Dag 304 van 365- Jeremia 22-23 Titus 1

₁Dan MASRA taigi mi taki: “Go na a oso fu a kownu fu Yuda dan yu e taigi en disi: ₂‘Kownu fu Yuda di sidon tapu a kownusturu fu yu afo David, arki a boskopu fu MASRA. Yu, den man di e wroko nanga yu, nanga a pipel fu yu di e waka na den doro disi kon na inisei. ₃Na disi MASRA e taki: Du sani tapu wan leti fasi èn un sorgu dati sma e kisi den leti. Un no meki sma bedrigi trawan moro. Un no du doroseisma, uma di masra dede kba, nanga pikin di no abi p'pa nanga m'ma moro ogri èn un no teki sani fu den nanga tranga. Un mus tapu fu kiri sma dyaso ini a kondre tu di no du ogri. ₄Efu un sa hori un fin'fini den sani dati, dan den kownu di e sidon baka David tapu a kownusturu, sa psa na den doro disi kon ini a foto. Den sa sidon tapu asi nanga tapu wagi èn den man di e wroko nanga en nanga a pipel fu en. ₅Ma efu un no wani du san Mi taki, dan Mi e sweri na Misrefi, na so MASRA e taki, dati a kownu-oso disi sa tron wan bigi ipi broko ston.

₆Bika na disi MASRA e taki fu a kownu-oso fu a kownu fu Yuda:

₈Dan furu folku o hari psa a foto disi èn den o aksi makandra taki: Fu sanede MASRA du so wan sani nanga a bigi foto disi? ₉Den o piki taki: Na fu di den no hori den na a ferbontu fu MASRA, a Gado fu den, èn fu di den go boigi gi tra gado fu anbegi den.

₁₁Na disi MASRA e taki fu kownu Salum fu Yuda, a manpikin fu Yosia, di tron kownu baka en p'pa: A no dyaso moro èn a no o drai kon baka. ₁₂Salum sa dede ini a kondre pe den tyari en go. A no o si a kondre disi moro.

₂₄So leki fa a tru taki Mi e libi, na so MASRA taki, awinsi Mi ben weri yu, Konyahu, manpikin fu Yoyakim, na Mi finga leki a linga fu wan kownu nanga a stampu fu en, Mi ben o hari yu puru. ₂₅Dan Mi ben o gi yu abra ini a makti fu den sma di wani kiri yu, ini a makti fu en di yu e frede, ini a makti fu kownu Nebukadnesar fu Babel, nanga ini a makti fu den Kaldeasma. ₂₆Mi o fringi yu nanga yu m'ma, di meki yu, gwe na wan tra kondre, na wan kondre pe un no gebore. Èn na drape un o dede. ₂₇Un no o drai kon baka na a kondre pe un ben angri nanga un heri ati fu drai kon baka.

₂₉Kondre, kondre, yere a boskopu fu MASRA: ₃₀Na disi MASRA taki: Skrifi ini den buku fu yu dati a man disi no abi pikin. Skrifi dati a ben de wan man di no ben abi koloku. Bika no wan fu den pikin fu en o sidon tapu a kownusturu fu en afo David fu tiri Yuda.’ ”

₁“A kba gi den tiriman di e panya den skapu fu a wei fu Mi èn di e meki den go lasi, na so MASRA taki. ₂Dat' meki na disi MASRA, a Gado fu Israel, e taigi den man di e tiri a pipel fu En: Un meki den skapu fu Mi panya, un yagi den gwe, èn un no e go suku den. Un yere, Mi o strafu un fu den ogri di un du, na so MASRA taki. ₃Dan Mi o tyari ala den skapu fu Mi di libi, kon na wan. Mi o puru den ini ala den kondre pe Mi ben yagi den go. Dan Mi o meki den drai kon baka na den weigron fu den. Den o meki furu pikin èn den o kon furu. ₄Mi o poti tiriman tu fu luku den, tiriman di o tiri den nanga den heri ati. A pipel fu Mi no o frede moro, èn no wan fu den o lasi moro, na so MASRA taki.

