Dag 343 van 365- Daniël 11-12 en Judas

Ete dri kownu o de na makti ini Persia. A di fu fo o gudu moro den fosiwan. A gudu fu en o meki taki a abi makti fu du ala sani fu feti Grikikondre ₃Dan wan tranga kownu o kon. A o abi furu makti èn a o man du ala sani san a wani. ₄Ma a no langa baka te a kon na makti, a kondre fu en o broko pis'pisi èn a o prati na fo. A no o kon ini anu fu en eigi pikin. A kondre no o abi someni makti tu leki di en ben e tiri en. A kondre fu en o broko pis'pisi èn a o kon ini anu fu trawan. Den pikin fu en no o kisi en.

₅A kownu fu zuidsei o kisi furu makti. Ma wan fu den legre edeman fu en o abi makti moro en, èn a o rigeri leki kownu. A o rigeri abra wan moro bigi kondre leki di fu a kownu fu zuidsei. ₆Baka wantu yari a kownu fu zuidsei nanga di fu Noordsei o meki wan ferbontu. Fu stampu a ferbontu di den meki, a kownu fu Zuidsei o meki en umapikin trow nanga a kownu fu Noordsei. Ma a umapikin no o abi a makti langa fu meki a kownu hori ensrefi na a ferbontu. A makti fu en p'pa no o tan langa tu. Den o kiri a umapikin nanga ala sma di ben kon nanga en. Den o kiri en manpikin nanga en masra srefi. ₇A ten dati wan sma fu en famiri o teki a presi fu en p'pa. A sa hari kon nanga en legre na a tranga foto fu a kownu fu Noordsei èn A sa wini den. ₈A o teki ala den gado fu den nanga den diri sani di meki fu gowtu nanga solfru, tyari go na Egipte. Wantu yari langa a no sa feti nanga a kownu fu Noordsei. ₉Dan a kownu fu Noordsei sa kon nanga en legre ini a kondre fu a kownu fu Zuidsei, ma a o drai go baka na en kondre. ₁₀Dan den manpikin fu a kownu fu Noordsei o meki densrefi klari fu feti. Den o seti wan bigi legre. Den o hari go feti nanga a kownu fu Zuidsei. Den o teki a kondre abra, leki te a watra fu wan liba e furu wan kondre. Den o psa na ini a kondre fu a wan sei go na a tra sei. Te den o hari go fu a di fu tu leisi, den o doro te na a tranga oso fu a kownu. ₁₁A kownu fu Zuidsei no o man teki disi moro èn a o opo fu feti baka nanga a kownu fu Noordsei. A kownu fu Noordsei o seti wan bigi legre, ma a legre fu en o lasi a feti. ₁₂Dan a kownu fu Zuidsei o kisi heimemre te a wini a legre fu Noordsei. Ma aladi a wini dusundusun man, dati no meki taki a abi makti. ₁₃A kownu fu Noordsei o seti wan tra bigi legre baka. A disi o bigi moro a fosiwan. Dan baka wantu yari a o hari go feti nanga a kownu fu Zuidsei, nanga wan bigi legre di ben abi ala sani di ben de fanowdu fu hari go na feti. ₁₄A pisten dati furu sma no o wani a kownu fu Zuidsei moro. Danyel, ogrisma fu yu eigi folku srefi no o wan en moro. Den o wani si taki wan sani di Gado ben sori den kon psa. Ma den no o man meki a sani psa. ₁₅A kownu fu Noordsei o kon seti bergi santi nanga ston na a skotu fu wan tranga foto èn den o teki a foto abra. A legre fu a kownu fu Zuidsei no o man tan feti doro. Srefi den moro bun fetiman fu en no o abi a krakti fu tan feti. ₁₆Dan a wan di kon feti o du san a wani. No wan sma o man hori en. A o doro srefi ini a moro moi kondre fu grontapu èn a o teki a heri kondre abra. ₁₇A o pruberi fu teki a heri kondre fu a trawan ini en makti. Fu dat'ede a o meki wan ferbontu nanga en. A o gi a kownu wan umapikin fu a kan broko a kondre tapu so wan fasi. Ma a sani san a ben abi ini en prakseri no o psa. A no o abi no wan wini na en. ₁₈Baka dati a drai go feti nanga den kondre di didon na a se. A o teki wan lo fu den kondre disi abra. Ma dan wan legre-edeman o tyari wan kba kon na a hei memre fu en. A o lasi a feti tapu wan syen fasi èn a no o man du noti baka. ₁₉Baka dati a o wan feti nanga den tranga foto ini en eigi kondre. Ma dan a o lasi a feti. Den o kiri en puru fu têgo na pasi. ₂₀A kownu di o kon na en baka o seni wan man di e piki lantimoni go lontu ini Yuda, a moro moi pisi fu a kondre. Ma baka wan pisten a kownu disi o dede. A no o dede ini wan feti ma den o luru en dan den kiri en bakabaka.

