Dag 322 van 365- Ezechiël 8-10 en Hebreeën 13

₁Ini a di fu siksi yari, tapu a di fu feifi dei fu a di fu siksi mun, den edeman fu den sma fu Yuda ben de na mi ini mi oso. Ne wantronso a krakti fu Masra MASRA kon baka na mi tapu. ₂Di mi luku, mi si wan sani leki wan libisma di ben de fu faya. Fu en ondrobere go na gron ben de fu faya. Fu en bere go na loktu ben e koti faya, a ben e brenki, leki weti gowtu. ₃Dan a langa wan sani leki wan anu èn a grabu mi hori na mi wiwiri. Dan ini a sani di Gado ben e sori mi, a yeye opo mi, mindri heimel nanga grontapu, tyari go na Yerusalem. A tyari mi go leti fesi a doro fu a pren, di ben de tapu a dyari fu a tempel, a doro di ben e luku go na noordsei. Na drape a popki fu a kruktu gado ben de, a groskin sani di e wiki a atibron fu Gado. ₄Ne mi si a glori fu a Gado fu Israel drape tu, leki fa mi ben si ini a dal na a Kebarliba. ₅Dan Gado taigi mi taki: “Manpikin fu libisma, luku go na noordsei!” Mi luku go na noordsei, dan mi si a popki fu a kruktu gado ben tnapu na a bigin fu a Altarpoort, a popki di e wiki a atibron fu MASRA. ₆Dan Gado taigi mi baka taki: “Manpikin fu libisma, yu e si san den sma fu Israel e du? Yu e si den bigi groskin sani di den e du, den sani di e meki Mi abi fu tan fara fu a santa presi fu Mi? Ma yu o si moro bigi groskin sani ete.”

₇Baka dati A tyari mi go pe yu e psa go tapu a pren fu a tempel. Dan mi si dati a skotu ben abi wan olo. ₈Ne A taigi mi taki: “Manpikin fu libisma, psa ini a olo go na a tra sei.” Mi psa ini a olo fu a skotu dan mi si wan doro. ₉Dan A taigi mi taki: “Go na inisei go si den bigi groskin sani di den e du dyaso.” ₁₀Ne mi go na inisei dan mi luku èn mi si ala sortu prenki fu groskin sani di ben tyerfi na a skotuskin: prenki fu meti di e kroipi nanga tra sortu meti, nanga fu ala den kruktu gado di den sma fu Israel ben e anbegi. ₁₁Seibitenti fesiman fu Israel ben tnapu fesi a skotu. Yasanya, a manpikin fu Safan ben de na den mindri. Iniwan fu den ben hori wan pan ini en anu ini san wierook ben e bron èn a smoko fu en di ben abi wan switi smeri ben e opo go na loktu. ₁₂Dan Gado taigi mi taki: “Manpikin fu libisma, yu e si san den fesiman fu Israel e du kibrikibri, drape ini a bigi kamra di furu nanga prenki fu kruktu gado. Den e tak' srefi taki: ‘MASRA no e si unu. MASRA gwe libi a kondre.’ ”

₁₃Gado taigi mi moro fara taki: “Yu o si moro fu den groskin sani di den e du.” ₁₄Dan A tyari mi go leti fesi a doro di de na noordsei fu a oso fu MASRA. We, umasma ben sidon drape e krei gi a gado Tamuz. ₁₅Ne A aksi mi taki: “Yu si dati, manpikin fu libisma? Ma Mi o sori yu moro bigi groskin sani di den e du.”

₁₆Dan A tyari mi go tapu a inisei pren fu a oso fu MASRA. We, drape, mofo a doro fu a tempel fu MASRA, mindri a fes'sei gadri nanga a altari, sowan tutenti-na-feifi man ben de. Den ben drai den baka go na a tempel nanga den fesi go na oostsei. So, nanga den fesi go na a oostsei, den boigi e anbegi a son. ₁₇Ne A aksi mi taki: “Yu si dati, manpikin fu libisma? Èn den groskin sani dati di a pipel fu Yuda e du no sari den, bika soso ogri den e du tu ini a kondre. Luku fa den e afrontu Mi dorodoro. Luku, wan droifi taki srefi den e hori na den noso. ₁₈Na dat' meki Mi o strafu den ini Mi hebi atibron. Mi no o sori sari-ati, Mi no o sari no wan fu den. Awinsi den e bari bun tranga na Mi yesi, Mi no o arki den.”

₁Dan mi yere Gado bari tranga taki: “Un kon krosbei, unu di o strafu a foto disi, un alamala mus hori a fetisani ini un anu nanga san un o broko a foto.” ₂Ne mi si siksi mansma waka kmopo fu a doro di ben na loktusei na noordsei fu a tempel. Iniwan fu den ben hori a fetisani nanga san a ben o broko a foto ini en anu. Wan fu den man ben weri linnen krosi èn a ben tyari wan kokro nanga skrifisani na ini na en seibere. Di den man kon krosbei den go tnapu na a kopro altari.

