1Kownu Nebukadnesar fu Babel ben poti Sedekia, a manpikin fu Yosia, leki kownu fu Yuda na a presi fu Konyahu, a manpikin fu Yoyakim. 2Ma Sedekia no ben arki san MASRA ben e meki profeiti Yeremia taigi en. No en, no den man di ben e wroko nanga en, no den sma fu a kondre.
3Wan dei kownu Sedekia seni Yehukal, a manpikin fu Selemya, nanga priester Sefanya, a manpikin fu Maaseya, go na a profeiti Yeremia nanga a aksi disi: “Mi e begi yu tangitangi fu yu begi MASRA, a Gado fu unu, gi wi.” 4A ten dati Yeremia ben fri ete, den no ben sroto en ete. 5A ten dati tu den Kaldeasma ben tapu fu feti nanga Yerusalem, bika den ben yere dati a legre fu Farao ben kmopo fu Egipte e kon. 6Dan MASRA taki nanga a profeiti Yeremia, A taigi en taki: 7“Na disi MASRA, a Gado fu Israel, e taki: Un taigi a kownu fu Yuda di seni un taki: Yere, a legre fu Farao fu Egipte di de na pasi fu kon yepi yu e drai gwe baka. 8Den Kaldeasma o drai kon baka èn feti nanga a foto disi. Den o teki en abra èn den o sutu faya gi en. 9Na disi MASRA e taki: No kori yusrefi nanga a prakseri dati den Kaldeasma gwe fu no kon moro, bika a no gwe den gwe. 10Èn awinsi un ben sa wini a heri legre fu den Kaldeasma, di o kon feti baka nanga unu, taki na soso srudati nanga hebi mankeri tan na baka, dan srefi den dati bo kmoto ini den tenti fu sutu faya gi a foto.”
11Di Farao ben hari kon nanga a legre fu en, den Kaldeasma ben hari gwe fu Yerusalem, 12Dan Yeremia ben wani kmoto fu Yerusalem fu go na a kontren fu a lo fu Benyamin. A ben wani go drape fu di a ben mus kisi wan pisi gron drape. 13Ma di a ben doro na a Benyaminpoort, wan waktiman hori en tnapu nanga den wortu: “A mus de taki na den Kaldeasma yu wani go.” A waktiman dati ben nen Yiria, a manpikin fu Selemya nanga granpikin fu Hananya. 14Yeremia piki en taki: “A no tru, a no den Kaldeasma mi wani go.” Ma Yiria no bribi en. A grabu en dan a tyari en go na den tiriman. 15Den man dati atibron tapu Yeremia. Den meki wantu waktiman fon en, dan den sroto en ini a oso fu a sekretarsi Yonatan. Den ben teki a oso dati meki wan strafu-oso. 16Na so Yeremia doro na strafu-oso, ini den kamra di ben de na ondrosei fu a oso. A tan drape wan heri pisten.
17Dan wan leisi kownu Sedekia seni teki Yeremia sondro fu tra sma sabi, dan a aksi en taki: “MASRA taki nanga yu?” Yeremia piki en taki: “Iya, A o gi yu abra ini a makti fu a kownu fu Babel.” 18Yeremia aksi kownu Sedekia tu taki: “San mi du yu, den man di e wroko nanga yu, nanga a folku, dati un poti mi na strafu? 19Pe den profeiti de di ben e taigi yu taki Gado taigi den taki: ‘A kownu fu Babel no o hari kon feti nanga yu èn nanga a kondre disi.’ 20Tye masra, mi kownu, mi e begi yu fu yu arki mi, no seni mi go baka na a oso fu a sekretarsi Yonatan. Efu mi go drape baka mi o dede.” 21Dan kownu Sedekia komanderi fu den hori Yeremia na a presi fu den waktiman na a kownu-oso. Drape a ben kisi ala dei wan brede fu den bakriman, te leki brede no ben de moro ini a foto. Yeremia tan drape na a presi fu den waktiman na a kownu-oso.