₂₁Dan wan kownu di sma no e si fu noti o teki en presi. Den no o wan poti en leki kownu srefi. Ma sondro fu wan sma ferwakti, a o tron kownu tapu wan bedrigi fasi. ₂₂Ala feyanti fu en a o wini. A o puru den na pasi fu têgo. A o kiri wan prenspari tiriman fu a ferbontu tu. ₂₃A e bedrigi ala sma nanga san a e meki wan ferbontu. Nanga a yepi fu wan pikin grupu sma a o kisi moro nanga moro makti. ₂₄Sondro fu wan sma ferwakti, a o doro ini den pisi fu a kondre pe a gron e gi a moro bun nyanyan. A o du san no wan fu den tra kownu di waka na en fesi ben du. Den sani san a fufuru èn puru nanga tranga na sma anu, a o prati gi den sma di e hori baka gi en. A o sidon prakseri tu fa a o man teki den moro tranga foto abra. Ma ala den sani disi o de fu wan pisten nomo. ₂₅Nanga ala en krakti èn nanga ala sani san de na ini en a o opo baka fu feti a kownu fu Zuidsei. Nanga wan bigi èn tranga legre a o hari go na en tapu. Dan a kownu fu Zuidsei o seti wan moro bigi èn tranga legre fu en sei, ma a no o man kaka futu. Den o meki mofo fu kiri en, èn den o kiri en tu. ₂₆Den man di ben e gi en rai, den wan di a ben e fertrow, o kiri en. Den o figi a legre fu en puru na pasi èn furu dede o fadon. ₂₇Den tu kownu o go sidon makandra fu kruderi, ma ala tu o prakseri fa den man du a trawan ogri. Den o pruberi fu bedrigi makandra. Ma ala den sani san den ben abi ini prakseri no o go doro, fu di a no ben de a ten ete di Gado ben poti. ₂₈A kownu fu noordsei o drai gwe na en kondre nanga furu sani di a wini ini a feti. Te a e drai go na oso a o seti ensrefi fu du sani nanga a santa ferbontu èn a du tu san a ben wani.

₂₉Baka wan pisten a o hari go baka nanga en legre ini a kondre na Zuidsei. Ma a leisi disi sani o waka tra fasi. ₃₀Den sipi fu den Romeinisma o kon feti nanga en dan a o lasi ati èn a o drai gwe baka. Dan a o puru en atibron wantron moro tapu a santa ferbontu èn a o du sani drape. A go na en kondre dan a o arki den wan di libi a santa ferbontu. ₃₁A o poti bakaman fu en ini Yerusalem. Den o pori a tempel, den o tyari wan kba kon na den ofrandi di ben e tyari aladei ini a tempel èn den o poti a popki, a groskin wan di e tyari pori, na ini. ₃₂A o kori den sma di no e hori densrefi na a ferbontu, fu den no dini Gado moro langa. Ma den wan di tan dini Gado, o tranga nofo fu kaka futu gi en. ₃₃Den koniwan mindri a folku o meki furu sma kon ferstan san e psa. Ma sma o de na den koniman disi baka. Sma o kiri den, poti den na dungru-oso èn sma o puru den sani san den abi na den anu. ₃₄Te den sma o de so na den baka fu kiri den, dan wan pikin grupu sma o yepi den. Furu sma o kon ini a grupu fu den, ma no nanga bun prakseri. ₃₅Den o kiri sonwan fu den koniman, ma so den sma o psa tesi èn den e kon de san den mus de. Solanga a ten no doro di Gado poti, wan kba no o kon na a sani disi.

₃₆A kownu fu Noordsei o man du san a wani du. A o kisi so wan heimemre, taki a o taki tak' a hei moro ala gado. Den sani di a o taki fu a moro hei Gado, no fiti fu taki srefsrefi. A o go bun nanga en, te leki a ten doro pe a atibron fu Gado doro en marki. Bika san Gado besroiti o psa. ₃₇A no o abi lespeki tu gi den gado fu den afo fu en, noso gi a gado di den frow lobi moro ala trawan. A no o teri no wan gado. A o firi ensrefi moro hei leki den. ₃₈A no wani dini den gado dati, ma a o dini a gado di e kibri den tranga foto. A o gi grani na wan gado di den afo fu en no ben sabi. A o gi a gado dati gowtu, solfru, diri ston nanga tra diri sani. ₃₉A o poti wan folku di e dini wan tra gado, fu luku taki noti no psa nanga den tranga foto. Den sma di e lespeki a gado dati a e gi grani. A e poti den leki basi abra furu sma èn a e gi den gron leki paiman.

