Dag 321 van 365- Ezechiël 5-7 en Hebreeën 12

₁“Manpikin fu libisma, teki wan srapu nefi. Teki en leki a nefi fu koti yu edewiwiri nanga yu barba, dan yu e du dati tu. Baka dati yu mus poti a wiwiri na tapu wan wegi dan yu prati en. ₂Leki fa a ten doro dati wan kba kon na a lontu di yu ben lontu a foto, yu mus bron wan fu den ipi ini a foto. A di fu tu ipi yu mus koti fin'fini nanga wan deigri na dorosei fu a foto, èn a laste ipi yu mus fringi na loktu meki a winti wai en tyari gwe. Dan Mi o hari go na en baka nanga Mi deigri. ₃Kibri pikinso fu a wiwiri ini a lantyi fu a langa krosi fu yu tu. ₄Fringi pikinso fu a wiwiri dati ini faya. A faya di o opo fu den wiwiri dati o bron ala den sma fu Israel.”

₅Na disi Masra MASRA e taki: Disi na Yerusalem. Mi ben poti en mindri tra folku, èn kondre ben lontu en. ₆Ma na tapu wan ogri-ati fasi, moro leki den tra folku srefi, a no ben wani du den sani fu Mi na san a ben mus tan hori ensrefi. Moro leki den kondre di lontu en a no ben wani du den sani di a mus tan du. Bika a poti den sani fu Mi na wan sei na san a ben mus tan hori ensrefi, èn a no du den sani di a ben mus tan du. ₇Dat' meki na so Masra MASRA e taki: Un no ben wani arki, moro leki den tra folku srefi lontu unu. Un no tan du den sani di un mus tan du. Un no hori unsrefi na den sani fu Mi na san un ben mus tan hori unsrefi nanga di fu den folku lontu unu. ₈Fu dat'ede, na disi Masra MASRA e taki: Un yere, Mi o strafu unu. Iya, Misrefi. Mi o strafu unu leti fesi den tra folku. ₉Fu ala den groskin sani di un du, Mi o du nanga unu san noiti ete Mi du nanga sma èn san Mi no sa du noiti moro nanga sma tu. ₁₀P'pa nanga m'ma sa nyan den eigi pikin ini yu, Yerusalem, èn pikin sa nyan den papa nanga den mama. Den wan di sa tan na libi Mi o panya go na ala den sei pe a winti e wai go. Na so Mi sa strafu unu.

₁₁Dat' meki na disi Masra MASRA e taki: Mi e sweri na Mi eigi libi taki Mi o kiri un alamala puru na grontapu. Bika un doti a santa presi fu Mi nanga den groskin sani fu unu èn nanga a groskinfasi fa un e tyari unsrefi. Mi no o sori sari-ati èn Mi no o sari no wan sma. ₁₂Yerusalem, Mi e prati den sma fu yu ini dri grupu. Wan grupu o dede ini a foto fu takrusiki di o panya drape, nanga fu angri ini wan angriten. Wan grupu na deigri o kiri den dorosei fu a foto, èn wan grupu Mi o panya go na ala den sei pe a winti e wai go, dan Mi o hari go na den baka nanga Mi deigri. ₁₃Mi o pai den baka nanga a faya atibron fu Mi di Mi o lusu na den tapu te leki a sari Mi. Dan te Mi lusu a hebi atibron fu Mi so na den tapu den o sabi dati Mi ben taki so fu di Mi, MASRA, e dyarusu. ₁₄Mi o broko yu tron bigi ipi broko ston. Yu o tron wan dreigi gi den folku lontu yu, èn ibri sma di o psa o si san miti yu. ₁₅Te Mi o strafu yu nanga hebi strafu ini Mi faya atibron, yu o tron wan dreigi nanga wan spot'popki. Yu o de leki wan warskow gi den folku lontu yu nanga leki wan eksempre gi san den o frede te fu dede. Na Mi, MASRA, taki dati. ₁₆Mi o sutu den takru peiri fu angri kon na un tapu, di o tyari dede kon. Mi o sutu den kon na un tapu fu tyari dede gi unu. Mi o meki angri kiri unu èn Mi o meki a brede di e hori un na libi no o de fu feni moro. ₁₇Mi o meki angri nanga krasimeti kiri den pikin fu unu. Unu dati na takrusiki o panya na un mindri, brudu o lon èn Mi o meki feyanti kiri unu nanga deigri. Mi, MASRA, taki dati.

