Dag 264 van 365- Prediker 7-9 en 2 Korintiërs 13

₁A moro betre fu abi wan bun nen dan fu abi bun switismeri, èn a dei di wan sma e dede betre moro a dei di a gebore. ₂A moro betre fu go na wan dede-oso dan fu go na wan friyari-oso. Bika un alamala o dede wan dei. Un di de na libi mus prakseri a sani dati bun. ₃A moro betre fu sari dan fu lafu. Awinsi dati e meki a fesi luku sari, a e meki a sma leri ondrofeni. ₄Wan koni sma lobi prakseri fa sani o de te a dede, ma wan don sma e prakseri soso prisiri.

₅A moro betre fu teki en te wan koni sma e piri ai gi yu, dan fu firi bun te wan don sma e gi yu grani. ₆Bika a lafu fu wan don sma de leki a babari fu makamaka taki di e bron ondro wan ketre. Na wan soso lafu di no wani taki noti.

₇Wan koni sma e tron wan don sma, efu a e pina wan trawan fu puru wan sani na en anu. Wan sma di e teki tyuku e pori en ati.

₈A kba fu wan sani betre moro a bigin fu en. Wan sma di abi langa pasensi, betre moro wan sma di abi bigifasi. ₉No nyan yu niri tumsi esi. Na don sma abi a gwenti fu e nyan den niri. ₁₀No aksi yusrefi taki: “Fa a du kon taki fosi sani ben e go moro betre leki now?” Bika wan koni sma no e aksi den sortu sani dati.

₁₁Koni na wan bun sani. A de leki gudu di bigisma e libi na baka. Na wan bun sani gi ala libisma. ₁₂Bika a srefi fasi fa moni kan kibri yu gi problema, na so koni kan du tu. Ma a wini di sma di koni abi, de taki a e gi langa libi na a sma di abi en.

₁₃Meki un luku den sani di Gado meki: suma kan meki wan sani let'opu di Gado meki kron? ₁₄Prisiri te sani e go bun ini yu libi. Te sani no e go bun, yu mus memre dati na Gado meki a ten dati tu. So wan libisma sabi fa a libi fu en o de tamara.

₁₅Ini a libi fu mi di e psa gwe mi si ala sortu sani. Wan fu den sani dati na taki sma di bun ini Gado ai e dede frukufruku, aladi den e du san bun ini Gado ai. Na a tra sei yu abi ogri-ati sma di e libi langa, aladi den e du ogri. ₁₆No denki fu yusrefi taki na bun nomo yu bun so ini Gado ai, èn no tyari yusrefi leki wan sma di koni psa marki. Na kiri yu wani kiri yusrefi? ₁₇No gi yusrefi tumsi abra na kruktudu èn no du don! Fu sanede yu wani dede fosi yu yuru kisi? ₁₈A o bun fu hori ala den tu warskow disi ini prakseri, bika no wan fu den sani disi e miti a sma di e lespeki Gado. ₁₉A makti di koni e gi a koni sma, bigi moro leki a makti di tin tiriman fu wan foto abi. ₂₀No wan sma de na grontapu di no e du ogri, di e du soso bun èn di no e sondu. ₂₁Un no mus teki ala sani di sma e taki, bika sma kan kon taigi yu dati yu knekti e fluku yu. ₂₂bika yusrefi sabi omeni leisi yu fluku trawan tu.

₂₃Nanga a koni fu mi, mi ondrosuku ala den sani dati. Mi prakseri na misrefi taki: a koni fu mi o gi mi piki tapu den sani dati. Ma koni no ben man du dati gi mi. ₂₄Den sani di de, bigi moro un ferstan, den dipi psa marki. Suma o man sabi den dorodoro? ₂₅Mi suku koni nanga mi heri ati, èn mi meki muiti fu ferstan ala sani di de. Mi suku koni èn mi ben wani ferstan den fu ben kan kon na wan besroiti. Mi ben wani sori taki fu du ogri na wan don sani èn fu don na wan trutru law sani. ₂₆Mi kon si wan sani tu di bita moro dede: dati na wan umasma di sabi kori mansma fu fanga den, wan umasma di ati de leki wan net èn di anu de leki bui. A no man fanga a sma di e gi Gado prisiri, ma a sma di no e gi Gado prisiri a e fanga. ₂₇Yere, Preikiman e taki, efu mi poti ala sani kon na wan fu ferstan den gi misrefi, mi e kon si disi: ₂₈Mi suku nanga ala sani di de ini mi, ma te nanga now mi no feni a piki ete. Mi feni wan sma nomo di e libi tapu wan leti fasi na mindri dusun, ma a no ben de wan umasma. ₂₉Ma yere, na disi wawan mi kon si: dati Gado meki libisma bun, ma dati na libisma e fromu densrefi na ini den denki.

₁Suma koni trutru? Suma man taki fa sani de trutru? Koni e meki a fesi fu wan sma brenki. A tranga luku e kmoto fu en fesi.

