Dag 326 van 365- Ezechiël 18-19 en Jakobus 4

₁MASRA taki nanga mi, A taigi mi taki: ₂“Fu sanede unu ini Israel e taki a sani disi?: Papa nanga mama e nyan swa droifi, ma na den tifi fu den pikin e swa. ₃Mi e sweri disi na a eigi libi fu Mi, Masra MASRA e taki, dati noiti moro a sani disi sa taki ini Israel. ₄Yere, a libi fu ala sma na fu Mi: a libi fu papa nanga mama, nanga a libi fu pikin èn na a sma di sondu sa dede.

₅Efu wan sma di bun ini Mi ai e du san bun, a e libi na tapu wan leti fasi, ₆a no e nyan meti di tyari leki ofrandi gi kruktu gado makandra nanga trawan tapu den bergi, a no e opo en ede luku den kruktu gado di den e dini, a no e go na bedi nanga a uma fu wan tra man noso nanga wan uma di abi en munsiki, ₇a no e pina no wan sma, a e gi a sma di mus pai en a panti fu en baka, a no e fufuru, a e prati a brede fu en nanga sma di angri e kiri, a e weri krosi gi den di de nanga sososkin, ₈a no e aksi sma moro leki san a leni den, a no e seri sani diri furu moro leki san a mus seri, a no e du kruktu sani, a e taki sani leki fa den de fesi krutu, ₉a e du den sani fu Mi di a mus tan du èn a e hori ensrefi fin'fini na den sani fu Mi na san a mus tan hori, - so wan sma na wan sma di bun ini Mi ai. A no abi misi dati a o tan libi. Na so Masra MASRA e taki.

₁₀Ma efu a meki wan boi di e fufuru, di e kiri, di e du ala den sani ₁₁di ensrefi no du noiti, wan boi di e nyan meti di tyari leki ofrandi gi kruktu gado makandra nanga trawan tapu den bergi, di e go na bedi nanga a uma fu wan tra man, ₁₂di e pina pôtisma nanga sma di no de noti, di no e gi a sma di mus pai en a panti fu en baka, di e opo en ede luku kruktu gado, di e du groskin sani, ₁₃di e aksi sma moro leki san a leni den èn di e seri sani diri furu moro leki san den mus de, - so wan sma no sa tan na libi. Baka ala den groskin sani dati di a du a sa dede nomonomo. Èn na ensrefi suku en dede.

₁₄Ma efu so wan sma meki wan boi, wan boi di e si ala den sondu di en papa e du, di e si den, ma di no e du den, ₁₅di no e nyan meti di tyari leki ofrandi gi kruktu gado makandra nanga trawan tapu den bergi, di no e opo en ede luku den kruktu gado fu a pipel fu Israel, di no e go na bedi nanga a uma fu wan tra man, ₁₆di no e pina no wan sma, di no e teki panti srefsrefi, di no e fufuru, di e prati en brede nanga den di angri e kiri, di e weri krosi gi den di de nanga sososkin, ₁₇di no e du kruktu, di no e teki na sma moro leki san a leni den, di no e seri sani diri furu moro leki san den mus de, ma di e hori ensrefi na den sani fu Mi na san a mus tan hori ensrefi èn di e du den sani fu Mi di a mus tan du, - so wan sma no sa dede fu den kruktudu di en papa du, ma a o tan na libi. ₁₈Na en papa, di pina trawan puru sani na den anu, di fufuru sani fu trawan èn di du sani di no bun nanga en eigi famiri, iya, na en sa dede fu den kruktudu fu en. ₁₉Ma unu e aksi taki: ‘Fu sanede a manpikin no e yepi tyari den kruktudu fu en papa?’ A manpikin no e yepi en tyari den bika en e du san bun, èn a e libi na tapu wan leti fasi. A e hori ala den wèt fu Mi fin'fini. A boi o tan na libi. ₂₀Na a sma di sondu sa dede. Wan boi no o yepi tyari den kruktudu fu en papa, èn wan papa no o yepi tyari den kruktudu fu en boi. A bun fasi fu wan sma di bun ini Mi ai sa de na ensrefi tapu, èn a ogri-ati fasi fu wan ogri-ati sma sa de na ensrefi tapu.

₂₁Ma te wan ogri-ati sma drai en baka gi ala den sondu di a e du, te a e hori ala den wèt fu Mi, te a e du san bun èn libi na tapu wan leti fasi, dan a o tan na libi. A no sa dede. ₂₂A no o abi fu pai fu no wan fu den ogri di a du. A libi di a e libi na tapu wan leti fasi now o meki a tan na libi. ₂₃Mi no abi prisiri nanga a dede fu wan ogri-ati sma, Masra MASRA e taki. Ma Mi abi prisiri te a sma sa drai en baka gi a fasi fa a e libi, fu a kan tan libi.

