Dag 293 van 365- Jesaja 59-61 en 2 Tessalonicenzen 3

₁Un yere, a anu fu MASRA no syatu fu ferlusu unu,

èn den yesi fu En no tapu tak' A no man yere unu.

₂Ma na den kruktudu fu unu e tyari prati

mindri unu nanga a Gado fu unu,

èn na den sondu fu unu e meki A drai En baka

fu A no yere unu.

₃Bika brudu flaka den anu fu unu,

èn kruktudu flaka den finga fu unu.

Un e lei tu nanga un mofo,

èn a tongo fu unu e tak' ogri fu trawan.

₄No wan tori nanga san sma e go na krutubakra

na fu feni leti,

èn no wan tori e krutu na tapu wan leti fasi.

Den sani di den e tyari kon na fesi na soso sani,

nanga lei.

Den furu nanga kruktudu

èn san den e tyari kon na doro na ogri.

₅Den ogri di den e sidon prakseri fu du

de leki te eksi fu takru sneki e broko.

Den e fanga sma nanga den sani fu den

leki fa anansi e fanga sani ini a anansititei.

A sma di e nyan a eksi fu den e dede,

èn efu a eksi broko,

wan takru sneki e kmoto na ini.

₆Leki fa yu no man weri anansititei fu tapu yu skin,

na so den no man kibri a ogri tu di den e du.

Leki fa a anansititei no warti leki krosi,

na so den sani di den e prakseri fu du na sososani.

Ala san den e du na ogri,

èn den e du sani nanga tranga.

₇Den gaw fu go du ogri,

es'esi den e kiri sma di no du noti.

Soso ogri de ini den ede,

alape den go na bigi ogri nanga pori.

₈Den no sabi san na freide noso libi wan fasi di fiti.

Den no e waka a leti pasi fu kisi san den wani.

No wan sma di e waka a pasi dati sabi san na freide.

₉Na fu dat'ede sani no e psa gi wi na tapu wan leti fasi

èn na fu dat'ede un no man kisi un leti.

Un e howpu fu si a leti,

ma a e kon moro dungru.

Un e howpu fu a krin fu dei,

ma un e tan waka ini dungru.

₁₀Leki brenisma un e firifiri a skotu te un e waka,

un e firifiri leki sma di no abi ai srefsrefi.

Bigibigi dei un e misi futu leki na neti e fadon.

Leki dedesma un de, aladi wi abi ala un krakti ete.

₁₁Un alamala e bari leki wan beer

te un e sari un e meki leki doifi.

Un wakti fu wi kisi wi leti, ma a no e kon,

tapu ferlusu, ma a e tan fara fu wi.

₁₂Bika den fowtu fu wi furu na Yu fesi,

den sondu fu wi de leki ketoigi di e krutu wi.

Un sabi taki un fowtu,

un sabi den kruktudu di un du:

₁₃Un kaka un futu gi Yu,

un taki tu tak' un no sabi MASRA,

un drai un baka gi a Gado fu unu.

Den sani di un e taki na soso fu pina trawan,

èn bedrigi trawan.

Un furu nanga soso lei

èn san wi e puru kon na doro na sani di no tru.

₁₄Na dat' meki sani no e du tapu wan leti fasi,

du sani nanga leti de fara fu wi.

Bika sma no e tak' a tru moro tapu den pren,

presi no de gi sma di e tak' sani kmopo fu wan krin ati.

₁₅Tru no de fu feni na un mindri moro,

èn den e pina den sma di no wan du ogri.

Ma MASRA si ala den sani dati,

èn A no ben bun ini En ai

taki sani no ben e du tapu wan leti fasi.

₁₆A si tak' no wan sma ben de,

èn A ferwondru trutru tak' no wan sma ben e du wan sani.

Dat' meki nanga En eigi krakti A tyari yepi kon,

èn a wani fu En fu sani psa tapu wan leti fasi meki A du dati.

₁₇Du sani tapu wan leti fasi ben de leki wan isri bosroko di A weri.

A ferlusu di A e tyari ben de leki wan fet'ati tapu En ede.

A weri a pai di A o pai baka leki en srudati krosi,

èn a domru Ensrefi ini hebi atibron leki wan langa dyakti.

₁₈A o pai ini wan sma fu a sani di a du:

den feyanti fu En a o pai nanga atibron,

èn den di e feti En A o pai baka.

Den kondre tapu se nanga den wan na a sekanti A o strafu tu.