₂Du san kownu e komanderi, bika Gado ben meki en wan pramisi èn A ben sweri dati A o hori En na a pramisi. ₃No waka gwe fu kownu sondro fu prakseri bun san yu o du, èn no moksi nanga sma di wan du en ogri. Bika a kan du san a wani. ₄Memre tu dati na san en e taki e psa. Suma sa man kari en kon fu a gi frantwortu? ₅Ogri no o miti a sma di e du san kownu e komanderi. Wan koni sma sabi fa nanga oten a mus du wan sani. ₆Bika ala sani abi en ten nanga en fasi fa a mus du. Ma libisma abi fu psa furu tranga ten, ₇bika a no sabi san de fu kon noso fa sani sa de. Suma sa man taigi en dati? ₈No wan sma abi makti abra a bro fu en, efu a mus koti a o koti. No wan sma abi makti tu abra a dei di a o dede. Èn leki fa srudati no e kisi primisi fu gwe libi wan feti, na so ogri no e lusu den wan di e du ogri. ₉Mi si ala den sani dati di e psa na grontapu èn mi prakseri den go, mi prakseri den kon. Son leisi sma e basi trawan ma densrefi e firi en.

₁₀Mi si wan tra sani tu: dati na a fasi fa den e beri ogri-ati sma. Sma e tyari den fu a santa presi go beri èn den e kisi grani fu sma fu a srefi foto pe den ben du den ogri. Dati na wan sani di tranga fu ferstan. ₁₁Fu di sma no e kisi strafu wantron fu a ogri di den e du, meki a e kon so esi ini den ede fu du ogri. ₁₂Wan sondusma kan abi wan langa libi aladi a du ogri en heri libi langa. Ma mi sabi tu dati a o go bun nanga a sma di abi lespeki gi Gado, fu a lespeki di a abi gi En. ₁₃Ma nanga a ogri-ati sma a no o go bun. Leki fa wan schaduw e psa es'esi, na so a libi fu en o psa es'esi tu, bika a no e lespeki Gado. ₁₄Ma wan sani e psa na grontapu di tranga fu ferstan: dati de tak' son sma di bun ini Gado ai e kisi a strafu di ogri-ati sma mus kisi, èn dati son ogri-ati sma e kisi san sma di bun ini Gado ai ben mus kisi. Mi taigi misrefi taki: dati tranga fu ferstan. ₁₅Dat' meki a moro betre sani di wan sma kan du na fu prisiri. Bika wan moro betre sani no de fu du dyaso na grontapu dan fu nyan, fu dringi, nanga fu prisiri. Den sani dati no mus mankeri ini a libi fu wan sma nanga ala a tranga wroko di a e du a ten di Gado gi en fu a libi na grontapu.

₁₆Di mi teki a besroiti fu kon ferstan moro betre san koni wani taki èn fu luku ala den sani di libisma e du na grontapu, mi no ben e sribi, no dei no neti. ₁₇Dan mi kon si dati libisma no o man ferstan noti fu den sani di Gado du na grontapu. Awinsi omeni muiti den meki, den no man ferstan en. Srefi efu wan koniman taigi yu dati a ferstan en, na lei a e lei.

₁Trutru, mi prakseri den sani disi bun èn mi ondrosuku den alamala. Dan mi kon si taki den sani di den sma di bun ini Gado ai nanga den koni sma e du, de ini Gado anu. A lobi di den e sori noso a si di den no man si sma na ai. No wan libisma sabi san de fu kon. ₂A srefi sani e miti ala sma: a sma di bun ini Gado ai nanga a sma di e du ogri, a sma di e du bun, a sma di krin ini Gado ai, nanga a sma di no krin ini Gado ai, a sma di e tyari ofrandi gi Gado nanga a sma di no e tyari ofrandi. A srefi sani di e psa nanga a bun sma e psa nanga a sondusma, sosrefi nanga a sma di e meki sweri nanga a sma di no e meki sweri kwet'kweti. ₃Disi na wan sari sani di e psa na grontapu, dati a srefi sani e miti ala sma. Ma a no dati wawan. Na wan sari sani tu dati den heri libi langa a ati fu libisma furu nanga ogri èn nanga prakseri di no bun èn dati den e go na den grebi baka dati. ₄Ma solanga wan sma de na libi, howpu de gi en. Wan dagu di de na libi betre moro wan lew di dede. ₅Bika den sma di de na libi sabi dati den o dede wan dei. Ma den dedewan no sabi noti moro. Den no abi noti moro fu wini. Sma no e prakseri den moro tu. ₆A lobi di den ben lobi sma noso a lobi di den no ben lobi sma srefsrefi, nanga a abi di den ben wani abi san wan trawan abi, ala den sani disi psa gwe langa ten kba. Noiti moro den e teki prati na san e psa na grontapu.

