Dag 341 van 365- Daniël 5-7 en 2 Johannes

₁Kownu Belsasar ben gi wan bigi fesa pe a ben kari sowan dusun fu den heihei man fu a kondre kon. A ben e dringi win makandra nanga den sma dati. ₂Di a win ben e bigin wroko, Belsasar taigi den sma fu tyari den gowtu nanga den solfru kan kon di en afo Nebukadnesar ben teki puru ini a tempel na Yerusalem. Den sma ben mus tyari den kon fu kownu dringi ini den, makandra nanga den heihei man fu a kondre, den trow frow fu en nanga den tra umasma di a ben abi leki frow tu. ₃Dan den sma tyari den kan kon di den ben tyari kmoto fu a tempel ini Yerusalem. Ne kownu nanga den heihei man fu a kondre, den trow frow fu en nanga den tra umasma di a ben abi leki frow tu, teki den kan dringi. ₄Di den ben e dringi a win, den ben e taki fa den gado fu den bigi, di ben meki fu gowtu, solfru, kopro, isri, udu nanga ston. ₅A srefi momenti dati den finga fu wan anu ben de fu si di ben e skrifi na a ferfi na a sei planga fu a kownu-oso, leti abra den kandra di ben anga na loktu. Di kownu si taki den finga e skrifi wan sani na a sei planga, ₆en fesi kenki kloru èn a no ben sabi sa a ben mus prakseri. A no ben abi krakti moro ini en futu èn en kindi ben e beifi. ₇Ne a bari taki den mus seni teki den bonuman, den Kaldeaman nanga den man di e koti karta kon. Dan kownu taigi den koniman fu Babel taki: “A sma di man leisi a sani disi èn di man taigi mi san a wani taki, sa kisi wan moi lila krosi. Den sa anga wan gowtu keti na en neki èn a sa de a di fu dri man di sa abi fu taki ini a kondre disi.” ₈Ma no wan fu den koniman fu kownu ben man leisi san skrifi na a sei planga èn den no ben man taigi kownu san a ben wani taki. ₉Disi meki taki kownu Belsasar kon bruya moro. En fesi ben kon weti. Den heihei man srefi no ben sabi san fu taki.

₁₀Di a m'ma fu kownu yere san psa nanga kownu nanga den heihei man, a go na ini a kamra pe a fesa ben e hori. Dan a taigi kownu taki: “Kownu, mi e winsi yu langa libi. A no de fanowdu fu yu bruya so taki yu fesi kenki kloru. ₁₁Wan man de ini a kondre di yu afo, kownu Nebukadnesar, ben poti leki edeman fu den lukuman, den bonuman, den Kaldeaman nanga den man di e koti karta. A yeye fu den santa gado e libi ini en. Di yu afo ben de na libi ete, a man dati ben abi wan krin ferstan, a ben sabi sani èn a ben koni leki wan gado. ₁₂Na Danyel mi e taki. Yu afo ben gi en a nen fu Beltesasar. Fu di a ben denki srapu, èn fu di a ben abi furu sabi nanga ferstan, a ben man puru dren, tyari kibritori kon na krin èn puru laitori. Seni kari Danyel, a sa taigi yu san a sani wani taki.”

₁₃Dan de tyari Danyel wantron go na kownu. Ne kownu taki: “Na yu na Danyel, wan fu den man di mi afo, a kownu, tyari leki srafu kmoto fu Yuda? ₁₄Mi yere taki a yeye fu den gado e libi ini yu, sosrefi taki yu ede krin, taki yu abi ferstan èn taki yu koni srefsrefi. ₁₅A de so taki mi seni kari den koniman nanga den bonuman kon fu den leisi san skrifi na a sei planga èn fu den taigi mi san a wani taki. Ma den no man du dati. ₁₆Mi yere fu yu taki yu man puru dren nanga laitori. Efu yu man leisi san skrifi èn yu taigi mi san a wani taki, dan yu sa kisi wan lila krosi fu weri. Den sa weri wan gowtu keti gi yu na yu neki èn yu sa de a di fu dri man di abi fu taki san e psa ini a kondre.”

