Dag 262 van 365- Prediker 1-3 en 2 Korintiërs 11:16-33

₁Disi na den wortu fu Preikiman, a manpikin fu David, kownu fu Yerusalem.

₁₂Mi, Preikiman, ben de kownu fu Israel ini Yerusalem. ₁₃Nanga mi heri ati mi ondrosuku ala sani dyaso na grontapu tapu a srefi fasi leki fa ala koniman bo du, bika mi ben wani ferstan ala sani di e psa. Dati na wan sari sani fu du. Na wan sani di Gado gi libisma fu du, fu pina en. ₁₄Mi ondrosuku ala sani di e psa na grontapu, èn yu sabi san: a tranga fu ferstan, leki fa a tranga fu ferstan fa a winti e wai. ₁₅Yu no kan meki wan sani di kron kon let'opu, èn yu no man teri wan sani di e mankeri. ₁₆Mi taigi misrefi taki: Mi kisi bigi koni, moro furu leki ala den trawan di ben e tiri Yerusalem fosi mi. Mi kon kisi furu koni nanga sabi. ₁₇Nanga mi heri ati mi meki muiti fu kon sabi san na koni nanga sabi, san na don èn san a wan taki fu no abi ferstan. Ma mi kon si tak' dati srefi na wan sani di tranga fu ferstan, leki fa a tranga fu ferstan fa a winti e wai. ₁₈Bika a sma di abi furu koni abi furu sari èn a sma di e sabi sani moro nanga moro, e firi pen moro nanga moro tu.

₁Mi taigi misrefi taki: So, mi o pruberi den sani di e gi prisiri. Mi o luku sortu bun den abi. Ma mi kon si taki dati srefi tranga fu ferstan. ₂Mi kon si dati na wan don sani fu e lafulafu nomo èn dati prisiri no e du noti gi yu. ₃Dat' meki mi go ondrosuku na misrefi luku: Mi dringi win te leki mi bigin firi prisiri, ma a srefi ten mi meki muiti fu tan koni. Mi ben wani sabi efu dati ben de a moro bun sani gi libisma fu du, a syatu ten di den de dyaso na grontapu.

₄Mi du bigi sani tu: Mi meki sma bow oso gi mi, mi meki den prani droifidyari gi mi, ₅mi meki den seti moi bigi dyari kon, fu den prani ala sortu froktu bon. ₆Mi meki den diki bradi peti fu a watra dati ben kan nati den rutu fu yongu bon. ₇Mi bai mansrafu nanga umasrafu. Den pikin fu den srefi gebore leki srafu ini mi oso. Mi ben abi bun furu kaw, skapu nanga krabita, moro leki ala den wan di ben libi fosi mi ini Yerusalem. ₈Mi tyari bun furu solfru nanga gowtu gi misrefi kon na wan tu. Srefi gudu fu kownu nanga fu kondre di ben saka densrefi gi mi. Mi ben abi singiman nanga singi-uma, sosrefi uma, moi uma, di e gi iniwan man prisiri. ₉Tapu a fasi disi mi tyari moro gudu kon na wan, moro ala den wan di ben libi fosi mi ini Yerusalem. Èn nanga ala san mi tyari kon na wan gi misrefi, mi tan hori a koni fu mi. ₁₀Mi meki den ai fu mi si ala san den ben wani si, mi gi mi ati ala a prisiri di a ben wani. Iya, nanga mi heri ati mi prisiri nanga ala den sani di mi ben tyari kon na wan. Dati ben de a paiman fu ala a tranga wroko di mi ben du. ₁₁Ma dan mi prakseri ala den sani ete wan leisi di mi du, ala a tranga wroko di mi du, nanga a naki di mi naki mi skin fu ben kan abi den. We yere, dati tranga fu ferstan tu, leki fa a tranga fu ferstan fa a winti e wai. Bika no wan wini a no tyari gi mi dyaso na grontapu.

