Dag 334 van 365- Ezechiël 37-39 en 2 Petrus 2

₁A krakti fu MASRA kon na mi tapu dan a Yeye fu En tyari mi go poti ini wan dal di ben furu nanga bonyo. ₂A meki mi waka alasei fu a dal, èn so mi ben kon si dati bun furu bonyo ben didon alasei ini a dal, bonyo di ben drei srefsrefi. ₃Dan Masra aksi mi taki: “Manpikin fu libisma, den bonyo disi sa man kisi libi baka?” Mi piki taki: “Masra MASRA, dati na Yu wawan sabi.” ₄Ne A taigi mi taki: “Taigi den bonyo disi san Mi e gi yu fu taki. Taigi den taki: ‘Drei bonyo, un arki a boskopu fu MASRA. ₅Na disi Masra MASRA e taigi unu: Un yere, Mi o poti a libibro ini unu èn un o libi baka. ₆Mi o poti titei nanga meti na un tapu, Mi o tapu un nanga buba èn poti a libibro ini unu fu un kon na libi baka. Dan un o sabi taki Mi de MASRA.’ ”

₇Mi now taki san Masra gi mi fu taki, leki fa A ben komanderi mi. Leki fa mi bigin du dati so mi yere wan safri babari. Na den bonyo ben e beweigi, den ben e kon na wan, iniwan na tapu a yoisti presi. ₈Mi luku, èn mi si fa titei nanga meti ben kon na den tapu, dan buba tapu den. Ma a libibro na ben de na ini den ete. ₉Dan Masra taigi mi taki: “Manpikin fu libisma, taigi a libibro san Mi e gi yu fu taki, taigi en san Mi e gi yu fu taki! Taki: Na disi Masra MASRA e taki: Libibro, kmopo kon fu den fo sei fu pe a winti e wai, dan yu e blo na tapu den dedewan fu den kon na libi baka.” ₁₀Ne mi taki san A gi mi fu taki, neleki fa A komanderi mi. Dan a libibro go ini den èn den kon baka na libi. Dan den opo tnapu na tapu den futu, a ben de wan bun bigi legre.

₁₁Masra taigi mi moro fara taki: “Manpikin fu libisma, den bonyo disi na a pipel fu Israel. Den ben e prakseri taki: ‘Den bonyo fu un drei gwe, howpu gwe libi unu, a kba nanga unu.’ ₁₂Ma taigi den san Mi e gi yu fu taki. Taki: Na disi Masra MASRA e taki: Pipel fu Mi, un yere, Mi e opo den grebi fu unu, Mi e meki un opo kmopo na den ini, dan Mi e tyari un go na Israel. ₁₃Pipel fu Mi, un o sabi taki Mi de MASRA, te Mi o opo den grebi fu unu èn meki un opo kmopo na den ini. ₁₄Mi o meki a Yeye fu Mi kon ini unu, fu un kan libi baka, èn Mi o meki un libi ini un eigi kondre. Dan un o sabi taki Mi, MASRA, taki en èn dati Mi du en tu, Masra MASRA e taki.”