₁MASRA taki nanga mi, A taigi mi taki: ₂“Manpikin fu libisma, luku go na den bergi fu Israel, dan yu e taigi den san Mi e gi yu fu yu taki. ₃Taigi den taki: ‘Bergi fu Israel, arki a boskopu fu Masra MASRA na disi Masra MASRA e taigi den bergi, den bigiwan nanga den pikinwan, den ravijn, nanga den dal: Un yere, Mi o meki feyanti kiri unu ini bigi feti èn so Mi o broko den presi fu unu pe un e tyari ofrandi. ₄Den altari fu unu o broko pis'pisi èn den sani tapu san un e bron wierook o broko tu. Mi o meki den sma di e libi drape fadon dede leti fesi den kruktu gado fu unu. ₅Mi o fringi den dedeskin fu den Israelitisma fesi den kruktu gado fu den èn panya den bonyo fu den lontu den altari. ₆Pipel fu Israel, den foto fu unu o broko ala presi pe un e libi. Den presi pe un e tyari ofrandi o tron busi, èn so den altari fu unu o broko èn tan den wawan drape. Den kruktu gado fu unu o broko fadon pis'pisi, èn den sani tapu san un e bron wierook o panya. Ala den sani di unsrefi meki o lasi. ₇Furu fu unu o lasi un libi. Dan un o sabi dati Mi na MASRA. ₈Ma Mi o meki wantu fu un tan na libi. Den dati feyanti no o kiri nanga deigri èn den o go libi na ini tra kondre mindri dorosei folku pe Mi o panya den go. ₉Den sma di no dede o prakseri Mi te den de na mindri den tra folku na ini den kondre pe den ben tyari den go leki strafuman. Den o memre san Mi du nanga den fu di den waka baka tra gado èn fa den ai kori den tyari go na den kruktu gado. Dan den o fisti fu densrefi fu di den ben tyari densrefi so wan groskin fasi. ₁₀Den o ferstan tu dati a no fu soso Mi, MASRA, taki dati Mi o meki a bigi ogri dati miti den.

₁₁Na disi Masra MASRA taigi mi: Naki ini yu anu nanga atibron, stampu den futu fu yu, dan yu e bari taki: A kba nanga ala den ogri groskin sani di den sma fu Israel e du. Bika feyanti o kiri den nanga deigri, den o dede fu angri ini wan angriten nanga fu takrusiki di o panya na den mindri. ₁₂A takrusiki o kiri den wan di de farawe. Feyanti o kiri den wan di de krosbei, èn den wan di tan na libi o dede fu angri. Mi o lusu ala a hebi atibron fu Mi na den tapu. ₁₃Den o ferstan taki Mi na MASRA te den dedewan fu den o didon mindri den kruktu gado lontu den altari, pe den ben e bron ofrandi leki switismeri gi den kruktu gado fu den. Den o didon tapu ibri bergi, den pikinwan nanga den bigiwan, ondro ibri bon di lai wiwiri, nanga ondro ibri bigi bon di e gi furu kowrupresi. ₁₄Mi o sori den Mi makti. Mi o meki a kondre fu den tron wan broko pranasi, Mi e meki a tron busi, fu a bigi dreisabana go te na a foto Dibla na noordsei, ala sei pe den e libi. Dan den o ferstan dati Mi na MASRA.’ ”

₁MASRA taki nanga mi, A taigi mi taki: ₂“Manpikin fu libisma, na disi Masra MASRA e taigi Israel:

