Dag 26 van 365- Exodus 14-15 en Matteüs 17

₁Dan MASRA taigi Moses taki: ₂“Taigi den sma fu Israel taki den mus drai go baka go meki den kampu na fesi Pi-Hakirot, mindri Migdol nanga a Se. Un mus meki a kampu leti na abrasei fu Baal-Sefon na a Se. ₃Dan Farao o prakseri taki: ‘Den lasi pasi na ini a sabana. Den no sabi fa fu kmoto ini a sabana.’ ₄Mi sa meki Farao tranga en ati fu a teki na un baka. Mi sa kisi bigi nen te Mi kiri Farao nanga a heri legre fu en. Dan de sma fu Egipte sa sabi taki Mi na MASRA.” Dan den Israelitisma du so tu.

₅Di den taigi a kownu fu Egipte taki a pipel lowe gwe, en nanga den knekti fu en kenki den prakseri. Den taki: “San wi du? Fu sanede wi meki den Israelitisma gwe? Now wi no abi srafu moro.” ₆Ne a seti en fetiwagi dan a teki den man fu en nanga en. ₇A teki siksi hondro fu den moro bun fetiwagi nanga ala tra fetiwagi fu Egipte. Ala wagi ben abi wan ofisiri. ₈Na so MASRA ben meki Farao, a kownu fu Egipte, tranga en ati fu a go na den Israelitisma baka. Ma den sma fu Israel ben e go sondro frede moro fara.

₉A legre fu Egipte nanga ala den wagi fu Farao, den srudati di ben e sidon tapu asi nanga den srudati di ben e waka, hari go na den Israelitisma baka. Dan den kon miti den na Pi-Hakirot, abrasei fu Baal-Sefon, pe den Israelitisma ben meki den kampu na a se. ₁₀Di Farao ben kon moro krosbei den Israelitisma opo den ede luku, dan den si taki den sma fu Egipte ben e kon na den baka. Ne den bigin frede dan den bigin begi trangatranga fu MASRA yepi den. ₁₁Den taigi Moses taki: “Kande nofo berpe no ben de na Egipte. Dat' meki yu tyari wi kon fu un dede ini a sabana. Fa yu ben kan du sowan sani fu tyari wi kmoto fu Egipte? ₁₂Wi ben taigi yu na ini Egipte kba taki: ‘Libi wi meki wi dini den sma fu Egipte. Bika a moro bun gi wi fu wi dini den sma fu Egipte dan fu dede na ini a sabana.’ ” ₁₃Ma Moses piki a pipel taki: “No frede. Un hori doro dan un o si tide fa MASRA o yepi unu. Bika den sma fu Egipte di un e si tide, un no o si noiti moro. ₁₄MASRA o feti a feti gi unu. Unsrefi no abi fu du noti.”

₁₅Dan MASRA aksi Moses taki: “Fu sanede yu e bari kari Mi so? Taigi den sma fu Israel fu den broko a kampu. ₁₆Yu mus opo yu anu nanga a wakatiki, dan yu e langa yu anu go na a se fu prati a se na tu. Dan den sma fu Israel o man abra a se tapu drei gron. ₁₇Ma arki, na Mi o meki den sma fu Egipte tranga den ati fu den tan kon na un baka. Dan Mi o kisi bigi nen fu di Mi o kiri Farao nanga a heri legre fu en, den srudati di e tyari den fetiwagi nanga den srudati di e sidon tapu asi. ₁₈Dan den sma fu Egipte sa kon sabi taki Mi na MASRA, fu di Mi o kisi bigi nen fu di Mi o kiri Farao, den srudati di e tyari den fetiwagi fu en nanga den srudati di e sidon tapu asi.”