₅Yere, den dei e kon, na so MASRA taki, dati Mi o poti wan sma leki kownu di de wan trutru bakapikin fu David. A o tiri den sma na tapu wan leti fasi, a o sorgu dati sma fu a kondre kisi den leti èn dati sani e psa na tapu wan leti fasi. ₆Te a sa de kownu, a sa ferlusu Yuda fu den feyanti fu en, èn a pipel fu Israel sa libi ini freide. Den o kari en: ‘MASRA, di e gi wi wi leti.’

₇Dat' meki den dei e kon, na so MASRA taki, dati sma no o sweri moro taki: ‘Mi e sweri na a libilibi Gado di puru den Israelitisma fu Egiptekondre,’ ₈ma sma o sweri now taki: ‘Mi e sweri na a libilibi MASRA di ferlusu den Israelitisma fu a kondre na noordsei, nanga fu ala den tra kondre pe A ben meki feyanti tyari den go.’ Iya, den o libi na ini den eigi kondre baka.”

₉Abra den profeiti:

₁₆Na disi MASRA fu ala sani e taki: Un no arki den sani di den profeiti e taki. Den e meki un e howpu tapu sani di no o psa. Na densrefi meki den sani di den e si, a no MASRA gi den den sani dati fu taki. ₁₇Dorodoro den e taigi den sma di no wani du san Mi e taki tak': ‘MASRA taki tak' sani o go bun nanga unu.’ Den sma di trangayesi den e taigi taki: ‘No wan ogri o miti unu.’ ₁₈Ma sortu wan fu den ben de ini a konmakandra fu MASRA? Sortu wan fu den ben drape fu yere den besroiti di A teki? Sortu wan fu den ben arki èn yere san A taki?

₂₅Mi yere san den profeiti e taki di e taigi den sma soso lei sani ini Mi nen. Den e taki: ‘Mi kisi wan dren! Mi kisi wan dren’ ₂₆Olanga sani o tan go so? Olanga den prakseri dati den o man go doro fu gi lei boskopu di kmopo fu den eigi prakseri? ₂₇Den e ferteri a pipel fu Mi den dren fu den nanga a prakseri dati a pipel o fergiti a nen fu Mi, leki fa den afo fu den ben fergiti a nen fu Mi fu Baal ede. ₂₈Wan profeiti di dren kan taki soso san a dren, ma a wan nanga san Misrefi taki mus taki a boskopu fu Mi leki fa a yere en.

₃₀Dat' meki, yere, Mi, Mi o strafu den profeiti, na so MASRA taki, den profeiti di e taki baka san trawan e taki. ₃₁Yere, Mi o strafu den, na so MASRA taki. den di lobi bari taki: ‘Na so MASRA taki.’ ₃₂Yere, Mi o strafu den profeiti di e kori sma nanga den dren fu den, na so MASRA taki. Den e bedrigi a pipel fu Mi nanga den lei fu den èn nanga den sososani di den e taki. A no Mi seni den, noti Mi komanderi den. A pipel fu Mi no abi noti na den, na so MASRA taki.

₃₃Masra taigi Yeremia taki: Te wan profeiti, wan priester, noso ini wan sma fu a pipel aksi yu taki: ‘Sortu lai MASRA e gi un fu tyari nanga a boskopu fu En?’ Dan yu sa taigi en taki: Na yusrefi na a lai, èn Mi o fringi yu trowe puru na Mi tapu, na so MASRA taki. ₃₄Mi o strafu a profeiti, a priester, noso winsi suma fu a pipel di e kari Mi boskopu: ‘A lai fu MASRA.’ Mi o strafu en nanga en heri famiri. ₃₅A moro betre un aksi makandra taki: ‘San MASRA piki,’ noso: ‘San MASRA taki?’ ₃₆Ma un no mus taki moro fu: ‘A lai fu MASRA.’ Ala sma e taki dati na Mi e gi den sani fu taki, ma nanga dati un e drai den wortu fu a libi Gado, fu MASRA fu ala sani, a Gado fu unu. ₃₇A moro betre un aksi wan profeiti san MASRA piki noso san A taki. ₃₈Ma MASRA e taki disi: Efu un e tan taki fu ‘A lai fu MASRA’, aladi Mi bari un fu un no du en, ₃₉Mi sa opo un go na loktu èn fringi un kmopo na Mi tapu makandra nanga a foto di Mi ben gi den afo fu unu èn di Mi gi unu. ₄₀Mi o meki un kon tan so wan fasi dati sma o teki un meki spotu fu têgo. Noiti moro sma o fergiti a syen di Mi o gi unu.”