₄₀Na a kba fu a ten, a kownu fu Zuidsei o hari go na en tapu. Ma a kownu fu Noordsei o hari es'esi go miti en nanga wagi, man tapu asi èn nanga bun furu boto. A o teki kondre abra èn a o psa leki wan liba abra den nanga a legre fu en. ₄₁A o kon tu ini a moro moi kondre fu grontapu. Furu sma o dede. Ma a o misi den kondre fu Edom, Moab nanga den moro bun fetiman fu den Amonitisma. ₄₂Furu kondre a o teki abra, srefi Egipte tu. ₄₃A o fufuru den gudu fu en, den gowtu, den solfru nanga den tra sani di abi furu warti. Den sma fu Libia nanga Nubia o abi fu du tu san a wani. ₄₄Ma dan a o yere fu sani di e psa na a sei pe son e opo nanga a noordsei. Den sani disi o meki a bruya. A o feti nanga ala en krakti, èn ala presi pe a doro a o kiri èn a o pori sani. ₄₅A o poti den kownutenti fu en mindri a se nanga a santa bergi, a moro moi bergi na grontapu. Ma dan a o dede sondro fu wan sma du en wan sani.

₁Ma a pisten dati Mikael sa kon, a prenspari engelkapten, di e kibri yu folku. Wan tranga ten o kon. Sensi di libisma de na grontapu noiti ete sowan ten ben de. Ma a ten dati den sma fu yu folku, den wan di nen skrifi ini a buku fu Gado sa feni yepi. ₂Furu fu den wan di ben e rostu na ini dedekondre sa kon na libi baka. Sonwan o kon fu tan libi fu têgo, trawan o kon ma fu kisi syen èn fu têgo sma o si den fu noti. ₃Dan den koniwan o brenki leki a faya fu heimel. Den wan di leri a folku fu libi leki fa Gado wani, o brenki fu têgo leki stari. ₄Ma yu Danyel, no mus taigi no wan sma den sani disi. A buku mus tan tapu te na a kba fu grontapu. Furu sma o ondrosuku en, èn sabi o kon moro furu.”

₅Dan wantron so, mi Danyel, si tu tra man. A wan ben tnapu na disi sei fu a liba, a trawan na a tra sei. ₆Dan wan fu den aksi a man nanga a linnen krosi di ben tnapu pikinso moro fara taki: “Oten wan kba sa kon na den bigi sani disi di musu psa?” ₇Ne a man di ben weri a linnen krosi èn di ben tnapu pikinso moro fara, opo en tu anu go na heimel dan mi yere a taki: “Mi e sweri na a Gado di e libi fu têgo, taki baka dri nanga afu yari wan kba sa kon na ala den sani disi. Dan den no sa pina a santa folku moro langa.” ₈Mi ben yere en, ma mi no ben sabi san dati ben wan taki. Ne mi aksi taki: “Masra, fa ala den sani disi o kba?” ₉A taigi mi taki: “Danyel, go now. Bika solanga a kba fu ala sani no doro, a buku o tan tapu èn sma no o sabi san skrifi ini en. ₁₀Furu sma o kon na tesi èn den o kon de san den mus de. Ma den wan di e du ogri o tan du ogri. Den no o ferstan den sani, soso den koniwan o ferstan den. ₁₁Twarfu hondro nanga neigitenti dei o psa, kmoto fu a momenti di den o tapu den sma fu tyari ofrandi ala dei èn te den o poti a popki, a groskin wan di e tyari pori, ini a tempel. ₁₂Ma a blesi fu Gado de na tapu den sma di o hori doro, te leki wan dusun dri hondro dritenti-na-feifi dei psa. ₁₃Danyel, libi fu yu te leki yu dede. Yu o rostu ini yu grebi, te leki yu opo baka na a kba fu a ten fu kisi san Gado ben poti aparti gi yu.”

₁Gi den sma di Gado kari.

Disi na wan brifi fu Yudas, wan wrokoman fu Yesus Kristus èn wan brada fu Yakobus. Gado a P'pa lobi unu èn Yesus Kristus e kibri unu. ₂Mi e winsi taki Gado sa sori un sari-ati èn gi un bogobogo freide nanga lobi.

₃Lobiwan, mi ben meki ala muiti fu skrifi unu wan brifi abra a ferlusu di Gado ferlusu wi alamala. Ma now mi feni taki a moro prenspari fu sori un taki un mus tan hori tranga na a leri san wi, di de fu Gado, ben kisi kba. ₄Bika wantu sma di no wani dini Gado, boro kon na wi mindri. Den sma disi e teki a bun-ati fu Gado poti na fesi, dan den e libi den yayolibi. Den e poti Yesus Kristus, wi wan enkri Masra nanga Basi, na wan sei. Ma langaten na fesi a strafu san den o kisi, ben skrifi poti kba gi den.