Yeremia 38
1Sefatya, a manpikin fu Matan, Gedalya, a manpikin fu Paskur, Yukal, a manpikin fu Selemya, nanga Paskur, a manpikin fu Malkia, yere den sani di Yeremia ben tan taigi den sma. 2A ben taigi den taki: “Na disi MASRA e taki: A sma di tan ini a foto disi o dede ini a feti, a o dede fu angri, noso fu takrusiki di o panya drape. Ma noti no o psa nanga den di kmopo ini a foto fu go gi densrefi abra na den Kaldeasma. Den sa tan na libi. 3Na disi MASRA e taki: A no abi misi dati Mi o gi a foto abra ini anu fu a kownu fu Babel di o teki en abra.” 4Ne den tiriman taigi kownu taki: “A man disi mus dede. A e meki den srudati di tan ete ini a foto, nanga a heri folku lasi ati nanga den sani di a e taki. A no wani fu sani waka bun gi den, ma fu ogri miti den.” 5Kownu Sedekia piki den taki: “Un kan du san un wani nanga en, mi no man tapu unu.” 6Ne den man teki Yeremia dan den saka en go na ini a peti fu Malkia, a manpikin fu kownu. A peti dati ben de tapu a pren pe den waktiman fu a kownu-oso ben de. Den saka Yeremia nanga titei go ini a peti di no ben abi watra moro ma soso tokotoko. Dan Yeremia saka go ini a tokotoko 7Ma Ebed-Melek fu Nubia, wan fu den spesrutu wrokoman fu a kownu-oso, di ben de ini a kownu-oso, yere dati den man saka Yeremia ini a peti. Kownu srefi ben e hori krutu na a Benyaminpoort. 8Dan Ebed-Melek kmoto fu a kownu-oso go na kownu go taigi en taki: 9“Masra, mi kownu, na wan ogri den man du fu saka Yeremia poti ini a peti. Fu sanede a mus dede drape fu angri? No wan tra presi fu a foto abi brede moro tu.” 10Ne kownu komanderi Ebed-Melek fu Nubia taki: “Teki dri man dyaso, dan yu go hari Yeremia puru ini a peti fosi a dede.” 11So Ebed-Melek teki den man go na a kownu-oso, ini wan kamra ondro a maksin. Drape a teki duku nanga owru krosi di a tai na wan titei, dan a saka den go gi Yeremia ini a peti. 12Dan Ebed-Melek taigi Yeremia taki: “Poti a titei nanga den krosi ondro yu anu.” Yeremia du dati. 13Dan Ebed-Melek nanga den tra man hari Yeremia na a titei puru ini a peti. Ma Yeremia tan na a strafu-oso na a presi fu den waktiman fu a kownu-oso.
A di fu tu taki fu Sedekia nanga Yeremia
14Wan leisi kownu Sedekia meki den tyari a profeiti Yeremia go na en na a di fu dri doro fu a oso fu MASRA. Drape kownu taigi Yeremia taki: “Mi wani aksi yu wan sani, ma yu no mus kibri noti gi mi.” 15Ma Yeremia piki Sedekia taki: “Efu mi taigi yu a tru a no abi misi dati yu o kiri mi. Èn efu mi gi yu rai yu no o arki mi.” 16Ne kownu Sedekia sweri gi Yeremia pe en nanga Yeremia wawan ben de, taki: “Mi e sweri na a libilibi MASRA di gi wi a libibro, dati mi no o kiri yu èn dati mi no o gi yu abra tu na den man di wani kiri yu.” 17Dan Yeremia taigi Sedekia taki: “Na disi MASRA, a Gado fu ala sani, a Gado fu Israel, e taki: Efu yu gi yusrefi abra na den edeman fu a legre fu a kownu fu Babel, yu o tan na libi. Dan den no sa sutu faya gi a foto èn yu nanga yu famiri sa tan na libi. 18Ma efu yu no gi yusrefi abra na den edeman, a foto disi o kon ini anu fu den Kaldeasma. Den o sutu faya gi en èn den o kiri yu.” 19Ma kownu Sedekia piki taki: “Mi e frede gi den sma fu Yuda di abra go na den Kaldeasma. Efu den Kaldeasma gi mi abra na