Dag 309 van 365- Jeremia 34-36 en Hebreeën 2

₁MASRA taki nanga Yeremia a pisten di kownu Nebukadnesar fu Babel ben broko go tapu Yerusalem nanga den tra foto lontu Yerusalem, fu teki den abra. Nebukadnesar ben du dati nanga a heri legre fu en èn nanga den legre fu ala den kondre nanga folku di a ben poti na en ondro. ₂MASRA ben taigi Yeremia taki: “Na disi MASRA, a Gado fu Israel, e taki: Go na kownu Sedekia fu Yuda, dan yu e taigi en taki: ‘Na disi MASRA e taki: Mi e gi a foto disi abra ini a makti fu a kownu fu Babel, di sa sutu faya gi en. ₃Yusrefi no o kmopo ini en anu. A no abi misi taki den o grabu yu èn tyari yu gi en. Dan yu o si a kownu fu Babel nanga yu eigi ai èn yusrefi o taki nanga en. Baka dati den o tyari yu go na Babel. ₄Ma yu, kownu Sedekia fu Yuda, arki a boskopu fu MASRA. Na disi MASRA e taigi yu: den no o kiri yu. ₅Yu o dede ini freide. Èn leki fa den ben bron sani gi den afo fu yu, den kownu di waka na yu fesi, te den ben dede, na so den o bron gi yu owktu. A pipel fu yu sa low gi yu tu èn taki: Tye, wi masra. Mi e pramisi yu dati, na so MASRA taki.’ ”

₆Dan a profeiti Yeremia go na kownu Sedekia ini Yerusalem go taigi ala den sani dati. ₇A ten dati a kownu fu Babel ben feti nanga den foto Yerusalem, Lakis nanga Aseka, den foto nanga den tranga hei skotu di ben libi ete ini Yuda fu a ben teki abra.

₈MASRA taki nanga Yeremia baka, baka di kownu Sedekia fu Yuda nanga den sma fu Yerusalem ben agri fu fri ala den srafu fu den. ₉Den ben o fri ala den Hebrewsrafu, manwan nanga umawan. A fasi dati no wan sma fu Yuda ben o abi wan eigi kondreman fu en leki srafu e wroko gi en. ₁₀Ala den edeman nanga ala den sma ben agri taki ibri wan fu den ben o fri den srafu fu den, manwan nanga umawan. Den no ben o hori den moro leki srafu. Den ben agri fu du dati èn den fri den srafu fu den. ₁₁Ma baka wan pisten den teki baka san den ben taki èn den go teki den sma baka di den ben fri, fu kon wroko gi den baka leki srafu. ₁₂Ne MASRA taki nanga Yeremia, A taigi Yeremia taki: ₁₃“Na disi MASRA, a Gado fu Israel, e taki: Baka di Mi ferlusu den afo fu unu fu Egipte pe den ben de srafu, Mi ben meki wan ferbontu nanga den di ben taki so: ₁₄Baka ibri seibi yari un mus fri den Hebrewman nanga uma di ben seri densrefi gi unu leki srafu. Den mus wroko siksi yari gi unu, ma Baka dati un mus fri den baka. Ma den afo fu unu no ben arki Mi, den no du san Mi ben taigi den. ₁₅Ma unu ben du dati. Un ben du san bun ini Mi ai di un ben agri fu fri den kondreman fu unu. Un ben meki wan ferbontu ini a oso di ben meki fu Mi ede, taki un bo du dati. ₁₆Ma un teki baka san un ben taki. Un pori a nen fu Mi di un go teki den mansrafu nanga umasrafu baka, di ben fri fu go libi den eigi libi, dan un meki den tron srafu baka. ₁₇Dat' meki, na disi MASRA e taki: Fu di un no arki san Mi taki fu fri den kondreman fu unu, Mi o poti bigi feti, angriten nanga takrusiki fri fu den du nanga unu san den wani. Ala den kondre fu den kownu fu grontapu o frede te den yere san Mi du nanga unu. ₁₈Leki fa den ben prati a yongu kaw ini tu pisi dan den waka psa na mindri den pisi di den e meki a ferbontu, na so Mi o du tu nanga den man di broko a ferbontu, di no hori densrefi na den sani fu a ferbontu. ₁₉Dati na den man di e yepi tiri Yuda nanga Yerusalem, den wrokoman fu a kownu-oso, den priester nanga ala den sma fu a folku, di waka psa na mindri den tu pisi fu a yongu kaw. ₂₀Mi o gi den abra na den feyanti, na den sma di wani kiri den. Den dedeskin fu den sa de nyanyan gi fowru di e frei na loktu nanga gi krasimeti. ₂₁Kownu Sedekia srefi nanga den tra man di e yepi en tiri a kondre Mi e gi abra na den feyanti, na den sma di wani kiri den. Mi e gi den abra na a legre fu a kownu fu Babel, di e hari gwe fu unu now. ₂₂Ma mi o komanderi den, na so MASRA taki, dan den o drai kon baka na a foto disi èn den o lontu en baka fu alasei. Dan den o teki en abra èn sutu faya gi en. Mi e meki den foto fu Yuda tron wan broko pranasi pe no wan sma o libi moro.”