₁₅MASRA taki nanga mi, A taigi mi taki: ₁₆“Manpikin fu libisma, teki wan pisi udu dan yu skrifi disi na en tapu: ‘Gi a lo fu Yuda nanga gi den Israelitisma di moksi nanga a lo disi.’ Teki ete wan pisi, dan yu e skrifi tapu a dati: ‘Gi a lo fu Yosef, dati na Efraim, nanga a heri pipel fu Israel di moksi nanga a lo disi.’ ₁₇Tyari den tu pisi udu dati kon na wan fu a kan de leki wán pisi ini yu anu. ₁₈Te den kondreman fu yu aksi yu san a sani di yu du wan taki, ₁₉taigi den taki: ‘Na disi Masra MASRA e taki: Mi e teki a pisi udu fu Yosef, a di fu Efraim sobun, nanga di fu den lo fu Israel di moksi nanga en, dan Mi e fasi den na a di fu Yuda èn Mi e meki a tron wán pisi udu, fu den kan de wán na ini Mi anu.’ ₂₀Yu mus hori den pisi udu ini yu anu fu den kan si den, ₂₁dan yu e taigi den taki: ‘Na disi Masra MASRA e taki: Un yere, Mi e puru den Israelitisma na den folku pe den ben go. Fu ala sei Mi e tyari den kon na wan fu tyari den kon na den kondre. ₂₂Mi o meki den tron wán folku ini a kondre nanga tapu den bergi fu Israel èn na wán kownu o tiri den alamala. Den no o de tu folku moro di prati na ini den tu pisi fu a kondre. ₂₃Den no o doti densrefi moro tu na den kruktu gado fu den, nanga den groskin sani di den e du, èn nanga ala den ogri fu den. Ma Mi o ferlusu den fu ala den presi pe den ben tan èn pe den ben e sondu. Den o de a pipel fu Mi èn Mi o de a Gado fu den. ₂₄Na Mi knekti David sa de a kownu fu den. Na wán skapuman den alamala o abi. Den o hori densrefi na den sani fu mi na san den mus tan hori densrefi èn den o du den sani fu Mi fin'fini di den mus tan du. ₂₅Den o libi ini a kondre di Mi ben gi Mi knekti Yakob, a kondre pe den afo fu den ben libi tu. Iya, na ini a kondre dati den o libi fu têgo, den, den pikin, nanga den granpikin fu den. Na David, a knekti fu Mi, sa de a tiriman fu den. ₂₆Mi o meki wan ferbontu nanga den di sa de wan dyaranti gi den dati den o libi ini freide, èn a o de wan têgo ferbontu. Mi o gi den wan presi fu den tan èn Mi o meki den kon furu srefsrefi. A santa presi fu Mi sa de fu têgo na den mindri. ₂₇Mi sa libi na den. Mi sa de a Gado fu den èn den sa de a pipel fu Mi. ₂₈Te a santa presi fu Mi sa de fu têgo na den mindri den tra folku o sabi taki na Mi, MASRA, santa Israel.’ ”

₁MASRA taki nanga mi, A taigi mi taki: ₂“Manpikin fu libisma, luku go na Gog, a bigi tiriman fu Mesek nanga Tubal, ini a kondre fu Magog, dan yu e taki san Mi e gi yu fu taki. ₃Taki: ‘Na disi Masra MASRA e taki: Gog, bigi tiriman fu Mesak nanga Tubal, Mi o strafu yu! ₄Mi e kon teki yu. Dan Mi o naki aka psa na yu kakumbe èn meki yu hari gwe nanga a heri legre fu yu: nanga asi èn nanga den man di e tyari den asi, alamala nanga ala den fetisani. Wan bigi legre nanga bigi èn nanga pikin schild, soso srudati di sabi feti bun nanga deigri. ₅Dan yu abi owktu den srudati fu Persia, fu Nubia, nanga fu Libia, alamala nanga schild èn nanga den fet'ati. ₆Gomer nanga ala den grupu fetiman fu en taki pe yu poti mi. Bet-Togarma nanga ala den grupu fetiman fu en fu fara na noordsei: a no pikinso folku de nanga yu. ₇So, meki yusrefi klari gi a feti, yu nanga a heri bun bigi grupu di de nanga yu èn yu mus de a tiriman fu den. ₈Baka wan heri pisten yu o kisi wan komanderi fu hari go feti nanga wan kondre di no kmopo langa ini wan bigi feti, wan folku di kmopo ini furu folku èn kon na wan tapu den bergi fu Israel. Den e libi tiri fu den drape den wawan. ₉Dan un o hari go na en tapu leki wan tranga winti. Un o de leki wan wolku di e tapu a kondre, yu nanga ala den grupu fetiman fu yu nanga den furu folku di de nanga yu.

₁₀Na disi Masra MASRA e taki: Te a ten dati doro yu o prakseri fu du wan ogri. ₁₁Yu o taki: Mi o hari go feti nanga a kondre dati, a kondre di abi foto sondro skotu srefi. Mi o hari go feti nanga den sma dati di e libi tiri fu den, di e libi ini freide ini den foto di no abi skotu, bigi doro nanga greni. ₁₂Yu o go drape fu fufuru ala san yu man feni tyari gwe, fu feti nanga a broko pranasi pe sma e libi baka. A folku dati kmopo ini den kondre fu den tra folku èn kon na wan, wan folku di tyari meti nanga tratra sani kon na wan èn di e libi leti na mindrisei fu grontapu. ₁₃Den sma fu Seba, fu Dedan, den baiman nanga den seriman nanga den bigiman fu kondre fu Tarsis o taigi yu taki: Na kon yu kon fufuru ala sani tyari gwe? Na tyari yu tyari ala den grupu fetiman kon na wan fu kon teki den sma sani? Fu teki solfru nanga gowtu tyari gwe, fu feni furu sani teki tyari gwe?’

