Dag 265 van 365- Prediker 10-12 en Galaten 1

₁Te dede freifrei fadon ini a oli nanga san switismeri e meki, den e pori en. Na so pikinso donfasi e pori furu koni. ₂A ati fu wan koni sma e meki a waka tapu a leti pasi, ma a di fu wan don sma e meki a waka tapu a kruktu pasi. ₃Awinsi pe a don sma go a e kon na krin dati a no abi ferstan. A e sori ala sma fa a don.

₄Efu kownu ati bron nanga yu, teki en nanga sakafasi. Bika efu yu tan tiri, bigi fowtu no abi fu meki. ₅Mi si wan ogri di e psa na grontapu. Na wan fowtu di tiriman e meki dorodoro: ₆den e poti don sma na hei presi èn den e poti prenspari nanga gudu sma na lagi presi. ₇Mi si srafu e sidon tapu asi èn bigiman fu kondre e waka nanga futu leki srafu.

₈A sma di e diki wan olo kan fadon go na ini, èn sneki kan beti wan sma di e broko wan skotu. ₉A sma di e kapu ston puru na bergi kan kisi mankeri, èn a sma di e priti udu mus luku bun taki a no kisi mankeri. ₁₀A sma di no e srapu wan aksi te a dede, mus poti moro krakti te a e wroko. Ma koni na a moro bun sani di wan sma abi fanowdu, fu meki sani waka bun. ₁₁Efu a sneki beti a man di sabi tiri sneki, fosi a tiri a sneki, dan a man no abi noti na en.

₁₂Den sani di wan koni sma e taki e meki sma e lespeki en, ma den sani di wan don sma e taki e meki a broko en eigi neki. ₁₃Te a e bigin taki, yu e si kba dati na dondon sani a e taki. O moro fara a e go, o moro a e taki babaw. ₁₄Wan don sma e tak'taki furu, ma no wan sma sabi san o psa ini a ten di de na en fesi. Suma o man taigi en dati? ₁₅A tranga wroko di wan don sma e du e meki a e weri ensrefi, ma a pasi fu go na foto srefi a no man feni.

₁₆Bigi problema o miti a kondre di abi wan kownu di yongu tumsi èn di abi tiriman di e nyan na bigi nyanyantafra fruku mamanten kba. ₁₇Ma a kondre di abi wan kownu di kmoto fu wan heihei famiri, na wan blesi kondre. Den tiriman fu so wan kondre sabi a yoisti ten fu nyan na bigi nyanyantafra, fu kisi krakti èn no fu dringi drungu. ₁₈Efu wan sma lesi, den postu fu en oso o fadon. Efu wan sma e sidon nomo, a daki fu en oso o leki. ₁₉Sma e nyan wan bun preti nyan gi den prisiri, èn win e gi prisiri ini a libi. Ma efu yu no abi moni yu no kan abi no wan fu den tu. ₂₀Yu no mus fluku wan kownu, srefi ini yu prakseri yu no mus du en. Yu no mus fluku wan guduman, srefi ini yu sribikamra yu no mus du dati. Bika den fowru di e frei na loktu sa ferteri en moro fara. Den sa panya lontu sa yu taki.

₁Trowe yu brede go ini a watra, bika yu o feni en baka, baka wan langa pisten. ₂Prati san yu abi nanga seibi noso aiti sma, bika yu no sabi sortu ogri kan psa na grontapu. ₃Te wolku span nanga alen, den e lusu en kon na grontapu. Te wan bon fadon, dan a no abi trobi efu na zuidsei noso na noordsei, pe a fadon na drape a e tan didon. ₄A gronman di e tan luku a winti nomo noiti o prani, èn a sma di e tan luku den wolku nomo noiti o koti a nyanyan ini en gron. ₅Leki fa un no sabi fa libi e kon ini wan pikin di de ini a bere fu en m'ma, na so un no sabi den sani tu di Gado, di meki ala sani, e du. ₆Sai yu siri te mamanten, èn wroko go miti mofoneti. Bika yu no sabi sortu wan fu den siri o opo, den di fu mamanten noso den di fu mofoneti. A kan tu dati den ala tu opo.

₇A libi na wan prisiri sani, a bun fu si a krin fu dei. ₈Dat' meki efu wan sma e libi langa, a mus prisiri en heri libi, ma a mus memre tu dati dede no abi kba. Èn ala san e psa baka te wan sma dede tranga fu ferstan. ₉So, yongu sma, un prisiri te un yongu, prisiri nanga yu heri ati ini yu yongu yari. Du san yu ati e firi èn meki den ai fu yu luku san den wani. Ma sabi dati Gado o kari yu kon na frantwortu fu ala den sani dati. ₁₀Sorgu dati sani no e meki yu e sari, èn dati yu no e sikisiki. Bika te yu yongu, ini den yari te yu e gro kon, sani e psa di tranga fu ferstan.

₈Preikiman e taki disi: “A libi tranga fu ferstan! A gersi leki un no man ferstan not'noti fu ala den sani di e psa!”

