Dag 335 van 365- Ezechiël 40-41 en 2 Petrus 3

₁Tapu a di fu tutenti-na-feifi yari di un ben de leki strafuman ini Babilon, ini a di fu tin dei fu a fosi mun, a krakti fu MASRA kon na mi tapu. A ben de a di fu tin-na-fo yari tu di feyanti broko Yerusalem. ₂Dan ini sani di A e sori mi A tyari mi go na Israel pe a poti mi tapu wan bun hei bergi. Wan sani leki wan foto ben bow na zuidsei fu a bergi. ₃Di A tyari mi go drape, mi si wan man tnapu na a bigi doro fu a foto. A ben gersi dati a man ben de fu kopro èn a ben abi wan linnen titei nanga wan markitiki ini en anu. ₄A man taigi mi taki: “Manpikin fu libisma, luku ala sani bun di mi o sori yu èn arki, bika na fu dati yu de dyaso, fu mi sori yu sani. Yu mus taigi a pipel fu Israel ala san yu sa si.” ₅Mi si wan skotu drape di ben lontu a heri dyari pe a tempel ben tnapu. A marki tiki di a man ben abi ini en anu ben langa dri meter. Dan a man marki a skotu: a ben bradi leki a heri tiki èn a ben hei leki a heri tiki tu.

₆Baka dati a man go na a doro di ben de na oostsei. A kren den trapu dan a marki a stupu fu a doro: a ben bradi leki a heri tiki. Owktu a tra stupu ben bradi leki a heri tiki. ₇Ala den kamra fu den waktiman ben langa leki a heri tiki èn den ben bradi leki a heri tiki tu. Na tu nanga afu meter ben de mindri iniwan fu den kamra. A stupu fu a doro sei a gadri, a stupu na inisei fu a doro, ben bradi leki a heri tiki tu. ₈Baka dati a man marki a gadri fu a doro. ₉A sei dati ben langa fo meter. Den bradi postu di ben hori en ben deki wan meter. A gadri fu a doro ben de na a sei fu a tempel. ₁₀Na ala den tu sei fu a doro disi yu ben abi kamra gi den waktiman, dri na iniwan fu den sei. Den kamra ben bigi a srefi. Owktu den bradi postu di ben de na ala den tu sei ben bigi a srefi. ₁₁Baka dati a man marki o bradi a inisei fu a doro de: a ben bradi siksi nanga afu meter. A doro srefi ben bradi feifi meter. ₁₂Ala den kamra fu den waktiman na den tu sei fu a doro ben abi wan pikin skotu na den fesi di ben hei feifitenti centimeter. Den kamra srefi ben fo kanti èn den ben bigi dri meter. ₁₃A man marki a doro tu, fu a daki fu wan fu den kamra go na a daki fu a kamra di ben de na abrasei fu en: a ben bradi twarfu nanga afu meter. Den doro fu den kamra ben de abrasei fu den srefi. ₁₄A man marki tu o hei a bradi postu de: tin meter. Èn drape na den bradi postu a pren ben de di ben lontu a heri doro. ₁₅A presi pe yu e waka go na inisei, fu fes'sei fu a doro go te na fes'sei fu a gadri, ben langa tutenti-na-feifi meter. ₁₆Den kamra fu den waktiman, nanga den bradi postu na inisei fu a doro, ben abi fensre nanga lati na den fesi. Palmbon ben tyerfi poti tapu den bradi postu di ben e prati den kamra.

₁₇Baka dati a man tyari mi go na a pren di ben de na dorosei fu a dyari fu a tempel. Lontu a pren dati ben smenti, èn dritenti kamra ben de tapu pe ben smenti. ₁₈Den e kari pe smenti: a ondrosei pasi. A ben bradi a srefi leki seisei fu den doro. ₁₉Baka dati a man marki o bradi a pren de, kmopo fu a doroseipoort na oostsei go te na a inisei doro na noordsei: a ben de feifitenti meter.