den, den o fon mi.” 20Yeremia piki en taki: “Den Kaldeasma no o du dati. Ma arki san MASRA e taigi yu, na ini En nen mi e taki nanga yu. Sani o waka bun gi yu èn yu o tan na libi. 21Ma efu yu no wani go, dan na a sani disi, di MASRA sori mi, o psa: 22Srudati o teki ala den umasma di de ete ini a kownu-oso, fu yu tyari go na den legre edeman fu a kownu fu Babel. Dan den umasma o singi taki: ‘Den mati fu yu kori yu èn den meki yu broko yu neki. Now di den futu fu yu fasi na ini tokotoko den gwe libi yu.’ 23Ala den uma nanga pikin fu yu sa kon ini anu fu den Kaldeasma, èn a kownu fu Babel srefi o grabu yu. Èn a foto disi o bron.” 24Dan Sedekia taigi Yeremia taki: “No meki no wan sma sabi san un taki, noso mi o kiri yu. 25Te den tra tiriman yere fu a taki fu mi nanga yu, den o kon na yu kon aksi yu taki: ‘Wi e begi yu, taigi un san yu taigi kownu èn san kownu piki yu. No kibri noti gi unu, noso wi o kiri yu.’ 26Dan yu mus taigi den taki: ‘Mi begi kownu fu a no seni mi go baka na a oso fu Yonatan, bika mi o dede drape.’ ” 27Di den tra tiriman kon na Yeremia kon aksi en fu a taki fu en nanga kownu, Yeremia taigi den fin'fini san kownu ben komanderi en. Dan den man no aksi Yeremia noti moro, bika no wan sma ben yere san en nanga kownu ben taki. 28Yeremia tan na a presi fu den waktiman fu a kownu-oso, te kon miti a ten di den Kaldeasma teki Yerusalem abra.
Yeremia 39
A kownu fu Babel teki Yerusalem abra
1Ini a di fu tin mun, fu a di fu neigi yari, di kownu Sedekia ben de na makti ini Yuda, kownu Nebukadnesar fu Babel kon nanga a heri legre fu en na Yerusalem, dan a lontu a heri foto. 2Tapu a di fu neigi dei, fu a di fu fo mun, fu a di fu erfu yari, di Sedekia ben de na makti, den srudati fu Babel naki wan olo ini a skotu fu Yerusalem. 3Dan ala den edeman fu a kownu fu Babel hari kon ini a foto dan den go sidon na a Mindripoort. Den man dati ben de Nebusasban, edeman fu den knekti fu kownu, Nergal-Sareser, a gran-edeman fu a legre nanga ala den tra edeman fu a kownu fu Babel. 4Di kownu Sedekia fu Yuda nanga ala den srudati si dati, den lowe. Den lowe kmoto neti ini a foto. Den waka na a dyari fu a kownu-oso, den psa na a doro di ben de mindri den tu skotu fu a foto, dan den hari go na a sei fu a Yordandal. 5Ma a legre fu den Kaldeasma teki na den baka èn den miti nanga Sedekia ini den bigi opo wei fu Yeriko. Den grabu en dan den tyari en gi kownu Nebukadnesar fu Babel, di ben de ini a foto Ribla ini a kontren fu Hamat. Dan Nebukadnesar leisi strafu gi Sedekia. 6Baka dati a meki den srudati fu en kiri den manpikin fu Sedekia leti na en fesi. Ala den heihei sma fu Yuda a meki den kiri drape na Ribla tu. 7Dan a meki srudati dyuku den tu ai fu Sedekia puru, a meki den tai en nanga tu kopro keti tyari go na Babel. 8Den Kaldeasma sutu faya gi a kownu-oso nanga den oso fu den sma èn den broko den skotu fu Yerusalem trowe na gron. 9Dan Nebusaradan, a edeman fu den waktiman fu kownu Nebukadnesar, tyari den tra sma di ben tan ete ini a foto, nanga den wan di ben abra go na en, nanga tranga go na Babel. 10Ma den sma di ben pina, den di no ben abi not'noti, Nebusaradan libi na baka ini Yuda èn a gi den droifidyari nanga pranigron fu den prani.
