Dag 345 van 365- Hosea 5-8 en Openbaring 2

₁Priester, un arki. Israel, teki yu ai luku. Kownu, poti yesi arki. Bika na unu na den sma di ben mus krutu. Ma un seti wan trapu gi Mi pipel na Mispa, wan krafana tapu a Taborbergi. ₂Den wan di no wan dini Mi diki wan dipi peti Ma Mi o strafu den alamala. ₃Mi sabi Efraim Israel no kibri gi Mi. Ma fu tru, Efraim, now yusrefi go libi wan hurulibi. Israel doti ensrefi. ₄Den sani di den e du e hori den fu den no drai kon na den Gado. Bika wan yeye fu hurulibi e libi ini den. Israel doti ensrefi. ₅A bigi fasi fu Israel e krutu en. Den kruktudu fu Israel nanga Efraim o meki den stotu den futu. Yuda srefi e stotu en futu nanga den. ₆Den o tyari skapu, krabita nanga den kaw fu den kon fu suku MASRA, ma den no o feni En. A drai En baka gi den. ₇Den no tan waka baka MASRA wawan, ma den go meki pikin na dorosei. Fosi a nyun mun opo den o dede gwe. Den nanga den gron fu den.

₈Bro a tutu na ini Gibea, Bro a trompet na ini Rama. Meki babari ini Bet-Awen meki sma yere. Benyamin, den de na yu baka. ₉Efraim o tron wan dreisabana te a dei doro fu krutu en. Mi o meki kon sabi san Mi besroiti fu du nanga den lo fu Israel. ₁₀Den tiriman fu Yuda gersi den sma di e meki a gron fu den moro bigi leki san a mus de. Ma Mi sa lusu Mi atibron na den tapu leki watra. ₁₁Den e pina Efraim, sani no e du nanga leti, fu di na ensrefi ben wani fu waka baka soso sani. ₁₂Fu dat'ede Mi de leki wan woron di e nyan Efraim. Gi Yuda Mi de leki wan pori pisi na ini en futu, di e tan pori go doro. ₁₃Di Efraim kon si taki a e siki, di Yuda si a soro fu en, Efraim seni boskopuman go na Asur fu suku yepi na kownu Fetiman. Ma a disi no o man yepi yu fu yu kon betre, a no o man dresi a soro fu yu. ₁₄Bika gi Efraim Mi gersi wan lew. Gi Yuda Mi gersi wan yongu lew. Mi, Misrefi sa priti den dan Mi gwe. ₁₅Mi o teki tyari gwe sondro taki wan sma man yepi den. Mi sa drai go baka fu pe Mi kmoto, te leki den kon ferstan taki den sondu èn den bigin suku Mi baka. Te den no sabi moro san fu du, den sa angri fu Mi baka.

₄San Mi mus du nanga yu, Efraim? San Mi mus du nanga yu, Yuda? Bika a lobi fu yu de leki a dow di e de mamanten na tapu den wei, leki a dow di e gwe es'esi te mamanten. ₅Dat' meki Mi meki den profeiti naki unu nanga den wortu di Mi taki meki un dede. Dan leki fa wan faya e broko doro na so a o broko doro tu taki Mi abi leti. ₆Bika na lobi Mi wan si, no meti di srakti leki ofrandi. Mi wani si taki un sabi Gado, no meti di bron leki ofrandi. ₇Ma leki fa Adam ben du, na so den broko a ferbontu nanga Mi tu. So den ben gwe libi Mi kba. ₈Gilead na wan foto fu abani. Wan foto di lai nanga brudu. ₉Den priester e didon luru leki wan ipi fufuruman. Den e kiri sma tapu a pasi di e go na Sikem. Fu tru, soso hogri den e du. ₁₀Mi si groskin sani na ini Israel. Israel e libi wan huru libi. Israel doti ensrefi. ₁₁Yuda, yusrefi o koti san yu sai, te Mi o tyari wan kenki kon na ini a libi fu Mi pipel.

₄Den alamala e libi wan huru libi. Den gersi wan onfu di e tan bron, aladi a bakriman no e poti udu moro ini en, fu di a e masi a blon fu a kan sweri. ₅Tapu a fesadei fu kownu den e drungu den fesiman nanga tranga sopi. Dan kownu e seki anu nanga den man di no abi konsensi. ₆Den ati lai nanga korifasi, a gersi wan onfu. Awinsi den sribi heri neti, te mamanten a faya e opo baka. ₇Den alamala gersi onfu. Den e bron den tiriman fu den, ala den kownu fu den o fadon. No wan fu den e kari Mi.