₁Gi Titus.

Disi na wan brifi fu Paulus. Mi na wan knekti fu Gado nanga wan boskopuman fu Yesus Kristus. Mi mus tyari sma di Gado ben teki gi Ensrefi, kon na bribi èn mi mus leri den san na tru, fu den sa libi leki fa Gado wani. ₂Tapu sowan fasi den sa abi a howpu tak' den o kisi a libi fu têgo, di Gado ben pramisi fosi A meki grontapu. Èn Gado no e lei. ₃Ma now Gado wi Ferlusuman, feni taki a ten lepi fu a boskopu disi preiki fu sma kon sabi en. Dan A fertrow mi nanga a wroko dati èn A poti mi fu du en. ₄Titus, mi e si yu leki mi eigi pikin na ini a bribi fu wi. Mi e winsi taki Gado a P'pa, nanga Kristus Yesus wi Ferlusuman, sa sori yu bun-ati èn gi yu freide.

₅Mi libi yu na baka na Kreta fu seti den sani di ben mus seti ete, èn fu poti fesiman ini den gemeente ini ala den foto, soleki fa mi ben taigi yu fu du. ₆Den fesiman no mus abi wan takru nen. Den mus abi wan uma nomo èn den pikin fu den mus de bribisma. Den pikin no mus tyari nen taki den e libi wan yayolibi, èn taki den no e arki san sma e taigi den. ₇Bika a sma di e tiri a gemeente, e hori ai na tapu den sani fu Gado. Dat' meki a no mus abi wan takru nen. A no mus de wan sma di e du san a wani. A no mus de wan sma di gaw fu kisi atibron, èn a no mus de wan sma di lobi dringi. A no mus de wan trobiman, èn a no mus suku fu abi wini tapu wan fasi di no fiti. ₈Ma en doro mus opo gi ala sma. A mus lobi den sani san bun. A mus abi wan krin ferstan, èn a mus e du san bun ini Gado ai. A mus libi wan santa fasi, èn a mus man hori ensrefi. ₉A mus tan hori tranga na a boskopu soleki fa wi ben leri. A boskopu disi de fu fertrow. Dan so a o man kraka tra sma nanga a bun leri, èn a o man sori den sma di no e agri nanga a leri, taki den fowtu. ₁₀Bika yu abi furu sma di no e arki san sma e taigi den. Den e taki lawlaw sani nanga den mofo èn den e kori sma. Moro furu fu den sma disi na Dyusma di tron Kristensma. ₁₁A de fanowdu fu sma tapu den mofo gi den. Bika den e bruya her'heri famiri fu di den e leri sani san den no mus leri. Na a takru gridi fu moni meki den e du dati. ₁₂Wan man fu Kreta srefi, wan fu den eigi profeiti, ben taki: “Den sma fu Kreta na leiman, den e libi leki meti, èn den na nyanman di lesi.” ₁₃A man di taki a sani disi, no lei. Dat' meki sondro draidrai yu mus poti den tapu den presi, fu den kan hori densrefi na a tru bribi. ₁₄Dan den no o gi yesi na den anansitori fu den Dyusma, nanga den leri fu sma di drai den baka gi a tru leri. ₁₅Ala sani krin gi sma di abi wan krin ati. Ma noti no krin gi sma di no abi wan krin ati èn di no e bribi. Bika a ferstan nanga a konsensi fu den pori. ₁₆Den e taki tak' den sabi Gado, ma den sani san den e du no e sori noti fu dati. Den sma disi takru srefsrefi èn den trangayesi. Den no fiti fu du no wan bun wroko.