11Kownu Nebukadnesar fu Babel ben komanderi Nebusaradan, a edeman fu den waktiman taki: 12“Sorgu gi Yeremia èn no du en noti, ma du san a e aksi yu.” 13Dan Nebusaradan, a edeman fu den waktiman fu Nebukadnesar, Nebusasban, a edeman fu den knekti fu kownu, Nergal-Sareser, a gran-edeman fu a legre nanga den tra tiriman fu a kownu fu Babel, 14seni teki Yeremia pe a ben de na a presi fu den waktiman. Dan den meki Gedalya, a manpikin fu Akikam, a granpikin fu Safan, tyari en go na en oso. Na so Yeremia kon fri baka.
A pramisi di Masra gi Ebed-Melek
15Di Yeremia ben de na a presi fu den waktiman fu a kownu-oso ete, MASRA ben taigi en taki: 16“Go na Ebed-Melek, a man fu Nubia, dan yu taigi en taki: ‘Na disi MASRA fu ala sani, a Gado fu Israel, e taki: Yere, Mi o meki ala den ogri di Mi ben taki tak' den o miti a foto disi, miti en tu. Yu si dati nanga yu eigi ai. 17Ma Mi o kibri yu a ten dati, na so MASRA taki. Mi no o gi yu abra na den man di yu e frede. 18Mi sa meki yu lowe. Yu no o dede ini a feti, ma Mi o kibri yu fu di yu ben fertrow na Mi tapu. Na so MASRA taki.’ ”
1Brada nanga sisa di Gado kari èn di A poti aparti gi Ensrefi, na dat' meki un mus poti un prakseri tapu Yesus, a Wan di Gado seni. Na En na a granpriester fu a bribi san wi abi. 2A hori Ensrefi na a Wan di poti En fu du En wroko, leki fa Moses ben hori ensrefi na san a ben mus du ini a heri oso fu Gado. 3Ma a fiti taki Yesus kisi moro grani leki Moses, leki fa a sma di bow a oso e kisi moro grani leki a oso srefi. 4Bika ala oso abi wan sma di meki en, ma Gado na a Wan di meki ala sani. 5Moses ben hori ensrefi na san a ben mus du ini a oso fu Gado leki wan knekti: a ferteri fu san Gado ben o taki. 6Ma Kristus, di de a Manpikin fu Gado, hori Ensrefi tu na den sani san A ben mus du ini a oso fu Gado. Èn wi na a oso fu Gado, solanga wi tan hori dek'ati èn wi hori tranga na a howpu di wi abi. 7Dat' meki a de soleki fa a Santa Yeye e taki:
Tide efu un yere Gado sten,
8dan un no mus tranga un yesi
leki den afo fu unu.
Den ben meki rigeri
a pisten di Mi ben tesi den ini a dreisabana.
9Drape den tesi Mi
fu luku san Mi ben o du
aladi den ben si fotenti yari langa san Mi man du.
10Dat' meki Mi ati bron na den tapu,
dan Mi taki:
“Noiti den e tan du san Mi wani,
èn den no e ferstan
fa Mi wani taki den mus libi.”
11So Mi sweri ini Mi atibron taki:
“Noiti den sa doro na a presi
pe Mi o gi den rostu.”
12Brada nanga sisa, un mus luku bun taki no wan fu unu abi wan takru ati di no e bribi, dan a drai en baka gi a libilibi Gado. 13Ma un mus gi makandra dek'ati ala dei, solanga un man taki fu “tide.” Dan sondu no o man drai no wan fu un ede, fu un tranga un yesi. 14Bika wi e teki prati ini san Kristus abi, efu te na a kba wi e tan abi a fertrow san wi ben abi na a bigin. 15Leki fa a skrifi kba: “Tide efu un yere Gado sten, dan un no mus tranga un yesi leki fa den afo fu unu ben du di den ben meki rigeri.” 16Ma suma na den sma dan di meki rigeri aladi den yere Gado sten? Dati na ala den sma di Moses ben tyari kmoto fu Egipte. 17Èn suma na den sma di meki Gado ati bron fotenti yari langa? Dati na den sma di ben sondu dan den fadon dede ini a dreisabana. 18Nanga suma Gado ben abi en di A sweri taki noiti den o doro na a presi pe A o gi den rostu? Dati na den sma di no ben wani arki. 19So wi e si taki den no ben doro na a presi fu di den no ben wani bribi.