₁₄Dat' meki, manpikin fu libisma, taki san Mi e gi yu fu taki. Taigi Gog taki: ‘Na disi Masra MASRA e taki: Yu o sabi bun te Israel, a pipel fu Mi, e libi tiri fu den. ₁₅Dan yu o kmopo kon fu a tanpresi fu yu di fara na noordsei, yu nanga den furu folku di de nanga yu, soso fetiman tapu asi, bun furu, wan bigi legre. ₁₆Dan leki wan wolku di e tapu a kondre yu o hari go fu feti nanga Israel, a pipel fu Mi. Disi o psa wan fu den ten disi. Mi o meki yu hari kon fu kon feti nanga a kondre fu Mi. Dan te den tra folku o si san Mi o du nanga yu, Gog, den o leri sabi Mi.

₁₇Na disi Masra MASRA e taki: Na yu na a wan abra san Mi ben meki den knekti fu Mi, den profeiti fu Israel, taki langa di psa dati Mi ben o meki yu hari go fu feti nanga a pipel fu Mi.

₁₈Ma te a ten doro di Gog o kon ini Israel, Masra MASRA e taki, dan a hebi atibron fu Mi o kmopo ini noso leki smoko, ₁₉dan Mi o taki disi fu di Mi dyarusu èn ini a faya fu a hebi atibron fu Mi: Tapu a dei dati a gron fu Israel o seki wan hebi seki. ₂₀Iya, den fisi fu den se, den fowru di e frei na loktu, den krasimeti, ala san e kroipi na gron, nanga ala sma na grontapu o beifi gi Mi. Bergi o fadon, bergiston o broko fadon, èn ala den skotu fu foto o fadon broko. ₂₁Dan Mi o meki ala sortu bigi ogri miti Gog na tapu ala den bergi fu Mi, Masra MASRA e taki. Den man fu en o kiri makandra nanga den deigri. ₂₂Mi o strafu Gog nanga takrusiki nanga brudu di o lon drape. Mi o meki hebi alen nanga pis'pisi ijs, nanga faya èn nanga kroiti fadon na tapu en, tapu den grupu fetiman, nanga tapu ala den folku di de nanga en. ₂₃Mi o sori Misrefi na tapu wan bigi èn santa fasi. Te Mi o sori Misrefi furu folku o sabi taki Mi de MASRA.’

₁Manpikin fu libisma, taigi Gog san Mi e gi yu fu taki. Taigi en taki: ‘Na disi Masra MASRA e taki: Yere, Gog, bigi tiriman fu Mesek nanga Tubal, Mi o strafu yu! ₂Mi o kon teki yu, Mi o srepi yu tyari gwe. Mi o meki yu hari kmopo fu fara na noordsei dan Mi o tyari yu go na tapu den bergi fu Israel. ₃Dan Mi o naki a bo puru fu a kruktu anu fu yu nanga den peiri fu a leti anu fu yu. ₄Tapu den bergi fu Israel yu o dede, yu nanga ala den grupu fetiman fu yu èn nanga den folku di de nanga yu. Mi o meki un tron nyanyan gi ala sortu bigi fowru nanga gi krasimeti. ₅Owktu ini a wei un o dede. Na Mi taki en, Masra MASRA e taki. ₆Mi o sutu faya gi Magog, nanga mindri den sma di e libi tiri fu den ini den kondre na a syoro fu a se. Dan den o sabi taki Mi de MASRA. ₇Mi o meki a pipel fu Israel kon sabi a santa nen fu Mi. Mi no o meki den doti a santa nen fu Mi moro tu. Dan den folku o sabi taki Mi, MASRA, de a santawan fu Israel.

₈A e kon, a o psa, Masra MASRA e taki: a dei fu san Mi taki. ₉Baka a dei dati den sma fu Israel o kmopo ini den foto fu den kon teki den fetisani fu den fu meki udu faya. Seibi yari langa den o man meki faya nanga den bigi nanga den pikin schild, den bo nanga den peiri, den bigi tiki nanga den lansri. ₁₀Den no o abi fu go teki udu ini a wei noso fu koti na busi, bika nanga den fetisani dati den o meki den udu faya. So den o fufuru den sani fu den feyanti di ben kon fu fufuru den, den o teki ala den sani fu den di den libi na baka, Masra MASRA e taki.