₈Efraim e moksi nanga tra folku. Efraim gersi wan fadon kuku. ₉Doroseisma gwe nanga ala en krakti, ma a no e si dati ete. Ala en wiwiri kon weti, ma a no e si dati ete. ₁₀A bigi fasi fu Israel e krutu en. Ma den no drai kon baka na MASRA, den Gado, aladi di ala den sani disi psa. ₁₁Efraim gersi wan don doifi sondro ferstan. Den e kari Egipte fu kon yepi den, den e go suku kibripe na Asur. ₁₂Ma te den opo fu frei, Mi e span wan net abra den. Mi hari den kon na gron, leki fowru di e frei na loktu. Te Mi yere taki den e opo fu frei, Mi e fanga den.

₁₃Den mus luku bun, bika den frei gwe fu Mi. Den o dede, bika den drai den baka gi Mi. Den lei gi Mi, aladi Mi ferlusu den. ₁₄A no trutru kari den e kari Mi, te den e didon e krei na tapu den bedi. Den e tyerfi den skin fu kan kisi karu nanga win. Na so den e drai den baka gi Mi. ₁₅Den e prakseri fu du Mi ala sortu ogri, aladi na Mi gi den leri, èn gi den krakti. ₁₆Den e drai, ma den no e drai kon na Mi. Den gersi wan bo di yu no man fertrow. Den fesiman fu den o dede na ini feti, fu den bigi taki di den ben taki. Dan Egipte o teki den meki spotu fu dati.

₁Bro a tutu! Tingifowru e frei abra a oso fu MASRA. Bika den broko Mi ferbontu, den kaka futu gi a wèt fu Mi. ₂Den e kari Mi dan den e taki: “Mi Gado, Wi, Israel, sabi Yu.” ₃Ma den no lobi den bun sani. Fu dat'ede den feyanti sa de na den baka.

₄Sondro fu aksi Mi den poti sma leki kownu. Den poti fesiman sondro taki na Mi taigi den. Nanga a gowtu nanga a solfru fu den, den meki popki fu kruktu gado di no abi no wan warti. ₅Samaria, a pikin kaw fu yu no de wan bun sani srefsrefi. Mi ati e bron na un tapu. O langa a mus tan ete fosi den kon krin ini Mi ai? ₆Fu tru, na wan sani di meki na ini Israel. Na wan man di sabi a wroko meki en, ma a no de wan gado. Fu tru, a pikin kaw disi o naki broko pis'pisi. ₇Winti den e sai, ma na wan sibibusi den o mai. A karu no o gro te a kon lepi, un no o man meki blon fu en. Te un meki blon fu en, tra sma e swari en.

₈Den swari Israel. Tra folku e si en leki wan soso sani di no wan sma abi fanowdu moro. ₉Bika den ben go na Asur. Wan werder buriki e hori ensrefi na wan sei, ma Efraim e seri lobi. ₁₀Ma awinsi den e kisi lobi fu den tra folku, Mi sa tyari den kon na wan. Den no abi fu ferwakti noti fu den sani di a tranga kownu taki.

₁₁Fu tru, Efraim meki furu altari fu sondu. Den altari fu den ben meki fu sondu. ₁₂Mi kan skrifi den wèt fu Mi tin dusun leisi gi den, den e tan si den leki sani fu wan sma di den no sabi. ₁₃Den e tyari meti kon leki ofrandi di densrefi e nyan. MASRA no abi no wan prisiri nanga den. A e memre den ogri di den du, èn A e strafu den fu dati. Den sa drai go baka na Egipte. ₁₄Iya, Israel fergiti a Wan di meki en. Den bow bigi oso gi den kownu. Yuda meki furu tranga foto. Ma mi sutu faya gi den foto fu en, di sa bron den tranga foto fu en.

₁“Skrifi a engel fu a gemeente na Efese taki:

Disi na san a Wan e taki di e hori den seibi stari na ini En let'anu, èn di e waka mindri den seibi gowtu tiki di hori den olilampu: ₂Mi sabi den sani san un e du, a muiti san un e meki, nanga a fasi fa un e hori doro. Mi sabi taki un no e koti nanga den sma di e du ogri. Un ben tesi den sma di e kari densrefi boskopuman fu Mi, ma un kon si taki den e lei. Den a no boskopuman fu Mi. ₃Fu Mi ede un hori doro èn teki ala sortu pina, ma un no lasi ati. ₄Ma san Mi no feni bun fu unu, na taki un lasi a fosi lobi san un ben abi gi Mi. ₅Un mus prakseri o fara un ben de fosi un fadon. Dat' meki un mus drai un libi èn du den sani baka san un ben du fosi. Ma efu un no du dati, efu un no drai un libi, Mi o kon puru a tiki fu unu di hori den olilampu, na en presi. ₆San Mi feni bun fu unu, na taki neleki Mi, un no lobi den sani kwet'kweti san den sma e du di e hori na a leri fu Nikolaus.

