Dag 291 van 365- Jesaja 53-55 en 2 Tessalonicenzen 1

₁Suma bribi den sani di un yere?

Suma si a krakti fu MASRA?

₂Leki wan pransun a opo na En fesi,

leki wan rutu di gro kmoto ini drei gron.

No wan moi ben de fu si na en,

noti no ben de na en san ben e meki un angri fu luku en.

₃Sma ben si en fu noti,

den ben e koti pasi gi en.

A ben de wan man di ben sabi san na skin-ati,

di ben sabi san na siki.

Wan man gi san sma ben e drai den fesi.

Sma ben si en fu noti, èn wi no ben teri en.

₄Ma a teki den siki fu wi na en tapu,

èn a nyan den pina fu wi.

Un ben e si en leki wan sma di Gado poti na wan sei,

leki wan sma di Gado strafu,

wan sma di Gado e pina.

₅Den dyuku En fu wi sondu ede

èn a teki hebi fonfon fu den ogridu fu wi.

A teki a strafu na en tapu fu wi kan abi en bun,

èn den wipi di a teki meki taki wi abi en bun.

₆Un alamala ben waka leki skapu sondro fu sabi pe un e go,

iniwan fu unu ben teki un eigi pasi.

Ma MASRA poti den kruktudu fu wi alamala na en tapu.

₇Den gi en hebi fonfon, ma a ben saka ensrefi gi den,

a no opo en mofo.

Leki wan skapu den tyari en go srakti,

èn leki fa wan skapu no e meki babari

te den e puru den wiwiri na en skin,

na so A no ben opo En mofo tu.

₈Den krutu en tapu wan kruktu fasi,

dan den tyari en gwe.

No wan sma fu en ten ben e span nanga en.

Den kiri en puru na mindri den libiwan.

Den strafu en fu a sondu fu mi pipel.

₉Den beri en pe den e beri den ogri-ati sma,

en grebi ben de na den guduman.

Ma noiti a no ben du wan ogri,

noiti a bedrigi wan sma nanga en mofo.

₁₀Ma a ben de a wani fu MASRA,

fu a nyan hebi fonfon.

A meki a siki.

A gi ensrefi leki wan ofrandi fu den kisi pardon fu den sondu,

fu kan si den bakapikin fu en,

èn fu libi langa.

A meki a wani fu MASRA psa.

₁₁Di a kba nyan a pina, a si a leti

èn en ati ben sidon.

Nanga a pina di a nyan,

a knekti fu mi di bun ini Gado ai,

o meki furu kon bun ini Gado ai,

èn a sa teki den kruktudu fu den na en tapu.

₁₂Fu dat'ede Mi sa gi en wan presi na mindri den bigiwan,

a sa prati den sani di wini ini feti nanga den tranga wan.

Bika a gi ensrefi abra fu den kiri en.

Den ben si en leki wan abani.

Ma a ben teki a strafu fu furu na en tapu,

èn a ben begi gi sondusma.

₁Uma di no man hori bere,

yu di noiti kisi pikin,

prisiri!

Yu di no sabi a pen fu kisi pikin,

bari fu prisiri!

Bika MASRA e taki tak' den pikin fu a uma di masra ben gwe libi en,

o furu moro den pikin fu a trow uma.

₂Meki yu tenti moro bigi,

hari den duku fu en moro bradi!

Bradi en o fara yu man!

Meki den titei fu en moro langa,

Naki den pen fu en fasi.

₃Bika yu o kon moro bigi na a let'sei nanga na a kruktusei.

Den bakapikin fu yu o yagi den tra folku gwe,

èn den o go libi ini foto pe sma no ben e libi moro.

₄No frede! Yu no o kon na syen.

No firi broko saka! Bika den no o man gi yu syen!

Yu o fergiti a syen fu yu yongu yari,

èn yu no o memre a broko saka moro,

fu a ten di yu no ben abi masra.

₅Bika a Wan di trow nanga yu, na a Wan di meki yu,

MASRA fu ala sani na a nen fu En.

A Wan di ferlusu yu na a Santa Wan fu Israel,

a Wan di den e kari: Gado fu heri grontapu.

₆Iya, MASRA kari yu di yu ben de leki wan uma,

wan uma di en masra ben gwe libi,

wan uma nanga bigi sari.

A kari yu leki wan yongu uma di en masra gwe libi.

Na so a Gado fu yu taki.

₇Fu wan syatu ten Mi ben gwe libi yu,

ma nanga bigi sari-ati Mi e teki yu baka.

₈Ini hebi atibron Mi ben drai Mi baka gi yu fu wan momenti.

Ma nanga a têgo lobi fu Mi, Mi sa sorgu gi yu.

Na so MASRA, yu Ferlusuman taki.

₉Gi Mi a de leki ini a ten fu Noa.