₁₁A ten dati Mi o sori den Israelitisma pe fu Israel den mus beri Gog: den mus beri en ini a Abiramdal, na oostsei fu a Dede se. A grebi dati, pe Gog nanga a bun bigi legre di ben de nanga en o beri, o tapu a pasi fu sma no kan hari psa drape moro. Sma kari drape now: A dal fu a bun bigi legre fu Gog. ₁₂A pipel fu Israel o beri den fu krin a kondre, èn a o teki seibi mun langa fu du dati. ₁₃Iya, ala sma fu a kondre o teki prati fu beri den dedeskin, èn dati o de wan grani gi den tapu a dei di Mi e sori o bigi Mi de, Masra MASRA e taki. ₁₄Dan a pipel sa poti wantu man fu hari psa dorodoro ini a kondre fu beri den dedeskin di didon ete na gron, fu krin a kondre a fasi dati. Na a kba fu den seibi mun den sa bigin teki waka. ₁₅Te den e hari psa ini a kondre èn den si libisma bonyo, den sa poti wan marki na den, fu den wan di e beri den dedeskin kan si den èn beri den tu ini a Dal fu a bigi legre fu Gog. ₁₆Na a fasi dati den sa krin a kondre. Wan foto o kon leti drape ini a birti tu di o nen: Bun bigi legre.’

₁₇Manpikin fu libisma, na disi Masra MASRA e taki: Taigi ala den difrenti sortu bigi fowru di e frei na loktu nanga ala den krasimeti taki: ‘Un kon na wan, dan un kon, un hari kmopo fu alasei kon. Un kon nyan a ofrandi di Mi srakti gi unu, na wan bun bigi ofrandifesa tapu den bergi fu Israel. Un kon nyan meti èn un kon dringi brudu. ₁₈Na a meti fu dyadya fetiman un o nyan èn na a brudu fu tiriman fu grontapu un o dringi. Mi o srakti den leki fa sma e srakti man skapu, yongu skapu, man krabita nanga bulu. Den o de leki den meti fu Basan di kweki kon fatu. ₁₉Un o nyan a fatu fu den te un no man moro èn un o dringi a brudu fu den te un drungu. Na wan ofrandifesa pe Mi srakti sani gi unu. ₂₀Iya, un o nyan te un no man moro na a tafra fu Mi. Un o nyan asi nanga den man di ben tyari den asi, un nyan dyadya fetiman nanga ala sortu tra fetiman, Masra MASRA e taki. ₂₁Na a fasi dati Mi o sori den folku a glori fu Mi. Ala den folku o si fa Mi strafu den èn fa Mi sori a krakti fu Mi.

₂₂Kmopo fu a dei dati a pipel fu Israel sa sabi taki Mi, MASRA, de a Gado fu den. ₂₃Èn den folku o sabi taki a pipel fu Israel de leki strafuman ini wan dorosei kondre fu den kruktudu fu den ede. Fu di den drai baka gi Mi fu go dini kruktu gado meki Mi ben drai Mi fesi gi den èn gi den abra ini a makti fu den feyanti di kiri den nanga den deigri. ₂₄Mi du so nanga den, èn Mi drai Mi fesi gi den fu a doti di den doti densrefi nanga fu den ogri di den du. ₂₅Dat' meki, na disi Masra MASRA e taki: Na now Mi o tyari wan kenki kon gi den bakapikin fu Yakob, Mi o sorgu baka gi a heri pipel fu Israel, bika a santa nen fu Mi mus tan hei. ₂₆Te den o libi tiri fu den baka ini a kondre, èn sma no e kon meki den skreki moro, den o fergiti a syen di den kisi nanga ala den leisi di den drai baka gi Mi fu go dini kruktu gado. ₂₇Mi o puru den mindri den dorosei folku, puru den ini den kondre fu den feyanti tyari kon na wan. Nanga dati bun furu folku o si dati Mi na a Santawan. ₂₈A folku fu Mi srefi o sabi taki Mi na MASRA, a Gado fu den. Den o sabi taki te Mi tyari den gwe leki strafuman go na mindri tra folku, nanga te Mi e tyari den kon na wan baka ini den eigi kondre, sondro fu Mi libi wan fu den srefi ini a kondre pe den ben de. ₂₉Èn te Mi o meki Mi Yeye kon bogobogo na den tapu Mi no o drai Mi fesi moro gi den, Masra MASRA e taki.’ ”

₁Ma kruktu profeiti ben de na mindri a pipel tu, leki fa kruktu leriman o kon na un mindri. Safrisafri den o panya falsi leri na un mindri di kan meki un go lasi. Den o taki srefi tak' den no sabi a Basi di pai fu den kon fri. Tapu sowan fasi her'esi den o go lasi. ₂Someni sma o go libi a yayolibi san den e libi. Den o meki sma taki ogri fu a tru leri. ₃Gridi o meki den e ferteri un soso lei, fu den kan puru moni na un skin. Ma someni langa a strafu fu den de klar'klari kba. A no langa moro fosi den go lasi.

