Dag 263 van 365- Prediker 4-6 en 2 Korintiërs 12

₁Wan tra sani di mi kon si, na ala den fasi fa sma e pina trawan na grontapu. Mi si den watra-ai tu fu den sma di de ini a pina, ma den no abi no wan sma di e trowstu den. Den sma di e pina den ben abi makti, ma den di de ini a pina no abi no wan sma di e trowstu den. ₂Dat' meki mi feni taki den sma di dede kmoto kba ini a pina, abi en moro bun now leki den di e libi ini a pina ete. ₃Ma den wan di abi en bun moro den disi, na den wan di no gebore ete, den wan di no si den takru wroko ete di e psa na grontapu. ₄Mi kon si tu dati a tranga wroko fu sma, nanga a sabi di den sabi du den wroko bun, e kon fu di a wan sma wani abi san a trawan abi. Dati srefi tranga fu ferstan, leki fa a tranga fu ferstan fa a winti e wai. ₅Wan don sma e sidon langa en futu nomo, èn a e dede fu angri. ₆A moro betre yu abi pikinso nanga san yu e prisiri, dan furu gi san yu ben abi fu wroko tranga. Dati srefi tranga fu ferstan, leki fa a tranga fu ferstan fa a winti e wai.

₇Wan tra sani mi kon si na grontapu di tranga fu ferstan: ₈wan sma di de en wawan, sondro manpikin, sondro famiri, ma di e wroko tranga ala dei, sondro fu abi prisiri nanga a gudu di a abi. Ne a aksi ensrefi taki: Gi suma mi e naki mi skin so, èn fu sanede mi no e prisiri nanga a libi? Dat' srefi tranga fu ferstan èn na wan sari sani. ₉Dat' meki a moro bun gi wan sma fu de nanga wan trawan, dan fu de en wawan. Bika den kan prisiri makandra nanga a pai fu a tranga wroko fu den. ₁₀Èn efu wan fu den fadon, a trawan kan yepi en fu a tnapu baka. Ma a sma di de en wawan te a fadon de fu sari, bika sma no drape fu yepi en tnapu baka. ₁₁Efu tu sma e didon makandra tu, den kan gi densrefi waran. Ma fa wan sma kan gi ensrefi waran? ₁₂Te wan sma de en wawan, wan trawan kan du en wan sani moro makriki. Ma te den de tu sma den kan kaka futu gi a trawan. Dri titei di brei kon na wan, no e koti esi.

₁₃Wan pôti ma koni yongu boi betre moro wan owru èn don kownu di no e teki rai moro. ₁₄Bika a yongu boi o kmoto na straf'oso fu tron kownu, aladi a ben gebore leki wan pôti boi di a tra kownu ben de na makti. ₁₅Mi si tak' ala sma na grontapu ben e waka baka a yongu boi disi di bo teki a presi fu a owru kownu. ₁₆Den wan di ben waka na en baka no ben de fu teri. Ma bakaten no wan sma ben abi prisiri nanga en moro. Dati srefi tranga fu ferstan, leki fa a tranga fu ferstan fa a winti e wai.

₁₇Te yu e go na a oso fu Gado yu mus sabi fu sanede yu e go. A moro betre yu e go fu go arki, dan dati yu e go fu tyari ofrandi leki den don sma. Den no sabi srefi dati na wan ogri den e du.

₇Yu no mus ferwondru te yu si taki sma e pina den pôtiwan ini son pisi fu a kondre, taki sma no e kisi den leti èn taki sani no e du tapu wan leti fasi. Bika wan hei lantiman sabi dati wan moro heiwan e kibri en, èn den ala tu sabi dati wan di hei moro den e kibri den tu. ₈Ma ini ala den sani disi, a bun sani de dati a kownu srefi e luku taki sani e waka bun te nyanyan e koti ini den pranigron.

₉Moni no e sari a sma di lobi moni, èn a sma di e angri fu kon gudu noiti e abi nofo. Dati srefi tranga fu ferstan. ₁₀O moro wan sma abi, o moro trawan o kon nyan fu en. Dan sortu wini a gudu tyari gi sma? Luku wawan a kan luku en. ₁₁Wan wrokoman e sribi switi te neti, èn a no abi trobi efu a ben nyan furu noso pikinso. Ma a sma di e swen ini en gudu no man sribi srefsrefi te neti.

