Dag 260 van 365- Spreuken 27-29 en 2 Korintiërs 10

₁No meki bigi fu san yu o du tamara,

bika yu no sabi fa tamara o waka.

₂No gi yusrefi grani,

ma meki wan tra sma gi yu grani,

meki a kmoto na ini wan tra sma mofo

èn no fu yu eigi mofo.

₃Ston hebi èn santi no lekti tu,

ma a fuga di yu kan fuga nanga wan don sma,

hebi moro den ala tu.

₄Atibron kan meki sma du sani sondro fu prakseri,

te wan sma ati teki faya a kan figi ala sani puru na pasi,

ma wan sma di e dyarusu, ogri moro den.

₅Fu warskow wan sma leti fesi ala sma,

betre moro leki te yu no warskow en fu di yu lobi en.

₆Efu wan mati taigi yu wan sani di e hati,

a du dati fu di a wani si bun fu yu,

ma den bosi fu wan feyanti furu.

₇Wan sma di bere furu kba,

no e luku a moro switi oni srefi na wan ai,

ma gi wan sma di angri e kiri, a moro bita sani srefi e switi gi en.

₈Leki wan fowru di frei lontu fara fu en nesi,

na so wan sma de tu di e waka lontu fara fu en oso.

₉A smeri fu oleif-oli nanga wierook e meki yu firi prisiri,

ma moro switi gi a ati na a waran fu wan bun mati.

₁₀No drai yu baka gi yu mati nanga a mati fu yu p'pa,

no go na yu brada oso tu te yu de ini problema,

bika wan sma di e libi krosbei fu yu

betre moro wan brada di e tan farawe.

₁₁Mi boi, libi koni, dan yu e gi mi prisiri,

dan so mi kan piki den sma di e taki takru fu mi.

₁₂Wan koni sma e si a ogri di e kon,

èn a e go kibri,

wan sma di no e denki, e waka go miti en,

èn a e tesi a bakapisi fu en.

₁₃Teki a tapusei krosi fu a sma

di tnapu dyaranti gi wan trawan

di a no sabi,

gi en leki panti na wan doroseisma.

₁₄Efu yu e bari wan birtisma trangatranga odi te fruku mamanten,

a odi e de leki wan fluku gi en.

₁₅Wan uma di lobi meki trobi,

de leki wan daki di e leki dorodoro tapu wan alen dei.

₁₆Leki fa yu no man fanga winti,

noso grabu oli hori,

na so yu no man meki a hori en mofo.

₁₇Leki fa isri e srapu isri,

na so a wan libisma e srapu a trawan.

₁₈Efu yu e sorgu bun gi wan froktubon,

yu o nyan den froktu fu en,

a knekti di e sorgu bun gi en basi,

o kisi grani.

₁₉Leki fa wan sma kan si en eigi fesi ini watra,

na so a ati fu wan sma e sori suma a sma de trutru.

₂₀Leki fa dedekondre noiti abi nofo,

na so a de tu nanga a ai fu libisma.

₂₁Nanga faya sma e krin solfru nanga gowtu,

na a bun nen fu wan sma e sori suma a sma de trutru.

₂₂Awinsi yu stampu wan don sma nanga wan matatiki,

awinsi yu stampu en makandra nanga graan ini wan mata,

a don no e kmopo na ini en.

₂₃Yu mus sabi fa a e go nanga den skapu nanga den krabita fu yu,

sorgu bun gi den.

₂₄Bika gudu no e tan fu têgo,

wan kroon no e tan fu têgo tu ini wan famiri.

₂₅Te yu koti a fosi grasi èn a nyun wan e sproiti kon,

te yu koti a grasi na den bergifutu tyari kon na wan,

₂₆dan yu o abi skapu di abi wiwiri fu yu kan meki krosi,

nanga bokoboko di yu kan seri fu bai wan pisi gron.

₂₇Yu o abi nofo krabitamerki gi yu, gi den ososma fu yu,

nanga den umasrafu fu yu.