₅Now mi wani tyari wantu sani kon na fesi, aladi un sabi ala den sani disi kba. Un sabi taki Masra ben ferlusu den sma fu En puru ini a kondre Egipte. Ma bakaten A kiri den sma di no ben wani bribi, puru na den mindri. ₆Un ben yere tu fu den engel di ben feni taki a makti san Gado ben gi den no ben sari. Dan so den libi a presi pe den ben de. Dat' meki Gado keti den nanga keti di no man broko, èn A e hori den ini dipi dungru presi fu krutu den tapu a bigi dei. ₇Sosrefi un ben yere fu Sodom nanga Gomora nanga den foto di ben de ini a birti fu den. Tapu a srefi fasi leki den engel, den sma disi ben gi densrefi abra na takru lostu èn den ben e go na tra sani baka. Fu dat'ede Gado strafu den foto dati nanga faya di no e dede, èn dati e tan wan eksempre gi wi. ₈A de a srefi nanga den sma di boro kon na un mindri èn di e si sani ini den dren. Den e pori den eigi skin, den no wani saka densrefi gi noti, èn den e taki takru fu den moro heiwan. ₉Ma di Mikael srefi, wan fu den moro prenspari engel, ben e hari taki nanga didibri abra a dedeskin fu Moses, a no ben prefuru fu taki takru fu didibri noso fu krutu en. A taigi en nomo taki: “Masra sa krutu yu.” ₁₀Ma den sma disi e taki takru fu ala sani san den no sabi. Neleki meti di no man denki, den sabi soso den sani san den skin e firi fu du. Èn na den sani dati e broko den neki.

₁₁Ma den mus luku bun! Bika den teki a srefi pasi leki Kain, èn fu moni ede den go langalanga go meki a srefi fowtu leki Bileam. Den e meki rigeri leki Kora, èn den o dede neleki en tu. ₁₂Te un kon makandra fu nyan fu sori lobi, den sma disi e pori en, bika den no e syen fu nyan span den bere sondro fu prakseri wan trawan. Soleki fa wan wolku kan blaka, ma a no gi alen fu di a winti wai en gwe, na so den sma disi de. Den de leki froktubon di no e gi nyanyan awinsi a ten fu den doro. Den no abi no wan dropu libi, fu di sma rutu den puru. ₁₃Den de leki den skwala fu se di e rigeri, na so den syen sani san den e du, e kon fu si leki skuma. Den de leki stari di lasi pasi. Gado o hori den fu têgo ini a moro dipi dungru presi san de.

₁₄Henok, a di fu seibi afo te yu teri kmopo fu Adam, ben taki fu den sortu sma disi san Gado ben gi en fu taki. A taki: “Luku, Masra o kon nanga den santa wan fu En, den no de fu teri. ₁₅A o kon fu krutu ala sma èn fu strafu den ogri sma di no wani dini Gado. A o strafu den fu ala den ogri san den du. A o strafu den ogri sondusma disi tu fu ala den kosi san den ben kosi En.” ₁₆Den sma disi lobi fu knoru èn fu krutu. Den e libi leki fa den wani, èn den abi bigitaki na ini den mofo. Te den e taki bun fu wan sma, dan na soso fu den srefi kan feni bun.

₁₇Ma lobiwan, un no mus fergiti den sani di den boskopuman fu wi Masra Yesus Kristus ben leri unu na fesi kba. ₁₈Den ben taigi unu taki na ini den kriboi dei, sma o de di o spotu èn den o tan du san den e firi fu du, sondro fu abi bisi nanga Gado. ₁₉Na den sortu sma disi e tyari prati kon na un mindri. Den e du san den e firi, bika den no abi a Yeye.

₂₀Lobiwan, ma unu mus bow unsrefi ini a santa bribi fu unu, èn un mus begi soleki fa a Santa Yeye e gi unu fu begi. ₂₁Un mus gi unsrefi abra na a lobi fu Gado, èn un mus tan luku fu a sari-ati fu wi Masra Yesus Kristus, di sa gi unu a libi fu têgo. ₂₂Un mus sori sari-ati na den sma di e degedege ete na ini a bribi. ₂₃Trawan un mus grabu puru ini a faya. Ma un mus luku bun nanga a sari-ati san un e sori son sma. Srefi a krosi fu den yu mus frede fu fasi, bika dati srefi flaka nanga sondu.

₂₄Gado di kan kibri unu fu un no stotu un futu èn di kan meki un tnapu sondro fowtu èn nanga bigi prisiri na fesi En glori, ₂₅na En na a wan enkri Gado, di ferlusu wi tangi fu Yesus Kristus, wi Masra. Na En mus kisi glori, bigi nen, krakti nanga makti, sensi fosi grontapu meki, now, èn fu têgo. Amen.