Dag 302 van 365- Jeremia 18-19 en 2 Timoteüs 3

₁MASRA taki nanga Yeremia, A taigi Yeremia taki: ₂“Opo! Go na a wrokopresi fu a man di e meki sani fu kleidoti. Drape Mi o taigi yu san Mi abi fu taki.” ₃Ne mi go na a wrokopresi fu a man di e meki sani fu kleidoti, èn yere, leki fa mi doro drape a man ben meki wan sani tapu a ston fu en di e drai. ₄Efu a kleipatu di a man ben meki no ben de leki fa a ben mus de, a man ben bigin baka nanga a srefi kleidoti fu meki wan tra patu, leki fa en ben wani dati a ben mus de. ₅Ne MASRA taki: ₆“Sma fu Israel, Mi kan du nanga unu leki fa a man e du nanga a kleidoti, na so MASRA taki. Sma fu Israel, un yere, leki fa a man kan du san a wani nanga a kleidoti, na so Mi kan du san Mi wani nanga unu! ₇Mi kan taigi wan folku nanga wan kondre dati Mi o rutu den puru, dati Mi o broko a kondre èn dati Mi o puru den na pasi. ₈Ma efu a folku di Mi e taki tapu nanga den ogri-ati sani di a e du, dan Mi no sa meki a bigi ogri miti den moro. ₉Mi kan taigi wan folku nanga wan kondre tu dati Mi o prani den èn dati Mi o bow den. ₁₀Ma efu a folku dati du wan sani di no bun ini Mi ai fu no arki san Mi e taki, dan Mi no o du den no wan fu den bun moro di Mi ben pramisi den. ₁₁We, taigi den sma fu Yuda nanga den di fu Yerusalem taki: Na disi MASRA taki: Un yere, Mi e meki bigi ogri klari fu miti unu, Mi e prakseri fu du unu wan ogri. We, un tapu dan nanga den ogri di un e du èn un go libi wan moro betre libi. ₁₂Ma den o piki yu taki: ‘Yu no abi fu meki muiti, wi o libi leki fa un prakseri e gi wi èn iniwan fu unu o du san a takru ati fu un e gi unu fu du.’ ”

₁Dan MASRA taigi mi taki: “Go dan yu e bai wan kroiki. Dan yu mus go makandra nanga wantu edeman fu a pipel nanga wantu edeman fu den priester ₂na a Hinomdal di didon leti fesi a poort di den e kari a Schervenpoort. Drape yu mus taki san Mi o gi yu fu taki. ₃Taki: ‘Kownu fu Yuda nanga sma fu Yerusalem, un arki san MASRA e taigi unu. Na disi MASRA fu ala sani, a Gado fu Israel, taki: Un yere, Mi o meki bigi ogri psa dyaso. No wan sma di yere fu en o wani bribi san a e yere. ₄Bika den gwe libi Mi, den pori a presi disi, èn den bron wierook gi tra gado di den no ben sabi, èn di den afo nanga den kownu fu Yuda no ben sabi. Den meki bun furu brudu lon na a presi disi tu, brudu fu sma di no du no wan ogri. ₅Den bow presi tu fu bron den pikin fu den nanga faya leki ofrandi gi Baal. Noiti Mi ben komanderi a sani dati, noiti Mi ben taigi den fu du en, noiti a sani dati kon ini Mi prakseri. ₆Dat' meki luku, den dei e kon, na so MASRA taki, dati sma no sa kari a presi disi Tofet moro noso Hinomdal, ma sma o kari en: Dal pe den e kiri sma ogri-ati fasi. ₇Dyaso Mi o pori den sani di den sma fu Yuda nanga fu Yerusalem seti fu du. Mi o meki den feyanti fu den kiri den na ini feti. Ala sma di ben wani kiri den, sa kiri den. Iya, Mi o meki fowru di e frei na loktu nanga krasi meti nyan den dedeskin fu den. ₈Mi o meki foto tron wan broko pranasi, a o de wan presi gi san sma o skreki te den si en. Ala sma di e psa drape o tnapu nanga opo mofo èn den o skreki fu si a bigi ogri di miti en. ₉Mi o meki den sma nyan a skin fu den eigi manpikin nanga umapikin. Den o nyan densrefi te a feyanti di wani kiri den, lontu den fu ala sei èn den no sabi san fu du.’