₁Di Yoyakim, a manpikin fu Yosia, ben de kownu fu Yuda, MASRA taki nanga Yeremia. ₂A taigi Yeremia taki: “Go na den Rekabitisma. Aksi den fu go nanga yu na a oso fu MASRA. Tyari den go ini wan fu den kamra, dan yu e gi den win.” ₃Mi go drape dan mi teki Yaasanya, den brada fu en, ala den manpikin fu en, nanga ala den tra sma fu a famiri fu den Rekabitisma. Yaasanya ben de a manpikin fu wan tra Yeremia, nanga granpikin fu Habasinya. ₄Mi tyari den go na a oso fu MASRA, ini a kamra fu den man di ben teki leri fu Hanan, wan man fu Gado, di ben de a manpikin fu Yigdalyahu. A kamra dati ben de sei a kamra fu den man di ben e yepi tiri a kondre, èn a ben de na tapusei fu a di fu Maaseya, a manpikin fu Salum, di ben de edeman fu den waktiman fu a tempel. ₅Drape mi poti wantu kroiki di ben span nanga win nanga wantu kan gi den, dan mi taigi den taki: “Un kan dringi.” ₆Ma den taigi mi taki: “Un no e dringi win. Un afo Yonadab, a manpikin fu Rekab, ben komanderi un taki: ‘Noiti un no mus dringi win. No unu, no den pikin fu unu. ₇Un no mus bow oso tu, un no mus prani èn un no mus seti droifidyari noso abi wan. Un mus tan soso ini tenti. Na a fasi dati wawan un o man libi langa ini a kondre pe un e libi.’ ₈Un du ala san wi afo Yonadab, a manpikin fu Rekab, ben komanderi wi. No wi, no den uma, manpikin nanga umapikin fu wi e dringi win. ₉Un no e bow oso tu fu libi na ini, èn un no abi droifidyari nanga pranigron tu pe un e prani. ₁₀Na ini tenti un e libi. Un e du ala san wi afo Yonadab ben komanderi wi. ₁₁Un de ini Yerusalem now, fu di kownu Nebukadnesar fu Babel hari kon feti ini a kondre. Na fu di un ben frede fu den legre fu den Kaldeasma nanga di fu den sma fu Aram un teki a besroiti fu kon libi dyaso ini Yerusalem.”

₁₂Ne MASRA taki nanga Yeremia, A taigi Yeremia taki: ₁₃“Na disi MASRA fu ala sani, a Gado fu Israel, e taki: Go taigi den sma fu Yuda nanga fu Yerusalem taki: ‘Un kan leri san a wani taki fu arki Mi, na so MASRA taki. ₁₄Yonadab, a manpikin fu Rekab, ben komanderi den wan di kon na en baka fu den no dringi win. Den hori den na san den afo komanderi den, èn te leki a dei fu tide den no e dringi win. Ma nanga unu Mi taki dorodoro, ma un no arki. ₁₅Mi seni den knekti fu Mi, den profeiti, dorodoro kon na unu, nanga a boskopu taki: Un tapu nanga den ogri di un e du, un libi wan moro betre libi, un no waka baka tra gado èn un no anbegi den. Dan un o man tan libi ini a kondre di Mi ben gi den afo fu unu nanga unu. Ma un no du san Mi taigi unu, un no arki san Mi ben taki. ₁₆Iya, den bakapikin fu Yonadab, a manpikin fu Rekab, du san den afo ben komanderi den. Ma a pipel disi no arki Mi. ₁₇Dat' meki, na disi MASRA, a Gado fu ala sani, a Gado fu Israel, e taki: Mi sa meki ala a ogri di Mi ben taki dati o miti Yuda nanga den sma fu Yerusalem, miti den tu. Bika Mi ben taki nanga den ma den no gi yesi. Mi kari den, ma den no piki.’ ”

₁₈Dan Yeremia taigi a famiri fu den Rekabitisma taki: “Na disi MASRA fu ala sani, a Gado fu Israel, e taki: Fu di un arki un afo Yonadab èn du ala san a ben komanderi unu, ₁₉MASRA fu ala sani, a Gado fu Israel, e taki disi: Noiti wan bakapikin fu Yonadab, a manpikin fu Rekab, sa mankeri di e dini Mi.”