₂₀Wan doro ben de noordsei fu a pren na dorosei fu a tempel dyari tu. A man marki a doro dati tu, fa a ben bradi nanga fa a ben langa. ₂₁A doro disi ben abi dri kamra gi waktiman owktu, na iniwan fu den sei fu en, neleki a fosi doro. A ben abi gadri tu nanga bradi postu di ben e prati den kamra. A doro ben langa tutenti-na-feifi meter, èn a ben bradi twarfu nanga afu meter. ₂₂Owktu den fensre, a gadri fu en nanga den palmbon ben bigi a srefi leki di fu a doro fu oostsei. Na seibi tree yu ben mus kren go na a doro disi, èn a gadri ben de na inisei fu en. ₂₃Wan doro ben de abrasei fu a doro disi tu, leki fa wan ben de na abrasei fu a doro na oostsei. A man marki fu a wan doro go na a trawan: feifitenti meter.

₂₄A man tyari mi go na zuidsei now. Owktu a sei dati ben abi wan doro. A man marki den bradi postu nanga a gadri fu a doro dati: den ben de a srefi leki di fu den tra doro. ₂₅A doro disi ben abi densrefi fensre na en lontu nanga ini a gadri, leki den tra doro. A ben langa tutenti-na-feifi meter èn a ben bradi twarfu nanga afu meter. ₂₆Seibi tree yu ben abi fu kren fu go na a doro disi. A gadri ben de na inisei fu en èn den bradi postu ben abi palmbon na ala den tu sei fu den. ₂₇A inisei pren ben abi wan doro tu na zuidsei. A man marki fu a wan doro go na a trawan drape na zuidsei: feifitenti meter.

₂₈Baka dati a man tyari mi doro a doro dati na zuidsei go na a pren inisei fu a dyari fu a tempel. A marki a doro dati èn a ben bigi leki den tra doro. ₂₉Owktu den kamra fu den waktiman, den bradi postu nanga a gadri ben bigi a srefi. A ben abi fensre na en lontu nanga ini a gadri. A doro srefi ben langa tutenti-na-feifi meter èn a ben bradi twarfu nanga afu meter. ₃₀Yu ben abi gadri na ala sei fu a doro. Den ben langa twarfu nanga afu meter èn den ben bradi tu nanga afu meter. ₃₁A gadri ben de na a sei fu a pren di ben na dorosei fu a dyari fu a tempel. Palmbon ben tyerfi na tapu den bradi postu èn yu ben abi fu kren aiti tree fu go na a doro dati.

₃₂Baka dati a man tyari mi go na oostsei fu a pren inisei fu a tempel dyari. A marki a doro èn a ben bigi a srefi leki den trawan. ₃₃Den kamra fu den waktiman, den bradi postu nanga a gadri ben bigi a srefi tu. A ben abi fensre na en lontu nanga ini a gadri. A doro ben langa tutenti-na-feifi meter èn a ben bradi twarfu nanga afu meter. ₃₄A gadri fu en ben de na a sei fu a pren di ben de dorosei fu a dyari fu a tempel. Palmbon ben tyerfi na ala den tu sei fu den bradi postu fu en èn na aiti tree yu ben abi fu kren fu doro na en.

₃₅Baka dati a man tyari mi go na a doro di ben de na noordsei. A marki en èn a ben bigi leki den tra doro. ₃₆A ben abi kamra gi waktiman, bradi postu, wan gadri nanga fensre na en lontu. A doro ben langa tutenti-na-feifi meter èn a ben bradi twarfu nanga afu meter. ₃₇A ben abi bradi postu tu, na a sei fu a pren dorosei fu a dyari fu a tempel, èn palmbon ben tyerfi poti na ala den tu sei fu den bradi postu. Yu ben mus kren aiti tree fu doro na a doro disi.