₇We dan, nyan yu brede nanga prisiri, dringi yu win nanga wan breiti ati. Bika na so Gado ben wani en langa ten kba. ₈Weri ala ten leki na wan fesa yu e go èn yu mus smeri switi. ₉Meki prisiri ini a libi nanga a uma di yu lobi. Du dati ibri dei fu a libi di Gado gi yu dyaso na grontapu, a libi di tranga fu ferstan, a libi di e psa gwe es'esi. Bika dati na a pai di Gado e gi yu fu ala a tranga wroko, fu a naki di yu e naki yu skin dyaso na grontapu. ₁₀Du ala san yu feni fu du, èn du en nanga yu heri ati. Bika ini dedekondre pe yu o go, wroko no e wroko, denki no e denki, sabi noso koni no de. ₁₁Mi si na grontapu tu dati a no ala ten a sma di moro esi e wini a strei lon, dati a no dyadya fetiman e wini bigi feti, dati a no a sma di koni e abi nyanyan ala ten, dati a no a sma di e teki bun besroiti e kon gudu èn dati sma no e lespeki a wan di sabi du sani heri bun. Bika a ten nanga a fasi fa sani e psa o poti fa sani o waka. ₁₂No wan sma no sabi tu oten en dedeyuru o doro. Leki fa fisi no sabi tu oten den o fasi ini a net noso fowru oten den o fasi ini a krafana. Na so dede e kon te libisma no e ferwakti en. A e kon wantronso.

₁₃Mi si ete wan koni na grontapu di meki mi ferwondru: ₁₄yu ben abi wan pikin foto nanga wantu sma nomo na ini. Wan kownu nanga furu makti hari go drape fu teki a foto abra: den lontu en fu alasei èn den meki heihei ipi fu santi nanga ston fu pe den ben man feti nanga den sma fu a foto. ₁₅Ma yu ben abi wan pôti koniman ini a foto di ben kan ferlusu a foto nanga a koni fu en. Ma no wan sma ben e prakseri a pôtiman. ₁₆Ne mi taki: Yu e si dati koni betre moro krakti. Ma den sma si a koni fu a pôtiman leki noti èn den no teki den rai fu en. ₁₇A moro betre fu arki den wortu di wan koniman taki tapu wan safri fasi, dan a babari fu wan tiriman na mindri don sma. ₁₈Koni betre moro iniwan fetisani. Ma wan enkri fowtu kan pori furu sani.

₁Disi na a di fu dri leisi di mi e kon na unu. Gadowortu e taki: Te tu noso dri sma e kotoigi fu wan sani, dan a sani dati tru. ₂Di mi ben de a di fu tu leisi na unu, mi ben warskow den sma di ben e libi ini sondu. Mi ben warskow ala den trawan tu. Now mi e warskow den baka fosi mi doro, tak' te mi doro, ala sma o kisi a strafu di fiti en. ₃Un e aksi mi fu sori unu tak' te mi e taki, dan a tru taki Kristus e taki. Ma Kristus no sori ensrefi swaki gi unu. A e wroko nanga krakti na un mindri. ₄Di den spikri Kristus na a kroisi, A ben swaki. Ma now A e libi nanga a krakti fu Gado. Wi srefi swaki neleki fa A ben swaki, ma nanga a krakti fu Gado, wi srefi o libi nanga En fu kan yepi unu.

₅Un mus ondrosuku unsrefi fu si efu un de ini a bribi, un mus luku efu na so a de. A gersi taki un no sabi trutru tak' Yesus Kristus de ini unu. Efu un no sabi dati, dan unu na lasiman. ₆Mi e howpu taki unu sa kon si taki wi a no lasiman. ₇Wi e begi Gado fu un no du no wan ogri. No fu sori sma taki wi na winiman, ma wi wani taki un mus du san bun, awinsi a gersi taki wi na lasiman. ₈Bika wi no man du noti san no e akruderi nanga a tru leri, wi mus du san e agri nanga a tru leri. ₉Wi e breiti efu unu tranga ini bribi, awinsi wi e firi swaki. Èn wi e begi taki un sa kon de soleki fa un mus de. ₁₀Dat' meki mi skrifi unu den sani disi fosi mi doro drape. Bika mi no wani taki tranga nanga unu te mi doro. Masra gi mi a makti dati, ma A gi mi en fu bow a bribi fu unu, no fu broko en.

₁₁We, brada nanga sisa, na a kba mi wani taigi unu fu un tan bun. Un mus kon de san un mus de. Un arki bun rai. Un mus si sani a srefi fasi, èn un mus tan libi ini freide nanga makandra. Dan a Gado fu lobi nanga freide sa de nanga unu. ₁₂Un mus taki makandra odi nanga wan santa bosi. Ala den sma fu Gado dya seni taki un odi.

₁₃Meki a bun-ati fu wi Masra Yesus Kristus èn a lobi fu Gado de nanga unu. Èn meki un alamala de wan nanga makandra ini a Santa Yeye.