Dag 301 van 365- Jeremia 15-17 en 2 Timoteüs 2

₁Ma MASRA taigi mi taki: “Awinsi na Moses nanga Samuel srefi ben tnapu e begi gi den, Mi no ben o sari den. Seni den gwe, Mi no wani si den moro. ₂Èn efu den aksi yu pe den mus go, taigi den taki: ‘Na disi MASRA e taki:

₃Iya, Mi o strafu den fo fasi, Na so MASRA taki: den o dede na ini feti, dagu o srepi den dedeskin fu den tyari gwe, fowru di e frei na loktu nanga krasimeti o priti den èn nyan den. ₄Ala den kondre fu den kownu fu grontapu o frede te den si san Mi du nanga den. Mi e strafu den fu san kownu Manase, a manpikin fu Yekiskia, du na ini Yerusalem.

₁MASRA taki nanga mi, A taigi mi taki: ₂“Mi no wani fu yu trow èn kisi pikin ini a kondre disi, ₃bika na disi MASRA e taki fu den pikin di sa gebore dyaso, nanga fu den m'ma nanga den p'pa di sa meki den ini a kondre disi: ₄‘Na takrusiki sa kiri den. No wan sma sa low gi den èn no wan sma sa beri den. Den dedeskin o tan didon tapu den pranigron leki mest. Trawan fu den na ini bigi feti noso fu angriten den o dede. Den dedeskin fu den o de nyanyan gi fowru di e frei na loktu nanga gi krasimeti.’

₅Na disi MASRA e taki: ‘Mi no wani fu yu go na den dede-oso fu den. Mi no wani fu yu low èn fu sori den dati yu e firi nanga den. Bika Mi o puru Mi freide fu a pipel disi, na so MASRA taki, Mi no o sori den lobi nanga sari-ati nanga moro. ₆Bigiwan nanga pikinwan o dede ini a kondre disi sondro fu sma beri den. Sma no o low gi den èn no wan sma o tyerfi en skin noso piri en ede gi den fu sori fa a e sari. ₇No wan sma o prati en brede nanga den sma di e low fu trowstu den noso tyari sani gi den fu dringi, awinsi na den p'pa noso m'ma srefi lasi libi. ₈Mi no wani fu yu go tu na wan oso pe de e meki prisiri, fu go nyan èn dringi nanga den.’ ₉Bika na disi MASRA fu ala sani, a Gado fu Israel, e taki: ‘Yere, Mi o meki un si fa sma o tapu fu singi prisiri singi dyaso. Trowman nanga trowmisi no o singi e prisiri moro.

₁₀Te yu o taigi a pipel ala den sani disi den o aksi yu taki: Fu sanede MASRA o meki ala den bigi ogri dati miti wi? San na den kruktudu fu unu? San na den sondu di un du, san na a wani fu MASRA, a Gado fu unu, di un no du? ₁₁Dan yu mus piki den taki: Na fu di den afo fu unu gwe libi Mi, na so MASRA taki. Na fu di den go waka baka tra gado, fu go dini den èn anbegi den. Na fu di den gwe libi Mi, na fu di den no du san a wèt fu Mi e taki, ₁₂èn un du moro ogri leki den afo fu unu. Bika prefu unu arki Mi, ibri wan fu unu du san a takru ati fu un e gi unu fu du. ₁₃Na dat' meki Mi o fringi un puru fu a kondre disi. Mi o meki feyanti tyari un go na wan kondre di, no unu, no den afo fu ben sabi. Dan drape un kan dini tra gado, dei nanga neti, fu di Mi no o abi sari-ati moro nanga unu.’

₁₄‘Dat' meki den dei e kon, na so MASRA taki, dati sma no o sweri moro taki: Mi e sweri na a libilibi Gado di puru den Israelitisma ini Egiptekondre, ₁₅ma sma o sweri now taki: Mi e sweri na a libilibi MASRA di ferlusu den Israelitisma fu a kondre na noordsei nanga fu ala den tra kondre pe A ben meki feyanti tyari den go. Iya, Mi sa meki den drai kon baka na a kondre di Mi ben gi den afo fu den.

₁₆Yere, Mi e komanderi furu fisiman, na so MASRA taki, di o fanga den. Baka dati Mi o komanderi furu ontiman di sa go onti den tapu ibri bergi, tapu ibri pikin bergi nanga ini ibri bergi-olo. ₁₇Bika Mi e si ala san den e du, noti no kibri gi Mi. Mi e si den kruktudu fu den. ₁₈Dat' meki Mi o pai den fosi, Mi o pai den dobru fu den kruktudu nanga sondu fu den. Bika den doti a kondre fu Mi nanga den popki fu den di no e libi èn di Mi no lobi srefsrefi, èn nanga den groskin gado fu den.’ ”