₃₈Yu ben abi wan kamra drape, te yu ben waka go ini a doro, pe den ben e wasi den meti di ben o bron leki ofrandi. ₃₉Na ala den tu sei fu a gadri yu ben abi tu tafra pe den ben e srakti den meti di sma ben e tyari kon leki ofrandi: Den meti di ben mus bron leki ofrandi, den meti fu kisi pardon fu sondu, noso di den ben tyari kon leki paiman fu kan kisi pardon fu sondu. ₄₀Owktu na dorosei fu a gadri, na dorosei fu a doro na noordsei, tu tafra ben tnapu na ala tu sei fu a gadri. ₄₁So yu ben abi fo tafra na ala den tu sei fu a doro. Aiti tafra sobun tapu san meti ben e srakti. ₄₂Yu ben abi fo tafra ete gi den meti di ben mus bron leki ofrandi, èn den tafra dati ben meki fu ston di ben kapu puru na den bergi. Iniwan fu den tafra dati ben langa seibitenti-na-feifi centimeter, den ben bradi seibitenti-na-feifi centimeter, èn den ben hei feifitenti centimeter. Na tapu den tafra dati den wrokosani ben tan fu srakti den meti di ben o bron leki ofrandi nanga den meti di ben o srakti leki wan ofrandi. ₄₃Aka di ben bigi leki fa wan libisma anu bradi ben anga na alasei fu a oso fu Masra. Den tra tafra ben de gi den meti di den sma ben tyari kon leki ofrandi. ₄₄A man tyari mi go now na a pren di ben de na inisei fu a tempel dyari, pe mi si tu langa kamra. A wan di ben de sei a doro na noordsei ben e sori go na zuidsei, èn a wan di ben de sei a doro na zuidsei ben e sori go na noordsei.

₄₅Dan a man taigi mi taki: “A langa kamra di e sori go na zuidsei na fu den priester di e wroko ini a tempel. ₄₆A wan di e sori go na noordsei na fu den priester di e wroko na a altari. Dati na den bakapikin fu Sadok, èn na den wawan fu ala den Lefitisma kan go ini a santa presi fu dini MASRA.”

₄₇Baka dati a man marki a pren tapu a dyari fu a tempel. A ben fokanti, a ben langa feifitenti meter, èn a ben bradi feifitenti meter. A altari ben tnapu fesi a oso fu Masra. ₄₈A man tyari mi go now na a gadri fu a oso fu Masra, dan a marki den bradi postu na ala den tu sei fu en: iniwan fu den ben langa wan nanga afu meter. A doro ben bradi tu nanga afu meter na a wan sei, nanga tu nanga afu meter na a tra sei. ₄₉A gadri srefi ben langa tin meter èn a ben bradi siksi meter. Na kren yu ben mus kren tree fu doro na en. Yu ben abi moro smara postu na ala tu sei fu den bradi wan.

₁A man tyari mi go now na a bigi kamra fu a tempel. Dan a marki den bradi postu: di fu ala den tu sei ben bradi siksi fu den pisi fu a markitiki. Na so a tenti ben bradi tu. ₂A doromofo ben bradi tin fu den pisi fu a tiki, èn den skotu na ala den tu sei fu a doromofo ben de feifi fu den pisi fu a tiki. A man marki o langa a bigi kamra de tu: fotenti fu den pisi fu a tiki, èn a ben bradi tutenti fu den pisi fu a tiki. _3-4A man waka go now na a kamra di ben de baka a bigi kamra. Dan a taigi mi taki: “A kamra disi na a moro santa presi.” Dan a marki a bradi postu na a doromofo: a ben de tu fu den pisi fu a markitiki. A marki a doromofo tu: dati ben de siksi fu den pisi fu a markitiki. Den skotu na ala den tu sei fu a doromofo ben bradi seibi fu den pisi fu a markitiki. Baka dati a marki o langa a kamra dati de, a moro santa presi: tutenti fu den pisi fu a markitiki èn a ben bradi tutenti fu wan den pisi fu a markitiki, neleki a bigi kamra.

