Dag 292 van 365- Jesaja 56-58 en 2 Tessalonicenzen 2

₁Na so MASRA taki:

Un tan du sani tapu wan leti fasi,

èn un libi leki fa a fiti.

Bika a ferlusu di Mi o tyari de klar'klari fu kon,

èn her' esi a o de fu si fa Mi e du sani nanga leti.

₂A libisma di e du den sani dati,

di e hori tranga na den,

na wan blesi sma.

Sowan sma e hori a sabatdei, a no e pori en,

èn a no e du no wan ogri nanga en anu.

₃A doroseisma di e dini MASRA now no mus prakseri taki:

“A no abi misi tak' MASRA o hori mi aparti fu a pipel fu En.”

Den eunuch no abi fu prakseri tu taki:

“Luku mi, mi na wan bon di drei gwe.”

₄Bika disi MASRA e taki:

Den eunuch di e hori a sabatdei fu Mi,

den di e teki a besroiti fu du Mi wani,

èn di e hori densrefi na a ferbontu fu Mi,

₅den man dati Mi e gi wan moro betre sani,

leki manpikin nanga umapikin.

Mi e gi den wan nen ini a oso fu Mi,

nanga wan marki na tapu den skotu fu en,

di o meki sma memre den.

Mi e gi den wan nen di o tan fu têgo,

wan nen di sma no o fergiti.

₆Den doroseisma di e dini MASRA now,

di lobi a nen fu MASRA,

èn di tron knekti fu En,

iniwan fu den di e hori a sabatdei, di no e pori en,

èn di e hori tranga na a ferbontu fu Mi,

₇na den Mi e tyari go tapu a santa bergi fu Mi.

Mi e gi den prisiri ini a oso fu Mi pe begi e begi.

Den meti di den e bron leki ofrandi gi Mi tapu a altari,

nanga den meti di den e srakti leki ofrandi gi Mi,

Mi o teki nanga prisiri.

Bika a oso fu Mi mus de wan begi oso gi ala folku.

₈Na so Masra MASRA taki,

En di e tyari den Israelitisma kon na wan,

di feyanti ben tyari gwe nanga tranga:

Mi o tyari tra sma kon na wan,

makandra nanga den di kon na wan kba.

₉Meki ala meti fu a wei,

nanga ala meti fu a busi kon nyan.

₁₀Bika den waktiman fu a foto breni,

den no sabi noti.

Den alamala de leki babaw dagu di no man meki babari.

Heri dei den e didon fu den,

den e dyonko tak' den e dren srefi.

₁₁Den dagu disi na dagu di e swari,

nyanyan no e sari den.

Den na skapuman di no sabi noti.

Den alamala e tyari densrefi leki fa densrefi wani,

èn den alamala e luku soso den eigi saka.

₁₂Den e taigi makandra taki:

“Kon! Mi o go teki win fu un dringi drungu,

èn tamara un o du a srefi

ma un o du en moro bigi.”

₁Wan sma di bun ini Gado ai e dede,

èn no wan sma e teki a sani dati na ati.

Den e kiri sma di e libi bun,

ma no wan sma sabi fu sanede.

Iya, a ogri e meki taki den sma di bun ini Gado ai e dede gwe.

₂A e go ini freide.

Den sma di ben e libi krin,

sa rostu ini den grebi.

₃Ma unu dati, pikin fu uma di e du tofruwroko,

bakapikin fu uma di e huru èn di sribi nanga tra sma man,

un kon krosbei!

₄Nanga suma un denki tak' un e meki spotu?

Suma un wan gi bigi taki?

Gi suma un e langa un tongo?

Un na sma di wani fu libi wan sondu libi,

sma di e lei.

₅Ondro ibri bigi bon,

ondro ibri bon di lai wiwiri,

un e angri fayafaya fu sribi nanga makandra.

Un e srakti den pikin fu unu ini den dal,

nanga ini ibri bergi-olo.

₆Na mindri den grati ston ini a dal

yu o kisi wan pisi di o de fu yu.

Dati, iya dati na a pisi fu yu.

Bika na drape yu kanti win leki ofrandi,

na drape yu tyari graan-ofrandi.

Un denki Mi no sa strafu un fu dati?

₇Te na tapu bun hei bergi yu go didon meki lobi,

èn srefi drape yu kren go fu tyari ofrandi.

₈Yu poti den marki di mus memre yu na den san disi,

baka yu doro nanga na yu doro postu.

Yu drai yu baka gi Mi,

yu meki yu bedi,

yu kren go na en tapu,

dan yu meki presi tapu yu bedi gi suma wani kon.

Yu meki mofo nanga den omeni moni den ben mus pai.

Nanga prisiri yu ben e sribi nanga den,

èn yu no ben man puru yu ai fu den manpresi.

₉Yu hari go na a gado Molok nanga oli

èn nanga wan lo switismeri.

Yu seni boskopu go bun fara,

go te na dedekondre srefi.

₁₀Den langa pasi weri yu skin,

ma noiti yu taki: “Mi no man moro.”

Na fu di yu e feni nyun krakti meki yu no e weri.

₁₁Gi suma yu abi someni lespeki?

Gi suma yu e frede so taki yu e lei gi Mi?

Yu no e prakseri Mi moro,

yu no abi ten gi Mi moro.

Mi tan tiri tumsi langa,

dat' meki un no abi lespeki moro gi Mi.

₁₂Mi sa tyari den sani kon na doro di yu e du,

den sani di yu denki taki den bun,

ma di no man yepi yu.

₁₃Meki ala den kruktu gado fu yu yepi yu

te yu o bari suku yepi.

Winti o opo den alamala,

pikinso winti nomo o wai den alamala gwe.

Ma den di e kibri na Mi o kisi a kondre

nanga a santa bergi fu Mi gi densrefi.