₁₂Dan mi poti mi prakseri baka tapu san na koni, san na don èn san a wani taki fu no abi ferstan. Bika san a kownu di o kon na mi baka o du nanga ala den sani di a wan di waka na en fesi du? ₁₃Ma mi ben kon ferstan dati koni bun moro don, neleki fa leti bun moro dungru. ₁₄Wan sma di koni e si san a e du, ma wan don sma e firifiri ini a dungru. Ma disi mi sabi tu: na a srefi sani e miti den ala tu. ₁₅Mi taigi misrefi taki: A srefi sani di e miti a don sma, e miti mi tu. Dan sortu bun a bigi koni fu mi e du gi mi? Dati srefi tranga fu ferstan. ₁₆Bika sma no e tan prakseri wan trawan, èn a no e meki noti efu a ben de wan koni sma noso wan don sma. Te fu kba sma e fergiti ala tu. Èn na wan sari sani tu dati dede no abi bisi efu yu koni noso efu yu don.

₁₇Na dat' meki mi no ben lobi a libi srefsrefi moro. Bika a gersi leki notinoti no bun san sma e du dyaso na grontapu. A tranga fu ferstan, leki fa a tranga fu ferstan fa a winti e wai. ₁₈A moro tranga sani na dati mi o abi fu libi ala den sani na baka gi san mi wroko so tranga, den sani gi san mi naki mi skin dyaso na grontapu, gi a sma di o kon na mi baka. ₁₉No wan sma man taigi mi efu a o de wan koni sma noso wan don sma. Ma na en o abi a makti abra ala den sani gi san mi wroko so tranga nanga a koni fu mi dyaso na grontapu. Dati srefi tranga fu ferstan. ₂₀So mi no ben sabi moro san mi ben mus prakseri fu ala a tranga wroko di mi ben wroko, nanga a naki di mi naki mi skin dyaso na grontapu. ₂₁Bika wan sma di naki en skin fu kan abi san a abi, èn di du en nanga koni èn nanga sabi, o abi fu libi en na baka gi wan sma di no du noti gi en. Dati srefi tranga fu ferstan èn a de wan bigi ogri. ₂₂Sortu wini wan sma abi na ala den sani di a tyari nanga tranga wroko kon na wan? A meki ala muiti fu kon na den, a naki en skin gi den dyaso na grontapu, ₂₃ma na soso sari a sabi ini en libi. Ala san a e du e tyari soso broko ati, èn srefi sribi a no man sribi te neti. Dati srefi tranga fu ferstan. ₂₄A moro bun sani di wan libisma kan du, na fu nyan, dringi èn fu prisiri nanga den sani gi san a wroko so tranga. Bika mi kon ferstan tak' dati srefi de ini Gado anu. ₂₅Bika nanga a yepi fu Gado wawan wan sma kan nyan èn feni prisiri ini a libi. ₂₆Bika A e gi koni, sabi nanga prisiri na wan libisma di e gi En prisiri, ma wan sma di no e gi En prisiri A e gi a wroko fu tyari sani kon na wan, fu gi den na a sma di e gi En prisiri. Dati srefi tranga fu ferstan, leki fa a tranga fu ferstan fa a winti e wai.

₉Sortu wini wan sma abi na ala a naki di a e naki en skin? ₁₀Mi kon luku den sani finifini di Gado gi libisma fu du. ₁₁Gado e meki ala sani psa na tapu a yoisti ten, èn A meki libisma abi ferstan fu a ten tu. Ma san wi no man ferstan krin, na a wroko di Gado du. Un no man ferstan a bigin noso a kba fu en. ₁₂So mi kon si taki a moro bun sani di libisma kan du, na fu prisiri, nanga fu abi prisiri nanga a libi. ₁₃Den mus nyan, den mus dringi èn den mus prisiri nanga ala den sani fu san den wroko tranga. Bika dati na wan kado fu Gado. ₁₄Mi kon si tu dati ala san Gado e du na fu têgo. Yu no kan poti noti moro na en, èn yu no kan puru noti fu en. Gado du en so fu libisma kan abi bigi lespeki gi En. ₁₅Ala san de, ben de langa ten kba, èn ala san o kon ben de kba tu. Gado e meki densrefi sani psa agen èn agen.