₁₉Dan den sma na westsei o kisi bigi lespeki gi a nen fu MASRA,

èn den sma fu oostsei o abi bigi lespeki gi a glori fu En.

Bika A o kon leki wan liba di e lon tranga,

fu di a bro fu MASRA e meki a watra rigeri.

₂₀Ma A o kon leki a Ferlusuman gi Sion,

nanga gi den sma fu Yakob di wani tapu nanga ogridu.

Na so MASRA taki.

₂₁Fu Mi sei, disi na a ferbontu di Mi e meki nanga den,

MASRA taki.

A Yeye fu Mi di de na yu tapu,

nanga den wortu fu Mi di Mi poti ini yu mofo,

no sa kmopo ini a mofo fu yu.

Den no sa kmopo ini a mofo fu den pikin

nanga ini a mofo fu den granpikin fu yu tu,

bigin fu now èn fu têgo.

So MASRA taki.

₁Yerusalem, opo èn brenki!

Bika a leti fu yu kon,

a glori fu MASRA opo na yu tapu tu.

₂Bika yere,

dungru sa de abra grontapu,

dipi dungru sa de tapu den folku.

Ma MASRA sa opo na yu tapu leki fa a son e opo,

a glori fu En sa de fu si na yu tapu.

₃Folku sa hari kon na a leti fu yu,

kownu sa kon na a brenki leti fu yu te a e opo.

₄Opo yu ede luku lontu.

Den e kon na wan èn den e hari kon na yu.

Den manpikin fu yu e kmopo fu farawe kon,

den umapikin fu yu den opo poti na den seibere.

₅Yusrefi o si dati èn a fesi fu yu o brenki.

A ati fu yu o dyompo fu prisiri,

bika sipi o tyari ala den gudu fu kondre abra a se gi yu.

Den gudu fu den folku o kon na yu.

₆Kameel sa furu a kondre,

yonguwan fu Midyan nanga fu Efa.

Furu sa kmoto fu Seba kon.

Den o kon nanga gowtu nanga wierook,

èn den o ferteri fa MASRA bigi.

₇Ala den skapu nanga krabita fu Kedar e kon na wan gi yu.

Den man skapu fu Nebayot tnapu klar'klari fu te yu abi den fanowdu.

Den o bron leki ofrandi tapu a altari fu Mi,

ofrandi di e gi Mi prisiri,

èn a moi oso fu Mi, Mi o meki moro moi.

₈Suma na den di e wai kon leki wolku,

di e frei leki doifi di e go na den koi?

₉Na tapu mi den kondre na sekanti e wakti.

Den sipi fu Tarsis na den fosiwan di o kon.

Den o tyari den manpikin fu yu kon fu fara.

Den e kon nanga a solfru èn nanga a gowtu fu den,

fu gi grani na a nen fu MASRA,

a Gado fu yu, a Santa Wan fu Israel,

fu a glori di A gi yu.

₁₀Doroseisma o meki den skotu fu yu,

èn den kownu fu den o dini yu.

Bika ini Mi atibron Mi ben naki yu,

ma ini Mi bunfasi Mi sorgu gi yu baka.

₁₁Den bigi doro fu yu sa tan opo.

Deiten den no o sroto, neti den no o sroto,

fu den folku tyari den gudu fu den kon gi yu,

makandra nanga den kownu fu den.

₁₂Bika a folku nanga a kondre di no wani dini yu,

o broko.

Den o tron broko pranasi.

₁₃Den moro moi udu fu a busi fu Libanon den o tyari kon gi yu:

udu fu a sipresbon,

fu a plataanbon nanga fu a dennebon.

Den o tyari den kon fu moi a santa presi fu Mi.

Sma o gi a presi pe Mi e sidon grani baka.

₁₄Den manpikin fu den di ben pina yu,

o kon na yu èn den o boigi dipi gi yu.

Ala den wan di ben si yu leki noti o kon na yu,

dan den o kindi na yu futu.

Èn den o kari yu: Foto fu MASRA,

Sion fu a Santa Wan fu Israel.

₁₅Awinsi sma ben gwe libi yu,

awinsi den no ben lobi yu srefsrefi,

awinsi no wan sma ben hari psa moro ini yu,

Mi e poti yu fu têgo leki wan tumsi moi presi,

leki wan presi di de wan prisiri gi sma fu ala ten.

₁₆Yu o hari a gudu fu den folku kon na yu,

leki fa wan pikin e hari a bobi fu en m'ma.