₁₂Mi si ete wan bun ogri sani na grontapu: wan sma di e ori ai na tapu den gudu fu en, ma dan sani no e waka bun. ₁₃Wan ongoluku e miti en, èn a e lasi ala a gudu fu en. A manpikin di a meki, e tan na baka nanga leigi anu. ₁₄Leki fa a guduman ben gebore nanga sososkin, na so a e dede gwe nanga sososkin baka. Noti fu san a ben wroko so tranga a kan tyari gwe nanga en. ₁₅Iya, na wan bun ogri sani: leki fa a kon, na so a e gwe baka. A no abi no wan wini na en taki a naki en skin so. ₁₆En heri libi a ben de mindri sma di ben e dede, sma di ben e sari, sma di ben e kisi atibron, sma di ben e siki, nanga sma di ben e nyan den niri. ₁₇Yere, a sani di mi kon si, na dati a moro bun sani di wan libisma kan du, na fu nyan, na fu dringi èn fu prisiri nanga den sani gi san a wroko so tranga. Disi na san Gado gi en. Na fu dati a e naki en skin a syatu ten di Gado gi en dyaso na grontapu. ₁₈Te Gado meki wan sma abi furu moni nanga gudu, èn A gi a sma dati a okasi fu prisiri nanga den, fu prisiri nanga fa sani waka ini en libi, èn fu prisiri nanga en tranga wroko, dan na wan kado fu Gado. ₁₉Sowan sma no e sidon e broko en ede nanga a syatu pisten di a o de na grontapu, bika nanga en heri ati a e prisiri nanga san Gado gi en.

₁Mi si wan ogri na grontapu di libisma e tyari leki wan hebi lai: ₂dati na tak' Gado e meki wan libisma abi furu moni, gudu nanga grani. A sma dati abi ala san en ati e angri, a no e mankeri noti. Ma toku Gado no e gi en pasi fu a prisiri nanga den sani dati. Wan tra sma e kba ala. Dati tranga fu ferstan èn bita fu swari. ₃Bika awinsi so wan sma ben abi wan hondro pikin, awinsi a libi langa èn a doro wan hei libimarki, efu a no ben prisiri nanga den bun sani fu a libi, èn sma no beri en di a dede, mi e taigi unu taki wan pikin di gebore dededede srefi betre moro en. ₄Bika a tranga fu ferstan fa a pikin kon so na grontapu, èn fa a du dede gwe so. No wan sma sabi san so wan pikin ben o tron. ₅Noiti a si a krin fu dei, èn a no sabi not'noti fu a libi. Ma a e rostu fu en, moro leki a man, ₆di no e prisiri nanga den bun sani fu a libi, awinsi a ben libi tu dusun yari. A grebi e wakti ala sma.

₇Ala a tranga wroko di libisma e du na fu furu den bere, ma a gersi leki nyanyan noiti e sari den. ₈San wan koni sma abi tapu wan don sma? Sortu wini wan pôtisma abi awinsi a sabi fa a mus tyari ensrefi ini a libi? ₉A moro betre fu abi prisiri nanga wan sani di yu abi, dan nanga wan sani fu san yu e dren. Dati srefi tranga fu ferstan, leki fa a tranga fu ferstan fa a winti e wai. ₁₀Langa na fesi a ben poti kba fa libisma ben o de. A bo nen libisma èn libisma no abi makti moro Gado. ₁₁Bika o moro wan sma e taki, o moro den sani san a e taki e tranga fu ferstan. A no abi no wan wini na en. ₁₂No wan sma sabi san na a moro bun sani di wan libisma kan du ini a syatu ten fu a soso libi fu en, a libi di e psa so esi leki smoko. Suma kan taigi wan libisma san o psa baka te a libi fu en na grontapu kon na wan kba?