₁Ogri-ati sma e lowe sondro taki sma de na den baka,

ma den sma di bun ini Gado ai de leki yongu lew,

den sabi taki noti no o trobi den.

₂Te sma fu wan kondre e feti nanga densrefi,

yu e abi furu edeman,

ma soso te yu abi wan koni man di e si sani krin,

sani sa go bun fu wan langa ten.

₃Wan pôtiman di e pina tra pôtisma,

de leki wan sibibusi di e wasi ala sani gwe san prani.

₄Sma di no e du san a wèt e taki,

e gi ogri-ati sma grani,

ma den sma di e hori a wèt,

e feti den.

₅Takru-ati sma no e ferstan san a wani taki fu libi bun,

ma den sma di e suku MASRA, e ferstan krinkrin san dati wani taki.

₆Wan sma di e pina ma tapu san trawan no man sori finga,

betre moro wan guduman di no de fu fertrow.

₇Wan koni pikin e hori ensrefi na a wèt,

ma a pikin di e teki waka nanga sma di e nyan fu gridi,

e gi en p'pa syen.

₈Son sma e kon gudu fu di den e teki furu moni moro

tapu san den leni wan trawan,

ma na tyari den e tyari a moni kon na wan,

gi sma di abi sari-ati nanga mofina sma.

₉A sma di no wan arki a wèt srefsrefi,

a begi fu en na wan groskin sani gi Gado.

₁₀A sma di e meki den di e libi leki fa a fiti, du sani di no bun,

o fadon ini a eigi olo di a diki gi den,

ma a sa go bun nanga den sma di e libi krin.

₁₁Wan guduman kan koni ini en eigi ai,

ma wan pôtiman di koni sabi fa a de trutru.

₁₂Te sma di bun ini Gado ai de na makti,

bigi prisiri e de,

ma te ogri-ati sma kon na makti,

a pipel e go kibri.

₁₃A no sa go bun nanga a sma di e kibri den fowtu fu en,

ma Gado e gi a sma pardon di e taki tak' a sabi taki a fowtu,

èn di no e meki den fowtu moro.

₁₄A sma di e tan lespeki MASRA, na wan blesi sma,

ma bigi ogri o miti a sma di tranga en ati.

₁₅Leki wan lew di e bari,

leki wan beer nanga angri,

na so wan ogri-ati man de

di e tiri wan pipel di no man yepi densrefi.

₁₆Wan tiriman di no abi ferstan e pina a pipel fu en furu,

ma a sma di no wani fu kon gudu tapu wan fasi di no fiti,

o libi langa.

₁₇No yepi wan sma di kiri wan trawan,

meki a tan lon te leki a go ini en grebi.

₁₈Noti no o miti a sma tapu san trawan no man sori finga,

ma wan sma di e libi kruktu, e fadon wantronso.

₁₉Wan sma di e wroko en pranigron, sa abi furu nyanyan,

ma wan sma di e lon baka sani di no abi warti,

sa nyan pina.

₂₀Wan sma di de fu fertrow, e kisi bogobogo blesi,

ma wan di wani gudu es'esi, o kisi strafu.

₂₁Yu no mus teki a sei fu wan sma te yu de na fesi krutu,

bika gi wan pisi brede son sma e du dati kba.

₂₂Wan gridi sma wani kon gudu es'esi,

ma a no sabi taki na pina e wakti en.

₂₃A sma di e warskow wan trawan,

o kisi moro grani bakaten,

dan a sma di e taigi a trawan nomo san a wani yere.

₂₄Wan sma di e fufuru fu en p'pa nanga en m'ma,

ma di no e si dati leki wan sondu,

na a srefi leki wan kiriman.

₂₅Wan gridiman lobi meki trobi,

ma a sa go bun nanga a sma di poti en fertrow tapu MASRA.

₂₆A sma di e fertrow na tapu en eigi denki,

na wan don sma,

ma a sma di e libi koni,

e kmopo na pasi gi ogri.

₂₇A sma di e gi na pôtisma,

no sa mankeri noti,

ma a sma di e tapu en ai gi a nowtu fu den,

e kisi furu fluku na en tapu.