₁₇Danyel piki taki: “Kownu, yu kan hori yu kado noso yu kan gi den na wan tra sma. Ma mi sa leisi san skrifi dan mi taigi yu san a wan taki. ₁₈Kownu, na a Moro Hei Gado ben poti yu afo Nebukadnesar leki kownu, a gi en grani, A opo en, èn a meki sma lespeki en. ₁₉A makti di Gado ben gi en ben meki taki ala sma ben e beifi gi en, awinsi fu sortu folku den ben kmoto noso sortu tongo den ben e taki. Efu a ben wani kiri wan sma, a ben e kiri en. Efu a ben wani wan sma tan na libi, a ben e meki a tan na libi. A ben e opo suma a wani èn a ben e broko saka suma a wani. ₂₀Ma dan a bigin opo en borsu èn a bigin tranga en ati. So Gado puru en leki kownu fu di a ben kisi heimemre èn a lasi ala grani di a ben abi. ₂₁Libisma no ben wani en na den mindri moro. A ben kon gersi wan meti. A ben e tan na mindri den werder buriki. A ben e nyan grasi leki den kaw èn a dow fu heimel ben e nati en skin. Na so a ben mus libi te leki a taki tak' na a Moro Hei Gado abi fu taki suma e tron kownu èn a e poti suma a wani leki kownu. ₂₂Belsasar, yu na en manpikin, èn aladi yu sabi ala den sani disi yu no saka yusrefi. ₂₃Yu abi heimemre èn yu kaka futu gi a Kownu fu heimel. Yu seni teki den kan fu a tempel fu en dan yu, makandra nanga den heihei man, den trow frow fu yu nanga den tra umasma di yu abi leki frow, dringi ini den. Yu ben taki fa den gado fu solfru, gowtu, kopro, isri, udu nanga ston, bigi. Gado di no e si, di no e yere èn di no abi ferstan. Ma yu no gi grani na a Gado di e sorgu taki yu e bro èn taki yu man du ala den sani di yu e du. ₂₄Dat' meki a seni a anu kon di skrifi a skrifi disi poti. ₂₅Disi na san skrifi: Mene, mene, tekel ufarsin. ₂₆Èn na disi a wani taki: Mene – Gado teri olanga yu de kownu èn A tyari wan kba kon na en. ₂₇Tekel – Gado poti yu tapu a wegi èn yu ben lekti tumsi. ₂₈Peres – Gado prati a kondre di yu e tiri leki kownu èn A o gi en na den Meden nanga den Persen.”

₂₉Dan Belsasar taigi den sma fu weri wan lila krosi gi Danyel. Den ben mus weri wan gowtu keti na en neki èn den ben mus meki ala sma sabi taki en ben de a di fu dri man di ben abi fu taki ini a kondre. ₃₀A srefi neti dati den kiri Belsasar, a kownu fu den Kaldeasma.

₁Dan Darius, wan man fu a folku fu den Meden, tron kownu. A ben abi siksitenti-na-tu yari di a tron kownu.

₂Darius ben teki a besroiti fu prati a kondre di a ben e tiri leki kownu ini wan hondro nanga tutenti pisi di bo abi den eigi tiriman. ₃Den man disi bo abi dri edeman, èn Danyel bo de wan fu den. Den man di kownu ben poti fu tiri den kontren ben mus gi frantwortu na den. Tapu a fasi disi no wan sma bo man fufuru kownu. ₄Danyel ben e denki srapu. Dati ben e meki taki a ben bun moro den tra edeman nanga den man di ben e tiri den kontren. Fu dat'ede kownu ben wani poti en fu tiri a heri kondre. ₅So den tra edeman nanga den man di ben e tiri den kontren ben e suku wan fasi fu go kragi Danyel taki a no e du en wroko bun. Ma den no ben man feni noti. Bika yu ben man fertrow Danyel, a no ben e du no wan kruktu sani èn noiti a ben e fergiti fu du den sani di a ben mus du. ₆Dan den taigi makandra taki: “No wan sani no de fu san unu o man kragi Danyel, noso a mus de wan sani di abi fu du nanga a dini di a e dini a Gado fu en.” ₇Ne den tra edeman nanga den man di ben e tiri den kontren go na kownu Darius dan den taigi en taki: “Kownu, wi e winsi yu langa libi. ₈Ala edeman, den driktoro, den man di yu poti fu tiri den kontren, den man di e gi yu rai nanga den granman, agri taki wan wèt mus kon. A wèt disi mus taki so: dritenti dei langa no wan sma mus begi wan tra sma noso wan gado wan sani. Den mus aksi noso begi kownu wawan. A sma di no hori ensrefi na a sani disi den mus fringi go ini a olo nanga den lew. ₉Kownu, yu mus meki den skrifi a wèt disi. A mus de wan wèt leki fa den Meden nanga den Persen e meki den wèt. Wan wèt di no man kenki moro.” ₁₀Dan kownu Darius du san den aksi. A meki den skrifi a wèt disi poti.