₁₆Ete wan sani mi si dyaso na grontapu: dati kruktu de na a presi pe krutu mus koti tapu wan leti fasi èn dati kruktu de na a presi pe sma mus feni den leti. ₁₇Ma mi taigi misrefi taki: Gado o krutu den sma di bun ini En ai nanga den sma di e du ogri. Bika A poti wan ten gi ala sani di psa, nanga gi ala sani di sma e du. ₁₈Mi taigi misrefi taki: Gado gi libisma wan spesrutu presi, ma A e meki den si dati den na a srefi leki meti. ₁₉Bika a sani di e miti libisma e miti meti tu. Na a wan sani e miti ala tu: leki fa a wan e dede, na so a trawan e dede tu, èn na a wan bro ala tu abi. So un e si dati libisma no hei moro meti. Fu tru, disi tranga fu ferstan. ₂₀Na wan presi ala sani e go. Ala sani meki fu doti, èn ala sani e tron doti baka. ₂₁Suma sabi efu a bro fu libisma e opo go na loktu èn efu a di fu meti e saka go na gron ini a doti? ₂₂So mi kon si dati a moro bun sani di wan libisma kan du na fu prisiri nanga ala den sani di a e du. Na dati na en pai. Bika no wan sma man sori en san o psa baka te a dede.

₁₆Mi e taigi un ete wan leisi taki no wan sma mus prakseri taki mi edesei no e wroko bun. Ma efu un e feni taki na so a de, dan un mus teki mi leki fa mi de. Dan mi kan meki bigi pikinso gi misrefi. ₁₇A no Masra taigi mi fu meki bigi gi misrefi. Ma efu wi abi a okasi fu meki bigi, dan mi o du dati leki wan sma di edesei no e wroko bun. ₁₈Efu someni sma e meki bigi leki fa den grontapu sma e du, dan mi sa du en tu! ₁₉Na fu di un koni so, meki nanga prisiri un e abi pasensi nanga den donman. ₂₀Bika un e feni en bun te sma e teki un leki srafu, te den e puru na un skin san den man puru, te den e meki un du nomo san den wani, te den e si densrefi moro hei leki unu, noso te den e naki unu ini un fesi. ₂₁Mi abi fu taki en: Wi ben swaki tumsi fu du dati. Tye, dati na wan syen gi mi!

Mi o taki baka leki mi edesei no e wroko bun. Ma efu tra sma man du dati, dan mi man du en tu. ₂₂Den feni taki den na Hebrewsma. Mi srefi na wan! Den feni taki den na sma fu Israel. Mi srefi tu! Den feni taki den na bakapikin fu Abraham. Mi srefi na wan! ₂₃Den feni taki den na wrokoman fu Kristus. Kande mi edesei no e wroko bun efu mi taki disi, ma mi na wan moro bigi wrokoman fu En! Mi wroko moro tranga, mi go na straf'oso èn mi kisi fonfon moro leki den. Furu leisi mi misi fu dede. ₂₄Feifi leisi den Dyusma gi mi dritenti-na-neigi wipi. ₂₅Dri tron den fon mi nanga tiki. Wan leisi den fringi ston na mi tapu fu kiri mi. Dri leisi a sipi sungu ini san mi ben de. Wan leisi mi psa wan heri dei nanga neti tapu se. ₂₆Ala leisi te mi ben e go fu a wan presi na a trawan, sani ben miti mi di ben kan kiri mi. Mi ben abi problema tapu den liba, mi ben abi problema nanga fufuruman, mi ben abi problema nanga mi eigi kondreman èn nanga sma di no de Dyu. Mi ben abi problema ini den foto, di mi ben de ini a dreisabana, nanga di mi ben de tapu se. Mi ben abi problema tu nanga sma di e kari densrefi bribisma. ₂₇Mi wroko tranga èn mi ben gi ala mi krakti. Bun furu neti mi no sribi. Mi psa ten pe angri nanga watra ben e kiri mi. Bun furu dei mi no nyan. Mi psa ten pe mi ben e kowru èn mi no ben abi noti fu weri tapu mi skin. ₂₈Dan boiti den sani di mi kan kari ete, ala dei mi abi a sorgu fu den gemeente na mi tapu tu. ₂₉Te wan sma swaki, dan misrefi e firi swaki tu! Te den meki wan sma sondu, dan mi ati e teki faya!

₃₀So, efu mi mus meki bigi, dan mi e meki bigi fu den sani di e sori taki mi swaki ete. ₃₁Gado, a P'pa fu wi Masra Yesus, sabi taki mi no e lei. Meki wi opo En nen fu têgo. ₃₂Di mi ben de na Damaskus, a granman fu kownu Aretas ben poti sma na a foto fu grabu mi. ₃₃Ma mi no fadon ini en anu. Den poti mi ini wan baskita, dan den meki mi saka fu wan fensre-olo ini a hei skotu fu a foto.