Iya, yu o hari a gudu fu kownu kon,

dan yu sa sabi taki Mi, MASRA,

na yu Yepiman, yu Ferlusuman

a Tranga Gado fu Yakob.

₁₇Prefu kopro mi e tyari gowtu,

prefu isri mi e tyari solfru,

prefu udu mi e tyari kopro,

èn prefu ston mi e tyari isri.

Freide nanga du sani tapu wan leti fasi,

o de den wan di e tiri yu.

₁₈Sma no o yere moro fu bigi ogri di e psa ini yu kondre,

noso fu bigi feti ini a kontren fu yu di e pori èn di e broko sani.

Yu o kari den skotu fu yu: Ferlusu,

den bigi doro fu yu: Grani.

₁₉Te deiten yu no sa abi a faya fu a son fanowdu moro,

nanga a leti fu a munkenki te neti.

Bika na MASRA o de leki wan têgo faya gi yu,

na a Gado fu yu o brenki gi yu.

₂₀A son fu yu no o saka moro,

èn a munkenki fu yu no o dungru moro.

Bika MASRA o de wan têgo faya fu yu,

èn wan kba kon na a ten di yu ben e sari.

₂₁A heri folku sa de sma di bun ini Gado ai.

A kondre o de fu den fu têgo.

Den o de den fosi pransun fu san Mi prani,

a wroko fu Mi anu,

fu Mi kisi grani.

₂₂A pikinwan o tron wan lo,

a moro pikinwan wan makti folku.

Mi, MASRA o du disi es'esi te a ten fu en doro.

₁A Yeye fu Masra MASRA de na mi tapu,

bika MASRA salfu mi.

A seni mi fu tyari bun nyunsu gi den pôtiwan,

fu gi den wan di lasi ati howpu baka,

fu taigi den sma di de na strafu taki den o lusu,

fu fri den di de na strafu,

₂fu bari wroko tak' a yari doro pe MASRA o du den bun,

nanga wan dei pe A o pai den feyanti baka.

A seni mi tu fu trowstu ala sma di e sari,

₃èn fu gi den sma fu Sion di e sari

wan kroon tapu den ede prefu asisi,

prisiri prefu brokofasi.

Sma sa kari den:

Bigi bon di bun ini Gado ai,

a bon di MASRA srefi prani fu gi En grani.

₄Den presi di ben didon brokobroko na gron bun langa kba,

den o bow baka,

èn den presi di feyanti ben broko olanga kba,

den o meki baka.

Den o meki foto baka di ben didon leki bigi ipi broko ston,

foto di feyanti ben broko bun langa kba.

₅Doroseisma sa tnapu e wei den meti fu yu,

tra folku sa wroko den pranigron nanga den droifidyari fu yu.

₆Ma unu den o kari: priester fu MASRA.

Den o gi unu a nen fu: knekti fu a Gado fu unu.

Un o prisiri nanga den gudu fu den dorosei folku,

èn un o prodo nanga den.

₇Un o kisi wan dobru paiman fu a syen di un nyan.

Den o prisiri fu san den o kisi fu a afrontu di den nyan.

Dat' meki den o kisi wan dobru pisi,

èn a prisiri di den o prisiri o de fu têgo.

₈Bika Mi, MASRA, lobi te sani e du tapu wan leti fasi.

ma Mi no lobi srefsrefi te sma e fufuru trawan,

nanga te sma e du trawan ogri.

Mi o pai den baka leki fa Mi pramisi,

èn meki wan têgo ferbontu nanga den.

₉Ala folku sa sabi den pikin fu den,

èn ala kondre sa sabi den bakapikin fu den.

Ala sma di o si den o taki tak' den na sma di MASRA blesi.

₁₀Mi sa prisiri srefsrefi fu MASRA ede,

mi sili sa firi switi ini a Gado fu mi.

Bika A weri wan krosi fu ferlusu gi mi,

A poti wan langa dyakti na mi skowru fu sori taki mi bun ini En ai,

Leki fa wan trowmasra e poti wan kroon tapu en ede.

èn leki fa wan trowmisi e weri den moi sani fu en.

₁₁Bika leki fa a gron e pusu den pransun fu en kon na loktu,

èn leki fa wan bromkidyari e meki den siri fu en opo,

na so Masra MASRA sa meki a fasi fu du sani nanga leti,

nanga grani

gro kon na loktu meki ala folku si.