₇Suma abi yesi, meki a yere san a Yeye e taigi den gemeente. A sma di e wini, Mi sa gi fu nyan fu a bon san e gi libi di de ini a paradeis fu Gado.”

₈“Skrifi a engel fu a gemeente na Smirna taki:

Disi na san a Wan e taki, di de a Fosiwan nanga a Kriboiwan, a Wan di ben dede èn di kon baka na libi: ₉Mi sabi fa sma e pina unu. Mi sabi fa un pôti, ma un gudu. Mi sabi fa den wan di e kari densrefi Dyusma, e taki takru fu unu. Ma den a no Dyusma, den na sma fu Satan. ₁₀Un no mus frede fu a pina san un mus nyan. Luku, didibri sa poti sonwan fu unu na ini straf'oso fu tesi unu. Tin dei langa den o pina unu. Ma un mus tan bribi te dede, dan Mi sa gi un a libi fu têgo, leki a grani fu di un wini.

₁₁Suma abi yesi, meki a yere san a Yeye e taigi den gemeente. A sma di e wini no sa si dede fu a di fu tu leisi.”

₁₂“Skrifi a engel fu a gemeente na Pergamum taki:

Disi na san a Wan e taki di abi a deigri di srapu na ala tu sei: ₁₃Mi sabi taki un e libi na ini a foto pe didibri e rigeri, èn taki un tan hori na Mi. Un no drai un baka gi a bribi san un abi na ini Mi, aladi den ben kiri Antipas, a trutru kotoigi fu Mi ini a foto fu unu pe Satan e rigeri. ₁₄Ma san Mi no feni bun fu unu na disi: Wantu sma de na un mindri di e hori densrefi na a leri fu Bileam, di ben leri Balak fa fu kori den sma fu Israel fu den nyan afkodrei nyanyan, èn fu den gi densrefi abra na takru lostu. ₁₅Wantu sma de na un mindri tu di e hori densrefi na a leri fu Nikolaus. ₁₆Un mus drai un libi. Ma efu un no wani, dan Mi sa kon her'esi drape èn Mi sa feti nanga den sma dati nanga a deigri san e kmopo ini Mi mofo.

₁₇Suma abi yesi, meki a yere san a Yeye e taigi den gemeente. A sma di e wini, Mi sa gi en fu nyan fu a mana san kibri. Èn Mi sa gi en wan weti ston nanga wan nyun nen na en tapu, san no wan sma sabi boiti a sma di kisi en.”

₁₈“Skrifi a engel fu a gemeente na Tiatira taki:

Disi na san a Manpikin fu Gado e taki, di abi ai san de leki faya, nanga futu san e brenki leki kopro: ₁₉Mi sabi san un e du. Mi sabi a lobi nanga a bribi fu unu, èn Mi sabi fa un e yepi trawan. Mi sabi tu fa un e hori doro, èn Mi sabi taki san un e du now bigi moro den sani san un ben du fosi. ₂₀Ma san Mi no feni bun fu unu, na taki un e meki a uma Isebel du san a wani. A e kari ensrefi wan profeiti, ma a e leri èn kori den knekti fu Mi fu den gi densrefi abra na takru lostu èn fu den nyan afkodrei nyanyan. ₂₁Mi ben gi en ten fu drai en libi, ma a no wani libi den takru lostu fu en. ₂₂Luku, Mi o poti en didon na tapu sikibedi. Mi o meki den sma di e huru nanga en kon na ini bigi pina, efu den no e drai den libi èn libi den sani san a leri den. ₂₃Mi o kiri den pikin fu en. Dan ala den gemeente sa si taki na Mi e ondrosuku den prakseri nanga a ati fu wan libisma. Mi o pai ibri sma fu den sani san a du. ₂₄Ma un trawan di de na ini Tiatira. Un no e hori na a leri fu Isebel, èn un no sabi not'noti fu san den bakaman fu en e kari den dipidipi sani fu Satan. Dat' meki Mi no o poti no wan tra sani na un tapu. ₂₅Ma un mus hori tranga na a leri san un abi te leki Mi kon.

₂₆A sma di e wini èn di e tan du den sani fu Mi te na a kba, Mi sa gi makti tapu den sma di no sabi Gado. ₂₇A sa tiri den nanga wan isri tiki, èn a sa naki den broko leki wan prapi. ₂₈Disi na a srefi makti san Mi ben kisi fu Mi P'pa. Èn Mi sa gi a sma a mamanten-stari. ₂₉Suma abi yesi, meki a yere san a Yeye e taigi den gemeente.”