1Suma bribi den sani di un yere?
Suma si a krakti fu MASRA?
2Leki wan pransun a opo na En fesi,
leki wan rutu di gro kmoto ini drei gron.
No wan moi ben de fu si na en,
noti no ben de na en san ben e meki un angri fu luku en.
3Sma ben si en fu noti,
den ben e koti pasi gi en.
A ben de wan man di ben sabi san na skin-ati,
di ben sabi san na siki.
Wan man gi san sma ben e drai den fesi.
Sma ben si en fu noti, èn wi no ben teri en.
4Ma a teki den siki fu wi na en tapu,
èn a nyan den pina fu wi.
Un ben e si en leki wan sma di Gado poti na wan sei,
leki wan sma di Gado strafu,
wan sma di Gado e pina.
5Den dyuku En fu wi sondu ede
èn a teki hebi fonfon fu den ogridu fu wi.
A teki a strafu na en tapu fu wi kan abi en bun,
èn den wipi di a teki meki taki wi abi en bun.
6Un alamala ben waka leki skapu sondro fu sabi pe un e go,
iniwan fu unu ben teki un eigi pasi.
Ma MASRA poti den kruktudu fu wi alamala na en tapu.
7Den gi en hebi fonfon, ma a ben saka ensrefi gi den,
a no opo en mofo.
Leki wan skapu den tyari en go srakti,
èn leki fa wan skapu no e meki babari
te den e puru den wiwiri na en skin,
na so A no ben opo En mofo tu.
8Den krutu en tapu wan kruktu fasi,
dan den tyari en gwe.
No wan sma fu en ten ben e span nanga en.
Den kiri en puru na mindri den libiwan.
Den strafu en fu a sondu fu mi pipel.
9Den beri en pe den e beri den ogri-ati sma,
en grebi ben de na den guduman.
Ma noiti a no ben du wan ogri,
noiti a bedrigi wan sma nanga en mofo.
10Ma a ben de a wani fu MASRA,
fu a nyan hebi fonfon.
A meki a siki.
A gi ensrefi leki wan ofrandi fu den kisi pardon fu den sondu,
fu kan si den bakapikin fu en,
èn fu libi langa.
A meki a wani fu MASRA psa.
11Di a kba nyan a pina, a si a leti
èn en ati ben sidon.
Nanga a pina di a nyan,
a knekti fu mi di bun ini Gado ai,
o meki furu kon bun ini Gado ai,
èn a sa teki den kruktudu fu den na en tapu.
12Fu dat'ede Mi sa gi en wan presi na mindri den bigiwan,
a sa prati den sani di wini ini feti nanga den tranga wan.
Bika a gi ensrefi abra fu den kiri en.
Den ben si en leki wan abani.
Ma a ben teki a strafu fu furu na en tapu,
èn a ben begi gi sondusma.