₉Boiti dati Preikiman ben de wan koniman, a ben e tan leri a pipel sabi. A ben wegi sani go, a ben wegi den kon èn a ben lobi ondrosuku sani. A meki furu odo tu. ₁₀Te Preikiman ben e taki, a ben e meki ala muiti fu taki switi, èn te a ben e skrifi, a ben e skrifi sani di tru nanga wortu di de fu fertrow. ₁₁Ala den leri fu koni sma de leki wan prin, leki spikri di naki fasi ini udu. Na wán skapuman nomo gi den leri dati.

₁₂Mi boi, meki mi warskow yu fu ete wan sani: fu tyari odo kon na wan na wan wroko di no e kba, èn fu stuka fu kon koni o go na yu skin. ₁₃Efu un kan taki ala den sani di yu yere wan syatu fasi, un kan taki en so: Abi bigi lespeki gi Gado èn hori yu na den gebod fu En. A sani disi na gi ala sma. ₁₄Bika Gado o krutu ala sani san libisma du, owktu den sani di den du kibrikibri, den bun sani nanga den kruktu sani.

_1-2Gi den gemeente na Galasia.

Disi na wan brifi fu Paulus. Mi na wan boskopuman fu Yesus, fu di Yesus Kristus nanga Gado a P'pa, di ben meki Yesus opo baka na dede, ben wani dati. A no libisma seni mi go, èn a no libisma poti mi fu du a wroko disi. Mi nanga ala den brada nanga sisa di de nanga mi, e seni odi gi unu. ₃Wi e winsi taki Gado wi P'pa, nanga wi Masra Yesus Kristus, sa sori un bun-ati èn gi un freide. ₄Leki fa Gado wi P'pa ben wani, Yesus Kristus gi En libi fu wi sondu ede, fu ben kan ferlusu wi puru ini a takru grontapu pe wi e libi now. ₅Meki Gado, wi P'pa, kisi glori fu têgo èn ala ten! Amen.

₆Mi e ferwondru taki so esi un e drai un baka gi a Wan di kari un kon na En, nanga a bun-ati fu Kristus. Èn now un e gi yesi na wan tra bun nyunsu. ₇Ma a sani dati no de wan bun nyunsu kwet'kweti. Ma na wantu sma wani bruya unu, èn den e suku fu drai a bun nyunsu fu Kristus. ₈Ma awinsi wi srefi, noso wan engel fu heimel, ben sa tyari wan bun nyunsu gi unu di no de a srefi leki a bun nyunsu san wi ben tyari gi unu, dan meki a fluku fu Gado de na en tapu! ₉Mi ben taki en kba na fesi, now mi e taki en ete wan leisi: Efu wan sma e tyari wan bun nyunsu gi unu di no de a srefi leki a bun nyunsu san un ben kisi kba, dan meki a fluku fu Gado de na en tapu. ₁₀Mi no e suku fu kisi sma na mi sei, ma mi e suku fu Gado de na mi sei. Mi no e pruberi fu meki sma lobi mi. Efu mi ben du dati, mi no ben o de wan wrokoman fu Kristus.

₁₁Brada nanga sisa, mi kan taigi un disi: A bun nyunsu san mi e preiki no kmopo fu libisma. ₁₂Bika mi no kisi en noso leri en fu wan libisma, ma na Yesus Kristus ben tyari en kon na krin gi mi.

₁₃Un yere fu a fasi fa mi ben libi fos'fosi ini a Dyubribi. Mi ben de fayafaya na a gemeente fu Gado baka fu du en ogri, èn mi ben suku fu puru en na pasi. ₁₄Ini a Dyubribi mi skopu en moro fara leki furu fu den tra Dyusma fu mi speri. Nanga mi heri ati mi ben e du ala muiti fu hori san den afo fu mi ben leri. ₁₅Ma fosi mi gebore, Gado ben poti mi aparti gi Ensrefi, èn ini En bun-ati A kari mi. ₁₆A ben feni En bun fu meki mi si En Manpikin, fu mi ben kan go ferteri den sma di no de Dyu, abra En. Di a sani disi psa, mi no go na no wan libisma fu go suku rai. ₁₇Mi no go na Yerusalem tu, na den wan di ben de boskopuman fu Yesus kba fosi mi. Ma mi go na Arabia, èn fu drape mi drai go baka na Damaskus. ₁₈Dri yari baka dati mi go na Yerusalem fu go luku Kefas. Dan mi tan tin-na-feifi dei nanga en. ₁₉Mi no miti nanga no wan fu den tra boskopuman fu Yesus, boiti Yakobus a brada fu Masra. ₂₀San mi e skrifi dya no de wan lei. Gado na mi kotoigi. ₂₁Baka dati mi go na den kontren fu Siria nanga Silisia. ₂₂Ma den gemeente fu Kristus ini Yudea no ben leri sabi mi ete. ₂₃Den ben yere nomo taki a man di ben waka e du den ogri, e preiki a bribi now san a ben suku fu puru na pasi. ₂₄Na so den ben gi Gado grani fu san A ben du na ini mi.