₁Mi o go doro fu meki bigi gi misrefi, awinsi a no e tyari no wan wini gi mi. Mi o taki now fu den sani san Masra meki mi si nanga san A meki mi kon ferstan. ₂Mi sabi wan sma di de wan nanga Kristus. Tin-na-fo yari di psa Gado ben tyari en go te na a di fu dri heimel. Mi no sabi efu a go nanga en skin, noso sondro en skin. Gado wawan sabi. ₃Mi sabi san psa nanga a man disi. Ma mi no sabi efu a go nanga en skin, noso sondro en skin. Dati na Gado wawan sabi. ₄A doro te na ini Paradeis. Drape a yere sani di yu no man taki nanga wortu, sani di libisma no mus prefuru fu taki. ₅Mi o meki bigi gi a man disi. Mi no o meki bigi gi misrefi, noso dan a mus de gi den swakifasi fu mi. ₆Efu mi ben wani meki bigi gi misrefi, a no ben o de so taki mi edesei no bun, bika san mi ben o taigi unu na sani di tru. Ma mi no o du en, fu sma no si mi moro bigi leki san den si mi du, noso san den yere mi taki. ₇Fu sorgu taki mi no kisi bigifasi fu di Gado ben sori mi den bigi sani disi, meki mi ben kisi wan maka ini mi skin. Wan futuboi fu Satan e naki mi kofu, fu mi no kisi bigifasi. ₈Dri tron mi ben begi Masra fu puru en na mi tapu. ₉Ma Masra piki mi taki: “Mi bun-ati sari gi yu. Te yu swaki, dan fosi Mi kan sori yu o bigi Mi krakti de.” Dat' meki nanga prisiri mi o meki bigi taki mi na wan swaki sma, fu a krakti fu Kristus kan de na mi tapu. ₁₀Dat' meki fu Kristus ede mi e prisiri te mi swaki, te sma e broko mi saka, te mi de ini nowtu, te sma de nomo na mi baka fu du mi ogri, èn te mi de ini bigi benawtu. Bika te mi swaki, dan fosi mi tranga.

₁₁Mi meki bigi gi misrefi leki wan sma di edesei no e wroko bun. Ma na unu meki mi du dati. Bika na unu ben mus du wan bun wortu gi mi. Awinsi mi no prenspari, mi sabi taki na no wan fasi mi du ondro gi den man di e si densrefi leki dyadya boskopuman. ₁₂Nanga ala pasensi mi ben du den sani di e sori taki mi na wan boskopuman fu Yesus: mi sori unu marki, mi du wondru, èn mi du bigi sani. ₁₃A wan enkri sani san mi du na tra gemeente, ma di mi no du nanga unu, na dati mi no teki moni na unu. Efu dati na wan ogri sani, dan mi e aksi un pardon!

₁₄Luku, now mi de fu kon baka na unu fu a di fu dri leisi, èn un no abi fu pai mi noti. Mi no wani a gudu fu unu, ma na unu srefi mi wani. Bika a no wan pikin mus poti moni na wan sei gi en m'ma nanga en p'pa, ma na a m'ma nanga a p'pa mus du en gi a pikin. ₁₅Mi fu mi sei de klari fu gi unu ala san mi abi. Mi wani gi unu misrefi. Ma fa a gersi taki o moro mi e lobi unu, o moro a lobi fu unu gi mi e go nanga baka? ₁₆Son sma e taki tak' mi no ben meki un gi mi moni, ma fu di mi koni meki mi kisi unu tapu wan koni fasi. ₁₇Fa dan? Mi no meki no wan fu den brada di mi seni kon na unu, teki wan sani fu unu. ₁₈Mi ben aksi Titus fu kon na unu èn mi aksi a tra brada fu go nanga en. Ma Titus no teki moni na unu. Bika mi nanga en e prakseri a srefi fasi, èn wi e libi a srefi fasi tu. ₁₉Kande un e prakseri someni langa kba dati na krin mi wani krin mi fesi. Kwet'kweti! Ma wi de wan nanga Kristus èn wi e taki den sani disi na Gado fesi. Èn, lobiwan, wi e du en fu un kon moro tranga ini bribi. ₂₀Ma mi e frede taki te mi kon, un no o de leki fa mi ben sa wani, èn mi no o de leki fa unu ben sa wani. Mi e frede taki trobi, dyarusu nanga bigi atibron o de. Mi e frede tu taki sma o prakseri densrefi wawan, den o taki takru fu tra sma, den o hoigri sma bakabaka, den o wani opo den borsu, èn taki dyugudyugu o de. ₂₁Mi e frede taki mi Gado o meki mi saka misrefi gi unu te mi doro baka na unu. Mi e frede taki mi o firi sari gi furu fu unu di e libi ini sondu ete. Te nanga now un no drai un baka gi a doti libi di un e libi, a fasi fa un e gi unsrefi abra na takru lostu, nanga a yayolibi fu unu.