₂₈Te ogri-ati sma kon na makti,

a pipel e go kibri,

ma te den no de na makti moro,

den sma di bun ini Gado ai e teki abra.

₁A sma di no wani arki, awinsi fa den e warskow en,

e de fu dede wantronso,

sondro fu a kon betre baka.

₂Te sma di bun ini Gado ai de na makti,

a pipel e prisiri,

ma te ogri-ati sma de na makti

a pipel e dyeme.

₃Wan pikin di lobi koni,

e gi en p'pa prisiri,

ma a sma di lobi go na motyo,

e fermorsu a gudu fu en.

₄Sani sa go bun ini wan kondre,

efu a kownu e du sani na tapu wan leti fasi,

ma a kondre o broko,

efu a abi wan tiriman di e puru moni na den sma anu.

₅A sma di e kori trawan nanga switi wortu,

e seti wan sani gi en fu fanga en.

₆Wan takru sma e fasi ensrefi ini den kruktudu fu en,

ma a sma di bun ini Gado ai sa singi èn prisiri.

₇Wan sma di bun ini Gado ai e teri den leti fu pôtisma,

ma wan ogri-ati sma no sabi dati srefsrefi.

₈Den sma di e spotu e tyari dyugudyugu ini a kondre,

ma koni sma e kowru atibron.

₉Efu wan koniman nanga wan don man de na krutu,

a don man o rigeri noso a o lafu,

ma den no o feni densrefi.

₁₀Kiriman no lobi den sma srefsrefi di e libi krin,

ma den sma di e libi leki fa a fiti,

e lespeki a libi fu den.

₁₁Wan don sma e kisi atibron sondro fu man hori ensrefi,

ma wan koni sma man hori ensrefi

èn a e meki a atibron saka.

₁₂Efu wan tiriman e arki lei,

ala den wrokoman fu en o de ogri-ati sma.

₁₃A pôtiman nanga a wan di e pina en abi wan sani makandra,

na MASRA gi den ala tu libi.

₁₄Wan kownu di e krutu den pôtiwan tapu wan leti fasi,

sa tan kownu gi wan langa ten.

₁₅Fonfon nanga warskow e meki wan pikin kon koni,

ma te den bigisma fu en libi en fu a gro kon leki fa a wani,

a o gi den syen bakaten.

₁₆Te ogri-ati sma e rigeri,

ogri e kon moro furu,

ma nanga prisiri den sma di bun ini Gado ai e luku te den e fadon.

₁₇Leri yu pikin fa a mus libi,

dan yu no sa abi broko ede nanga en,

èn a sa gi yu prisiri.

₁₈Wan folku di no man si san de fu kon,

na wan folku di o libi bruya,

ma Gado e blesi a folku di e du san a wèt fu En e taki.

₁₉Wortu wawan no sari fu sori wan knekti fa a mus libi,

bika a e ferstan san yu e taigi en,

ma a no e du en.

₂₀Howpu de moro gi wan don sma,

dan gi wan sma di e taki sondro fu prakseri fosi a taki.

₂₁A sma di bigin pori en knekti yonguyongu,

no o man tiri en bakaten.

₂₂Wan sma di e kisi atibron es'esi e meki trobi esi tu,

wan sma di ati e teki faya es'esi e sondu furu.

₂₃A heimemre fu wan sma o broko en saka,

ma wan sma di abi sakafasi o kisi grani.

₂₄A sma di e prati fufuru sani nanga wan fufuruman,

no lobi ensrefi,

bika a no o man taki,

awinsi a sabi taki wan fluku o kon na en tapu efu a no taki.

₂₅A sma di e frede tra libisma e fasi ensrefi,

ma noti no e miti a sma di poti en fertrow tapu MASRA.

₂₆Furu sma e meki muiti fu wan tiriman kan lobi den,

ma na MASRA e gi wan sma san a fiti fu kisi.

₂₇Wan takru-ati sma na wan groskin sani

gi sma di bun ini Gado ai,

èn wan sma di e libi leki fa a fiti na wan groskin sani

gi ogri-ati sma.