1Wantu fu den edeman fu Israel kon na mi. Di den sidon 2MASRA taki nanga mi, A taigi mi taki: 3Manpikin fu libisma, den man disi e dini den kruktu gado fu den nanga den heri ati. Den e poti den sani di e meki den fadon ini kruktudu leti na den fesi. Dan fa Mi kan gi den a rai di den kon suku? 4Dat' meki opo yu mofo taigi den taki: “Na disi Masra MASRA e taki: Misrefi sa piki ibri Israelitisma di seri en ati gi den kruktu gado fu en, di e poti den sani di e meki a fadon ini kruktudu leti na en fesi, èn di e teki a prefuru fu kon aksi wan profeiti fu Mi rai. 5Mi sa meki den Israelitisma firi dati den drai baka gi Mi nanga a dini di den go dini den kruktu gado.” 6Dat' meki, taigi a pipel fu Israel taki: Na disi Masra MASRA e taki: Un drai kon baka na Mi, un drai gwe fu den kruktu gado fu unu èn un gwe libi ala den groskin sani. 7Bika Mi, MASRA, srefi o piki ibri Israelitisma di drai en baka gi Mi, di seri en ati gi den kruktu gado fu en èn di e poti den sani di e meki a fadon ini kruktudu leti na en fesi, ma di e teki a prefuru fu kon na wan profeiti fu meki a aksi Mi rai. 8Mi o tron a feyanti fu so wan sma, Mi o meki a tron wan eksempre, wan odo, èn Mi sa yagi en fu têgo kmoto na mindri fu Mi pipel, dan un o sabi taki Mi de MASRA. 9Ma efu na wan profeiti di e kori sma èn a gi piki, dan na Mi, MASRA, kori en fu a du dati. Mi o strafu so wan profeiti èn Mi sa yagi en fu têgo kmoto na mindri fu Mi pipel Israel. 10Den sa tyari den kruktudu fu den. A kruktudu fu a profeiti bigi a srefi leki di fu a sma di kon aksi en rai. 11Dan so a pipel fu Israel no sa drai baka moro gi Mi, èn den no sa doti densrefi moro tu nanga ala den sondu fu den. Dan den sa de a pipel fu Mi èn Mi sa de a Gado fu den. Na so MASRA e taki.
12MASRA taki nanga mi, A taigi mi taki: 13“Manpikin fu libisma, te wan kondre du san Mi no wani fu go dini kruktu gado, dan Mi e strafu a kondre dati fu sorgu dati sani no e gro drape moro. Mi e seni angriten go drape èn Mi e kiri libisma nanga meti. 14Ma efu den dri man disi, Noa, Danyel, nanga Yob, ben e libi drape, dan den ben o man kmopo gi a strafu fu di den e libi na tapu wan leti fasi. Na so MASRA e taki. 15Efu Mi meki krasimeti bigin waka lontu ini a kondre, krasimeti di e kiri den sma drape, dan a kondre o tron wan broko pranasi fu di sma no o hari psa drape moro fu den krasi meti ede. 16Ma efu den dri man dati ben e libi drape, èn Mi e sweri disi na a eigi libi fu Mi, so MASRA e taki, dati den no ben o man puru den manpikin nanga den umapikin fu den srefi na ini. Na densrefi wawan den ben o man puru, ma a kondre dati e tron wan broko pranasi. 17noso efu Mi meki bigi feti broko ini a kondre èn Mi taki: ‘Un hari psa ini a kondre dati nanga un deigri’ èn Mi e puru libisma nanga meti na pasi, 18ma den dri man dati ben e libi drape, Mi e sweri disi na a eigi libi fu Mi, Masra MASRA e taki, dati den no ben o man puru den manpikin nanga umapikin srefi na ini. Densrefi wawan den ben o man puru. 19Noso efu Mi seni wan takru siki fu panya ini a kondre èn lusu a hebi atibron fu Mi drape fu meki furu brudu lon fu kiri libisma nanga meti, 20ma Noa, Danyel nanga Yob ben e libi drape, Mi e sweri disi na a eigi libi fu Mi, Masra MASRA e taki, dati den no ben o man puru den manpikin nanga umapikin na ini. Fu di den e libi na tapu wan leti fasi na densrefi wawan den ben o man puru na ini. 21Ma disi Masra MASRA e taki: Ma awinsi Mi seni den fo hebi strafu fu Mi, bigi feti, angriten, krasimeti nanga takrusiki go na Yerusalem fu kiri libisma nanga meti, 22toku sma o de di o tan na libi, sma di o kmopo na ini, manpikin nanga umapikin, di a feyanti o tyari kon na den kondre leki strafuman. A feyanti o tyari den kon pe unu de, dan te un o si fa den e tyari densrefi un o ferstan fu sanede meki Mi strafu a foto, èn dati o de wan trowstu gi unu. 23Iya, a o de wan trowstu gi unu te un o si fa den e tyari densrefi. Dan un o sabi taki a no fu soso Mi du den sani di Mi du drape. Na so Masra MASRA e taki.”
