Dag 349 van 365- Amos 1-3 en Openbaring 6

₁Disi na den sani di Amos, wan skapuman fu Tekoa taki. Gado ben sori en den sani disi di ben o psa nanga Israel. A si den sani disi tu yari fosi a gron ben seki hebi ini Israel, ini a ten di Usia ben de kownu fu Yuda, nanga di Yerobeam, a manpikin fu Yoas, ben de kownu fu Israel.

₃Na so MASRA taki: A no dri noso fo leisi nomo den sma fu Damaskus du ogri. Den broko èn den pori Gilead. Fu dat'ede Mi o du tu san Mi taki tak' Mi o du. ₄Mi o sutu faya gi a oso fu Hasael, Mi o bron ala den tranga foto fu Benhadad. ₅Mi o broko den sroto fu den bigi doro fu Damaskus. Mi o kiri a kownu fu Bikat-Awen puru na pasi, nanga a wan di de na makti ini Bet-Eden, èn Mi o meki den tyari a folku fu Aram go leki srafu na Kir. Na disi MASRA taki.

₆Na so MASRA taki: A no dri noso fo leisi nomo den sma fu Gasa du ogri. Bika den tyari wan heri folku gwe leki srafu, dan den gi den abra na Edom. Fu dat'ede Mi o du tu san Mi taki tak' Mi o du. ₇Mi o sutu faya gi den skotu fu Gasa, meki den tranga foto fu en bron. ₈Mi o kiri a kownu fu Asdod nanga a wan di de na makti ini Askelon. Mi o strafu den sma fu Ekron, meki den Filistijnsma dede te na a laste wan. Na disi MASRA taki.

₉Na so MASRA taki: A no dri noso fo leisi nomo den sma fu Tyrus du ogri. Bika den tyari wan heri folku gwe leki srafu, dan den gi den abra na Edom. Den no hori densrefi na a ferbontu di den ben meki leki mati. Fu dat'ede Mi o du tu san Mi taki tak' Mi o du. ₁₀Mi o sutu faya gi den skotu fu Tirus, meki den tranga foto fu en bron.

₁₁Na so MASRA taki: A no dri noso fo leisi nomo Edom du ogri. Bika nanga deigri a ben hari go baka en brada, sondro fu sori en sari-ati. A atibron fu en no ben saka, a ben tan hori Israel na ati. Fu dat'ede Mi o du tu san Mi taki tak' Mi o du. ₁₂Mi o sutu faya gi Teman, Mi o bron den tranga foto fu Bosra.

₁₃Na so MASRA taki: A no dri noso fo leisi nomo den Amonitisma du ogri. Den priti den bere opo fu den uma di ben de nanga bere, fu den ben kan meki a kondre fu den kon moro bigi. Fu dat'ede Mi o du tu san Mi taki tak' Mi o du. ₁₄Mi o sutu faya gi den skotu fu Raba meki den tranga foto fu en bron. A dei dati babari fu feti sa de fu yere èn wan tranga winti sa wai. ₁₅Den o tyari a kownu fu den leki srafu go na wan tra kondre makandra nanga ala den fesiman fu a kondre. Na disi MASRA taki.

₁Na so MASRA taki: A no dri noso fo leisi nomo Moab du ogri. Bika den bron den bonyo fu a kownu fu Edom tron puiri. Fu dat'ede Mi o du tu san Mi taki tak' Mi o du. ₂Mi o sutu faya gi Moab, meki ala den tranga foto fu Keriot bron. Moab sa dede ini a dyugudyugu fu a feti. Babari fu feti sa de fu yere, nanga a babari fu trompet. ₃Mi sa kiri a wan di e tiri den puru na den mindri, makandra nanga ala den fesiman fu en, MASRA taki.

₄Na so MASRA taki: A no dri noso fo leisi nomo Yuda du ogri. Bika den poti a wèt fu MASRA na wan sei èn den no du den sani di den ben mus tan du. Ma den meki den leimofo kruktu gado fu den kori den fu waka na den baka, leki fa den afo fu den ben du kba. Fu dat'ede Mi o du tu san Mi taki tak' Mi o du. ₅Mi sa sutu faya gi Yuda meki ala den tranga foto fu Yerusalem bron.

₆Na so MASRA taki: A no dri noso fo leisi nomo Israel sondu. Fu dat'ede Mi o du tu san Mi taki tak' Mi o du. Bika den seri den bun sma gi moni, den pôtiwan den kenki gi tu susu. ₇Den meki swakiwan kroipi gi den ini a santi, èn den e pusu den sma kmopo na pasi di no man dyompo gi densrefi. Wan p'pa nanga en boi e sribi nanga a srefi uma, èn den e pori Mi santa nen tapu a fasi dati. ₈Den e didon sei den altari tapu krosi di den teki leki panti fu tra sma, èn ini a oso fu den Gado den e dringi win, di den ben puru leki butu na sma anu.

₉Dan na fu den ede Mi ben kiri den Amoritisma puru na pasi, di ben langa leki sedrebon èn di ben tranga leki kankantri. Mi ben pori ala den froktu fu den na loktu nanga den rutu fu en na gron. ₁₀Mi ben tyari un kmoto na ini Egipte, èn Mi tyari un fotenti yari langa ini a dreisabana, fu un ben kan teki a kondre fu den Amoritisma abra. ₁₁Mi meki son bakapikin fu unu tron profeiti, nanga nasireisma. Taigi Mi, un sma fu Israel, efu a no so a de, MASRA taki. ₁₂Ma un gi den nasireisma win fu dringi. Un taigi den profeiti taki den no mus taki den sani san Mi gi den fu taki.

