Dag 346 van 365- Hosea 9-11 en Openbaring 3

₁₀Di Mi feni Israel,

den ben gersi droifi na ini a dreisabana.

Den afo fu unu ben de leki den fosi figa,

den fosi figa na a figabon.

Ma den ben go na Baal-Peor,

èn den gi densrefi na a gado fu syen sani.

Fu dat'ede den tron a srefi groskin sani,

leki a sani di den lobi.

₁₁A moifasi fu Efraim sa frei gwe leki wan fowru.

Den no sa man meki pikin moro,

den no o de nanga bere moro,

èn den no o man hori bere tu.

₁₂Iya, awinsi den kweki den pikin fu den kon bigi

Mi sa meki taki den tan sondro pikin,

te leki no wan no de moro.

Bigi problema o miti den

te Mi drai Mi baka gi den.

₁₃Ini Mi ai, Efraim ben de wan yongu palmbon

di ben prani ini wan gron.

Ma now Efraim abi fu gi den manpikin fu en

na wan kiriman.

₁₄MASRA, gi den san Yu wani.

Meki taki den no man kisi pikin,

meki taki den borsu drei.

₁₅Ini Gilgal Mi si a ogri fu den.

Fu dat'ede Mi no ben lobi den srefsrefi.

Mi o yagi den kmoto na ini Mi oso,

fu den ogri di den du.

Mi no o lobi den moro.

Ala den tiriman fu den e kaka futu gi Mi.

₁₆Den naki Efraim

a rutu fu en kon drei.

A no o man gi froktu moro.

Efu den ben e kisi pikin ete

Mi bo kiri den pikin fu den

di den lobi so.

₁₇A Gado fu mi sa poti den na wan sei,

fu di den no ben wani arki en.

Den sa waka fu a wan sei go na a trawan

na mindri den tra folku.

₁Israel gersi wan taki fu wan droifibon,

nanga furu froktu.

A e gi furu froktu.

Ma o moro den froktu ben e furu,

o moro altari a ben e meki.

O moro sani ben e go bun nanga a kondre fu en,

o moro den e seti ston fu anbegi den gado fu den.

₂Den ati furu nanga bedrigi fasi,

ma now den o butu fu en

A sa broko den altari fu den,

naki den ston fu den pisipisi pe den anbegi den gado fu den.

₃Den e taki: “Un no abi wan kownu.”

Ma efu un no e lespeki MASRA,

san wan kownu bo man du gi wi dan?

₄Den e taki sani di no wani taki noti.

den e pramisi sani di den no e du,

èn den e sroto ferbontu.

A krutu di ben mus krutu nanga leti

gersi wan takru taya

di e gro tapu den bedi di sma meki na ini den gron.

₅Den sma fu Samaria de na row

fu a pikin kaw fu Bet-Awen.

Iya, na fu dat'ede a folku e krei,

na fu dat'ede den afkodreipriester e dyeme so,

fu di a moi fasi fu en gwe.

₆Den tyari en go srefi na Asur

leki wan presenti gi kownu Fetiman.

Ma Efraim fesi o fadon,

Israel o kon na syen nanga den prakseri di a meki.

₇Samaria o broko pisipisi.

A kownu fu en o didon leki wan pisi broko udu

na tapu a watra.

₈Ala den hei presi fu Awen pe den o tyari ofrandi o broko.

Den presi pe Israel e sondu.

Bus'busi di lai makamaka

sa gro tapu den altari.

Dan den sa taigi den bergi taki: “Tapu wi.”

Den pikin bergi den sa taigi taki: “Fadon na un tapu.”

₉Israel, sensi un ben de na Gibea

un ben bigin nanga sondu

èn un e tan du den ete.

Fa un denki taki Mi no o strafu un drape,

a presi pe Mi e strafu sma di no wani dini Gado?

₁₀Na disi Mi angri fu du. Iya, Mi o strafu den.

Folku o kon na makandra fu feti den,

te den o kisi a strafu fu a dobru sondu fu den.

₁₁Efraim ben de leki wan yongu kaw

di ben e masi a gron sondro fu yu dwengi en.

Mi ben kibri en neki gi a tranga wroko

Ma now Mi o anga a wrokosani gi en na en neki.

Yuda sa drai a gron,

Yakob sa wroko a gron.

₁₂Sai tapu wan leti fasi,

koti na ini lobi,

koti nyun gron opo.

Dan a ten doro fu aksi MASRA

fu A kon dan A meki a alen fu En bunfasi

fadon na un tapu.

₁₃Ma unu drai a doti nanga ogri,

èn un koti kruktufasi.

Un nyan den froktu fu den lei fu unu,

fu di un bow tapu un eigi krakti

nanga den furu dyadya fetiman fu unu.

₁₄Fu dat'ede feti o broko gi unu.

Den o broko ala den tranga foto fu unu,

leki fa Salman ben broko Bet-Arbel.

Ini a feti dati den ben naki mama nanga pikin kiri.

₁₅Na den sani dati Betel ben du nanga unu,

fu a takrufasi fu unu.

Te dei e broko

a kownu fu Israel o dede.

₁Mi ben lobi Israel di a ben de wan pikin ete.

Fu Egipte Mi kari Mi manpikin kon.

₂O moro yu e kari den,

o moro den go den eigi pasi.

Den ben e tyari ofrandi gi Baal.

Den ben e bron wierook leki ofrandi

gi den ston nanga udu popki fu kruktu gado.

₃Mi leri Efraim waka.

Mi ben opo en na tapu Mi anu.

Ma den no ben ferstan

taki na Mi ben e dresi den.

₄Safrisafri Mi ben e tyari den,

nanga lobi Mi ben e tyari den na wan titei.

Na Mi ben puru a hebi na den tapu,

èn boigi fu gi den nyanyan.

₅Den sa drai go baka na Egipte.

A kownu fu Asur sa tiri den,

fu di den no wani drai den libi.

₆Den o kiri den sma ini den foto fu den nanga deigri,

broko den greni fu den bigi doro fu a foto,

fu den sani san den ben e sidon prakseri.

₇Iya, Mi folku e tan drai den baka gi Mi.

Dat' meki awinsi fa den e kari A Wan na loktu,

A no sa meki sani kon moro lekti gi den.

₈Ma fa Mi sa man libi yu fu sani miti yu, Efraim?

Fa Mi bo man libi yu fu yu go, Israel?

Fa Mi bo man libi yu fu a srefi sani miti yu leki Adma,

fu yu dede gwe leki Seboim?

Mi ati bo priti,

sari-ati no bo meki Mi du dati.

₉Mi no sa puru Mi atibron na un tapu.

Mi no sa broko Efraim go moro fara.

Bika Mi na Gado,

Mi a no libisma.

Mi na a Santa Wan na un mindri.

Mi ati no sa bron na un tapu.

₁₀Den sa waka na MASRA baka,

èn A sa bari leki wan lew.

Te A bari, den manpikin sa drai kon beifibeifi

fu abra watra.

₁₁Beifibeifi leki wan fowru

den o drai kon fu Egipte,

leki wan doifi den o kmoto ini Asur.

Dan Mi o meki den tan na ini eigi oso.

Na so MASRA taki.