₁₉MASRA taigi mi taki: “Go tnapu na a moro bigi doro fu a foto pe den kownu fu Yuda e waka te den e go nanga te den e kon. Go tnapu na ala den tra doro fu Yerusalem tu. ₂₀Drape yu mus taigi a pipel taki: ‘Kownu fu Yuda, sma fu Yuda nanga fu Yerusalem, unu di e waka na den doro disi, un arki a boskopu fu MASRA: ₂₁Na disi MASRA taki: Efu un lobi un libi, dan un mus sorgu dati un no syow lai tapu sabatdei na den doro fu kon ini Yerusalem. ₂₂Tapu a sabatdei un no mus syow sani puru ini un oso tu èn un no mus du no wan wroko. Un teki a sabatdei leki wan santa dei, na dati Mi ben komanderi den afo fu unu. ₂₃Ma den no arki Mi, den no teki san Mi taigi den, ma den tranga den ati prefu den arki san Mi e taigi den. ₂₄Ma efu unu arki Mi, na so MASRA taki, èn un no syow lai tapu a sabatdei na den doro kon ini Yerusalem, èn efu un no du no wan wroko a dei dati, ma un hori a sabatdei leki wan santa dei, ₂₅dan den kownu di e sidon baka David tapu a kownusturu, sa psa na den doro disi kon ini a foto. Den sa sidon tapu asi nanga tapu wagi èn den tra man di e yepi en tiri a kondre nanga den sma fu Yuda nanga di fu Yerusalem sa de nanga den èn a foto disi sa tan fu têgo. ₂₆Dan sma sa kmopo fu den foto fu Yuda, fu a kontren fu Yerusalem, fu a kontren fu a lo fu Benyamin, fu a kontren fu den pikin bergi, fu a kontren fu den hei bergi nanga fu a Negebsabana fu kon tyari ofrandi ini a oso fu MASRA. Den sa bron meti leki ofrandi, den sa srakti meti leki ofrandi, den sa tyari graan-ofrandi, den sa bron wierook èn den sa tyari ofrandi fu gi Mi tangi. ₂₇Ma efu un no wani arki san Mi e taki fu teki a sabatdei leki wan santa dei, èn efu un e waka psa nanga lai tapu a sabatdei na den doro kon ini Yerusalem, dan Mi o leti wan faya gi den doro, wan faya di o bron den tranga presi fu den ini Yerusalem, wan faya di no wan sma o man kiri.’ ”

₁We, mi pikin, meki a bun-ati di Kristus Yesus sori yu, gi yu krakti. ₂Èn san yu ben yere fu mi na fesi someni tra sma, na dati yu mus leri tra sma tu, sma di de fu fertrow èn di sa man leri trawan baka. ₃Leki wan bun srudati fu Kristus Yesus, yu srefi mus teki pina tu. ₄No wan srudati di de ini wan feti, e broko en ede nanga a aladei libi, bika a wani meki a edeman fu a legre abi prisiri nanga en. ₅Èn efu wan sma de ini wan wega, dan a kan kisi grani leki winiman soso efu a strei a strei leki fa a musu. ₆A gronman di du a tranga wroko, mus de a fosi sma di e nyan san a prani. ₇Poti prakseri tapu san mi e taki, bika Masra o meki yu ferstan ala den sani disi.

₈Memre tak' Gado ben meki Yesus Kristus, wan bakapikin fu David, opo baka na dede. Disi na a bun nyunsu di mi e preiki. ₉Na fu a bun nyunsu disi ede meki mi e nyan pina, èn den bui mi srefi neleki mi na wan ogriman. Ma den no man bui a wortu fu Gado. ₁₀Dat' meki awinsi san e miti mi, mi e teki en, efu dati sa tyari ferlusu nanga têgo glori ini Kristus Yesus gi den sma di Gado ben teki. ₁₁San mi e taki now de fu fertrow:

₁₄Yu mus tan memre den bribisma den sani disi. Taigi den na fesi Gado tak' den no mus meki trobi abra san wan wortu wani taki. Bika a sani dati no e tyari no wan wini kon, ma a e pori den sma di e arki. ₁₅Du ala muiti fu Gado kan feni taki yu na wan bun wrokoman fu En, di no abi fu syen èn di e leri a tru wortu soleki fa a musu. ₁₆No bemui nanga sma di e hari taki abra lawlaw sani di no abi noti fu du nanga Gado. Bika o moro sma e bemui ini den sani disi, o moro den e kmopo na a pasi fu Gado. ₁₇A leri fu den e panya leki wan takru siki. Himeneus nanga Filetus na tu fu den sma di e du a sani disi. ₁₈Den libi a tru pasi, e leri a lei tak' den dedesma kon baka na libi kba. Tapu a fasi disi den e broko a bribi fu son sma. ₁₉Ma a fundamenti di Gado poti, steifi. A no man seki. A sani disi skrifi na en tapu: “Masra sabi suma na fu En.” Nanga: “Ala sma di e taki tak' den na fu Masra, mus tan fara fu ogridu.” ₂₀A de so tak' na ini wan bigi oso yu no abi soso gowtu nanga solfru sani. Ma yu abi sani tu di meki fu udu, nanga sani di meki fu kleidoti. Sonwan fu den na fu spesrutu momenti, trawan na fu aladei sani. ₂₁Efu wan sma hori ensrefi krin fu ala sortu ogri, dan Masra sa man teki en fu du spesrutu sani. A o de santa, èn a o de klar'klari fu du ibri bun wroko san Masra gi en fu du.

₂₂Yu no mus gi yusrefi abra na den lostu fu yongu sma. Ma makandra nanga den sma di e kari na Masra nanga wan krin ati, yu mus poti yusrefi fu du san bun ini Gado ai, fu bribi, fu lobi, èn fu libi ini freide. ₂₃Mi e taigi yu ete wan leisi fu no bemui nanga lawlaw nanga don aksi, bika yu sabi taki den e tyari trobi. ₂₄Wan wrokoman fu Masra no mus e meki trobi, ma a mus abi switi maniri nanga ala sma. A mus man fu gi leri, èn a mus abi pasensi. ₂₅Nanga wan safri fasi a mus man poti den sma di e feti en na den presi. A kan tak' Gado sa meki den drai den libi kon bribi san na tru. ₂₆Na so den o kisi densrefi èn den o man kmopo ini a krafana fu didibri pe a ben hori den, fu den du san didibri wani.