Dag 332 van 365- Ezechiël 33-34 en 1 Petrus 5

₁MASRA taki nanga mi, A taigi mi taki: ₂“Manpikin fu libisma, opo yu mofo taigi den kondreman fu yu taki: efu Mi meki bigi feti broko ini wan kondre èn den sma fu a kondre poti wan sma leki waktiman, ₃dan a waktiman o bro a tutu fu warskow a pipel fu en te a si taki feyanti e broko kon fu kiri den. ₄Efu wan sma yere a babari fu a tutu ma no teki en leki wan warskow, èn feyanti kiri en ini a feti, dan na ensrefi suku en dede. ₅A yere a babari fu a tutu, ma a no teki en leki wan warskow. Na ensrefi suku en dede. Efu a ben arki a warskow a ben o tan na libi. ₆Ma te a waktiman si a feyanti e kon ma a no e bro a tutu fu warskow a pipel, dan a feyanti doro èn kiri wan sma, dan a sma o dede fu en eigi kruktudu ede, ma Mi o kari a waktiman kon na frantwortu fu a dede fu a sma.

₇Now yu, manpikin fu libisma. Mi poti yu leki waktiman gi a pipel fu Israel. Te yu yere Mi taki wan sani, yu sa warskow den ini Mi nen. ₈Te Mi taki dati a no abi misi dati so wan ogri-ati sma o dede, ma yu no e taki fu warskow a ogri-ati sma fu a fasi fa a e tyari ensrefi, dan so wan ogri-ati sma o dede fu en eigi kruktudu ede, ma Mi o kari yu kon na frantwortu fu a dede fu en. ₉Ma efu yu warskow so wan ogri-ati sma fu a tapu nanga a fasi fa a e tyari ensrefi, ma a no e tapu, dan a o dede fu a eigi kruktudu fu en ede, ma yu ferlusu a libi fu yu.

₁₀Dat' meki, manpikin fu libisma, taigi a pipel fu Israel taki: Un e taki: ‘Den kruktudu nanga den sondu fu wi di de leki wan bun hebi lai na un tapu e meki un swaki dei fu dei. Un no man libi so go moro fara.’ ₁₁Dan yu mus taigi den taki: ‘Mi e sweri na Mi eigi libi, Masra MASRA e taki, Mi no abi a prisiri te wan ogri-ati sma e dede. Ma san e gi Mi prisiri na te wan ogri-ati sma tapu nanga a fasi fa a e tyari ensrefi èn tan na libi. Tapu, tapu nanga a ogri fasi fu yu e tyari yusrefi. Fu sanede un wan dede, pipel fu Israel?’

₁₂Manpikin fu libisma, taigi den kondreman fu yu taki: ‘A libi fu wan sma di bun ini Gado ai no o yepi en efu a bigin du ogri. Èn ogri-ati sani di wan ogri-ati sma e du no o meki a lasi en libi efu a tapu nanga en. Wan sma di bun ini Gado ai no o man tan na libi efu a bigin sondu, awinsi o bun a ben e libi. ₁₃Te Mi e taigi a sma di bun ini Mi ai dati a no abi misi dati a o dede, ma a e fertrow na tapu a leti fasi fa a e libi èn a e tan du ogri, dan Mi no o prakseri no wan fu den bun sani di a du, ma a o dede fu den ogri di a du. ₁₄Te Mi e taigi a ogri-ati sma dati a no abi misi dati a o dede, ma a e tapu nanga a sondu libi èn a bigin du bun èn libi tapu wan leti fasi, ₁₅te a gi baka san a ben teki leki panti, pai a sma di a fufuru, èn libi soleki fa den wèt e taki di e gi libi, wan sani di e meki a tapu fu du ogri, dan a no abi misi dati a o tan na libi, a no o dede. ₁₆A no o pai moro fu no wan fu den sondu di a du. A bigin du san bun èn libi na tapu wan leti fasi. A no abi misi dati a o tan na libi.’ ₁₇A sani disi meki den kondreman fu yu e taki: ‘A fasi dati fa MASRA e du sani no bun,’ ma na a fasi fa den e du sani no bun. ₁₈Te wan sma di bun ini Mi ai tapu fu libi na tapu wan leti fasi èn bigin du ogri, dan na a ogri di a e du o tron en dede. ₁₉Ma te wan ogri-ati sma tapu nanga a ogri-ati libi di a e libi èn a bigin du san bun èn libi na tapu wan leti fasi, dan dati o meki dati a tan na libi. ₂₀Un taki fu unu nomo: ‘A fasi fa MASRA e du sani no bun,’ ma Mi o leisi strafu gi unu pipel fu Israel, iniwan na a fasi fa a tyari ensrefi.”