₁Di kownu Yoyakim, a manpikin fu Yosia, ben de fo yari na makti ini Yuda, MASRA taki nanga Yeremia. ₂A taigi Yeremia taki: “Teki wan papira, dan yu e skrifi ala den sani di Mi taigi yu fu Israel, fu Yuda, nanga fu den tra folku. Skrifi den sani di Mi taigi yu sensi a ten di Mi taki nanga yu fu a fosi leisi, a ten di Yosia ben de kownu, te kon miti tide. ₃Kande te a pipel fu Yuda yere ala a bigi ogri di Mi poti e wakti den, den sa kisi densrefi èn tapu nanga den ogri di den e du. Dan Mi sa gi den pardon fu den kruktudu nanga fu den sondu.” ₄Dan Yeremia seni kari Baruk, a manpikin fu Neria. Dan Baruk skrifi ala den sani di MASRA ben taigi Yeremia, tapu wan papira. ₅Di dati psa Yeremia taigi Baruk taki: “Now di den tapu mi fu go ini a oso fu MASRA, ₆yu mus go. Yu mus go wan dei di a pipel e faste. Dan yu e leisi den wortu fu MASRA, di mi taigi yu fu yu skrifi poti tapu papira, gi ala sma di de ini a oso fu MASRA. Den sma di kmoto fu den foto fu Yuda mus yere den tu. ₇Kande den sa go na MASRA fesi èn begi nanga ala sakafasi, èn tapu nanga den ogri di den e du. Bika a atibron nanga san MASRA pramisi den taki sani o miti den, bigi trutru.”

₈Dan Baruk, a manpikin fu Neria, du fin'fini san a profeiti Yeremia taigi en. A go ini a oso fu MASRA go leisi den wortu fu MASRA gi a pipel. ₉Dati psa ini a di fu neigi mun, fu a di fu feifi yari, di kownu Yoyakim fu Yuda, a manpikin fu Yosia, ben de na makti. A dei dati den sma fu Yerusalem nanga ala den sma fu ala den foto fu Yuda di ben kon na Yerusalem, ben e faste na MASRA fesi. ₁₀Dan Baruk leisi den sani di Yeremia ben taki, gi den alamala, den sani di ben skrifi tapu a papira. A du dati ini a oso fu MASRA, ini a kamra fu Gemarya, a manpikin fu Safan di ben de a sekretarsi fu a kownu-oso. A kamra dati ben de na a tapusei pren, na a Nyun poort fu a oso fu MASRA. ₁₁Di Mikayehu, a manpikin fu Gemarya nanga granpikin fu Safan, yere den wortu fu MASRA di ben skrifi tapu a papira, ₁₂a saka go na a kownu-oso fu kownu. A go na a kamra fu a sekretarsi fu a kownu-oso. Ala den man di ben yepi tiri a kondre ben kon makandra drape: Elisama, wan tra sekretarsi, Delaya, a manpikin fu Semaya, Elnatan, a manpikin fu Akbor, Gemarya, a manpikin fu Safan, Sidkiahu, a manpikin fu Hananya, nanga tra tiriman. ₁₃Dan Mikayehu taigi den ala den sani di a yere, den sani di Baruk leisi kmoto fu a papira gi a folku. ₁₄Ne den tiriman seni Yehudi go na Baruk. Yehudi ben de a manpikin fu Netanya, a granpikin fu Selemya nanga a bakapikin fu Kusi. A ben mus gi Baruk a boskopu disi: “Kon na unu nanga a papira di yu leisi gi den sma.” Dan Baruk, a manpikin fu Neria, go na den nanga a papira. ₁₅Drape den tiriman taigi en taki: “Sidon dan yu leisi en gi unu.” Dan Baruk leisi en gi den. ₁₆Di den tiriman yere ala den sani den luku makandra nanga frede. Den taki: “Un mus fu meki kownu yere den sani disi.” ₁₇Den aksi Baruk taki: “Fa yu du skrifi den sani disi?” ₁₈Baruk piki den taki: “Yeremia ben taki den èn mi skrifi den nanga enki tapu papira.” ₁₉Dan den tiriman taigi Baruk taki: “Un go kibri, yu nanga Yeremia, èn un no meki no wan sma sabi pe un de.”