₁₉Dan a Engel fu Gado, di ben e go na fesi fu den Israelitisma, kmoto fu en presi go na den baka. A wolku, di ben gersi wan bigi postu, kmoto fu en presi na fes'sei tu go tnapu na den baka. ₂₀Tapu a fasi disi a ben de mindri a legre fu Egipte nanga di fu den Israelitisma. A wolku ben dungru na a wan sei ma na a tra sei a ben e krin a neti. So den tu legre no ben man miti densrefi a heri neti dati. ₂₁Dan Moses langa en anu abra a se. A heri neti dati MASRA meki wan tranga winti wai kmoto fu a oostsei, di ben e wai a watra fu a se gwe nanga baka, te leki a se ben prati èn drei gron ben de fu si. ₂₂So den Israelitisma ben man abra a se tapu drei gron. Na den let'sei nanga den kruktusei a watra ben tan tnapu leki wan skotu. ₂₃Dan den sma fu Egipte go na den baka ini a se. Ala den asi fu Farao, den wagi nanga den man tapu den asi. ₂₄Musudei mamanten MASRA luku fu a wolku nanga fu a faya di ben gersi wan bigi postu, go na a legre fu Egipte dan A tyari bruya na den mindri. ₂₅A meki taki den wiel fu den wagi ben e grati gwe. So den no ben man go esi na fesi. Ne den sma fu Egipte taki: “Kon meki wi lowe gi den Israelitisma bika MASRA e feti nanga wi gi den.”

₂₆Dan MASRA taigi Moses taki: “Langa yu anu go na a se fu a watra wasi kon baka abra den sma fu Egipte, den wagi fu den nanga den man tapu den asi.” ₂₇Ne Moses langa en anu go na a se. Di dei bigin broko a watra fu a se wasi kon baka leki fa a ben gwenti lon. Den sma fu Egipte ben e pruberi fu lowe, ma a watra ben e wasi kon na den tapu. Na so MASRA figi den sma fu Egipte go poti na ini a dipi fu se. ₂₈A watra ben wasi kon baka èn a tapu den wagi nanga den man tapu asi fu a legre fu Farao, di ben hari kon na baka den Israelitisma ini a se. No wan fu den no tan na libi. ₂₉Ma den sma fu Israel abra a se tapu drei gron. Na den let'sei nanga den kruktusei a watra ben tan tnapu leki wan skotu.

₃₀Na so MASRA ferlusu den Israelitisma a dei dati puru ini a makti fu den sma fu Egipte. Den Israelitisma ben si fa den dedeskin fu den sma fu Egipte ben didon na syoro. ₃₁Ne den sma fu Israel si a bigi wroko di MASRA du nanga Egipte. A pipel ben abi bigi lespeki gi MASRA èn den ben e fertrow MASRA nanga en knekti Moses.

₁Dan Moses nanga den Israelitisma singi a singi disi gi MASRA:

₁₉Di den wagi fu Farao, den asi nanga den man di ben tyari den asi go ini a se, MASRA meki a watra fu a se wasi kon baka abra den. Ma den sma fu Israel abra a se tapu drei gron.

₂₀Dan a profeiti Miryam, a sisa fu Aaron, teki en tamboerijn. Ala den tra uma teki na en baka. Den ben e naki den tamboerijn èn den ben e dansi. ₂₁Miryam ben e piki den ini a singi taki:

₂₂Dan Moses meki den Israelitisma hari kmoto fu a Riet Se go na a sabana fu Sur. Den waka dri dei langa ini a sabana sondro fu feni watra. ₂₃Dan den kon doro na Mara, ma den no ben man dringi a watra fu Mara, fu di a ben bita. Dat' meki den e kari a presi dati Mara. ₂₄Ne den sma bigin knoru gi Moses taki: “San un mus dringi?” ₂₅Ne Moses begi MASRA trangatranga, dan MASRA sori en wan pisi udu. Moses trowe a udu ini a watra dan a watra kon bun fu dringi.

Drape MASRA taigi den den sani di den mus tan du nanga den sani na san den mus hori densrefi. Drape A luku san den ben o du. ₂₆A taigi den taki: “Efu un arki bun san MASRA, un Gado, taigi unu, efu un du den sani di bun ini en ai, efu un hori unsrefi na den gebod fu En nanga ala den sani di un mus tan du, dan Mi no sa meki no wan fu den siki nanga san Mi ben naki den sma fu Egipte kon na un tapu. Bika Mi, MASRA, na un Dresiman.”

₂₇Baka dati den kon doro na Elim. Twarfu watrabron nanga seibitenti palmbon ben drape. Dan den meki den kampu drape sei a watra.