₁Wi abi wan bigi grupu kotoigi di lontu wi. Dat' meki wi mus poti ala sani na wan sei di e hori wi na baka, nanga den sondu di e frekti wi so makriki. Wi mus tan hori doro fu lon a streilon di wi mus lon. ₂Meki wi tan luku na Yesus, di de a Fesiman fu wi bribi nanga a Wan di o tyari en kon na a kba. Fu di A ben sabi fu a bigi prisiri san A ben o abi, meki A dede na a kroisi sondro fu span nanga a syen di A kisi. Dan now A e sidon na a let'anu sei fu a kownusturu fu Gado. ₃Prakseri a Wan di nyan someni pina fu sondusma nanga den sani san den taki. Disi sa yepi unu fu un no weri èn lasi ati. ₄Ini a strei san un e strei nanga sondu, un no lasi no wan dropu brudu ete. ₅Èn un fergiti fa Masra ben gi unu, leki En pikin, dek'ati di A taki: “Mi pikin, no si en leki noti te Masra e leri yu fu du En wani èn no lasi ati te A e sori yu tapu yu fowtu. ₆Bika Masra e leri a sma di A lobi fu du En wani èn A e fon ala sma di A e teki leki En pikin.” ₇Un mus hori doro te Gado e leri unu fu du En wani. Gado e libi nanga unu leki En pikin. Ala p'pa e leri en pikin fu du san en leki p'pa wani. ₈Efu unu no e leri dati leki ala trawan, dan unu a no trutru pikin, ma unu na dorosei pikin. ₉Boiti dati wi ben e lespeki den p'pa fu wi dya na grontapu di ben leri wi fu du den wani. Dat' meki wi mus saka wisrefi moro ete gi wi yeye P'pa, dan wi o feni libi. ₁₀Bika den p'pa fu wi na grontapu ben kweki wi fu wan syatu pisten tapu wan fasi di bun ini den ai. Ma Gado e du en tapu wan fasi di bun gi wi, fu wi kan teki prati na ini a santa fasi fu En. ₁₁Te un e kisi strafu un no e prisiri, ma na sari un e sari. Ma den sma di teki leri fu en, e kisi freide bakaten, fu di den e libi wan leti fasi. ₁₂Dat' meki, un mus opo den swaki anu fu unu, èn un mus opo tnapu tapu den kindi fu unu di e beifi. ₁₃Un tan waka tapu a leti pasi. Dati o yepi a futu san lan fu a no kmoto ini en skrufu, ma fu a kon betre. ₁₄Un meki muiti fu libi ini freide nanga ala sma èn fu libi wan santa libi. Bika sondro dati yu no o man si Masra. ₁₅Un luku bun taki no wan sma no drai en baka gi a bun-ati fu Gado. Sorgu tu taki no wan sma e libi nanga bita fasi di e tyari trobi èn di kan pori furu tra sma. ₁₆No wan fu unu mus gi ensrefi abra na takru lostu. No wan sma mus de leki Esau di no ben e span nanga Gado, ma di seri a leti di a ben abi leki fosi pikin gi wan enkri preti nyanyan. ₁₇Bika un sabi taki bakaten di a ben kon suku a blesi, a no kisi en. A no ben man kenki san a ben du moro, awinsi a ben begi en p'pa nanga watra-ai.

₁₈Un no kon leki a pipel fu Israel na wan sani san un kan fasi leki a bergi Sinai, di ben e bron nanga faya, èn pe wan dipi dungru ben de, èn pe wan krasi winti ben e wai. ₁₉Un no yere a babari fu wan tutu, noso wan sten di ben e taki. Den sma di yere a sten begi fu A no taki nanga den moro. ₂₀Bika den no ben man nanga san A komanderi den di A taki: “Efu wan meti srefi fasi a bergi, dan un mus ston en kiri.” ₂₁A sani san den si ben meki den frede sote taki Moses taki: “Frede e meki taki mi e beifi.” ₂₂Ma un kon na a bergi Sion, na a foto fu a libilibi Gado. Un kon na a Yerusalem di de na heimel nanga den dusundusun engel. ₂₃Un kon na a gemeente fu den fosi pikin fu Gado di nen skrifi na heimel, di kon makandra fu hori fesa. Un kon na Gado di e krutu ala sma, èn un kon na den yeye fu den sma di ben libi bun ini Gado ai èn di kon de leki fa Gado wani. ₂₄Un kon na Yesus, a Mindriman fu wan nyun ferbontu, èn un kon na a brudu di ben lon èn di e taki fu moro bun sani dan di fu Abel.

₂₅Dat' meki un mus sorgu taki un no drai un baka gi a Wan di e taki nanga unu. Bika den sma di ben drai den baka gi a Wan di warskow den na grontapu, no ben man kmoto gi a strafu. Dan wi no o man kmoto srefsrefi efu wi drai wi baka gi a Wan di e taki nanga wi kmoto fu heimel. ₂₆Di A ben taki nanga den, En sten ben seki grontapu. Ma now A pramisi taki: “Mi o seki grontapu ete wan leisi. Ma a no grontapu wawan, Mi o seki heimel tu.” ₂₇Den wortu “ete wan leisi,” e sori wi taki den sani di Gado meki o seki, èn A o puru den. Dan den sani di no man seki, sa tan. ₂₈Dat' meki wi mus taki Gado tangi tak' wi o kon ondro wan tiri di noiti no man seki. Kon meki un anbegi Gado nanga dipi lespeki tapu wan fasi di e fiti En. ₂₉Bika a Gado fu wi, na wan faya di e bron ala sani.