₁₀Naki a kroiki broko now leti fesi den man di go nanga yu, dan yu e taigi den taki: ₁₁‘Na disi MASRA fu ala sani taki: A srefi fasi Mi o broko a folku nanga a foto disi pis'pisi, a srefi fasi fa wan sma kan naki wan kroiki broko taki a no kan meki moro. Èn na ini Tofet den o beri den dede, bika tra presi no o de fu du dati. ₁₂Na so Mi o du nanga a presi disi nanga den sma fu en, na so MASRA taki. Mi o meki a foto disi kon tan leki Tofet. ₁₃Den oso fu Yerusalem nanga den oso fu den kownu fu Yuda sa kon doti leki Tofet. Ala den oso pe den ben e tyari ofrandi tapu den daki gi den sani di de na heimel èn pe den ben e kanti win leki ofrandi gi tra gado.’ ”

₁₄Di Yeremia kmopo na Tofet pe MASRA ben seni en go fu taki san En ben gi en fu taki, a go tapu a pren fu a oso fu MASRA. Drape a taigi a heri pipel taki: ₁₅“Na disi MASRA fu ala sani, a Gado fu Israel, taki: Mi o meki ala den ogri psa di Mi taki dati o psa nanga a foto disi nanga ala den foto ini a birti fu en. Bika den sma fu en trangayesi, den no wani arki den warskow fu Mi.”

₁Yu mus e hori a sani disi na yu ede, tak' tranga ten o kon na ini den laste dei. ₂Ini den dei dati den sma o prakseri densrefi nomo, èn den o gridi fu moni. Den o abi bigimemre, èn den o prakseri hei fu densrefi. Den o taki takru fu trawan, den no o arki m'ma nanga p'pa moro, den no o sabi san na tangi, èn den no o si noti leki wan santa sani. ₃Den sma no o lobi trawan, den no o sabi san wani taki tak' yu mus gi pardon, èn den o gi trawan pori nen. Den sma no o man basi densrefi, den o ogri, èn den no o lobi sani san bun. ₄Den o konkru densrefi, den o du sani sondro fu prakseri, èn den o abi bigifasi. Den o lobi grontapu prisiri moro leki Gado. ₅Den o du leki den e dini Gado, ma den no o meki a krakti fu Gado wroko ini den libi. Yu mus tan fara fu den sortu sma disi. ₆Sonwan fu den sma disi sabi fa fu boro go ini sma oso èn kisi den uma di no e denki fara. Den uma disi lai nanga sondu, èn ala sortu tranga lostu e hari den. ₇Ala yuru den e teki leri, ma noiti den no man kon ferstan san na tru. ₈Den man di e gi den kruktu leri, e feti a tru leri soleki fa Yanes nanga Yambres ben feti Moses. A ferstan fu den man disi pori kba, èn a bribi fu den no man hori stan. ₉Ma den no o skopu en fara, bika a srefi sani san ben psa nanga Yanes nanga Yambres, o psa nanga den tu. Ala sma o kon si taki na lawlaw sani den e leri.

₁₀Ma yu dati sabi ala den sani san mi e leri. Yu sabi fa mi e libi nanga san mi wani du ini mi libi. Yu sabi a bribi fu mi, yu sabi fa mi abi pasensi nanga lobi èn fa mi e hori doro. ₁₁Yu sabi fa sma ben de na mi baka fu du mi ogri, èn fa mi ben nyan pina na ini Antiokia, Ikonium nanga Listra. Ala den sani disi ben miti mi, ma Masra puru mi na ini alamala. ₁₂Ma a no kan tra fasi, bika ala sma di e bribi na ini Kristus Yesus èn di wani libi leki fa Gado wani, o ondrofeni tak' sma de na den baka fu du den ogri. ₁₃Ma den takru-ati sma nanga den bedrigiman sa kon moro ogri ete. Den e kori sma èn sma e kori den baka. ₁₄Ma yu dati mus tan hori na den sani san yu leri èn san yu sabi taki na tru sani. Bika yu sabi suma na den sma di ben gi yu leri. ₁₅Sensi yu ben de wan pikin boi, yu ben sabi san a Santa Buku e taki. A buku disi kan gi yu koni fu kon sabi taki efu yu bribi na ini Kristus Yesus, Gado o ferlusu yu. ₁₆Na Gado srefi ben meki sma skrifi ala sani san de ini a Santa Buku. Den sani disi bun fu gi leri, fu sori pe un fowtu, fu meki un kon bun, èn fu leri un fu libi wan bun fasi. ₁₇Tapu a fasi disi a sma di e dini Gado sa de klar'klari fu kan du ibri bun wroko.