1Opo, Sion, opo!
Kisi krakti baka!
Weri moi krosi, santa foto Yerusalem!
Bika no wan sma di no besnei,
noso wan sma di no krin ini Gado ai,
o kon na yu ini moro.
2Yerusalem, opo, dan yu e naki a doti puru fu yu skin.
Teki yu presi tapu a kownusturu.
Sion, yu di ben de na strafu,
lusu den keti fu yu neki.
3Na so MASRA taki:
Noti den no pai di den bai unu,
noti Mi no o pai tu fu fri unu.
4Na so MASRA taki:
Langa di psa a pipel fu Mi ben hari go na Egipte
fu tan leki doroseisma drape fu wan pisten.
Ma a pipel fu Asur pina den sondro fu den du wan sani.
5Ma san Mi e si dyaso now?
MASRA e taki.
Den tyari a pipel fu Mi gwe sondro taki den du wan sani.
Den edeman fu den ben e krei,
MASRA taki.
Èn dorodoro, ibri dei, den ben teki a nen fu Mi e meki spotu.
6Ma a ten dati a pipel fu Mi sa sabi a nen fu Mi,
èn taki na Mi na a wan di e taki:
“Un luku Mi dyaso.”
7O switi a de te wan boskopuman e lon kon abra den bergi
fu tyari bun nyunsu kon.
A e tyari boskopu fu freide kon,
a e tyari bun nyunsu kon,
a e taki tak' ferlusu e kon
èn a e taigi Sion taki: “Yu Gado na kownu.”
8Arki! Den waktiman e opo den sten!
Makandra den e bari fu prisiri!
Bika den e si nanga den eigi ai:
MASRA e drai kon baka na Sion.
9Presi fu Yerusalem di broko didon na gron,
makandra un mus bari fu prisiri,
bika MASRA trowstu En pipel.
A ferlusu Yerusalem.
10MASRA e meki ala den folku si a makti fu En.
Heri grontapu sa si fa Gado e ferlusu.
11Un gwe! Un gwe!
Un hari kmopo drape!
Un no fasi no wan fu den sani di no krin ini Gado ai!
Un kmopo na den mindri,
un di e tyari den santa wrokosani fu MASRA,
un krin unsrefi.
12Ma un no o abi fu hari gwe es'esi.
A no o abi fu gersi tu tak' na lowe un e lowe.
Bika MASRA e go na un fesi,
èn a Gado fu Israel e waka na un baka.
A strafu di tyari freide
13Yere, a sani di Mi knekti o du o waka bun!
A o kisi grani! Sma o gi en bigi nen.
14Leki fa a ben meki a skin fu furu gro,
so wan groskinfasi a ben kon tan,
a no ben gersi libisma moro,
a no ben abi not'noti moro fu wan libisma,
15na so a sa meki furu folku skreki.
Kownu no sa sabi san fu taki.
Bika san sma no ben ferteri den,
densrefi e si now,
èn san den no ben yere,
den e kisi fu yere now.