₁Un sma fu Israel, un alamala di Mi tyari kmoto na ini Egipte, yere san MASRA abi fu taigi unu: ₂Na un wawan Mi teki na mindri fu ala den folku na grontapu. Dat' meki Mi o strafu unu fu den ogri di un du.

₉Meki den sma kon sabi disi na ini den tranga foto fu Asdod nanga ini den tranga foto fu Egipte. Taigi den taki: “Un kon na wan na tapu den bergi fu Samaria. Un luku, bigi bruya di de ini a foto, nanga a fasi fa a wan e pina a trawan. ₁₀Na so MASRA taki: Den no sabi san a wani taki fu du sani nanga leti. Den na sma di e furu den tranga foto fu den nanga sani di den wini ini feti nanga fu pina trawan.” ₁₁Na so MASRA fu Masra taki: Samaria! Den feyanti fu yu o lontu a foto fu yu. Den o hari den tranga skotu fu yu trowe èn den o fufuru ala sani tyari gwe di ben de ini den tranga foto fu yu.

₁₂Na so MASRA taki: Leki fa a skapuman man hari tu baka bowtu noso wan pisi fu a yesi nomo puru na ini a mofo fu a tigri, na so a ferlusu sa de tu fu den sma Israel, fu unu di e didon drape ini Samaria na tapu un bedi, fu unu di e anga nanga baka na tapu un sturu.

₁₃Na so MASRA fu Masra, a Gado fu ala sani, taki: Un arki, dan un taigi den bakapikin fu Yakob disi: ₁₄Fu tru, a dei di Mi o strafu Israel fu den sani di den no ben mus du, Mi o strafu den altari fu Betel tu. Den o kapu den tutu fu den altari trowe na gron. ₁₅Mi o broko den presi pe den e tan ini a kowruten, nanga den presi pe den e tan te a kowruten psa. Mi o du a srefi sani nanga den moi kownu-oso di den meki fu ivoor. Furu oso sa broko fadon. Na disi MASRA taki.

₁Dan mi si a Lam lusu wan fu den seibi lenti. Ne mi yere wan fu den fo libilibi sani taki nanga wan tranga sten, leki te a dondru bari, taki: “Kon!” ₂Di mi luku, mi si wan weti asi kon. A sma di ben sidon na tapu a asi ben abi wan bo ini en anu, èn a ben kisi wan kroon fu weri. Dan a hari go feti leki wan winiman di ben o wini. ₃Di a Lam lusu a di fu tu lenti, mi yere a di fu tu libilibi sani taki: “Kon!” ₄Dan mi si wan tra asi kon. A asi disi ben de wan redi asi, èn a sma di ben sidon na en tapu ben kisi wan bigi deigri. A ben mus sorgu taki freide no de moro na grontapu, èn taki den sma e kiri densrefi. ₅Di a Lam lusu a di fu dri lenti, mi yere a di fu dri libilibi sani taki: “Kon!” Di mi luku, mi si wan blaka asi kon. A sma di ben sidon na en tapu ben abi wan wegi ini en anu. ₆Dan mi yere wan sten taki kmopo na mindri fu den fo libilibi sani taki: “Wan kan tarwe fu wan dei moni, nanga dri kan groto fu wan dei moni. Ma yu no mus pori a oli nanga a win.” ₇Di a Lam lusu a di fu fo lenti, mi yere a sten fu a di fu fo libilibi sani taki: “Kon!” ₈Di mi luku, mi si wan asi kon san ben gersi leki a lasi en kloru. A wan di ben sidon na en tapu ben nen Dede, èn Dedekondre ben e waka na en baka. Den ben kisi a makti fu kiri wan fu ala fo sma di e libi na grontapu. Den kiri den nanga deigri, den meki den dede fu angri, den kiri den nanga takru siki, èn den meki krasi meti kiri den tu.

₉Di a Lam lusu a di fu feifi lenti, mi si den sili fu den sma di tra sma ben kiri fu di den ben e panya a wortu fu Gado èn fu di den ben e kotoigi fu Yesus. Den ben de na a futusei fu a altari, ₁₀èn den ben bari nanga tranga sten taki: “Masra, Yu di e rigeri, Yu santa èn Yu de fu fertrow. O langa un mus wakti ete, fosi Yu krutu èn strafu den sma na grontapu di kiri unu?” ₁₁Dan den alamala kisi wan weti krosi fu weri. Èn den kisi fu yere taki den mus wakti ete wan syatu pisten te leki ala den tra sma doro di e dini Yesus, den brada fu den di sma ben o kiri ete neleki den.

₁₂Di a Lam lusu a di fu siksi lenti, mi si taki a gron bigin seki bun hebi, a son kon blaka leki krofaya, èn a munkenki kon redi leki brudu. ₁₃Den stari fadon kmopo na heimel kon na grontapu neleki te wan tranga winti e wai grun froktu puru na wan bon. ₁₄A heimel lolo gwe nanga baka, soleki fa yu e lolo wan sribi-papaya, èn ala bergi nanga eilanti kmopo na den presi. ₁₅Dan den kownu fu grontapu, den heihei man, den legre-edeman, den guduman, den prenspari man, den srafu nanga den fri sma, den alamala lon go kibri ini den bergi-olo nanga baka den bergiston fu den bergi. ₁₆Den taigi den bergi nanga den bergiston taki: “Fadon na un tapu, èn kibri unu fu a Wan di sidon na tapu a kownusturu no si unu, èn fu a Lam no strafu unu. ₁₇Bika a bigi dei fu a atibron fu den doro. No wan sma o tan na libi!”