₂₁Ini a di fu twarfu yari di un ben de leki strafuman ini Babilon, tapu a di fu feifi dei fu a di fu tin mun, wan man di ben man lowe kmopo ini Yerusalem kon drape nanga wan boskopu taki: “A foto broko!” ₂₂A neti na fesi a krakti fu MASRA ben de na mi tapu. Di a man doro a mamanten fu en na mi, MASRA opo mi mofo. So mi ben man taki baka, mi no ben babaw moro.

₂₃MASRA taki nanga mi, A taigi mi taki: ₂₄“Manpikin fu libisma, den sma di e libi mindri den bigi ipi broko ston ini Israel e taki: ‘Abraham ben de en wawan, toku a kisi a heri kondre. Unu de nanga furu, dat' meki na unu kisi a kondre gi unsrefi.’ ₂₅Fu di den e taki so, taigi den taki: ‘Na disi Masra MASRA e taki: Un e nyan meti di abi brudu ete, un e dini kruktu gado, un e kiri sma, dan fa un wani taki a kondre mus de fu unu. ₂₆Un e bow na tapu den deigri fu unu, un e du groskin sani, iniwan fu unu e go na bedi nanga tranga nanga a uma fu wan trawan. Dan fa un wani taki a kondre mus de fu unu.’ ₂₇Taigi den taki: ‘Na disi Masra MASRA e taki: Mi e sweri na Mi eigi libi taki den wan di e libi mindri den bigi ipi broko ston, na deigri o kiri den. Den wan di e libi ini den wei, na krasi meti o nyan den, èn den wan di e libi ini den tranga kibripresi nanga ini den olo na den bergi, na takrusiki di o panya drape o kiri den. ₂₈Mi o broko a kondre, Mi o pori en. Mi o broko a makti fu en di e meki a e opo ensrefi so. Den bergi fu Israel dati o gersi broko pranasi, no wan sma o hari psa na den moro. ₂₉Te Mi meki a kondre tron wan presi di broko, di pori, fu ala den groskin sani di a pipel du, den sa ferstan dati Mi de MASRA.’

₃₀Masra taigi mi taki: Manpikin fu libisma, den kondreman fu yu e taki nanga makandra fu yu, na den skotu fu a foto èn na den doro fu den oso fu den. A wan e taigi a trawan taki: ‘Kon, meki un go arki san MASRA abi fu taigi unu.’ ₃₁Dan den kon na yu nanga bun furu sma, den e go sidon èn den e arki san yu e taki. Ma den no e du den sani di yu e taigi den fu du. Wortu fu lobi e kmopo ini den mofo, ma den e prakseri soso fa den kan meki moni tapu wan fasi di no fiti. ₃₂Gi den yu na noti moro leki wan singiman di e singi lobisingi, wan di e singi moi èn di e prei a instrumenti bun. Den e yere san yu e taki, ma den no e du san yu e taki. ₃₃Ma te den sani di yu taki kon tru, èn den o kon tru, dan den o ferstan taki wan profeiti ben de na den mindri.”

₁MASRA taki nanga mi, A taigi mi taki: ₂“Manpikin fu libisma, taigi den skapuman fu Israel san Mi e gi yu fu taki. Opo yu mofo, èn taigi den san Mi e gi yu fu taki. Taigi den taki: ‘Na disi Masra MASRA e taki: A kba gi den skapuman fu Israel, den di e wei densrefi. Skapuman na skapu den mus wei. ₃Un e nyan a fatu fu den, un e weri den deki wiwiri fu den leki krosi, un srakti den moro fatuwan fu nyan, ma fu tyari den go wei un no de. ₄Den swakiwan un no e gi krakti, den sikiwan un no e dresi, un no e tai den presi pe den e kisi mankeri, den wan di lasi pasi un no e go teki tyari kon baka, den wan di lasi un no e go suku, ma un e tiri den nanga tranga èn na tapu wan ogri-ati fasi. ₅Den e panya go na ala sei, bika den no abi skapuman. Den e tron nyanyan gi ala den krasimeti noso den e lon panya. ₆Den skapu fu Mi e waka lontu nomo tapu den bergi nanga loktusei fu ala lagi bergi. Den skapu fu Mi panya abra heri grontapu, èn yu no abi no wan sma di e aksi fu den noso suku den.