₄Bika Gado no ben meki den engel di ben sondu, tan sondro strafu. Ma A trowe den ini wan dipi olo, pe A keti den poti ini dipi dungru, te leki a ten doro fu A strafu den. ₅Gado no meki den sma fu fosi tan sondro strafu tu. A meki a bigi frudu sungu ala den sma di no ben e dini En. Ma A kibri Noa, di ben e preiki gi den sma taki den mus libi bun ini Gado ai. Gado kibri en nanga seibi tra sma moro. ₆A strafu den foto Sodom nanga Gomora tu. Noti fu den no tan abra, A bron den te na gron. Na so A meki den tron wan eksempre gi den sma di no wani dini En. ₇Ma Gado kibri Lot, di ben e libi bun ini En ai. A man disi ben e sari fu a yayolibi fu den sma di no ben wani hori no wan enkri wèt. ₈Lot ben e libi na den mindri leki wan sma di bun ini Gado ai, èn ala dei a ben e hati en fu yere èn fu si a takru fasi fa den ben e libi. ₉Ma Masra sabi fa fu puru sma di e du En wani, na ini tesi. Èn A sabi fa fu hori den sma di no bun ini En ai te leki A strafu den tapu a krutudei. ₁₀A e strafu spesrutu den sma di e du den takru lostu fu a skin nomo, èn di no wani saka densrefi gi En.

Den kruktu leriman disi abi sowan don dek'ati èn den e si densrefi so hei, tak' den no e frede fu kosi den moro heiwan. ₁₁Den engel srefi, di tranga moro den èn di abi makti moro den, no e taki takru fu den heiwan fesi Masra. ₁₂Ma den sma disi de leki meti sondro ferstan, di meki soso fu sma fanga èn kiri den. Den e taki takru fu sani di den no sabi. Dat' meki den srefi o dede ini a ogri san den e du. ₁₃A srefi ogri san den ben du nanga trawan, o miti den baka. Den e si en leki wan prisiri sani fu e nyan èn dringi psa marki bigibigi dei. Fu di den lobi den bedrigi sani fu den, den de leki wan doti flaka nanga wan syen na un mindri te den e nyan makandra nanga unu. ₁₄Den e luku lontu nomo fu feni wan uma di wani huru nanga den. Den no e weri fu du sondu. Den e kori den swakiwan. Den sabi ala sani kba fu gridifasi. Wan fluku de na den tapu. ₁₅Den lasi pasi fu di den libi a bun pasi. Den e waka a srefi pasi now fu Bileam, a manpikin fu Beor, di ben lobi meki moni tapu wan kruktu fasi. ₁₆Ma Gado ben warskow en fu a kruktu libi fu en. A meki wan babaw buriki taki nanga en nanga wan libisma sten, fu tapu a profeiti fu a no du wan don sani.

₁₇Den sma disi na peti di no e gi watra moro. Den na wolku di a winti e wai gwe. A moro dipi dungru presi san de, de klar'klari e wakti den. ₁₈Den e taki bigitaki di no abi no wan warti. Nanga a takru lostu nanga yayolibi fu den, den e kori sma di no so langa ete ben hari densrefi puru na mindri fu den sma di e libi wan kruktu libi. ₁₉Den e pramisi den sma taki den o meki den kon fri, ma den srefi na srafu fu a pori libi di o meki den go lasi. Bika a de so taki yu na a srafu fu a sani di e basi yu. ₂₀Efu den sma kmoto ini a morsu libi fu grontapu fu di den kon sabi wi Masra èn Ferlusuman Yesus Kristus, ma dan den go libi a srefi libi baka tak' den no man tapu moro nanga en, dan a kon moro takru gi den leki na a bigin. ₂₁A ben o moro betre gi den efu den no ben kon sabi san den ben mus du fu kon bun ini Gado ai, dan fu sabi disi, ma dan den drai den baka gi a santa wèt san den kisi. ₂₂San miti den na leki fa a odo e taki: “Dagu drai go nyan san a ben puru kon na doro,” noso, “Agu wasi krin, dan a drai go lolo baka ini tokotoko.”