₃A glori fu a Gado fu Israel, di ben e tan tapu den kerub, kmopo drape go na mofodoro fu a tempel. Dan MASRA kari a man di ben weri a linnen krosi èn di ben abi a kokro nanga den skrifisani. ₄A taigi a man taki: “Hari psa ini a foto, hari psa ini Yerusalem, dan yu e poti wan marki tapu a fes'ede fu den man di e soktu èn di e dyeme fu den groskin sani di e psa drape.” ₅Dan mi yere a taigi den tra man taki: “Un hari baka a man dati go ini a foto dan un e naki ala tra sma kiri. Un no mus abi sari-ati un èn no sari no wan sma. ₆Granisma, yonkuman, yongu umapikin, pikin-negre, umasma, den alamala un mus puru na pasi. Ma un no mus fasi no wan fu den sma di abi a marki. un bigin na a santa presi fu Mi!” Ne den bigin na den man, den tiriman, di ben de fesi a tempel. ₇Gado taigi den tu taki: “Un doti a tempel, èn un furu den pren fu en nanga dedeskin. Un go!” So den go èn den naki sma kiri ini a foto. ₈Mi ben tan na baka di den man ben e naki den sma kiri. Ne mi trowe misrefi nanga fesi na gron èn bari taki: “Tye, Masra MASRA, na kiri Yu o kiri ala den sma fu Israel di tan na baka now di Yu lusu a hebi atibron na tapu Yerusalem?” ₉A piki mi taki: “A kruktudu fu den sma fu Israel nanga di fu Yuda bigi sote. Den meki furu brudu lon ini a kondre, èn den no e hori den na no wan wèt. Den e prakseri taki: ‘MASRA gwe libi a kondre, MASRA no e si san un e du.’ ₁₀Na dat' meki Mi no o abi sari ati èn Mi no sa sari no wan sma tu. Mi o meki den sani di den e du drai kon tapu den eigi ede.” ₁₁Dan mi si fa a man di ben weri a linnen krosi èn di ben tyari a kokro nanga skrifisani na ini na en seibere, drai kon piki taki: “Mi du san Yu komanderi mi.”

₁Di mi luku, mi si wan sani leki wan kownusturu di ben meki fu a diriston safier. A ben de loktusei fu a sortu lontu daki di ben de tapu a ede fu den kerub. ₂Dan MASRA taigi a man ini a linnen krosi taki: “Go na mindri den wiel di de ondro den kerub, dan yu e furu yu anu nanga krofaya di e puru faya. A krofaya disi de na mindri den kerub. Fringi en abra a foto.” Leti na mi fesi a man go mindri den wiel. ₃Den kerub ben tnapu na zuidsei fu a tempel, a pisten di a man ben e waka go. Dan wan wolku furu a heri inisei pren. ₄Dan a glori fu MASRA kmopo na tapusei fu den kerub go na mofodoro fu a tempel. Ne a wolku furu a tempel èn a heri inisei pren ben furu nanga a faya fu a glori fu MASRA. ₅A babari fu den frei fu den kerub ben de fu yere te tapu a pren na dorosei pren. A ben gersi a sten fu Gado, leki te a Wan de abi ala makti, e taki. ₆Baka di A ben komanderi a man ini linnen krosi fu teki faya na mindri den wiel di ben de ondro den kerub, a man ben go tnapu sei wan fu den wiel. ₇Dan wan fu den kerub langa en anu go na a faya di ben de mindrisei fu den dan a poti pikinso fu en ini a anu fu a man ini linnen krosi. A man teki en dan a hari gwe. ₈Wan sani leki wan libisma anu ben de fu si ondro den frei fu den kerub.

₉Di mi luku, mi si dati fo wiel ben de sei den kerub, wan sei ibri kerub. Den wiel ben e brenki leki a diriston turkoois. ₁₀Te yu ben e luku den, den ala fo ben tan a srefi fasi. A ben gersi leki wan ben de ini wan trawan. ₁₁Den wiel ben kan go na ala fo sei sondro taki den ben abi fu drai. Awinsi pe a fes'sei wan ben go, den trawan ben e go tu, sondro fu drai den ben e go. ₁₂A heri skin fu den kerub, den baka, den anu nanga den frei, sosrefi den wiel, ben furu nanga ai. Iniwan fu den fo kerub ben abi en eigi wiel. ₁₃Mi yere wan sma ben kari den wiel: Wiel di e drai. ₁₄Iniwan fu den kerub ben abi fo fesi. A fosi fesi ben de di fu wan kerub, a di fu tu ben de di fu wan libisma, a di fu dri ben de di fu wan lew, a di fu fo ben de di fu wan aka. ₁₅Dan den kerub opo go na loktu. A ben de densrefi libisani di mi ben si na a Kebarliba. ₁₆Te den kerub ben e dribi, den wiel ben de skinskin nanga den. Efu den kerub ben e bradi den frei fu opo go na loktu, den wiel ben e opo go na loktu tu. ₁₇Te den kerub ben tan tnapu, den wiel ben tan tnapu tu. Te den kerub ben opo kmopo na gron, den wiel ben e opo tu, bika na a srefi yeye di ben tiri den kerub ben tiri den wiel tu.