₇Dat' meki, un skapuman, un arki a boskopu fu MASRA. ₈Mi e sweri na Mi eigi libi, Masra MASRA e taki, den skapu fu Mi no abi skapuman, dat' meki den tron sani tapu san krasimeti e onti, den tron nyanyan gi den èn unu, skapuman, un no e wei den srefsrefi. Na unsrefi un e wei. ₉Dat' meki, un skapuman, un arki a boskopu fu MASRA. ₁₀Na disi Masra MASRA e taki: Mi o strafu den skapuman dati! Den o abi fu gi Mi den skapu fu Mi. Mi e tyari wan kba kon tu na a fasi fa den e taki dati den e wei Mi skapu. Den skapuman no o wei densrefi moro. Mi o puru den skapu fu Mi na ini den mofo, fu den no de nyanyan gi den moro. ₁₁Na disi Masra MASRA e taki: Misrefi o luku fu den skapu fu Mi èn Misrefi o sorgu gi den. ₁₂Leki fa wan skapuman e go luku fu den skapu fu en te den lasi pasi, na so Mi o go suku den skapu fu Mi èn ferlusu den fu ala den presi pe den ben panya go tapu wan dei fu dungru wolku di e gi frede. ₁₃Mi o meki den hari kmopo na mindri fu den folku, puru den na ini den kondre tyari den kon na wan, èn tyari den go na den eigi kondre. Mi o tyari den go wei tapu den bergi fu Israel, na a syoro fu kriki, nanga ini ala den kontren fu a kondre pe sma e libi. ₁₄Mi o wei den na tapu bun weigron, owktu na tapu weigron hei na ini den bergi fu Israel. Drape, na tapu den bergi fu Israel, den o rostu tapu wan bun weigron, èn nyan moi fatu grasi. ₁₅Na Misrefi o wei den skapu fu Mi èn meki den rostu, Masra MASRA e taki. ₁₆Den wan di lasi Mi o suku, èn den wan di ben lasi pasi Mi o tyari kon baka. Mi o tai den soro fu den wan di kisi mankeri, dresi den wan di siki, ma den fatu wan, den tranga wan Mi o kiri puru na pasi. Mi o wei den leki fa a fiti.

₁₇Èn unu, skapu fu Mi, na disi Masra MASRA e taki: Un yere, Mi o koti krutu mindri a wan skapu nanga a trawan. Den man skapu nanga den man krabita Mi e taigi taki: ₁₈Un e nyan ini den moro bun wei di de. Dan fu sanede un mus traputrapu a grasi di libi? Un e dringi a moro krin watra di de. Dan fu sanede un mus trubu a watra nanga un futu te un kba dringi? ₁₉Sobun den tra skapu fu Mi mus nyan a grasi di un traputrapu èn den mus dringi a watra di un trubu. ₂₀Dat' meki, na disi Masra MASRA e taigi den: Un yere, Misrefi o koti krutu mindri den fatu skapu nanga den mangri wan. ₂₁Fu di un e pusu den swakiwan gwe nanga un sei èn nanga un skowru, fu di un buku den nanga un tutu te leki un puru den na un mindri, ₂₂meki Mi o ferlusu den skapu fu Mi. Mi no o meki un rigeri so nanga den moro langa. Mi o koti krutu mindri a wan skapu nanga a trawan.

