1Un arki mi,
un di e suku nomonomo fu sani psa tapu wan leti fasi,
un di e suku MASRA.
Un luku a bergiston pe den kapu un puru,
a bigi olo pe den diki un puru.
2Un luku Abraham, un p'pa,
nanga Sara, di meki unu.
Di Mi kari Abraham, a ben de en wawan.
Ma dan Mi blesi en èn Mi gi en bun furu bakapikin.
3Bika MASRA e trowstu Sion.
A e firi sari gi den presi di broko pis'pisi te na gron.
A meki a dreisabana fu en kon tan leki a dyari fu Eden,
den presi di gersi broko pranasi leki a dyari fu MASRA.
Sma o prisiri èn den o breiti drape,
den o gi En tangi èn den o singi.
4Un arki Mi, Mi pipel,
Mi folku, un kaka un yesi gi Mi.
Mi o meki wèt poti,
èn Mi o meki sani psa na tapu wan leti fasi,
dati o de leki wan faya gi folku.
5A ten de krosbei pe Mi o meki sani psa tapu wan leti fasi,
a ferlusu di Mi o tyari o de fu si,
Mi o tiri den folku tapu wan leti fasi.
Tapu mi den kondre tapu se nanga den wan na sekanti e wakti,
tapu a makti fu mi den e howpu.
6Un luku go na loktu na heimel,
èn un luku grontapu na ondrosei.
Heimel o wai gwe leki smoko,
grontapu o pori gwe leki wan owru krosi,
den sma fu en o dede leki maskita,
ma a ferlusu di mi e tyari na fu têgo,
èn wan kba no o kon na a du di Mi e du sani tapu wan leti fasi.
7Folku nanga a wèt fu mi ini un ati,
un di sabi san a wani taki fu libi na tapu wan leti fasi,
un arki mi.
Un no frede te libisma o wani teki un meki spotu,
un no meki a broko di den wani broko un saka hati unu.
8Bika den no o man du noti moro,
leki fa yu no man du noti moro tu
nanga krosi noso katun di kakalaka nyan.
Wan kba no o kon na a du di Mi e du sani tapu wan leti fasi,
èn a ferlusu di mi e tyari na fu têgo.
9Wiki, wiki, anu fu MASRA!
Sori Yu krakti.
Wiki leki fos'fosi,
leki a ten di psa langa kba.
Na Yu ben de a wan di ben kapu Rahab trowe,
di boroboro a bun bigi sneki fu a se.
10Na Yu ben de a wan di ben drei a se,
den watra fu a bun dipi presi.
Na Yu ben meki wan pasi ini a se,
fu meki den wan di Yu ben ferlusu ben kan psa.
11Den wan di MASRA ferlusu o drai kon baka,
nanga bigi prisiri den e kon na Sion.
Wan têgo prisiri sa de na den tapu.
Den o breiti, den o prisiri,
ma sorgu nanga dyeme sa lowe.
12Mi, na Mi na a wan di e trowstu unu!
Fa un kan frede gi libisma dan,
gi libisma di e dede gwe leki grasi?
13Fa un kan fergiti MASRA,
a Wan di meki unu?
Na En hari a heimel poti leki fa a de.
Na En poti grontapu tnapu.
Fa un e tan frede nomo so,
gi a atibron fu a wan di e pina unu,
te a e meki ensrefi klari fu puru un na pasi?
Pe a atibron fu a wan di ben pina unu de now?
14A wan di den ben keti poti na strafu o kon fri heri esi.
A no o dede, a no o go na en grebi,
èn nyanyan no o mankeri en.
15Mi na MASRA, a Gado fu yu,
a Wan di e meki a se e rigeri tak' den skwala fu en e meki babari.
MASRA fu ala sani na En nen.
16Mi poti den wortu fu Mi ini a mofo fu yu,
èn Mi e kibri yu ini Mi anu.
Mi di hari a heimel poti leki fa a de,
èn di poti grontapu tnapu,
e taigi Sion taki:
“Un na a pipel fu mi.”
17Wiki! Wiki!
Yerusalem, opo!
MASRA meki yu dringi fu a kan fu a hebi atibron fu En.
Yu dringi a kroiki leigi te yu drungu.
18No wan fu den pikin di a meki tyari en waka,
no wan fu den pikin di a kweki grabu en anu hori.
19Tu sani miti yu.
Suma sa gi yu dek'ati?
Ala sani broko, ala sani pori,
angri nanga bigi feti.
Suma man trowstu yu?
20Den pikin fu yu fadon didon tapu den uku fu ala strati,
den no man du noti moro.
leki wan dia di fasi ini wan net.
A atibron fu MASRA ben kon hebi na den tapu,
a strafu fu a Gado fu den.
21Ma yu di someni sani miti, arki now,
yu di drungu, ma no fu win.
22Na so Masra MASRA taki,
a Gado fu yu, di e taki gi En pipel:
Luku, Mi puru a kan na yu anu di ben drungu yu.
A kroiki nanga a hebi atibron fu Mi,
yu no abi fu dringi moro fu en.
23Mi e langa en gi den wan di ben pina yu,
den di ben taigi yu taki:
“Go didon na gron meki un waka na yu tapu.”
So yu go didon
èn yu bradi yu baka leki wan strati gi den
fu den ben kan waka psa.