₁₈Dan a glori fu MASRA kmopo na mofodoro fu a tempel go tapu den kerub. ₁₉Mi si taki den kerub ben bradi den frei, taki den ben opo kmoto na gron di den ben e go, èn den wiel ben de na den sei. Den go tnapu na a Oostpoort fu a oso fu MASRA, èn a glori fu a Gado fu Israel ben de na den tapu. ₂₀A ben de densrefi libisani di mi ben si na a Kebarliba, den libisani tapu san a Gado fu Israel ben de tu. Ne mi kon ferstan dati den ben de kerub. ₂₁Iniwan fu den ben abi fo fesi nanga fo frei. Ondro den frei den ben abi sani di ben gersi libisma anu. ₂₂Te yu ben luku den, den fesi fu den ben gersi den fesi di mi ben si na Kebarliba. Na a srefi fasi den ben tan, a ben de densrefi libisani. Den no ben abi fu drai te den ben wani go na wan tra sei.

₁Un mus tan lobi tra bribisma. ₂Un no fergiti fu opo un oso gi trawan, bika disi meki taki son sma ben meki engel tan ini den oso sondro fu den sabi. ₃Un prakseri den sma di de na straf'oso neleki un de na strafu nanga den. Prakseri den sma tu di trawan e pina, neleki den e pina unu tu.

₄Ala sma mus lespeki a trowlibi, den no mus go nanga wan tra sma na bedi. Bika Gado o krutu den sma di e gi densrefi abra na takru lostu nanga den sma di e huru. ₅Moni no mus de a moro prenspari sani ini un libi. San un abi mus sari gi unu. Bika Gado srefi taki: “Mi no o libi yu noiti èn noiti Mi sa poti yu na wan sei.” ₆Dat' meki wi kan taki sondro frede taki: “Masra na mi Yepiman, mi no e frede. San wan libisma o man du mi?”

₇Un no mus fergiti den fesiman fu unu di ben ferteri un a wortu fu Gado. Luku fa den libi te leki den dede, dan un mus bribi leki fa den ben bribi. ₈Yesus Kristus na a srefi esde, tide èn fu têgo.

₉No meki sma drai un prakseri nanga ala sortu tra leri di un no sabi. A moro bun fu teki krakti ini a bun-ati fu Gado, dan ini den wèt di e leri san wi kan nyan noso san wi no kan nyan. Den sma di ben suku en ini san den e nyan no feni yepi. ₁₀Wi abi wan altari, ma den priester di e du den wroko ini a santa tenti no abi primisi fu nyan fu a altari disi. ₁₁Bika baka te a granpriester e tyari brudu kon ini A Moro santa presi leki ofrandi gi sondu, dan den e tyari a skin fu den meti go bron dorosei fu a foto. ₁₂Fu dat'ede Yesus nyan pina dorosei fu a foto tu, fu A kan meki a pipel kon santa nanga En eigi brudu. ₁₃So, meki wi go na En dorosei fu a foto fu teki prati ini a syen fu En. ₁₄Bika un no abi wan foto dya di e tan fu têgo, ma wi e suku a wan di de fu kon. ₁₅Dat' meki wi mus tan prijse Gado nanga a yepi fu Yesus, meki a de leki wan ofrandi gi En. Wi e du dati te wi e taki nanga wi mofo taki wi e bribi ini En. ₁₆Un no mus fergiti tu fu du trawan bun èn fu prati san un abi nanga den. Bika Gado lobi en te wi e tyari den ofrandi dati.

₁₇Du san den fesiman fu unu e taigi un fu du. Un saka unsrefi gi den, bika den na den sma di e sorgu gi unu, èn na den o abi fu gi frantwortu fu a sani disi. Meki den du den wroko nanga prisiri. Den no mus du en nanga dyeme, bika dati no o tyari no wan wini gi unu.

₁₈Begi gi unu, bika wi sabi taki wi abi wan krin konsensi. Bika ala fasi wi e pruberi fu tyari wisrefi bun. ₁₉Mi e begi unu fu un begi spesrutu taki mi kan drai kon baka moro esi na unu.

₂₀Gado di e gi freide, ben meki wi Masra Yesus, a bigi Skapuman fu den skapu, opo baka na dede fu di a têgo ferbontu ben stampu nanga En brudu. ₂₁Meki a Gado disi gi unu ala bun sani san un abi fanowdu fu du En wani. Dan A o man du san A wani ini unu nanga a yepi fu Yesus Kristus. Na En mus kisi glori fu têgo èn ala ten. Amen.

₂₂Brada nanga sisa, mi e begi unu fu teki den wortu disi nanga san mi e gi unu dek'ati. Mi skrifi wan syatu brifi nomo gi unu. ₂₃Mi wani taigi unu taki den lusu wi brada Timoteus. Efu a kon es'esi, dan mi nanga en o kon luku unu.

₂₄Taki ala den fesiman fu unu, nanga ala den sma fu Gado, odi gi mi. Den brada nanga sisa fu Italiakondre seni taki un odi. ₂₅Meki a bun-ati fu Gado de nanga unu alamala.