₁Siksi dei baka dati, Yesus teki Petrus nanga den tu brada Yakobus nanga Yohanes, tyari go na tapu wan hei bergi pe den wawan ben kan de. ₂Dan let' na den fesi a skin fu Yesus kenki. En fesi ben brenki leki a son, èn En krosi ben kon weti taki a e brenki leki wan krin faya. ₃Dan wantron so Moses nanga Elia ben de fu si, e taki nanga Yesus. ₄Ne Petrus taigi Yesus taki: “Masra, a bun taki wi de dyaso. Efu Yu wani, mi kan meki dri tenti dya: wan gi Yu, wan gi Moses nanga wan gi Elia.” ₅Petrus no ben kba taki ete, di wan brenki wolku saka kon na den tapu. Dan wan sten taki kmopo ini a wolku taki: “Disi na Mi Manpikin di Mi lobi. Mi abi prisiri nanga En. Un mus arki san A e taki.” ₆Di den man di ben e teki leri fu Yesus yere a sten, den skreki sote taki den trowe densrefi langalanga na gron. ₇Ma Yesus go na den, A fasi den, dan A taigi den taki: “Opo, un no abi fu frede.” ₈Di den opo den ai, den si Yesus wawan.

₉Di den e saka fu a bergi Yesus warskow den taki: “Un no mus taigi no wan sma san un si, te leki a Manpikin fu Libisma dede èn kon baka na libi.” ₁₀Dan den aksi En taki: “Fu sanede den sabiman fu Gado wèt e taki tak' Elia mus kon fosi a Mesias doro?” ₁₁Yesus piki den taki: “Elia o kon fu tru, èn a o seti ala sani. ₁₂Ma Mi e taigi un taki: Elia kon kba, ma den no ben sabi taki na en, dan den du nanga en san den ben wani. Na so a Manpikin fu Libisma o abi fu nyan pina fu den tu.” ₁₃So den man di ben e teki leri fu Yesus kon ferstan taki A ben e taki fu Yohanes a Dopuman.

₁₄Di den doro pe a bigi grupu sma ben de, wan man kon na Yesus, a kindi na En fesi dan a taki: ₁₅“Masra, abi sari-ati nanga a boi fu mi. A abi stoipi-siki èn a e pina srefsrefi. Furu leisi a e fadon ini faya noso watra. ₁₆Mi ben tyari en go na den man di e teki leri fu Yu, ma den no ben man dresi en.” ₁₇Yesus piki en taki: “Ai baya! Yu kan si taki un no e bribi, èn taki un ati takru. Olanga Mi mus tan nanga unu? Olanga Mi mus teki den sani disi fu unu ete?” Dan A taigi a man taki: “Tyari a boi kon gi Mi!” ₁₈Ne Yesus bari a takruyeye èn a kmoto tapu a boi. A srefi momenti dati a boi kon betre. ₁₉Dan den man di ben e teki leri fu Yesus kon na En. Di den ben de den wawan nanga En, den aksi En taki: “Fu sanede un no ben man yagi a takruyeye puru tapu a boi?” ₂₀Yesus piki den taki: “Bika a bribi fu unu no bigi nofo. Fu tru Mi e taigi un taki: Efu a bribi fu unu bigi leki wan mosterdsiri nomo, un kan taigi a bergi disi: ‘Kmopo dya go drape,’ èn a o kmopo go. Un o man du ala sani. ₂₁Ma den sortu takruyeye disi e kmoto soso te yu e begi èn faste.”

₂₂Di den doro baka ini Galilea, Yesus taigi den man di ben e teki leri fu En taki: “Den o gi a Manpikin fu Libisma abra na ini anu fu sma. ₂₃Den o kiri En. Ma baka dri dei Gado o meki A kon na libi baka.” Di den yere dati, den sari srefsrefi.

₂₄Di Yesus nanga den man di ben e teki leri fu En doro na Kafarnaum, den man di ben piki moni fu a tempel go aksi Petrus efu a Meister fu en e pai a moni fu a tempel. Petrus piki den taki: “Iya, A e pai en.” ₂₅Di Petrus doro na oso, Yesus fosi aksi en taki: “Simon, san yu e prakseri fu a sani disi? Suma den kownu fu grontapu e meki pai lantimoni? Den sma fu den eigi kondre, noso den sma fu tra kondre?” ₂₆Petrus piki taki: “Den sma fu tra kondre.” Dan Yesus taigi en taki: “Dati wani taki den sma fu a kondre srefi no abi fu pai. ₂₇Ma fu den ati no bron na wi tapu, wi o pai en. Go na a meer go uku. Te yu opo a mofo fu a fosi fisi di yu kisi, yu o si wan solfrumoni ini en. Teki en, dan yu go pai a moni gi Mi nanga yu.”