₁₄Dan A taki:

“Hei en! Hei en! Seti a pasi!

Puru ala sani fu a pasi gi a pipel fu Mi, di kan meki den fadon.”

₁₅Na disi a Wan e taki di hei,

èn di fiti fu kisi a moro hei grani,

A Wan di e libi fu têgo

A Wan di santa:

Mi e libi na wan hei èn santa presi,

ma Mi de tu nanga den di e sari fu den ogri di den du,

nanga den di abi sakafasi,

fu gi nyun krakti na den di abi sakafasi,

nanga den di e sari fu den ogri di den du.

₁₆Iya, Mi no o tan krutu den fu têgo,

èn Mi ati no o tan bron na den tapu fu têgo tu.

Bika efu Mi du dati den o kon swaki,

èn na Mi na a Wan di e gi a libibro.

₁₇Na fu a kruktudu fu den,

a bigi ai di den abi tapu trawan sani,

meki Mi ati ben bron dan Mi strafu den.

Mi ben e kibri gi den te Mi ati ben e bron.

Ma den drai den baka gi Mi

èn den go den eigi pasi.

₁₈Mi si a fasi fa den e tyari densrefi,

ma Mi o dresi den,

Mi o tiri den,

Mi o gi den freide,

Mi o sori den sari-ati,

èn Mi o meki a mofo fu den wan di e sari, prijse Mi taki:

₁₉Freide! Freide!

Gi den di de fara nanga gi den di de krosbei.

So MASRA taki.

Èn Mi o dresi den.

₂₀Ma den ogri-ati sma de leki a se

di e rigeri dorodoro sondro kba.

A e tyari doti nanga tokotoko kon na loktu.

₂₁Den ogri-ati sma no sa abi freide,

Na so Mi Gado taki.

₁Bari bun tranga!

No hori yusrefi!

Meki a sten fu yu piki leki wan tutu.

Taigi a pipel fu Mi den ogri di den du,

ferteri a oso fu Yakob den sondu fu den.

₂Ibri dei baka den e kon suku fu Mi,

èn den abi prisiri fu sabi a wani fu Mi,

leki wan pipel di e du sani tapu wan leti fasi,

èn di no e poti den besroiti fu a Gado fu den na wan sei.

Den e aksi Mi fu bun besroiti èn den lobi fu kon na Mi fesi.

₃“Fu sanede Yu no e luku te un e faste?

Fu sanede Yu no e si te un e saka unsrefi?”

Bika yere, tapu a dei di un e faste un e bai èn un e seri sani,

èn un e pina den wrokoman fu unu.

₄Yere, un e faste fu meki trobi nanga fu hari taki,

un e naki un feyanti nanga kofu srefi.

Efu un e du den sani disi te un e faste,

a sten fu un no o de fu yere na heimel.

₅A no a sortu faste dati Mi wani,

a no den sani dati sma mus du tapu a dei pe den mus saka densrefi.

A no wan dei tu pe sma mus saka den ede leki wan bromki di flaw.

A no wan dei tu fu bradi lowkrosi na gron,

fu poti asisi na en tapu dan un go didon na tapu.

A no so faste e faste.

Den sortu dei dati no e gi MASRA prisiri.

₆Te un e faste Mi wani tak' un mus du den sani disi:

un mus tapu fu du kruktudu,

un mus puru a hebi lai di un poti tapu trawan,

un mus lusu den wan di un e pina meki den kan libi fri,

èn un mus tapu nanga ala fasi fu pina trawan.

₇Te un e faste un mus prati un brede nanga den mofinawan.

Den di no abi oso, un mus teki ini un oso.

Te un si wan sma e waka nanga sososkin,

un mus gi en krosi,

èn un mus yepi un eigi famiri.

₈Dan a leti fu unu o broko kon na doro leki te a son e opo,

èn es'esi sani sa go bun baka nanga unu.

Den bunfasi fu unu sa waka na un fesi,

èn a glori fu MASRA

o waka na un baka leki wan waktiman.

₉Dan te un o kari MASRA, A o piki.

Te un o bari fu a yepi unu, A o piki taki:

“Mi de dyaso.”

Dati na te un o tapu fu pina wan trawan,

tapu fu sori finga tapu wan trawan,

èn tapu fu tak' takru fu wan trawan.

₁₀Te un o gi wan sma di abi angri san unsrefi wani,

èn gi den sma di trawan e pina ala san den e angri,

dan a leti fu unu sa opo ini a dungru,

dungru o de leki bakadina gi unu.

₁₁Èn MASRA o tiri un ala ten.

Te un de ini wan kontren di drei srefsrefi,

A o gi un watra fu dringi,

èn A o gi un krakti baka.

Un o de leki wan bromkidyari di abi nofo watra,

leki wan watrabron nanga bun watra.

₁₂Presi di ben broko fadon bun langa kba un o bow baka,

fundamenti di ben seti poti bun langa na fesi kba, un o seti baka.

Den o kari unu:

A wan di e bow ston skotu baka,

nanga:

A wan di e seti pasi kon bun baka.

₁₃Efu un hori unsrefi na a sabatdei,

èn un no e bai nanga seri sani tapu a santa dei fu Mi,

efu un sa kari a sabatdei wan dei fu prisiri,

efu un sa si a dei fu MASRA leki wan santa dei,

èn efu un sa lespeki en fu no du den sani di un e du aladei,

fu no bai nanga seri sani a dei dati,

èn fu no tak' lawlaw sani a dei dati,

₁₄dan un sa prisiri fu MASRA ede.

Dan Mi sa tyari unu abra den bergi fu grontapu,

èn Mi o meki unu prisiri nanga a gudu

di Mi ben gi un afo Yakob taki na fu en.

Bika na MASRA srefi taki so!