn den sma di no e tan waka na Gado baka,

e kisi a strafu fu den sma di e libi leki fa a fiti.

₁₉A moro betre fu libi na ini wan dreisabana,

dan nanga wan uma di e krutukrutu èn lobi meki trobi.

₂₀Furu diri gudu nanga oli de fu feni ini a oso fu wan koni sma,

ma wan don sma e kba ala sani esesi.

₂₁A sma di e meki muiti fu du Gado wani èn fu sori lobi,

o libi langa,

sma o libi tapu wan leti fasi nanga en,

èn a o kisi grani.

₂₂Wan koni man kan teki wan heri foto nanga dyadya srudati abra,

dan a broko a tranga skotu tapu san den ben e fertrow.

₂₃A sma di e denki bun fosi a taki,

no e poti ensrefi ini problema.

₂₄Wan sma nanga bigifasi nanga heimemre,

e teki ala sani meki spotu,

so wan sma abi heimemre psa marki.

₂₅Den sani di wan lesiman e angri fu abi, o kiri en,

bika en anu lesi tumsi fu wroko.

₂₆Furu sma de di wani moro nanga moro,

ma a sma di bun ini Gado ai, e gi,

a no e hori noti fu densrefi.

₂₇A ofrandi fu wan ogri-ati sma na wan groskin sani,

èn o moro, efu a du en nanga takru prakseri.

₂₈Wan ketoigi di no de fu fertrow mus tapu en mofo,

ma a sma di e arki bun, kan taki te a kba.

₂₉Wan ogri-ati sma e poti en fesi leki a sabi ala sani,

ma a sma di e libi leki fa a fiti sabi san a mus du.

₃₀No koni, no ferstan, noso bun rai fu libisma,

abi warti gi MASRA.

₃₁Yu kan meki yu asi klari gi a dei fu a feti,

ma na MASRA e gi a wini.