Leki fa Mi ben sweri taki den watra fu a ten fu Noa

no sa sungu grontapu noiti moro,

na so Mi e sweri now taki Mi ati no o bron moro na yu tapu,

èn taki Mi no o taigi yu moro taki Mi o du yu wan sani.

₁₀Awinsi hei bergi dribi,

pikin bergi kmopo na den presi,

a lobi fu Mi no o kmopo na yu tapu,

èn a ferbontu di Mi meki nanga yu tak' yu o libi ini freide, o tan.

Na so MASRA, di abi sari-ati nanga yu, taki.

₁₁Yu di sani miti,

yu di a tranga winti wai go pe a wani,

yu di no wan sma e trowstu,

yere, Mi o hari den ston fu yu nanga fini smenti,

Mi o meki a fundamenti fu yu nanga a diriston safier.

₁₂Den toren fu yu mi e meki fu robijn,

den poort fu yu fu karbonkelston,

èn a heri skotu fu yu mi e meki fu diriston.

₁₃Ala den pikin fu yu o kisi leri fu MASRA,

èn ala fasi a o go den bun.

₁₄Du sani nanga leti o de a fundamenti tapu san den o bow yu.

Feyanti di e pina yu sa tan fara fu yu,

yu no abi fu frede moro gi den.

No wan ogri no o miti yu moro tu,

bika den no o kon krosbei srefsrefi.

₁₅Efu toku sma kon feti nanga yu, a no Mi seni den.

Dat' meki den no o man hori feti nanga yu.

₁₆Yere, na Mi meki smeti.

Na den e gi a krofaya moro winti fu a kan teki faya,

fu den meki fetisani gi wan spesrutu wroko.

Na Mi meki a wan tu di e tyari pori, fu broko sani.

₁₇Ma no wan fetisani di meki fu feti yu,

o man du en wroko,

èn a o sori taki ala san den taki fu yu fesi krutu, no tru.

Disi na san den knekti fu MASRA o kisi,

a reti di Mi e gi den.

Na so MASRA taki.

₁Kon! Ibri sma di abi dreineki, kon, watra de dyaso.

Den sma di no abi moni kan kon bai èn nyan.

Kon, yu kan bai sondro moni

èn sondro fu pai un o kisi win nanga merki.

₂Fu sanede yu e pai gi wan sani di no de brede?

Fu sanede yu e gi yu moni gi sani di no e furu bere?

Un arki Mi bun, fu un kan abi bun nyanyan,

èn fu un kan abi en bogobogo.

₃Un kaka un yesi èn un kon na Mi,

un arki fu un kan libi.

Mi o meki wan ferbontu nanga unu di o de fu têgo,

Mi sori un a srefi lobi di Mi ben sori David.

₄Un yere, Mi ben poti en leki wan ketoigi gi folku,

leki wan edeman nanga tiriman fu folku.

₅Yere, yu o kari wan folku di yu no sabi,

wan folku di no sabi yu o lon kon na yu.

Den o du dati fu MASRA ede,

a Gado fu yu, a Santa Wan fu Israel,

fu a grani di A gi yu.

₆Suku MASRA te A de fu feni,

kari En te A de krosbei.

₇Meki den ogri-ati sma tapu nanga a ogri di den e du,

meki den di e du kruktudu kenki den prakseri.

Meki den drai kon baka na MASRA,

dan a sa sorgu gi den.

Meki den drai kon baka na a Gado fu unu,

fu A gi den furu pardon.

₈Ma den sani di Mi prakseri fu du,

a no san unu prakseri fu du,

a fasi fa Mi wani sani mus waka,

a no de fa un wani tak' sani mus waka.

Na so MASRA taki.

₉Bika leki fa heimel hei moro grontapu,

na so a fasi fa Mi wani taki sani mus waka,

hei moro leki fa un wani sani mus waka,

èn san Mi prakseri fu du hei moro san un prakseri fu du.

₁₀Bika te alen nanga sneeuw fadon fu heimel,

den no e drai go drape baka fosi den nati a gron,

fu a kon bun fu sani kan gro,

fu a kan gi siri baka na a sma di sai

nanga nyanyan fu nyan.

₁₁Na so a sani di Mi taki nanga Mi mofo de tu:

a no o drai kon leigileigi baka na Mi,

ma a o du san Mi wani,

èn a o du a wroko di Mi seni en fu a du.

₁₂Iya, un o hari gwe nanga prisiri,

ini freide un o drai kon baka.

Hei bergi nanga pikin bergi o bari fu prisiri,

èn ala den bon ini den wei o naki ini den anu.

₁₃Pe a makamaka ben gro,

wan sipresbon o gro kon.

Pe krasiwiwiri ben e gro

wan mirtebon o gro now.

Ala den sani disi o gi MASRA bigi nen.

Den o de wan marki fu têgo di no wan sma o man puru.