₁₁Di Danyel yere taki a wèt disi meki, a go na oso pe den fensre fu a sodrokamra ben opo di ben e luku go na a sei fu Yerusalem. Dan leki fa a ben gwenti fu du dri leisi wan dei, a kindi fu begi en fu prijse en Gado. ₁₂Den man di ben wani kragi Danyel ben kon, dan den si fa Danyel e begi Gado fayafaya. ₁₃Ne den go na kownu. Den memre en na a wèt èn den taki: “Kownu, a no yu poti a wèt taki dritenti dei langa no wan sma mus begi wan tra sma noso aksi wan gado wan sani? Den ben mus aksi noso begi yu wawan. Yu ben taki tu taki a sma di no hori en na a sani disi den mus fringi go ini a olo nanga den lew.” Ne kownu piki taki: “Na so a de. A wèt disi no man kenki moro. Na wan wèt leki fa den Meden nanga den Persen e meki den wèt.” ₁₄Ne den taigi kownu taki: “Ma Danyel, wan fu den man di un tyari kon leki srafu fu Yuda, no wan du san yu taki. A no e du san a wèt e taki. Dri leisi wan dei a e begi en Gado.” ₁₅Di kownu yere dati a sari srefsrefi. A prakseri ala sortu sani di a bo man du fu yepi Danyel. A du ala muiti fu feni wan fasi te leki son bigin saka. ₁₆Dan makandra den man go baka na kownu. Den taigi en taki: “Kownu, yu sabi taki a wèt disi na wan wèt leki fa den Meden nanga Persen e meki den wèt. Wan wèt noso wan besroiti di kownu teki no man kenki moro.” ₁₇Ne kownu taigi den meki den go teki Danyel fringi go ini a olo nanga den lew. A taigi Danyel taki: “Mi e winsi taki a Gado di yu e dini sondro kba, sa ferlusu yu.” ₁₈Den poti wan ston fu tapu a mofo fu a olo. Dan kownu nanga den heihei man stampu a marki fu den linga tapu a ston. Noti no bo man du moro gi Danyel.

₁₉Dan Kownu go baka ini en kownu-oso. A psa a neti sondro fu nyan noso wan sani fu gi en prisiri. Heri neti a tan na ai. ₂₀Frukufruku mamanten, di son bigin opo, kownu opo dan a go es'esi na a olo nanga den lew. ₂₁Di a kon krosbei a kari nanga sari sten: “Danyel, knekti fu a Gado di e libi. Taigi mi efu a Gado di yu e dini sondro kba ben man ferlusu yu fu den lew.” ₂₂Ne Danyel piki taki: “Kownu, mi e winsi yu langa libi. ₂₃A Gado fu mi seni en engel kon fu tapu a mofo fu den lew. Den no du mi noti, fu di Gado sabi taki mi no du noti. Kownu, mi no du yu no wan ogri tu.” ₂₄Kownu ben breiti trutru. A meki den hari Danyel puru ini a olo nanga den lew. Di den hari Danyel puru, den si taki no wan krabu ben de na en skin, fu di a ben poti en fertrow tapu en Gado. ₂₅Dan kownu meki den go teki den man kon di ben kragi Danyel. A meki de fringi den go ini a olo nanga den lew. Den nanga den frow nanga den pikin fu den. Den no ben doro na gron srefi ete di den lew grabu den, broko ala den bonyo. ₂₆Baka dati kownu Darius skrifi wan brifi gi ala sma na grontapu, awinsi fu sortu folku den ben kmoto noso sortu tongo den ben e taki. A skrifi taki: “Mi e winsi un freide nanga koloku. ₂₇Mi e komanderi taki ala sma ini ala pisi fu a kondre di mi e tiri leki kownu, mus abi wan dipi lespeki gi a Gado fu Danyel bika na en na a Gado di e libi fu têgo. Noiti den o man broko a kondre di A e tiri leki kownu. Noiti wan kba sa kon na a makti fu en. ₂₈A e yepi èn A e ferlusu, A e du wondru èn A e sori marki na ini heimel nanga grontapu. A ferlusu Danyel puru ini a makti fu den lew.”