₂₄Ma te wan sma di bun ini Mi ai tapu nanga a bun fasi fa a e libi, dan a bigin du ogri, a o pai fu ala den groskin sani di a e du èn a no o tan na libi. Mi no o prakseri no wan fu den bun sani moro di a ben du. Ma a o dede fu di a drai di a drai en baka gi Mi, nanga fu den sondu di a du.

₂₅Ma un e taki: ‘Ma MASRA no e du sani nanga leti.’ Ma pipel fu Israel, un yere. Na Mi no e du sani nanga leti, noso na unu no e du sani nanga leti. ₂₆Te wan sma di bun ini Mi ai drai kmopo fu a bun fasi fa a ben e libi go du ogri, dan a dede, dan a e dede fu den ogri di a go du. ₂₇Ma te wan ogri-ati sma drai en baka gi den ogri di a ben e du fu go du san bun, fu go libi na tapu wan leti fasi, dan a kibri a libi fu en. ₂₈Na kisi a kisi ensrefi, èn a drai baka gi ala ogri di a du. A o tan na libi, a no sa dede. ₂₉Ma a pipel fu Israel e taki: ‘Ma MASRA no e du sani nanga leti.’ Pipel fu Israel, na Mi no e du sani nanga leti noso na unu no e du sani nanga leti.

₃₀Na dat' meki, pipel fu Israel, Mi o strafu iniwan fu unu na a fasi fa un e tyari unsrefi, Masra MASRA e taki. Un drai un baka gi den ogri fu unu èn un tapu nanga den. Dan den no sa meki un fadon ini kruktudu. ₃₁Un broko nanga a sondu libi di un libi èn un poti krin denki ini un prakseri nanga ini un ati. Fu sanede un wani dede, pipel fu Israel? ₃₂Bika a dede fu wan libisma no e gi Mi prisiri, Masra MASRA e taki. Fu dat'ede, un drai baka gi sondu, fu un kan libi.

₁Baka dati Masra komanderi mi fu singi a dede-oso singi disi gi den tiriman fu Israel:

Disi ben de a dede-oso singi èn na so sma e singi en te tide.

₁Ma san e tyari feti nanga trobi na un mindri dan? Disi e psa fu di tranga lostu e bron ini unu. ₂Un abi wan tranga angri fu kisi wan sani, ma un no e kisi en. Un e kiri trawan èn un e dyarusu. Ma un no e kisi san un wani. Un e meki trobi èn un e feti. Ma un no e kisi noti, fu di un no e aksi Gado. ₃A kan taki un e aksi Gado, ma un no e kisi noti, fu di un no e aksi na a yoisti fasi. Bika un e aksi fu un kan du san un lostu fu du. ₄Na drai un drai un baka gi Gado! Na sabi un no sabi taki efu un lobi sani fu grontapu, dan un na feyanti fu Gado? A sma di lobi den sani fu grontapu e sori nanga dati taki en na wan feyanti fu Gado. ₅A no fu soso a skrifi ini a Santa Buku taki: “A yeye di A poti ini unu, mus de fu En wawan.” ₆Ma Gado e sori unu En bun-ati moro tranga. Dat' meki a skrifi taki: “Gado e feti den sma di abi bigimemre, ma den sma di abi sakafasi A e sori En bun-ati.” ₇Dat' meki un mus saka unsrefi gi Gado, ma un mus kaka futu gi didibri, dan a sa gwe libi unu. ₈Un mus kon moro krosbei fu Gado, dan Gado sa kon moro krosbei fu unu. Un di e sondu, un krin unsrefi fu den sani san un e du! Un di de nanga tu ati, un poti un prakseri tapu den sani fu Gado wawan! ₉Un mus sari, un mus de na row èn un mus krei. Un kba lafu dan un bigin row, èn a prisiri fu unu mus tron wan dipi sari. ₁₀Un saka unsrefi na Gado fesi, dan Gado sa opo unu.

₁₁Brada nanga sisa, un no mus taki takru fu wan tra bribisma. A sma di e taki takru fu wan tra bribisma noso di e krutu en, e taki takru fu a wèt èn a e krutu a wèt. Èn efu un e krutu a wèt dan un no e du san a wèt e taki, ma dan unu na krutubakra di e krutu a wèt. ₁₂Wan nomo de di meki a wèt, èn na En wawan kan krutu wi. Dati na a Wan di abi makti fu ferlusu èn fu kiri. Ma suma na yu dan fu krutu wan trawan?

₁₃Un arki, un di e taki: “Tide noso tamara wi o go na sowan foto sowan foto. Dan wi o tan wan yari drape èn wi o bai èn seri sani fu meki moni.” ₁₄Ma un no sabi srefi fa un libi o de tamara! Bika un de leki smoko di de fu si fu wan syatu pisten, dan baka dati a no de fu si moro. ₁₅A moro bun efu un ben taki: “Efu Gado wani, wi sa tan na libi, dan wi sa du disi noso dati.” ₁₆Ma san un e du now na bigi un e meki gi unsrefi, èn dati no bun. ₁₇So, efu wan sma sabi san bun fu du, ma a no du en, dan na sondu a e sondu.