₂₀Baka dati den tiriman kibri a papira ini a kamra fu Elisama, a sekretarsi fu a kownu-oso, dan den go na a kownu-oso go ferteri kownu ala sani. ₂₁Dan kownu seni Yehudi go teki a papira ini a kamra fu Elisama. Yehudi go teki en, dan a leisi en gi kownu nanga den tiriman di ben drape. ₂₂A ben de a di fu neigi mun fu a yari èn kownu ben sidon fesi wan faya ini a kownu-oso pe a ben e psa a kowruten. ₂₃Ala leisi te Yehudi ben leisi dri kon miti fo pisi, kownu ben e koti dati puru nanga wan pikin nefi fringi ini a faya pe a ben sidon, te leki a heri papira ben de ini a faya. ₂₄No wan fu den priti den krosi fu di den skreki san den yere, no kownu, no den man di e wroko nanga en. ₂₅Di kownu ben e bron a lolo, Elnatan, Delaya nanga Gemarya ben begi en srefi fu a no du en, ma a no arki. ₂₆Dan kownu komanderi Yerakmeel, wan yonkuman fu a famiri fu kownu, Seraya, a manpikin fu Asriyel, nanga Selemya, a manpikin fu Abdeel, fu go sroto a sekretarsi Baruk nanga a profeiti Yeremia. Ma MASRA ben gi den wan kibripresi.

₂₇Baka di kownu bron a papira nanga ala den sani na en tapu di Yeremia ben taigi Baruk fu a skrifi, MASRA taki nanga Yeremia. A taigi Yeremia taki: ₂₈“Teki wan nyun papira dan yu e skrifi ala den sani di ben de tapu a fosiwan, a wan di kownu Yoyakim fu Yuda bron. ₂₉Ma Yoyakim, a kownu fu Yuda, yu mus taigi taki: Na disi MASRA e taki: ‘Yu bron a papira èn aksi taki: Fu sanede a skrifi taki a kownu fu Babel o broko kon ini a kondre, dati a o broko en èn dati a o kiri libisma nanga meti. ₃₀Dat' meki, na disi MASRA e taki fu yu Yoyakim, kownu fu Yuda: No wan pikin fu en o sidon tapu a kownusturu fu en afo David. A dedeskin fu en o didon na dorosei te deiten ini a son nanga te neti ini a kowru. ₃₁Mi o strafu en, den pikin fu en, nanga den man di e wroko nanga en. Mi o meki ala a bigi ogri di Mi taki dati o miti a pipel fu Yerusalem nanga a di fu Yuda, miti den tu. Bika den no ben wani arki Mi.’ ” ₃₂Dan Yeremia teki wan nyun papira èn a langa en gi a sekretarsi Baruk, a manpikin fu Neria. Dan Baruk skrifi ala san Yeremia ben e taigi en, ala san ben skrifi tapu a papira di kownu Yoyakim fu Yuda bron nanga furu fu den srefi sortu sani disi di Yeremia ben taki ete.

₁Fu dat'ede un mus poti un prakseri moro tranga tapu san un ben yere, fu un no grati kmopo fu a pasi. ₂Bika a boskopu di Gado ben meki den engel tyari, ben de sowan bigi sani taki A ben strafu ala sma tapu wan leti fasi di no ben arki noso du san a boskopu taki. ₃Dan fa wi o man kmopo gi a strafu dan, efu wi no e span nanga a ferlusu di A ferlusu wi? Masra fosi ben taki fu en, èn den sma di yere san A taki, taigi un tak' na so a de. ₄Gado srefi ben sori tu taki a tru. Bika A ben meki wondru nanga marki psa, nanga difrenti sortu sani di sori a krakti fu En. Sosrefi A ben meki a Santa Yeye kon tapu suma A wani.

₅A no engel Gado o poti fu rigeri a nyun ten di o kon, a ten fu san wi e taki. ₆Bika wan sma taki wan presi ini Gadowortu taki:

₁₄Fu di den pikin na libisma, meki En srefi tron libisma tu. Tapu sowan fasi A ben kan dede fu broko a makti fu a wan di ben abi a makti abra dede, sobun didibri. ₁₅So A ben kan ferlusu ala sma di ben de ini katibo den heri libi langa fu di den ben frede fu dede. ₁₆Ma a de krin fu si taki A no broko En ede nanga den engel, ma taki A kon fu yepi den bakapikin fu Abraham. ₁₇Fu dat'ede A ben mus kon de leki den brada fu En ini ala sani. So A ben kan tron wan granpriester fu Gado di e sari den èn di den kan fertrow. Èn so a pipel kan kisi pardon fu den sondu nanga a ofrandi di A tyari gi den. ₁₈Bika fu di En srefi nyan pina èn A psa tesi, meki A kan yepi den sma di e psa tesi tu.