₅Baka dati a man marki a skotu fu a oso fu Masra: a ben deki dri meter. Pikin maksin di ben bradi tu meter ben meki lontu a heri oso fu Masra. ₆Na dritenti fu den pikin maksin disi ben de sei nanga sei, èn tu fu den rij dati ben de tapusei fu a fosiwan. Den pikin maksin dati no ben fasi na a skotu fu a oso fu Masra, ma na wan skotu di ben meki lontu a oso. ₇A rij fu den pikin maksin ben de lontu a heri oso. A di fu tu rij, a wan di ben de tapu a fosiwan, ben bradi moro a fosiwan, èn a rij di ben de tapu a di fu tu ben bradi moro a dati tu. O moro den maksin ben e hei, o moro den ben e bigi. Na tapu wan trapu di ben de ini a fosi rij yu ben kan kren go na a di fu tu rij èn na a di fu dri rij. ₈Lontu a oso fu Masra mi si wan sortu hei fundamenti fu dri meter, wan fu a heri markitiki, èn na tapu a fundamenti dati den pikin maksin ben meki. ₉A dorosei skotu fu den pikin maksin ben deki tu nanga afu meter. A opo presi mindri den pikin maksin fu a tempel ₁₀nanga den kamra fu den priester ben de tu nanga afu meter, lontu na a heri oso fu Masra. ₁₁Yu ben abi wan leigi presi mofo den doro fu den pikin maksin di ben bradi tu nanga afu meter. Den maksin ben abi tu doromofo: wan ben de na noordsei èn a trawan ben de na zuidsei.

₁₂Wan oso ben de tu na a pren, na westsei fu a oso fu Masra, di ben bradi dritenti-na-feifi meter. A heri skotu fu en ben deki tu nanga afu meter, èn a ben langa fotenti-na-feifi meter. ₁₃Baka dati a man marki a oso fu Masra: a ben langa feifitenti meter. Owktu a pren, den pikin maksin nanga den skotu fu den ben langa feifitenti meter. ₁₄Fes'sei fu a oso fu Masra, nanga a pren na oostsei fu en, ben langa feifitenti meter tu. ₁₅A man marki o langa a oso sei a pren de tu, makandra nanga den skotu na den tu sei fu en: a ben de feifitenti meter tu.

A gadri fu a tempel, a moro langa kamra, nanga a kamra na bakasei _16-17ben abi udu tapu den skotu fu den. Owktu den fensre nanga den lati, nanga den dri skotu abrasei fu a doromofo ben abi udu na den tapu. A heri skotu ben abi planga na en tapu: fu gron go te na den fensre, go te na loktu fu a doromofo, na inisei soleki dorosei.

₁₈Dan tapu den planga dati kerub nanga palmbon ben tyerfi poti. Wan palmbon mindri tu kerub. Iniwan fu den kerub ben abi tu fesi. ₁₉A fesi fu wan libisma di ben luku na wan fu den palmbon, nanga a fesi fu wan lew di ben luku go na a palmbon na a tra sei. Na so den palmbon nanga den kerub ben tyerfi poti na a heri oso fu Masra. ₂₀Fu gron go te na loktu fu a doromofo den kerub nanga den palmbon ben tyerfi poti. Na a heri skotu fu a tempel. ₂₁Den doro postu fu a tempel ben abi fo uku. Fes'sei fu a santa presi ben de a srefi. ₂₂A altari ben de fu udu. A ben hei wan nanga afu meter, èn a ben langa wan meter. Den uku, a futupisi nanga den sei fu en ben de fu udu. Dan a man taigi mi taki: “Disi na a tafra di tnapu klar'klari gi MASRA.” ₂₃A doro fu a tempel nanga di fu a santa kamra ben abi tu sei. ₂₄Iniwan fu den doro ben abi tu pisi èn iniwan fu den pisi ben e drai. ₂₅Owktu tapu den doro dati, den doro fu a tempel, kerub nanga palmbon ben tyerfi poti, neleki fa den ben tyerfi na tapu den skotu. A gadri ben abi wan daki na fes'sei fu en. ₂₆Fensre nanga udu lati èn palmbon ben de tapu den skotu na den tu sei fu a gadri. Owktu den pikin maksin fu a oso fu Masra ben abi daki fes'sei fu den.