₂₃Mi o poti wán skapuman fu tiri den, fu tyari den go na wei: Mi knekti David. En sa wei den, en sa de a skapuman fu den. ₂₄Mi, MASRA, sa de a Gado fu den, èn Mi knekti David sa de a tiriman na den mindri. Na Mi, MASRA, taki dati. ₂₅Mi o meki wan ferbontu nanga den di sa de wan dyaranti gi den dati den o libi ini freide. Mi o meki dati krasimeti no sa de moro ini a kondre. Den leki Mi skapu o man libi tiri fu den ini den wei èn sribi tiri fu den ini den busi sondro fu ogri miti den. ₂₆Mi o blesi den, sosrefi a gron di de lontu a lagi bergi fu Mi. Mi o meki a alen fadon na tapu den ten di a mus fadon. Den alen dati de wan blesi. ₂₇Den bon sa gi froktu èn a gron sa gi nyanyan. Den sa libi ini a kondre sondro wan sani du den. Te Mi puru a hebi lai na den tapu èn ferlusu den fu a makti fu den di ben e pina den, den o sabi taki mi de MASRA. ₂₈Dan tra folku no o kon fufuru den moro, èn krasimeti no o nyan den moro. Ma den o libi sondro fu ogri miti den, sondro fu sma skreki den. ₂₉Mi o seti pranigron poti gi den fu san sma o taki na alasei. No wan sma moro o dede fu angri ini a kondre èn tra folku no o man broko den saka moro langa. ₃₀Dan den o sabi taki Mi, MASRA, na a Gado fu den, èn dati den leki pipel fu Israel na a pipel fu Mi, Masra MASRA e taki. ₃₁Unu na den skapu fu Mi, den skapu di Mi e wei. Un na libisma èn Mi na a Gado fu unu, Masra MASRA e taki.’ ”

₁Fesiman fu gemeente, mi na wan fesiman tu. Mi si fa Kristus teki pina èn mi o teki prati ini a glori di de fu kon. Mi e begi unu: ₂Un sorgu bun gi den bribisma drape, den skapu fu Gado. Sma no mus dwengi unu fu du en, ma un mus du en nanga wan fri wani, soleki fa Gado wani. Un no mus du en tu fu meki moni, ma fu di un wani yepi den. ₃Un no mus de leki basi na tapu den sma di un mus luku, ma un mus de wan eksempre gi den skapu fu Gado. ₄Dan te a Moro Hei Skapuman kon, A sa gi un grani di noiti no e kba. ₅Yonguwan, unu fu un sei mus saka unsrefi gi den owruwan. Un alamala mus abi sakafasi gi makandra. Bika Gado e feti den sma di abi bigimemre, ma den sma di abi sakafasi A e sori En bun-ati. ₆Dat' meki un mus saka unsrefi ondro a tranga anu fu Gado, dan En o opo unu te a ten fu En doro. ₇Poti ala sani nanga san un e broko un ede, ini Gado anu, bika A e sorgu gi unu.

₈Un mus de nanga krin ferstan, èn un mus de na ai. Bika didibri, a feyanti fu unu, e waka lontu leki wan krasi tigri fu si suma a kan feni swari. ₉Un mus kaka futu gi en, un mus tnapu tranga na ini a bribi. Bika un sabi taki den brada nanga sisa na ini heri grontapu, e nyan den srefi pina leki unu. ₁₀Ma Gado, di e sori En bun-ati na ala fasi, kari unu fu teki prati ini En glori di e tan fu têgo, fu di un de wan nanga Kristus. Fu wan syatu pisten un o abi fu nyan pina, ma dan A o meki un kon de san un mus de. A o opo un tnapu, un o kon moro tranga, èn A o poti un tnapu tapu wan bun fundamenti. ₁₁Na En mus kisi ala krakti fu têgo èn ala ten! Amen.

₁₂Silfanus yepi mi skrifi unu a syatu brifi disi. A de wan brada di mi sabi taki un kan fertrow. Nanga a brifi disi mi wani gi un dek'ati, èn mi wani sori unu tak' san mi skrifi e taki fu a tru bun-ati fu Gado. Un mus tan hori tranga na dati. ₁₃Den sma fu Gado na Babilon seni taki un odi. Gado teki den gi Ensrefi neleki unu. Markus, di mi e si leki mi eigi pikin, seni taki un odi tu. ₁₄Un mus taki makandra odi nanga wan santa bosi. Meki a freide fu Gado de nanga unu di de wan nanga Kristus.