₂₉Danyel ben abi wan hei presi ini a kondre di Darius ben de na makti leki kownu nanga di Kores, a edeman fu den Persen, ben de na makti.

₁Ini a fosi yari di Belsasar ben de na makti leki kownu fu Babel, Danyel ben e didon e rostu dan a kisi wan dren. Ini a dren a si fa a wan sani baka a trawan e psa na en fesi. Dan Danyel skrifi den prenspari sani fu a dren. Disi na san a skrifi:

₂Wan neti Gado meki mi Danyel si wan sani. Mi si fa wan tranga winti bigin wai na ala den fo sei fu grontapu pe a winti e wai kmoto. A winti disi ben e meki a watra fu a se seki hebi. ₃Dan fo bigi meti kmoto ini a se. Fo difrenti meti. ₄A fosi meti ben gersi wan lew, ma a ben abi den frei fu wan aka. Mi si fa den hari den frei fu en puru. Baka dati den opo en poti tnapu let'opu leki wan libisma, dan den gi en wan libisma ati. ₅Dan a di fu tu meti kon. A ben gersi wan beer. A ben opo tnapu afu pasi. A ben hori dri lebrikibonyo mindri en tifi. Dan wan sma taigi a meti taki: “Opo, nyan someni meti leki yu man.” ₆Baka dati mi si wan tra meti. A ben gersi wan tigri, ma a ben abi fo frei na en mindri baka nanga fo ede. A meti disi ben kisi bigi makti. ₇A di fu fo meti di mi si a neti dati ben frede fu si. Yu skin ben e gro te yu e luku en. A meti disi ben tranga srefsrefi. A ben abi bigi isri tifi nanga san a ben e mara. San ben tan abra a ben e trapu nanga en futu. A meti disi no ben de srefsrefi leki den trawan èn a ben abi tin tutu. ₈Di mi hori ai tapu den tin tutu, mi si fa wan tra pikin tutu e pusu kon na den mindri. Dri fu den tin tutu ben rutu kmoto fu meki presi gi a pikinwan. A tutu disi ben abi libisma ai nanga wan mofo di ben lai bigitaki. ₉Di mi tan luku mi si fa den e poti kownusturu. Dan wan Bigiman teki presi na tapu wan fu den. En krosi ben weti srefsrefi èn en edewiwiri ben gersi katun. A ben gersi leki a sturu fu en nanga den wiel di ben de na en ondro ben de fu faya. ₁₀Faya ben e lon leki wan liba na en fesi. Hondrohondro, dusundusun ben e dini en. Den wan di ben tnapu na fesi en kownusturu no ben de fu teri. Dan a krutu bigin èn den wan di bo krutu opo den buku. ₁₁Mi ben man yere den bigi taki ete di a tutu ben e taki. Dan mi si fa den kiri en, èn fa den trowe a dedeskin fu en go ini wan bigi faya. ₁₂Den ben puru a makti tu fu den tra meti, ma den dati ben tan na libi te leki a ten di den ben kisi fu libi, ben kba. ₁₃Dan mi si fa wan sma e kon. Wolku ben lontu en, èn a ben gersi wan libisma. A ben e waka fu go na a Bigiman, dan den tyari en go na en. ₁₄Dan a kisi makti nanga grani leki kownu. Ala libisma ben e dini en awinsi fu sortu folku den ben kmoto noso sortu tongo den ben e taki. Noiti wan kba ben sa kon na a makti fu en, èn noiti den o man broko a kondre fu en di a e tiri leki kownu.