₁Lobiwan, disi na a di fu tu brifi di mi skrifi unu. Na ini ala tu mi tyari sani kon ini un prakseri fu yepi unu fu tan prakseri wan krin fasi. ₂Mi wani fu un memre den sani di den santa profeiti ben taki na fesi kba, nanga den komanderi fu wi Masra èn Ferlusuman, di den boskopuman fu En ben gi unu. ₃San un no mus fergiti na taki ini den laste dei sma o kon di o teki unu leki spot'popki. Den o du nomo san den takru lostu fu den e taigi den fu du. ₄Den o taki: “A ben pramisi taki A o kon. Pe a e tan dan? Sensi den afo fu wi dede, ala sani tan a srefi fasi leki fa den ben de sensi a bigin fu grontapu.” ₅Espresi den e du leki den no sabi taki langa ten kba Gado ben meki heimel nanga grontapu nanga a wortu san A taki. A ben meki grontapu nanga watra èn A puru en fu a watra. ₆Nanga watra Gado ben sungu a heri fosten grontapu, meki noti fu en no tan abra. ₇Ma nanga a srefi wortu Gado e kibri a heimel nanga a grontapu san de now, fu bron den nanga faya tapu a krutudei. Na a dei dati den sma di no wani dini Gado o go lasi.

₈Lobiwan, a sani disi un no mus fergiti, tak' wan dei de leki dusun yari gi Masra, èn tak' dusun yari de leki wan dei. ₉Masra no e draidrai fu du san A pramisi, ma son sma de di e prakseri dati. Ma A abi langa pasensi nanga unu, fu di A no wani taki no wan sma go lasi. A wani taki ala sma drai den libi.

₁₀Ma a dei fu Masra o kon leki fa wan fufuruman e kon. Tapu a dei dati ala sani di de na loktu o wai gwe nanga bigi babari. Den difrenti sani di de na loktu o bron gwe. Grontapu nanga ala den sani di e psa na en tapu, o kon na krin na fesi Gado. ₁₁Efu ala den sani disi o bron gwe tapu sowan fasi, dan un mus fu libi wan santa fasi leki fa Gado wani. ₁₂Un mus ferwakti a dei fu Gado èn meki muiti fu a dei dati kon esi. Tapu a dei dati den sani di de na loktu o bron èn a faya o meki den smèlter gwe. ₁₃Ma wi e ferwakti a sani san Gado ben pramisi: wan nyun heimel nanga wan nyun grontapu, pe ala sma o du san bun ini Gado ai.

₁₄Lobiwan, fu di wi e ferwakti dati, un mus du ala muiti fu libi wan krin libi sondro fowtu ini Gado ai. Un mus libi ini freide nanga En tu. ₁₅Sabi taki a ferlusu di wi ferlusu, na fu di Masra abi langa pasensi nanga wi. Wi lobi brada Paulus ben skrifi fu a sani disi tu nanga a koni di Gado gi en. ₁₆A skrifi fu en ini ala den brifi te a e taki fu a sani disi. Wantu sani de ini den brifi disi di tranga fu ferstan. Den sma di no kisi leri ini den sani disi, nanga den wan di swaki ete, e drai den sani disi neleki den e du nanga tra pisi fu a Santa Buku. Ma disi o meki den go lasi.

₁₇Lobiwan, now di un sabi disi na fesi, un mus luku bun taki un no drai un baka gi san un ben e bribi so tranga, dan un meki den sma di no e hori no wan wèt hari unu kon ini den sani san no tru. ₁₈Ma meki wi Masra Yesus Kristus, wi Ferlusuman, sori unu En bun-ati moro nanga moro, èn un mus kon leri sabi En moro bun. Na En mus kisi ala grani now èn fu têgo.