₁₅Den sani di mi Danyel si, seki mi. Mi ben bruya srefsrefi. ₁₆Dan mi aksi wan fu den di ben tnapu na a kownusturu, san den sani disi ben wani taki. Ne a taigi mi taki: ₁₇“Den fo bigi meti o de fo kownu na grontapu. Den o kon wan baka trawan. ₁₈Baka dati den santawan fu a Moro Hei Gado o kisi makti leki kownu fu têgo èn ala ten.” ₁₉Ma mi ben wan sabi san a di fu fo meti wan taki, di no ben de leki den trawan. A wan di ben e meki yu skin gro te yu ben e luku en, nanga den bigi isri tifi èn nanga den kopro anu fu en. Di ben e mara ala sani san a ben grabu èn di ben e trapu nanga en futu san ben tan abra. ₂₀Mi ben wan sabi tu san den tin tutu tapu en ede ben wan taki, nanga a nyun tutu di ben pusu kon na den mindri. A tutu gi san dri trawan ben mus meki presi, di ben abi ai nanga wan mofo di ben lai nanga bigi taki èn di ben luku moro bigi moro den trawan. ₂₁Disi ben de a tutu di mi ben si e feti nanga den santawan èn a ben wini den. ₂₂Ma di a Bigiman kon, a gi den leti. Baka dati a ten ben broko pe den santawan fu a Moro Hei Gado ben kisi a makti leki kownu. ₂₃Dan a engel taki: “A di fu fo meti na a di fu fo kownu na grontapu. A no o de leki den tra kownu. A o swari ala kondre, a o masi den dan a traputrapu den. ₂₄Den tin tutu na den tin kownu di o rigeri abra a kondre dati. Baka den disi ete wan kownu o kon di no o de leki den fosiwan srefsrefi. A o puru dri fu den na pasi. ₂₅A o kosi a Moro Hei Gado èn a o pina den santawan fu En. A o pruberi fu kenki a ten nanga a wèt fu den. Dri nanga afu yari langa den o de ini a makti fu en. ₂₆Baka dati den o krutu en. Den o puru a makti na en anu dan den o kiri en puru na pasi fu têgo. ₂₇Dan den santawan, a folku fu a Moro Hei Gado, o kisi a makti leki kownu. Den o teki ala makti nanga ala gudu fu den tra kondre na grontapu abra, pe wan kownu de na makti. A kondre fu a Moro Hei Gado na fu têgo. Ala den bigiwan fu grontapu sa arki en, èn dini en.”

₂₈Te so fara den sani di mi skrifi. Mi Danyel, ben bruya srefsrefi èn mi ben kon weti leki wan dede. Mi no fergiti den sani di mi si.

₁Gi a uma di Gado ben teki leki wan sma fu En.

Leki fesiman fu kerki mi e skrifi yu nanga den pikin fu yu di mi lobi trutru. Ma a no mi wawan lobi unu. Ala den sma di kon sabi a tru leri lobi unu tu. ₂Bika a tru leri de ini wi, èn a sa tan nanga wi fu têgo. ₃Mi e winsi taki Gado a P'pa, nanga Yesus Kristus a Manpikin fu a P'pa, sa sori bun-ati, sari-ati nanga freide na wi di sabi a tru leri èn di lobi makandra.

₄Mi ben breiti srefsrefi di mi miti wantu pikin fu yu di e hori densrefi na a tru leri leki fa wi ben kisi a gebod fu a P'pa. ₅Mi lobi sisa, dat' meki mi e aksi yu fu wi lobi makandra. A no fu wan nyun gebod mi e skrifi yu. Na wan sani san yu ben yere kba sensi na a bigin. ₆Bika lobi na te wi e du san den gebod fu Gado e taki. Yu mus libi soleki fa a gebod e taki di yu ben yere kba sensi na a bigin.

₇Furu sma de di e waka lontu na grontapu e kori trawan. Den e taki tak' a no tru taki Yesus Kristus kon na grontapu leki libisma. A sma di e taki so na a bedrigiman èn a bigi-feyanti fu Kristus. ₈Luku bun taki un no pori a wroko san wi du, fu un kan kisi a heri paiman. ₉A sma di no e tan ini a leri fu Kristus, ma di e go moro fara, no de fu Gado. Ma a sma di tan ini a leri fu Kristus, de fu a P'pa nanga a Manpikin. ₁₀Efu wan sma kon na unu di no e kon nanga a leri fu Kristus, dan un no mus meki a kon ini un oso, èn un no mus taki en odi. ₁₁Bika a sma di e taki en odi, abi prati ini den ogri sani san a e du.

₁₂Mi abi furu sani fu skrifi, ma mi no wani poti den tapu papira. Ma mi e howpu taki mi kan kon na unu, fu wi kan taki ai na ai fu den sani disi. Dan wi kan breiti trutru. ₁₃Den pikin fu yu s'sa, di Gado teki leki wan sma fu En, seni taki yu odi.